ኀበ ሰብአ ቈላስይስ 4
4
ምዕራፍ 4
1 #
ኤፌ. 6፥9። አጋእዝትኒ ዕሩየ ግበሩ ሎሙ ለነባሪክሙ ወፍትሑ ጽድቀ ተአምሩ ከመ ብክሙ እግዚእ በሰማያት።
ጸሎት በእንተ ትምህርተ ወንጌል
2 #
1ተሰ. 5፥17፤ ፊልጵ. 4፥6። ወተፀመዱ ለጸሎት እንዘ ትተግሁ በአኰቴት። 3#ሮሜ 15፥30፤ ኤፌ. 6፥19፤ 2ተሰ. 3፥1፤ 1ቆሮ. 16፥9። ጸልዩ ወሰአሉ ለነሂ ከመ ያርኁ ለነ እግዚአብሔር አናቅጸ ቃል ከመ ንንግር ምክረ ዘእምኀበ እግዚአብሔር ዘበእንቲኣሁ ተሞቃሕኩ። 4ከመ እክሥቶ በከመ ይደልወኒ እንግር። 5#ኤፌ. 5፥15-16፤ 1ተሰ. 4፥12። ሑሩ በልቡና በኀበ ባዕዳን እምሃይማኖት። 6#ኤፌ. 4፥29፤ ማር. 9፥50። ወይኩን ነገርክሙ በጸጋ ወቅሱመ በጼው ከመ ታእምሩ ዘትትዋሥኡ ለለአሐዱ አሐዱ። 7ወኵሎ ዜናየ ይዜንወክሙ ጢኪቆስ እኁነ ምእመን ዘነኀብር ተቀንዮ ዘውእቱ እኁክሙ በእግዚአብሔር። 8#ኤፌ. 6፥22። ዘፈነውክዎ ኀቤክሙ በእንተ ዝንቱ ግብር ከመ ታእምሩ ዜናየ ወያስተፍሥሕክሙ ልበክሙ። 9#ፊል. 10። ምስለ አናሲሞስ እኁነ ምእመን ዘናፈቅር ዘውእቱ ብእሲ እምኔክሙ ወእሙንቱ ያጤይቁክሙ ግብረነ ወዘሀሎነ ቦቱ። 10አምኁክሙ አርስጥሮኮስ ዘተፄወወ ምስሌየ ወማርቆስ ወልደ እኅወ አቡሁ ለበርናባስ ዘበእንቲኣሁ አዘዝኩክሙ ከመ አመ መጽአ ኀቤክሙ ትትወከፍዎ። 11ወኢያሱ ዘተሰምየ ኢዩስጦስ እለ እምሰብአ ግዝረት ወእሉ ዳእሙ ረድኤትየ በግብረ መንግሥተ እግዚአብሔር ወአስተፍሥሑኒ። 12#1፥7። አምኀክሙ ኤጳፍራስ ዘእምኀቤክሙ ውእቱ ገብረ ክርስቶስ ወዘልፈ ይጼሊ በእንቲኣክሙ ወይስእል ከመ ትኩኑ ፍጹማነ ወምሉኣነ በኵሉ ሥምረተ እግዚአብሔር። 13ወአነ ሰማዕቱ ከመ ፈድፋደ ያፈቅረክሙ ወይቴክዝ በእንቲኣክሙ ወለእለ በሎዶቅያ ወሀገረ ኢያራ። 14#2ጢሞ. 4፥10-11፤ ፊል. 24። አምኀክሙ ሉቃስ ዐቃቤ ሥራይ ፍቁርነ ወዴማስ። 15አምኅዎሙ ለአኀዊነ እለ በሎዶቅያ ወንምፋን ወእለ ሀለዉ ቤተ ክርስቲያን። 16#ፊል. 1-2። ወአንቢበክሙ ዛተ መጽሐፈ ፈንውዋ ሎዶቅያ ያንብብዋ በቤተ ክርስቲያን ወካዕበ አንብብዋ አንትሙ ለመልእክት እንተ ጸሐፍኩ እምሎዶቅያ። 17ወበልዎ ለአክርጳ ዑቅአ መልእክተከ ዘተሠየምከ እምኀበ እግዚአብሔር ከመ ትፈጽም። 18ወአማኅኩክሙ ጽሒፍየ በእዴየ አነ ጳውሎስ ተዘከሩ መዋቅሕትየ ጸጋ ምስሌክሙ አሜን።
ተፈጸመ መልእክት ኀበ ሰብአ ቈላስይስ፤ ወተጽሕፈ በሮሜ ወተፈነወ በእደ ጢኪቆስ።
ወስብሐት ለእግዚአብሔር አሜን።
Nke Ahọpụtara Ugbu A:
ኀበ ሰብአ ቈላስይስ 4: ሐኪግ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye