II. Samuela 5
5
1KE ame he je tribu Isaraela hia kö Davita hnyi Heberona, me ha, ka habe, Wâ bi ohmun ang je jeiâm me utiöiâm. 2Ke haba ehac waleji a than kötin Saulo, me u thibi at ame lelö hââng me lelö hmetu jem at Isaraela: ke Iehova ame ha köu, ka habe, U ma he ka hān lakeik a Isaraela, ke u me be ka bi than hnyi Isaraela. 3Ke ame o but wahingatiny at Isaraela hia thithö ka than hnyi Heberona; me Davita than ame ûhihiny-köu mödrin hnyi Heberona hnyi hnyimakö Iehova: me ödrin e hû Davita me me tuhan Isaraela.
4Ke thote je hunai Davita hnyi ûen e ame hwân he ka musi, ke e ame musi hnyi ta je huna a fâte bi. 5E ame musi Juda hnyi Heberona seven je huna ke siks je tehi: ke thote theri je huna e ame musi Isaraela me Juda hia hnyi Jerusalema.
6Ke ame he than me tavat unyin Jerusalema ai me tot ûcon at Jebusi, a je aten hnyei: tavat adre me ha kö Davita, ka habe, U je ne ca hom je wadröu me tavat ame ci, me u me ca he ka didro jem: anyin adre me ûnykûme a ga ca khanö Davita he ka dit kâe. 7Ke so bi Davita ame hûgûnâ hnabâ wale Ziona; a wale taun anyi Davita. 8Ke Davita ame ha hnyi bong eling, ka habe, Haba at ame he ka kot at Jebusi, me hamen he ka ölö ka hnyi deny köiö, me kot hnyat ame ci me wadröu, a je hûkötiânö Davita. Anyin a wale, adre me labö ha, ka habe, Wale bi eling je wadröu me hnyat ame ci; me ca khana he ka dit ka hnyi uma. 9Ke Davita ame laba hnyi hnabâ, kʼ ame hwenyi ien, me, taun anyi Davita. Ke Davita ame up veto igigilo hwân hnyi Milo ke ne o thö eiö hnyin. 10Kʼ ame hwege tot Davita; anyin a e bi unyin Iehova Khongon sabaoth.
11Ke haba Hirama thaniny Turo ame kunâ je ûthumetu kö Davita, me je ûö arasi, me tavat tretrau uto, me hnyat tretrau veto, me ödrin e up uma umo Davita. 12Ke Davita ame wâhmakhmeto a Iehova ame otilâ me me thaniny Isaraela, kʼ ame ogânâ dokhon dökhu can je lakeiny a at Isaraela.
13Ke Davita ame hok hanen anyin je momo me laâiân minya ûheny Jerusalema, hnyi ûen e ame o thö ûheny Heberona: ke adre hnokoâ ke je laku Davita obaga me omomo. 14Ke walang je iödrin adre hnokoâ kâu hnyi Jerusalema; jia Samua, me Sobab, me Nathana, me Solomona, 15me Ibara, me Elisua, me Nefega, me Jafia; 16me Elisama, me Eliada, me Elifelet.
17Ke a long ut at Filisiti a gʼ adre hia but hû Davita hnân than Isaraela, me ame he at Filisiti hia ka elöm Davita; ke a long ut Davita, me e ame utut ka hnyi hnabâ. 18Haba at Filisiti ödrin e o me avâ hnyigöuleny bucen Refai. 19Haba Davita ame hnö unyi Iehova, ka habe, Hawa, oge me he ka tot ka at Filisiti? u me he ka hnʼ ödrin ka hnyi hnyamok? Haingö Iehova kö Davita, ka habe, He thö: anyin oge me he ka ti hna at Filisiti ka hnyi hnyamâm. 20Ke ame o but Davita hnyi Baala-farez, ke Davita ame kuc ödrin eling: me e ame ha, ka habe, A hia but Iehova ohmetro je iwahnaihmiony mönya hnyi hnyimakök, helâ me ûkhutuiny köiö. Anyin a wale e ame hwenyi ien dok eling me Baala-farez. 21Ke ödrin e hna degecâ eling anyidrin je idola, me ame hom e Davita me lakeiny.
22Ke ame o hmetu thö at Filisiti, me avâ hnyigöulen bucen Refai. 23Ke Davita ame hnö unyi Iehova, me e ame ha, ka habe, U me ca he ka he: ke so bi u me he hwale thö ka hnyi hotudrin, ke he thö hodrin cicö je ûö baka. 24Ke u ka long dö hwa he ethö hon sabaka, awe, ie utut: anyin a Iehova ame hia but bân hnyi hnyimâkâm, be ka kot utbavat anyin at Filisiti. 25Ke Davita ame ânyâ helâ me hna hûna kâu ga Iehova; me kot at Filisiti hwân hnyi Geba ke ne o but hnyi Gezera.
maintained by the British and Foreign Bible Society