Ishaya 41
41
Nyambi ukushumisha Ishalela
1Mwenenu na kunyuvwilila,
enu matunga aku mawate!
Bantu bahongolole nyala zabo, balehenu beze, bambe,
yekenu hahepi twikale hamo ku mwanya wakuyatishila.
2Kati ou waletele mwene waku mushamuko,
na kumwingisha wakukoma matunga nimwao kutendela Nyambi yani?
Ou unamupaniki ngovu za kukoma bamyene na matunga yani?
Ukubacancola na mukwale wendi ngo lukungu,
mivwi yendi yikubapanzanisha ngo muzungu ku mpepo.
3Ukubatanda, kami niye ukwenda mu nzila shiwahe,
ngo muntu ukubula kulyata hanci.
4Yani naleteshe ngayi ebye bitendiwe,
na kwihana mikoka kufuma ku kutatika?
Ami, Nyambi ya Ngula,
ami wa muntanzi na mamaninino.
5Bantu baha bikuli aba banamono ebye bali na bowa,
mamanino a hanci akukanka,
banakuhenyena hahepi, ba kulikungulula.
6Muntu nimwendi ukuyavwa ndambo yendi,
kami ukwamba ku kawushinda wendi ngayi, “Lishumishe!”
7Mbazi wamanono ukushumisha mfuzi wa ngolinde,
kami mukakulembulula na shikoma ukushumisha
muka kufula na shikoma,
na kwamba ngayi, “Ku ngungika ku nawaha”
kami ukupampala kanankishi na zindonda,
ngayi kabule kuwa.
8 #
2Bya 20:7; Yako 2:23. Ngoboni obe, Ishalela mukamulimo wami,
Yakobo, muntu uyo nahatile,
muzukulya Abulahama, muhoni wami,
9nakufumishile ku nkumo ya litunga lya hanci,
na kukwihana ku kufumisha ku matunga akwakutali,
na kukutongweza ngayi,
obe uli mukamulimo wami,
na kuhatile kami kukakukana nifwako.
10Hinga utina, ndaba nili nobe,
hinga ulikekula, ndaba ami Nyambi yobe.
Nikakupana nyala na ku kuyavwa,
nika kukoweza na liboko lyami lya kulunga lya shilyo.
11Mona, nimwabo bakakupilamina,
bakayuvwa lisheni lya ku bakoma,
baya bakakulwisha
bakenga byowa, kami bakaloba.
12Hinge ndi ukashinga bamalamo bobe,
ngoboni kuka bawana wufwako.
Obo bakakulwisha bakenga byowa.
13Ndaba, ami Nyambi ya Ngula, Nyambi yobe.
Nikukwatilila ku liboko lyobe lya shilyo.
Ami nikwamba kukwobe ngayi,
“Hinga utina, Ami nika kuyavwa.”
14Nyambi ya Ngula ukwamba ngayi,
obe lipila, Yakobo,
hinga utina, Ami nika kuyavwa,
Mukakukuliza wobe niye wa Kuyela wa Ishalela.
15Mona, nika kutenda shipumpwisho sha ku shuma shashipya,
shashitwe, kami shili na mayewe
ukapumpula mapili na kuwacancola
kami ukatenda binkanda kwinga muzungu.
16Ukawaleleka, pe mpepo yikawapepola,
kami nkuli yikapanzanisha.
Pe obe ukatangala muli Nyambi ya Ngula,
ukekala na maleema muli wa Kuyela wa Ishalela.
17Oho bantu bami ba kuyanda bakashinga mema,
milibu yikayuma na linyontwa,
ami Nyambi ya Ngula nikaba kumbula,
kami ami, Nyambi wa Ishalela, nifwako kuka bafutamina.
18Nikatenda mishinzi ha binkanda bya nyuminine,
na tuheloke twa mema tukahwenta mu mikulo.
Nikafutula libelelengwa kwinga maziba a mema,
kami litunga lya nyuminine likenga tuheloke twa mema.
19Nikayaka mu libelelengwa mitondo ya shinda,
na mimbambangoma na mitondo ya mayiliti hamo na ya olive,
nikameneshamo mitondo ya shayipulashi, mu litunga lya nyuminine,
hamo na yunipa na mipaini,
20ngayi bantu bamone na kulimuka,
mwanga bahanganike na ku yuvwishisha,
ngayi liboko lya Nyambi ya Ngula nilyo linatende ebye,
wa Kuyela wa Ishalela niye walengele.
Nyambi ya Ngula ukunyanca banyambi bowa
21Nyambi ya Ngula ukwamba ngayi, letenu shambo shenu,
mwene ya Yakobo ukwamba ngayi, kunkwilishenu nkani zenu za ku fwanina.
22Letenu otwo tunankishi kuno
mwanga tulubulule kukwetu ebye bikamoneka,
tutontwelelenu eshe byekalile byuma bya ku mwaka,
ngayi mwanga tubihanganike,
na kulimuka shikati shabyo,
hinge kututontwelela ebye bikamoneka.
23Tutongwezenu ebye bikekala kumbili,
mwanga tukalimuke ngayi kati muli banyambi.
Tendenu shuma shashiwahe hinge sha kuleta malwa,
ngayi mwanga tutampwe na kwikala na bowa na mutentu.
24Monenu, munengi byowa,
obyo mwatendanga binengi byowa,
na nou unamihata unengi wa wunyengwe.
25Nehana umo wekala ku ncelele na kwiza wezakale,
ukufuminina kwezanga mutena,
pe ukehana ha lizina lyami,
ukalyatangila bamyene ngo ndoba,
ngonehe mukakubumba alyatangilanga lima.
26Kati yani wabilubulwile ku kutatika, ngayi mwanga tulimuke,
Kati yani wabilubwilile shilumweza mwanga twambe ngayi, “Wawahishile”?
Kwabulile umo kukwenu wabishimikile,
kwabulile umo wabitoyele ngayi bikamoneka,
kowa muntu wamiyuvwile himwamba lizu hahasho.
27Ami, Nyambi ya Ngula, ami wakutatika kutongweza Ziyoni,
natumine ntumwana ku Yelushalema na ncango zaziwahe.
28Oho natilaminine, kowa hinge umo,
kowa hinge umo watunankishi watweshele kubela,
kowa hinge umo watweshele kukumbula mayipu.
29Mona, nimwabo aba banengi byowa,
ebye ba kutenda byenga byowa,
tunankishi twabo twa kuyungulula twa kupopa na kubula ngovu.
Libuka Lya Kuyela © Bible Society of Zambia, 2020.