II. Samuela 6
6
1KE Davita ame ûkhacaköuâ hmetu tavat adre ûca ge at Isaraela, ödrin thote thauzan. 2Ke Davita ame tot me tha he me tavat hia unyin, ûheny Baala Juda, he ka hom ûheny e tang tangen Khong, adre hwenyi Ien, a iö Iehova tuhan sabaoth, at ame laba hon li kerubi. 3Ke ödrin e ip tang tangen Khong hon kât ae teb unyi, me hom e unyi hnyi uma umö Abinadab, wale hnyi dok ae hut: ke haba Uza me Ahio li laku Abinadab, ödru me alen kat ae teb ûnyi. 4Ke ödrin e hom e ûnyi hnyi uma umö Abinadab, a e hnyi dok ae hut, tha e me tang tangen Khong: ke Ahio ame he hnyi hnyimakan tang. 5Ke haba Davita me lap Isaraela hia, adre me khumöngö hnyi hnyimakö Iehova ta je ûnyi khumöng kop, me je kitara, me nabeli, me bwinybet, me pate, me simebalo. 6Ke adre me o ka hnyi hna huje hwit anyi Nakan, me haba Uza ame inâ benyin ka hnyi tang tangen Khong, me kât e; anyin ame haû li bolok. 7Me ame ubâhlâ hmonyin anyi Iehova kö Uza; me Khong ame kot e eling can anyin monu; me e ame mokcu eling hnyi tang tangen Khong. 8Ke hmak bi Davita can ame utut Iehova kö Uza: ke e ame hwenyi ien dok eling me Farez-uza, ke ne o but hnyi bong ang. 9Ke Davita ame outö Iehova hnyi bong eling, me e ame ha, ka habe, Ame ka kâmâu ka o könya tang tangö Iehova? 10Ke höcö Davita he ka hom bi kâu tang tangö Iehova ka hnyi taun anyi Davita; me haba Davita ame saûâ ka hnyi uma umö Obed-edoma at Gatha. 11Me ame mokut tang tangö Iehova eiö hnyin uma umö Obed-edoma at Gatha hnyi kun ta tehi: me Khong ame ohnahici Obed-edoma me anyin lap hia. 12Ke adre me thumetu Davita than, ka habe, Iehova ame hia but ohnahicâ lap anyi Obed-edoma me ta je ûnyi hia can tang tangen Khong. Me haba Davita ame he me hom senyinâ tang tangen Khong, ûheny hnyi uma umö Obed-edoma, ka hnyi taun anyi Davita. 13Ke ame he hnyat vadren tang tangö Iehova, ke ödrin e he siks ta hna okca, me e ame hudo ke bolok me ke meno ae pipikhenya. 14Ke Davita ame biâ hwege hnyi hnyimakö Iehova; ke Davita ame weikâ iefoda lino. 15Ke l haba Davita me lap hia anyû Isaraela, adre me hom tang tangö Iehova me hongot me tûö trutru. 16Ke hnyi ûen ame didro tang tangö Iehova ka hnyi taun anyi Davita, haba Mikala nöku Saulo ame bwele hnyi mamalama me ō Davita than ame gâ me bibiâ hnyi hnyimakö Iehova; me e ame hûkötiâ e hnyi hnyekon. 17Ke ödrin e odilâ tang tangö Iehova, me ip e hnyi hnen hnyi wanben uma mano wale ame otilâ Davita hobi kâu: ke Davita amo hudo je hudiny leû me je hudiny ole hnyi hnyimakö Iehova. 18Ke a hia but Davita hudo je hudiny leû me je hudiny ole me e ame ha hnahicâ tavat hnyi iö Iehova tuhan sabaoth. 19Ke e ame khenâ oûco ka i tavat hia, wale ka ûseiny Isaraela hia, obaga me omomo minya, ûsa khaca ong areto, me khaca uthmeno, me khaca u wan vine ae meleca. Me ame vese thö tavat hia ka hnyi je hnyabadrin. 20Ke Davita ame hmetu he ka ha hnahicâ anyin bi lap. Ke ame didrut Mikala nöku Saulo he ka ûkhanö me Davita, me ha, ka habe, E ti hmanenang eja than Isaraela, at ame bi wânen lathnyaba a je hlu hluiny lathnyabaem, helâ me at ae hop ame bi wânen! 21Ke haingö Davita kö Mikala, ka habe, Wale hnyi hnyimakö Iehova at ame ûco nya hon kâmâm me anyin lap hia, he ka otilö nya hnân taben tavat anyi Iehova, a Isaraela: wale me inye he ka khumöng dö hnyi hnyimakö Iehova. 22Ke oge me he ka ikiki tot hon e, ke hamök he ka he hnyikânâi hnyi hnyimakök bi: ke ame he ka oganö nya lathnyaba omomo wale u me ha eja. 23Ke ba nöku Mikala nöku Saulo ke ne o but bong e ame mokcu hnyin.
maintained by the British and Foreign Bible Society