Ko fɔlɔfɔlɛ 37
37
Yusufu la kiboenu
1Yaguba sabatita le Kanana duge tɔ, a baaba be luntanyala ka min na nun. 2Yaguba bɔnsɛ la tarigu le mu ka.
Yusufu be san tan nun wɔrɔwila, a nun a kɔtɔnu tota kolofeŋɛnu daɲinila. A nun a baaba la musenu Bila nun Silipa tɛn deŋɛnu tota ɲɔgɔn na, a be dendenya tɔ. Wonu be ko koroŋɛ min mala, a ni to nala wo fɔla a baaba ye. 3Kɔnɔ Yusufu le di a baaba ye fisa a la deŋɛnu bɛ ko, bayi a ka a sɔtɔ a la kayibaya le butɔ. A ka doroki banba ɲinma dii a ma. 4Yusufu kɔtɔnu to ka a yen anu baaba fisa ale len nadiyala anu bɛ ko, anu ka a lasɛɛya, kuma ɲinma bele anu tɛma bitugun.
5Lun do, Yusufu kibota, a ka wo kiboe fɔ a kɔtɔnu ye. A kɔtɔnu ka a lasɛɛya a fisayata fɔlɔnɛŋɛ ko. 6A ka a fɔ anu ye, a ko: «Wo tolomasɔ n na kiboe la. 7N kibota le, wo mɔ bɛ be kɔrɔ la kite tɔ sɛnɛ tɔ, n na kɔrɔ kite wulita, a sɔta. Wo la kɔrɔ kitenu ka n tɛŋɛ lamilin, anu bɛ kunsinta n na kɔrɔ kite ye.» 8A kɔtɔnu ka a maɲininka, anu ko: «Bɔ i be diren mala mɔ la mansa le la, i ni to mɔ yamɔrila ba?» Anu ka a kɔn a fisayata fɔlɔnɛŋɛ ko a la kiboenu la ko sabu la anun a la kumanu.
9Yusufu mɛn takibota, a ka wo kiboe tugun fɔ a kɔtɔnu ye, a ko: «N mɛn bata kibo: n ka a yen, tele nun kare anun loole tan nun dɔndɔ nata anu majigi n kɛn kɔtɔ.» 10A ka kɛ kiboe fɔ a baaba nun a kɔtɔnu ye. A baaba fatiyata a ma, a ka a fɔ a ye, a ko: «I be kiboren min na ka, a be fen fɔren? Nde nun i nɛɛnɛ nun i kɔtɔnu mɔ bɛ be nala mɔ majigila duge tɔ ile le ye ba?» 11A kɔtɔnu ka a bɛsɛnkɔnnɛya, kɔnɔ a baaba kan be a hakkile toren a la kiboenu ma.
Yusufu mayita koe
12Yusufu kɔtɔnu tagata anu baaba la kolofeŋɛnu daɲinidula Sisɛmu. 13Lun do, Yaguba ka a fɔ Yusufu ye, a ko: «I kɔtɔnu be tagaren kolofeŋɛnu daɲinidula Sisɛmu. Na yan, n ni i kii anu ma.» A ka a fɔ a ye: «Awa.» 14Yaguba ka a fɔ a ye, a ko: «Taga i kɔtɔnu fɛlɛ ka tana bele anu ma, ka tana bele kolofeŋɛnu tugun ma. I ni na dantɛgɛ sa n ɲɛ.» A ka Yusufu kii ɲɔgɔnna le. A bɔɔta Heburɔn kɛnɛ tɔ, a tagata Sisɛmu.
15A la tagareŋɛ, kaye do ka a yen, a be a matagamanna wula butɔ, a ka a maɲininka, a ko: «I be fen de ɲinila?» 16A ka a jaabi, a ko: «N be n kɔtɔnu le ɲinila. Yandi a fɔ n ɲɛ anu be kolofeŋɛnu daɲinila ka min na.» 17Kɛ kaye ka a fɔ a ye, a ko: «Anu tagata yanna le, bayi n ka anu kulɛ mɔɛ le anu be a fɔla, wo mɔ ma Dotan.» Yusufu sɔta a kɔtɔnu tagaman baa kɔma han a ka anu taran Dotan.
18A kɔtɔnu ka a yen kan yanfama tɔ. Yannun a ni sutuya anu la, anu ka janfa makiti a kunma a faga koe la. 19Anu tota a fɔla ɲɔgɔn ye: «Ale kibolá le be nala wo la. 20Wo mɔ wakkilɛ, wo mɔ ni a faga, mɔ ni a fure lajigi kɔlɔŋɛ tɔ. Wo tɛmuɛ, mɔ si a fɔ subu fatima bata a fara. Mɔ si a fɛlɛ kɔtɛ, ka a la kiboenu si ma a ye tɔɲa la.» 21Anu kɔtɔ kinama Rubɛn to ka wo mɔɛ, a dita a bɔɔla anu bolo. A ka a fɔ, a ko: «Wo mɔ kana a nɛ bɔɔ de!» 22Rubɛn mɛn ka a tafɔ anu ye, a ko: «Wo kana a base labɔɔ de! Kɛ kɔlɔŋɛ min be kɛ wula butɔ wo a lajigi ɲɔ. Mɔgɔ yo kana a bole maga a la i ni a faga.» Rubɛn ka wo fɔ le, bayi a be diren Yusufu bɔɔla anu bolo alako a ni a doni a baaba ye.
23Awa, Yusufu la kereŋɛ a kɔtɔnu ma, a la doroki banba ɲinma min be lajigiren a ma, anu ka a kosi a ma. 24Anu ka a jigan anu ka a lajigi kɔlɔŋɛ tɔ. Kɔnɔ fenfen bele wo kɔlɔŋɛ butɔ nun, ji bele a tɔ.
25Wo kɔma anu sigita anu be dɔmɛ dɔmɔla tɛmuɛ min tɔ, anu ka anu ɲa lawuli, anu ka Isumayila bɔnsɛ sɛtɛnu yen nala kabɔɔ Galadi tagala Misira. Sorayi, anun boore, anun labundɛ be bakkiren anu la ɲɔgɔmɛnu kunma. 26Wo butɔ, Juda ka a fɔ a baaba dɔndɛnu ye, a ko: «Ka mɔ ka mɔ dɔgɛ faga, mɔ ka a fure dogon, wo tɔnɛ mu mɔ ye fen na? 27Yannun mɔ ni mɔ bole maga a la, wo mɔ wakkilɛ mɔ ni a mayita Isumayila bɔnsɛ ma, bayi wo mɔ dɔgɛ le mu, mɔ bɛ mu basi dɔndɔ le la.» A baaba dɔndɛnu sɔnta a la kuma la. 28Julanu minnu be bɔɔren Madiyana jamanɛ tɔ, anu tanbi tɛmuɛ, Yusufu kɔtɔnu ka a sabaa anu ka a layɛlɛ kɔlɔŋɛ tɔ. Anu ka a mayita kaalisi kole mugan na, Isumayila bɔnsɛnu ma, wonu ka a doni Misira.
29Anu kɔtɔ Rubɛn mɛn tanata kɔlɔŋɛ tɔ, a ma Yusufu yen ɲɔ feu. A suunuta, han a ka a tɛn kutanu bɛ fara a ma. 30A saagita a dɔgɛnu dula, a ka a fɔ, a ko: «Dendeŋɛ bele ɲɔ feu, nde si fen ma kɔtɛ?» 31Anu ka sikule dɔndɔ bita anu ka a kannatɛgɛ. Anu ka a base madon Yusufu la doroke ma. 32Wo kɔma anu ka wo doroki banba ɲinma jigan anu ka a doni anu baaba ye. Anu ka a fɔ a ye, anu ko: «Mɔ bata kɛlɛ yen. A fɛlɛ ba koola ka i la deŋɛ la doroke le.» 33Yaguba ka doroke talɔn. A ka a fɔ, a ko: «N na deŋɛ la doroke le, subu fatima do bata Yusufu faga, a bata a fara.» 34Yaguba ka a la kutanu fara a ma. A ka kinikini kuta lajigi a ma, tele siyama a be a la deŋɛ la ko suunɛ tɔ. 35A la den kayireŋɛnu anun a la den musereŋɛnu bɛ wulita anu tagata a masabari, kɔnɔ a ma sɔn sabarila. A ka a fɔ, a ko: «N si n na deŋɛ la faga suunɛ ma han n be tagala a taranna tɛmuɛ min tɔ aligiyama.» A tota dila a la ko la.
36Madiyana julanu ka Yusufu mayita Misira jamanɛ tɔ Potifari ma, Misira mansa ka kaye min sɔ a la boŋɛ mɔgɛ bɛ kunma, a kantalanu kuŋɛ.
Nke Ahọpụtara Ugbu A:
Ko fɔlɔfɔlɛ 37: MOG
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye