Zincimpi 14
14
1Mukazi wangana wazikanga litala lyendi,
ngoboni shileya wanyemunanga na maboko wendi.
2Muntu ukwenda mukwoloka wenga mukakuyuvwila Nyambi ya Ngula bowa,
ngoboni mukakutalyangila ukumushampula.
3Bileya bikakuliyemeza byashushuliwanga ha nyambilo yabo ya wuleya,
ngoboni mazu a muntu wangana amulamwinanga.
4Kwakubula mapulu a kulima, mu shishete mu kubula kwikala byakulya,
ngoboni ndi ukwikala na mapulu akushuma, pe shishete shikenzala na byakulya.
5Paki wakwoloka kaliha wongezanga,
ngoboni paki wa mahalo wenga mukakwongeza.
6Muntu wa wuncengwe washinganga ku wana ngana,
ngoboni muka ku yuvwishisha wawananga kalimukisho.
7Fuma kuli shileya,
ndaba ku wanako mazu a ngana wufwako.
8Ngana za muntu wakukeya zamuhanganikishanga mwakwendela mu nzila yendi,
ngoboni kuyeba kwa shileya kwamu yongeshanga.
9Bileya bafwayo ndaba hinge ndi banabipishi,
Nyambi wayamizizanga bakulunga.
10Mutima walimukanga wukalu wawo,
kami kowa ukutwesha kuwu wahililisha.
11Litala lya mukawubi likanyemuniwa,
ngoboni ntanda ya wakwoloka yikemana.
12Kuli nzila yamonekanga wuwahe ku muntu,
ngoboni mamanino ayo enga lufu.
13Hinge mu kuhepa, mutima watweshanga kukola,
kami mamanino aku wahilila enga manyengo.
14Muntu wamubi wawananga binamufwanini,
ngoboni muntu wamuwahe ukalya ku mikabo ya milimo yendi.
15Shileya wakulupilanga byuma nimwabyo,
ngoboni muntu wakukeya wapenzesheshanga oku akuya.
16Muntu wangana wekalanga na bowa wa Nyambi kami wafumanga ku wubi,
ngoboni shileya waliyemezanga kami wekalanga mu mpoza.
17Muntu wakapilamina watendanga byuma bya wuleya,
kowa uku haka ndi bafwako kukukulupila.
18Bantu bakubula kalimukisho bakawana binafwanini wuleya wabo,
ngoboni ba kukeya banavwikiwi na kalimukisho.
19Bantu bababi bakafunkama hanci ku meho a babawahe.
Bantu bakuluwa bakafunkama ku mapangati a bantu bakulunga.
20Ncepwe ukuzimbiwa hinge ku ndambo yendi,
ngoboni mukakuheta wekala na bahoni babengi.
21Muntu ukushampula ndambo yendi wenga mukawubi,
ngoboni natandala muntu ou wekala na shishemo na bancepwe.
22Bantu bakakuyongola byabibi kati Kubipisha bafwako ndi?
Bantu bayongolanga byabiwahe ba kuwana maleema na kwoloka.
23Mu mulimo nimwamo mwekala bya kuwaninamo,
ngoboni kanwa kaletanga wuncepwe.
24Wuheti niwo munana wa bantu bangana,
ngoboni wuleya niyo ngala ya bantu bakubula ngana.
25Paki wa kupwisha walamwinanga wumi wa bantu,
ngoboni mukakwamba mahalo wenga libeba.
26Muntu ukutina Nyambi ya Ngula uli na shipata sha ku shuma,
kami bana bendi bakawana shiholamino.
27Kuyuvwila Nyambi ya Ngula bowa nilyo lishima lya wumi,
likufumisha ku tuntamba twa lufu.
28Kuvula kwa bantu niwo maleema a mwene,
ngoboni kubula bantu kwenga kuloba kwa mwana mwene.
29Muntu wabulanga kupilama shawangu wekala na kalimukisho shikuma,
ngoboni wakapilamina wahololanga wuleya.
30Mutima wawuwahe ukuletesha lutu kwikala shiwahe,
ngoboni mwili waboleshanga bifupa.
31Muntu ukulyatilila ncepwe, ukuhandula Shakalenga wendi,
ngoboni ou uli na shishemo ku mukakuyanda ukulemeeka Nyambi.
32Mubikati byabikalu bakuluwa ba kuloba,
ngoboni hinge mu lufu bakulunga ba kuwana shiholamino.
33Ngana zekalanga ku muka ku yuvwishisha,
ngoboni kaliha zekalanga ku shibulangana.
34Kulunga kwa katulanga litunga,
ngoboni wubi waletanga lisheni ku bantu.
35Mwene wa wahililanga na muka mulimo ukutenda bya ngana,
ngoboni wukali wendi watulilanga ha uya ukutenda bya lisheni.
Libuka Lya Kuyela © Bible Society of Zambia, 2020.