2Mak 3
3
Ngananĩo katĩ wa Oniasi na Simioni
1Ĩvindanĩ yĩla Oniasi waĩ Mũthembi Mũnene, ndũa ntheu ya Yelũsalemu yaĩ na mũuo na andũ nĩmakwataa mĩao makamĩlũmya vyũ, nũndũ Oniasi aĩ na kĩkĩo kya Ngai na nĩwamenete mothũku. 2Asumbĩ o namo nĩmanengete Ĩkalũ ndaĩa na nĩmayĩkumasya kwa kũyumĩsya mĩthĩnzĩo ya thooa mũnene. 3O na Mũsumbĩ Seleũkusi wa nthĩ ya Asia, nĩwanenganae mbesa sya kũthooa nthembo ila syaumaw'a Ĩkalũnĩ, aitũmĩa ũthwii wake mwene ũla woombanĩtye.
4Ĩndĩ mũndũ ũmwe weetawa Simioni, wa mbaĩ ya Mbengyameni, ũla waĩ mũũngamĩi wa Ĩkalũ, nĩwakananĩie na Mũthembi Mũnene Oniasi ĩũlũ wa kũũngamĩa ndũnyũ ya ndũa. 5Yĩla Simioni woonie kana ndanew'ana na Oniasi, nĩwaendie kũla kwĩ Avoloniasi kuma Taliso, ũla ĩvindanĩ yĩu waĩ ngavana wa Silia Nene na Voenisia. 6Simioni nĩweeie Avoloniasi kana kĩnandũ kya Ĩkalũ Yelũsalemu kyaĩ na mbesa mbingĩ mũno itatalĩka, na kana mbesa isu iyaĩ ũtalonĩ wa mbesa ila syatũmĩawa kwondũ wa nthembo, na kwoou syaaĩlĩte kwĩthĩwa iũngamĩwe nĩ mũsumbĩ.
Eliotolu Aitũmwa Yelũsalemu
7Yĩla Avoloniasi woonanie na mũsumbĩ, nĩwamũtavisye ĩũlũ wa mbesa ila waĩ anatavw'a ĩũlũ wasyo. Mũsumbĩ nĩwanyuvie Eliotolu, ũla waũngamĩe maũndũ ma kĩ-ũsumbĩ, na amũtũma athi akose na aimũetee ila mbesa Avoloniasi waneenete ĩũlũ wasyo. 8Kwa mĩtũkĩ Eliotolu nĩwambĩĩie kyalo kya kũthi kũla watũmĩtwe, ĩndĩ weethĩa eonany'a ta ũendete kũsisya ndũa sya Silia Nene na Voenisia. 9Yĩla wavikie Yelũsalemu na athokw'a nesa mũno nĩ Mũthembi Mũnene wa ndũa, nĩwatavanisye maũndũ ala mawetetwe, na kĩeleelo kya kyalo kyake, na akũlya kana maũndũ asu maĩ maw'o. 10Mũthembi Mũnene nĩwamũtavisye kana vaĩ mbesa syĩana ũndũ mũna syaiĩtwe kĩnandũnĩ kya Ĩkalũ, kwondũ wa aka ndiwa na syana ndiwa. 11O ta ũu nĩwamũtavisye kana vaĩ mbesa ingĩ syaĩ sya Ilikana mwana wa Toviasi, mũndũ waĩ wa ndaĩa nene, na ũtalo wa mbesa isu syonthe waĩ ũndũ ũmwe na kĩlo ngili ĩkũmi na itatũ sya silĩva, na kĩlo ngili thanthatũ na maana atano sya thaavu, na kwoou ndeto ila ũla mũndũ mũthũku weetawa Simioni waneenete iyaĩ syaw'o. 12Mũthembi ũsu mũnene nĩwaisye kana waĩ ũndũ ũtatonyeka o na vanini, mũndũ kũnengwa mwanya ose mbesa sya andũ asu, ala meekwatĩtye ũtheu na ũsũvĩo wa Ĩkalũ yĩla yĩ nguma ĩũlũ wa nthĩ yonthe.
Eliotolu Aivanga Kũlika Ĩkalũnĩ
13Eliotolu nĩwaendeeie kwasya kana no nginya mbesa isu syoswe itwawe kĩnandũnĩ kya mũsumbĩ o tondũ mũsumbĩ weeaĩte. 14Kwoou nĩwavangie mũthenya na athi Ĩkalũnĩ nĩ kana akaũngamĩe andũ matale mbesa isu. Ũndũ ũsu nĩwatumie kwĩthĩwa na kĩũũyũ kingĩ ndũanĩ ĩsu yonthe. 15Athembi mekĩĩte ngũa syoo sya kĩ-ũthembi nĩmakomie nthĩ na ĩvu mbee wa kĩthembeo, na mamwĩkaĩla Ngai asũvĩe mbesa isu, nũndũ nĩwe wanenganĩte mwĩao mbesa ila andũ maumya maiĩwe Ĩkalũnĩ isũvĩwe. 16Mũndũ asisya Mũthembi Mũnene nĩwakwatawa nĩ thĩna ngoonĩ, nĩkwĩthĩwa ũalyũku ũla waĩ ũthyũnĩ wake nĩwoonanasya woo ũla waĩ naw'o ngoonĩ. 17Mwĩĩ wa mũthembi ũsu nĩwatetemaa nĩ w'ĩa, na ũu nĩwoonasya andũ ala mamũsiasya woo ũla waĩ ngoonĩ yake. 18O namo andũ nĩmaumie nyũmbanĩ syoo mekalaatĩte na moombana vamwe mavoye nĩ kana Ĩkalũ yĩikavukw'e. 19Aka meyovete ngũa ngaamu sya makunia, na makatia ithũi ite mbw'ĩke, nĩmausũie nzĩanĩ sya ndũa. Namo eĩtu ala mekalaa nyũmba nthĩnĩ mate etĩkĩlye kumaala, nĩmasembie mĩvĩanĩ na ngũtanĩ sya ndũa, na angĩ masyaĩlya ndĩlĩsyanĩ. 20Andũ asu onthe nĩmookĩlilye moko moo ĩũlũ mamũvoya Ngai. 21Waĩ ũndũ wa kũmakya mũno kũmwona Mũthembi Mũnene e na kĩũũyũ na woo mwingĩ ngoonĩ, na andũ onthe makomete nthĩ na ĩvu.
Mwĩai Aisũvĩa Ĩkalũ yake
22Yĩla andũ maendee kũmũvoya Mwĩai Mwene Ũtonyi W'onthe asũvĩe mbesa isu syaiĩtwe nĩ andũ ũsũvĩonĩ wake, 23Eliotolu nĩwaendeeie kwĩka ũndũ wavangĩte. 24Ĩndĩ yĩla Eliotolu na asũvĩi make mavikie o ũu vala mbesa isu syaiĩtwe, Mwĩai wa maveva onthe na mokũmũ onthe nĩwavuanisye ũndũ wa kũseng'ya mũno weethĩa andũ asu onthe ala maĩ na ũkũmbaũ wa kũendany'a na Eliotolu nĩmatelema nũndũ wa ũtonyi wa Ngai, na mathela vinya nĩ w'ĩa. 25Nĩmoonie mbalasi yaĩ na matandĩko maĩ manake mũno, ĩla yatũlĩtwe nĩ mũndũ waĩ wa kũtĩsya e na ngao ya kĩthũi na mĩio ya kaũ ya thaavu. Mbalasi ĩsu nĩyasembie vala ve Eliotolu yĩ na ũthatu mwingĩ na yamũkinya na maũũ mayo ma mbee. 26O ta ũu Eliotolu nĩwaumĩlĩĩlwe nĩ anake elĩ. Anake asu maĩ na vinya mwingĩ wa kũseng'ya, maĩ ombe nesa na meekĩĩte ngũa mbanake mũno. Anake asu maũngamie mamwĩkĩa katĩ woo na mambĩĩa kũmũkũna makũna maingĩ mũno mate kũthũmũa. 27Eliotolu nĩwavalũkile nthĩ kwa kĩthũlũmũko na weethĩa ndekũmanya vala ũĩ, na andũ ala waĩ namo mamwosa mamũkua 28mamumya vau. Ĩvinda ĩkuvĩ ĩvĩtũku, mũndũ ũũ nĩwalikĩte vala ũthwii wa Ĩkalũ wiawa, atongoesye andũ aingĩ na e na asikalĩ ma kũmũsunga, ĩndĩ yu ndaĩ etonya. Andũ onthe nĩmakũsĩĩie vyũ ũtonyi mũnene wa Ngai.
Oniasi Aivoyea Eliotolu Avoe
29Eliotolu nĩwakomie vau atatonya kũneena nũndũ wa vinya ũla Ngai woonanisye, na ate na wĩkwatyo wa kũvoa. 30Ayuti nĩmamũtaĩie Mwĩai nũndũ nĩweekie ũndũ wa kũseng'ya asũvĩe Ĩkalũ yake. Ĩkalũ yĩu kavinda kanini vau mbeenĩ yaĩ na andũ mausũĩtwe nĩ w'ĩa na kũvũavũana, ĩndĩ yu yausũĩte andũ atanu na me na mũyo nũndũ Mwĩai, Mwene Ũtonyi W'onthe aĩ aneevuany'a. 31Anyanyae amwe ma Eliotolu nĩmakũlilye Mũthembi Mũnene Oniasi avoye Ngai Ũla wĩ Ĩũlũ Mũno, avonokye thayũ wa Eliotolu kuma kĩkw'ũnĩ nũndũ aĩ vakuvĩ kũkw'a. 32Kwoou Mũthembi Mũnene nĩwaumisye nthembo nĩ kana Ngai avosye Eliotolu, nũndũ ndendaa mũsumbĩ aisũanĩa kana Ayuti nĩmo mekie mũndũ ũla ũnatũmĩte naĩ. 33Oniasi aendee kumya nthembo ĩsu ya ũekeo wa naĩ, ala anake elĩ nĩmamumĩlĩĩile Eliotolu ĩngĩ mekĩĩte ngũa ila meekĩĩte mbeenĩ na maũngama masya atĩĩ, “Tũngĩa Mũthembi Mũnene Oniasi mũvea nĩkwĩthĩwa Mwĩai nĩwatangĩĩa thayũ waku nũndũ wake. 34Lilikana kana Mwĩai wa ĩtunĩ nĩwe ũkũkanĩtye. Enda kũla kwĩ andũ onthe ũkamatavye ĩũlũ wa vinya mũnene wa Ngai.” Anake asu mamina kwasya ũu, nĩmaaie.
Eliotolu Aitaĩa Ngai
35Nĩvo ĩndĩ Eliotolu waumĩisye Mwĩai nthembo, na eevĩta mawĩvĩto manene kwa Mũtangĩĩi wa thayũ wake. Amina kũtaanĩsya na Oniasi, Eliotolu nĩwasyokie kũla kwĩ mũsumbĩ e na asikalĩ make. 36Nĩwatavisye andũ onthe maũndũ manene ala Ngai, Ũla wĩ Ũtonyi weekĩte, na akeyonea na metho make mwene. 37Yĩla mũsumbĩ wakũlilye Eliotolu amũtavye maĩlĩte kũtũma mũndũ wa mũthemba wĩva athi ĩngĩ Yelũsalemu, Eliotolu nĩwamwĩie atĩĩ, 38“Ethĩwa wĩ na mũmaitha, kana mũndũ ũvangĩaa silikalĩ yaku mũvango mũthũku, mũtũme kw'o. Mũndũ ũsu akasyoka e mũkũne mũno, ethĩwa akavonoka na kũsyoka, nĩkwĩthĩwa vau Yelũsalemu ve vinya wĩ vo wa kũseng'ya wa Ngai. 39Ngai ũla wĩkalo wake wĩ ĩtunĩ nĩwe ũsũvĩaa Ĩkalũ yĩu; nũkũnaa na kũmina mũndũ o na wĩva ũla wũkaa kũyananga.”
40Ũsu nĩw'o ũelesyo wa ũndũ Eliotolu weekie, na ũndũ kĩnandũ kya Ĩkalũ kyasũvĩiwe.
BIBLE SOCIETY OF KENYA © 2011