Ishaya 40
40
Mazu a kulumbeza
1Nyambi yenu ukwamba ngayi,
“Bengezekenu bantu bami, babengezekenu.
2Bengezekenu bantu ba mu Yelushalema,
batongwezenu ngayi makando abo amanakale,
milandu yabo banayiyatili.
Banashushuliwi na liboko lya Nyambi ya Ngula,
ha wubi wabo nimwawo.”
3 #
Mat 3:3; Mako 1:3; Yowa 1:23. #Luka 3:4-6.Lizu lya mukakubilika mu libelelengwa ngayi,
“Wahishenu mukwakwa wa Mwene.
Ololenu zinzila za Nyambi yetu.
4Tungulungwa nimwato tukabuwiwa,
mapili nimwawo na binkanda bikawululiwa.
Mikwakwa ya kukontama yikoloka,
na zinzila zazibi zikalembululiwa.
5Pe wuwahe wa Nyambi ya Ngula ukaholoka,
na bantu nimwabo bakawumona hamo.
Ndaba kanwa ka Nyambi ya Ngula nisho kanamba.”
6 #
Yako 1:10-11; 1Pita 1:24-25. Lizu lyambile ngayi, “Bilikiza!”
Niho nepwile ngayi, “Nibilikize bishini?”
Bantu nimwabo bafweka ngonehe mwila,
kami wuwahe wabo, wafweka ngonehe maluba amu lishaka.
7Mwila walebukanga na maluba apulumukanga,
oho mpepo ya Nyambi ya Ngula yapepokelangaho.
Mwa shikuma, bantu benga ngonehe mwila.
8Mwila walebukanga na maluba apulumukanga,
ngoboni lizu lya Nyambi yetu lyekala mwaya myaka.
9Kankalala ha lipili lyalitali,
obe washimikilanga ncango zaziwahe mu Ziyoni.
Bilikiza shikuma na lizu lyalinene,
obe mukakushimikila ncango zaziwahe ku Yelushalema.
Bilikiza shikuma, hinga utina,
tongweza minzi ya Yunda ngayi, “Nyambi yenu uli na kwiza.”
10 #
Isha 62:11; Kuh 22:12. Mona, Nyambi wa Makunge uli na kwiza na ngovu,
ukwiza na kulela na liboko lyendi lya ngovu.
Mona, uli nayo ncuungu,
yiya akwiza na kupana bantu bendi.
11 #
Ezek 34:15; Yowa 10:11. Ukafulankana litanga lyendi, ngonehe mulishani.
Ukakungwila bana babambelele mu maboko endi,
na kubashimba na kubayaka ha kapumpo kendi,
na kwendesha shiwahe baya bali na bana.
Kowa wakufwanikiza na Nyambi wa Ishalela
12Kati yani wafwanikizile mema amu liwate mu liboko lyendi,
hinge kufwanikiza mayilu na shikanzi sha liboko lyendi?
Kati yani wakungwile mu nkomoki lukungu lwa hanci,
na kufwanikiza mapili na twina ha shipimo?
13 #
Lom 11:34; 1Koli 2:16. Yani walimuka bihanganiko bya Nyambi ya Ngula?
Yani ukutwesha kumubela?
14Kati Nyambi ya Ngula wanyepele ngana kuli yani, ngayi mwanga alimuke byuma?
Yani wamulongeshele nzila ya kuketula byambo mu kupwisha?
Kami yani wamulongeshele kalimukisho?
Yani wamutongwezele kwikala na kanangatima?
15Mona, matunga akufweka ngonehe limata lya mema a kukwanzulula mu ntesho,
kami a kulabiwa ngo lukungu ha shipimo.
Ukufwanikiza bikuli kwinga ngo lukungu lwaluhehu.
16Bitondo nimwabyo bya mu Lembanoni,
kuka konkana kwinga nkuni za ku bangizisha mundilo zifwako,
na batuyamana nimwabo ba mu mashaka amo
kukonkana ha nkombela ya kuhokesha kuli Nyambi yetu bafwako.
17Kukwendi matunga nimwawo anengi shuma showa,
niye wabifwanikizanga kwinga byowa na kubula kuyavwa.
18 #
Mil 17:29. Kati yani mukutwesha kufwanikiza na Nyambi?
Hinge bifwekesha ngani bya kumufwanikizisha.
19Ufwako kulifweka na kanankishi kaya abazanga muntu wamanono,
kaya banafwiki na ngolinde ku bamfunzi,
na kakutanga nketwana za shiliva.
20Muntu ukubula kutwesha kuwana shiliva na ngolinde,
ukulihatila shitondo sha kubula ku shumpwa,
ukushinga mbazi wamanono
ukubazaho kanankishi kakubula kuhenya.
21Kati kulimuka mufwako ndi?
Kati shilolo muyuvwe ndi?
Kati kaliha byambiwile kukwenu kufuma ku kutatika ndi?
Kati kaliha mwayuvwishishile kufuma ku kulenga kwa kaye ndi?
22Nyambi niye ukulela hano hanci nimwaho,
kami aba bekalamo bakufweka ngo bambimba.
Ukutandubula mayilu ngo likwiza lya shibamba,
na kuwatandubula kufwekesha ntanda ya kwikalamo.
23Nyambi ukuwisha bamyene
na kufutula batulela ba hanci kwinga byowa.
24Bakwinga ngo ntemo zikuzobela
na ku balika kukula,
ngoboni oho Nyambi akutuma mpepo,
zikulebuka na kupepuka na kakundukundu ngo muzungu.
25Nyambi wa kuyela ukwamba ngayi, kati yani ukufwanikiziwa na nami?
Kati ukutwesha kulyezeka na nami yani?
26Yimbulenu meho wenu kuyilu,
pe mumone ngayi yani walengele eze nyenye?
Ukutwesha ku zitwaminina ngo muntu ukutwaminina nzita?
Ukulimuka ngayi zenga zinga na kutumba lumo na lumo lizina.
Nyambi ya Ngula niye wa ngovu shikuma,
ou ukubula kuyongesha hinge lunyenye lumo.
27Obe Yakobo, ukwamba bishini?
Obe Ishalela, shumangani ukwambila ngayi,
“Nzila yami yinaholekiwi ku meho a Nyambi ya Ngula,
kami Nyambi kulifulankana byami binamfwanini ufwako?”
28Kati kulimuka ufwako ndi?
Kati shilolo uyuvwe ndi?
Nyambi ya Ngula niye Nyambi wa mwaya myaka,
Niye walengele kaye nimwako.
Kaliha wakwanganga hinge kupopa,
kowa ukutwesha kupima ngana zendi.
29Washumishanga baya banakwanga,
kami wayakilangako nyala ku baya banabulu nyala.
30Hinge bamihempela bakapopa na kukwanga,
na bandumbana bakahopoka mu zinyutu.
31Ngoboni baya ba kutatilila Nyambi ya Ngula
bakawana nyala zazipya,
bakatuka ha mbando ngonehe bangonga,
baketuka na kubula kukwanga
bakenda ngoboni kukapopa bafwako.
Libuka Lya Kuyela © Bible Society of Zambia, 2020.