Josua 11
11
1KE a long ut Jabin thaniny Hazora, me e ame ukhûnöng kö Jobab thaniny Madon, me thaniny Simerona, me thaniny Akesafa, 2me ka je thaniny hnyi hwadrö, wale hnyei ae hut, me dok ae tha hon hnyi Kinereth ke e hwaiöu, me hnyi hnyei ae ca hut, me je dok ae göranyiny Dora e jio, 3me tavat Kanana e deiö me jio, me at Amora, me Heth, me Perizi, me at Jebusi hnyi je bucen, me at Hivi hmelen Heremona hnyi hnyei Mizepa. 4Me adre me he but, ödra me anyidrin je utbavat hia thithö, e se hia tavat, helâ me önyin hobat köiö ûseiny, me je hos, me je kariota ae se hia. 5Ke ame ûkhacaköu je than hia thithö eling, me adre me he but me tha hunuma cicö an Meroma, he ka vat me at Isaraela. 6Ke Iehova ame ha kö Josua, ka habe, Ca he ka oût ödra; anyin a nyi hnyi ûen a helâng, oge me he ka hnʼ ödra hia thithö adre hlingʼ ödra, hnyi hnyimakan at Isaraela: u me he ka sö can haledrin je hos, me le anyidrin je kariota ge meic. 7Ke haba Josua me tavat hia thithö adre me tha o outhmoki ödra hnyi an Meroma, me utut ködra. 8Ke Iehova ame hnʼ ödra ka at Isaraela, me adre me kuc ödra, me hnu ödra ke ne o but Zidona ae gan, ke ne o but Miserefo-maim, me hnyigöulen bucen Mizepa e deiö; me adre me kuc ödra ke ne o but ame ba but kolon. 9Ke Josua ame ânyâ ködra helâ me Iehova ame ha kâu: e ame sö can haledrin je hos, me le anyidrin je kariota ge meic.
10Ke haba Josua ame hmetu hnyi ûen eling me hûgûnâ Hazora, me hlingâ thaniny ge hele vat: anyin a Hazora me wale ban je dökhu eling hia thithö ehac. 11Ke adre me kot tavat hia thithö hnyin ge hele vat, adre me tha ohiʼ ödra: ke ba kolon ame menâ: ke e ame le degecâ Hazora ge meic, 12Ke haba Josua ame hûgûnâ je tauniny je than eling hia thithö, me je thaniny hia, me hling ödrin ge hele vat, me ti ohiʼ ödra; helâji me Mose athnyabai Iehova ame hûna. 13Ke haba je taun ame tot ethö hon anyidra je utkânâ ae görany, me at Isaraela adre me ca thong degecâ; ke Hazora thibi; Josua ame thong degecâ e. 14Ke haba ta je omjeû hia hnyi je taun eling me omeno, me lakon Isaraela adre me hom hobi ködrin bi; ke so bi adre me hlingâ tavat hia thithö ge hele vat ke ne o but ame hiʼ ödra, ke ba but kolon ame menâ. 15Helâji me Iehova ame hûna kö Mose a athnyabainy, ke helâe Mose ame hûna kö. Josua: me Josua ame ânyâ helâe: e ame ca i degec ke ûnyi hnyi ta je ûnyi hia a hûna Iehova kö Mose.
16Ke Josua ame hom hnyei hia eling, a je hnyei ae hut, me je ke keihen ka hnyi hwaiöu hia, me hnyei Gosena hia, me hnyei ae ca hut, me dok ae tha hon, me hnyei ae hut hnyi Isaraela, me ke keihen e ae ca, hut; 17hwân hnyi bucen Halaka gethen ûheny Seira ke ne o but Baala-gada hnyi hnyigöulen bucen e Lebanona, wale hmelen bucen Heremona: ke e ame hom je than hia me kuc ödrin, me hlingʼ ödrin. 18Ke Josua ame vat me je than eling hnyi je bong ae se. 19E ba ke taun ame ûsoköu me lakon Isaraela, ke at Hivi thibi adre labā Gibeona: adre me hûgûnâ hia hnyi vat. 20Anyin a ûnyi ga Iehova he ka okhötâ je hnyekudra, mʼ adre me he ka vat me at Isaraela, me e ame he ka ti ohiʼ ödra, mʼ adre me ca he ka betenge gadra, ke ao bi mʼ adre me he ka ohiʼ ödra, helâji me Iehova ame ha kö Mose.
21Ke ame o Josua hnyi ûen eling, me subâ degecâ at Anaka walʼ ödrin hnyi hnyei ae hut, hwân Heberona, me Debira, me Anabi, me hnyei ae hut hia hnyi Juda, me hnyei minya ae hut hia hnyi Isaraela: haba Josua ame ti ohiʼ ödra me anyidrin je taun. 22E ba but je at Anaka hnyi hnyei iny lakon Isaraela: ke hake hu kolon thiju bi hnyi Gaza, me Gatha, me Asedoda. 23Ke helâe Josua ame hom hnyei hia thithö helâ me je hofuc hia thithö a ha Iehova kö Mose; ke Josua ame ham e ka at Isaraela me idrin, hoton hna khenâ ködrin hnyi anyidrin je tribu. Me ame menâ ju tavat ûhedrin hnyi hna vat.
maintained by the British and Foreign Bible Society