Zincimpi 15
15
1Kukumbula kwakuboto kwa manishanga wukali,
ngoboni lizu lya kukaliha likuhambiza wukali.
2Lulimi lwa muntu wangana lwa hololanga kalimukisho,
ngoboni tunwa twa bakakubula ngana twa tutwishanga bya wuleya.
3Meho a Nyambi ya Ngula apenzanga ku zimbalila nimwazo,
ku penzeshesha ha bantu bababi naba babawahe.
4Lulimi lwa mazu amawahe lwenga mutondo wa wumi,
ngoboni lulimi lwa mazu akutengama lwa koleshanga mutima.
5Shibulangana wakananga kufundiziza kwa tatiyendi,
ngoboni ou ukuyuvwa ku shiwululiwa nengi muka ngana.
6Muli wuheti wawingi mu litala lya wakulunga,
ngoboni wuheti wa wakuluwa wa muletelanga wukalu.
7Mivumbo ya muntu wangana yapanzanishanga kalimukisho,
ngoboni bakubula ngana kutwesha bifwako.
8Nkombela ya muntu wakuluwa yenga ya wunyengwe kuli Nyambi ya Ngula,
ngoboni niye uku wahilila na lilombelo lya muntu wakulunga.
9Nzila ya muntu wakuluwa kuli Nyambi ya Ngula yenga ya wunyengwe,
ngoboni wahaka uya ukukonka bya kulunga.
10Ou ukushiya nzila ukakeyeshiwa shikuma,
ou ukukana ku shiwululiwa ukafwa.
11Kalunga ka bafu kekala ha ku moneka ku meho a Nyambi ya Ngula,
haya bantu ba kutwesha kuholama kukwendi ndi?
12Muntu wa wuncengwe kushinga kutengululiwa wufwako,
kutwesha kuhenyena ku bantu bangana wufwako.
13Mutima wakutangala wamonekeshanga lupala lwa ku wahilila,
ngoboni mutima uli mu manyengo walishoshotanga.
14Mutima wa muntu mukaku yuvwishisha washinga kalimukisho,
ngoboni bakuyeba balyanga wuleya wabo.
15Muntu ukuyandishiwa matena wendi enga amakalu,
ngoboni mutima waku wahilila uli mu mayambwayambwa shikati nimwasho.
16Shashiwahe kwikala na byuma byabishe oku wuyuvwila Nyambi ya Ngula bowa,
kupitakana kwikala na wuheti wawingi uya uli nawo mu wukalu.
17Shashiwahe kulya mashiha hinga mwalihaka,
kupitakana kulya bya mazi hinga mwekala na nzimbo.
18Muntu wa kapilamina washonkomonanga ngunga,
ngoboni wakutula mutima wamweneshanga nkani.
19Nzila ya muvwa ya zika na mihongela,
ngoboni nzila ya muntu wakulunga yenga ya kuyela.
20Mwana wangana ukuwahilisha tatiyendi,
ngoboni mwana wakuyeba wayuvwishanga lisheni mandiyendi.
21Wuleya wawahilishanga muntu wakuyeba,
ngoboni muntu mukaku yuvwishisha wendanga mu nzila ya kwoloka.
22Kwakubula kulitengulula bifungo byabipanga,
ngoboni kwakwikala bakakushuza babengi ba kutenda shiwahe.
23Kukumbula liyipu shiwahe kwa wahilishanga muntu,
pe lizu lya kwamba shiwahe lyayuvwanikanga shiwahe.
24Nzila ya muntu wangana ya mukankalalishanga ku wumi,
ngayi hinga akunkulukila ku kalunga ka bafu.
25Nyambi ya Ngula washandolanga litala lya muntu wakuliyemeza,
ngoboni wakinga zinginza za mfwile.
26Bihanganiko bya muntu wamubi byenga bya wunyengwe kuli Nyambi ya Ngula,
ngoboni wawahililanga na mazu amawahe.
27Muntu wakutongokela kuheta mu nzila yayibi waletanga wukalu ha litala lyendi,
ngoboni ou wazimba lizika kanwa ukayoya.
28Mutima wa muntu wakulunga wahanganikanga taha noho akumbule,
ngoboni wakuluwa wambanga wanguwangu kubula kuhanganika.
29Nyambi ya Ngula uli kwakutali na muntu wakuluwa,
ngoboni wayuvwanga lilombelo lya muntu wakulunga.
30Lupala lwa ku wahilila lwawahilishanga mutima,
pe byambo byabiwahe bya kwangulukishanga bifupa.
31Ou uli na litu lya kuyuvwilila ku mazu akupana wumi,
ukekala hamo na bantu bangana.
32Ou ukakana kulongeshiwa, ukalikenda niyemwine,
ngoboni ou ukuyuvwa kutengululiwa ukekala na kanangatima.
33Kuyuvwila Nyambi ya Ngula bowa nikwo kulongeshiwa kwaletanga ngana,
kulilimbwilisha kwaletanga maleema.
Libuka Lya Kuyela © Bible Society of Zambia, 2020.