Izaya 2
2
Baŋa Wɛ nenɔŋa wó bere jaja
1 Baŋa Wɛ déem na le wonnu telo na tɛ Judah de Jerusalem taane o bere Amozi bu Izaya to mo tento:
2Maŋa wó ba ye Baŋa Wɛ diga kam na zege peo kolo yuu ne to na yere ko dwoni logo baŋa jei maama. Ko wó taa zege wɛɛne vili-vili se ko dwoni peero tem maama. Dwi maama tiina wó taa nwoŋi ba teene dem ne ba twoŋi daane taa ba yɔɔre da.
3Dwia yera yera maa wó ba da ye ba ta ba bere daane we,
“Pa-na se dé vo dé di Baŋa Wɛ peo kom yuu
se dé zuli Jakob Wɛ wom o diga kam ne.
Wonto wó bere debam o chwei sem,
se debam de wane dé taa tɔge-se.”
Kokuri to, da yam konto ne Wɛ bera yam wó zege Zion ne mo
ya jage jei maama ne.
Baŋa Wɛ kwora kam maa wó nwoŋi Jerusalem ne
ka yi nɔɔna maama.
4Logo baŋa dwi tiina balo maama ná jege daane,
Wɛ wó fɔge-ba o ke daane ye o lwɛ ba jara yam.
Ba maa wó kwei ba jara-keim se-zɔɔro ba ma lu vaane,
se ba chichwoa yam de pipiri ya ji lare ya pa-ba.
Teo daa bá kwaare jara de ko dwoŋi.
Nɔɔna de daa bá zamese jara keim.#Mika 4:1-3; Zekaria 2:11
5Jakob dwi tiina bam, nam ba-na!
Pa-na se dé taa vei pwooni delo Baŋa Wɛ na tiŋi o pa debam to wone.#Efesia 5:8
Baŋa Wɛ dɛ-kamunu kom taane
6 Baŋa Wɛ, nmo yɔɔre n dole n nɔɔna Jakob dwi tiina bam n yage mo.
Ba yeini ba tɔge wɛ-puli seeni liri-mwa tiina kikia,
ye ba beeri yi-nara ne Filisi tiina bam na ke tei to mo.
Ba maa me de dwi-gɛ tiina de ba chullu tem.
7Ba teo kom maama su de lu-nyenno de sabu-seŋa mo.
Ba jejegero tem ware te jeeli te ti.
Ba tega kam ta su de sisein-nɔɔna mo,
ye ba ware ba sisei-torokooro tem ni se ba ga ba ti.
8Ba tega kam maama su de jwo-yɔɔro mo.
Ba maa tiiri ba zuli wonnu telo ba tete je sem na ke to.
9Nɔɔna gwooni ba tete ya yiga ne,
ye ba daare ba vwi ba yibia tega ne ba pa-ya.
Konto ŋwaane, yé kwei ba wɛleera yam n chɛ-ba.
10Nam véi-na peero tem gugworru ne,
se á seigi tega kam wone.
Kokuri to, Baŋa Wɛ ban-zɔŋɔ kom jege foone mo
ye o nenɔŋ-fɔrɔ kom de tiini ko nye.#2 Tɛsaloni 1:9
11Dɛ dem konto ná yia,
nabiina balo na gwooni ba dwonna to wó to tega ne.
Balo na bere ba tete kamunim to de wó jwoori ba ba tega.
Baŋa Wɛ yere dem yerane mo wó zaŋe wɛɛne.
12Paŋwa Tu Baŋa Wɛ le dɛ mo o tiŋi dáa ne,
se o waare balo na jege fia ye ba bere we ba fuŋi to.
Dɛ dem konto ne banto maama wó to tega ne.
13O ta wó gwoni Lebanon tei-dedwaaro tem,
de tei-zwanno tem na wo Basan laŋa kam ne to o de tega ne.
14O maa wó pa pe-dedwaaro tem
de zwonnu telo na wo wɛɛne to jwoori tega,
15ye di-dedwaaro dwi maama
de teo kabiri-lilirru dwi maama de to tega ne.
16Ko ta ná ye nabwooru telo na beeri pipiu ŋwaane to,
de telo dwi na lana to,
te maama de wó chɔge dɛ dem konto ne.
17Nabiina kamunim kikia maama wó ti mo
pa se ba fia kam ji kafɛ.
Baŋa Wɛ yere dem yerane mo wó zaŋe wɛɛne.
18Jwona yam nam lage ya pɔpɔ ya jei mo.
19Nɔɔna wó duri mo ba vo ba seigi peero gugworru wone,
dedaane tega kuri bɔɔna wone,
maŋa kalo Baŋa Wɛ na wó zaŋe o fugi-ba to.
Kokuri to Baŋa Wɛ jege foone o pa-ba,
ye o nenɔŋ-fɔrɔ kom de tiini ko nye mo.#Gurim 6:15-17
20Dɛ dem konto nam ná yia, nɔɔna wó kwei ba jwona
yalo ba na mɛ sabu-seŋa de lu-nyenno ba mɔ se ba taa zuli to mo
ba dole ba yage,
se twarro de jenjwaano taa kare te kekare ya baŋa ne.
21Ba laam wó vo ba seigi ba tete peero bɔɔna wone,
de gugworru wone,
se ba wane ba lu Baŋa Wɛ ban-zɔŋɔ de o nenɔŋ-fɔrɔ kom.
Konto wó ke maŋa kalo Baŋa Wɛ na wó zaŋe o fugi nabiina to mo.
22Yé ta‑á jege-na nabiina chega.
Ba yɔɔre ba bwona mo lage-lage ne siu tei.
Dam dɔ mo ba jega se á sale ba yera ne?
© 2020, Ghana Institute of Linguistics, Literacy and Bible Translation (GILLBT)