Ko fɔlɔfɔlɛ 36
36
Esayu bɔnsɛ la tarigu
1Esayu min mɛn tɔgɛ be fɔla Edɔmi, a bɔnsɛ la tarigu le ka. 2Esayu ka a la musenu jigan Kanana kaanu le tɛma: Ada wo mu Elɔn Hɛti kaa la den musereŋɛ le la, anun Oholibami, Ana la den musereŋɛ, Sibeyon Hiwi kaa mamareŋɛ le wo la. 3A ka Isumayila tugun na den musereŋɛ Basimati sigi, Nebayoti dɔgɔ musuma. 4Ada ka Elifasi sɔtɔ Esayu ye. Basimati tugun ka Reyuyɛli sɔtɔ. 5Oholibami tugun ka den kayiren saba sɔtɔ: Yewusi, Yayelami anun Kora. Wonu bɛ mu Esayu la deŋɛnu le la minnu sɔtɔta Kanana duge tɔ.
6Esayu ka a la musenu doni a fɛ, a la den musereŋɛnu, anun a la den kayireŋɛnu, anun a la mɔgɛnu bɛ, sa a la kolofeŋɛnu bɛ kunma anun a ka harige min bɛ sɔtɔ Kanana duge tɔ. A ka a bɛ doni duge do tɔ, ka min yanfata a dɔgɔ Yaguba dula la. 7Bayi wo ka a taran anu harige bata siya, anu te nɔ tola ɲɔgɔn kɛnna. Anu be tola luntanya tɔ ka min na, anu la kolofeŋɛnu siyata duge ko, a bɛ te nɔ ɲagama sɔtɔla ɲɔ. 8Wolo ka a ma Esayu min mɛn tɔgɔ Edɔmi, a tagata sabati Seyiri kɔnkɛ kunma.
9Esayu bɔnsɛ le ka, Edɔmi kaanu benba, minnu be sabatiren Seyiri kɔnkɛ tɔ. 10Esayu la deŋɛnu tɔgɛnu le ka: Elifasi a la musu Ada tɛn den kayireŋɛ le wo la. Reyuyɛli a la musu Basimati tɛn den kayireŋɛ le wo la. 11Elifasi la den kayireŋɛnu mata Teman nun Omaru, anun Sefo, anun Gatami, anun Kenasi la. 12Esayu la den Elifasi la jon muse Timina ka Amaleki sɔtɔ Elifasi ye. Esayu nun a la musu Ada mamareŋɛnu le ka. 13Reyuyɛli la deŋɛnu mata Nahati nun Sera nun Samma nun Misa la. Wonu mata Esayu nun a la musu Basimati mamareŋɛnu la. 14Esayu la musu Oholibami ka deŋɛnu min sɔtɔ a ye, wonu tɔgɛ le ka: Yewusi, Yayelami, anun Kora. Ana la den musereŋɛ le mu Oholibami la. Sibeyon na den kayireŋɛ le mu Ana la.
15Kuntige minnu bɔɔta Esayu mamareŋɛnu tɔ, wondelen tɔgɛnu mu ka: A la den fɔlɛ Elifasi la deŋɛnu, minnu kuntigiyata wondelen mu ka: Teman, Omaru, Sefo, anun Kenasi, 16anun Kora, anun Gatami, anun Amaleki. Kuntigenu tɔgɛnu le kɛnu la, minnu fatanta Elifasi Edɔmi kaa la. Esayu nun a la musu Ada mamareŋɛnu le mu anu la. 17Esayu la den Reyuyɛli tugun tɛn deŋɛnu tɔgɛnu le ka minnu kuntigiyata: Nahati, Sera, Samma, anun Misa. Kuntigenu le kɛnu la, minnu bɔɔta Reyuyɛli tɔ, Edɔmi jamanɛ tɔ. Esayu la muse Basimati mamareŋɛnu le wonu la. 18Esayu la musu Oholibami tɛn deŋɛnu minnu kuntigiyata, wondelen mu ka: Yewusi, Yayelami, anun Kora. Kuntigenu le kɛnu la, minnu be fatanden Ana la den museren Oholibami nun a la kayi Esayu la. 19Awa, Esayu mu Edɔmi le la. A ka deŋɛnu minnu sɔtɔ, ande le mu wo la. Kuntigenu minnu bɔɔta Esayu bɔnsɛ tɔ, ande le mu wo la.
20Seyiri la deŋɛnu tɔgɛnu le ka: Horiti kaanu minnu fɔlɛ be nun kɛ duge tɔ: Lotan, Sobali, Sibeyon, Ana, anun 21Dison, Eseri, Disan. Seyiri la kɛ deŋɛnu be maren Horiti kuntigenu le la nun Edɔmi jamanɛ tɔ. 22Lotan na den kayireŋɛnu tɔgɛnu le ka: Hori nun Homan. Timina mata Lotan dɔgɔ musuma le la. 23Sobali la den kayireŋɛnu tɔgɛnu le ka: Aliwani, Manihati, Ebali, Sefo, Onan. 24Sibeyon na den kayireŋɛnu tɔgɛnu le ka: Awayi nun Ana. Kɛ Ana to be a baaba Sibeyon na sofalenu daɲinila janfue butɔ, a ka ji bande yen yɛlɛla tengenu tɔ. 25Ana la deŋɛnu tɔgɛnu le ka: Dison nun a baren muse Oholibami. 26Dison na den kayireŋɛnu tɔgɛnu le ka: Hɛmɛdan, Eseban, Itiran, anun Keran. 27Eseri la den kayireŋɛnu tɔgɛnu le ka: Bilihan, Saban anun Akan. 28Disan na den kayireŋɛnu tɔgɛnu le ka: Usi nun Aran. 29Kuntigenu tɔgɛnu le ka Horiti kaanu ye: Lotan, Sobali, Sibeyon, Ana, 30Dison, Eseri, Disan. Horiti kaanu la kuntigenu mata kɛnu le la a bɔnsɔ kɛɲama Seyiri duge tɔ.
31Mansanu tɔgɛnu le ka minnu ka mansaya ma Edɔmi duge tɔ yannun mansa do ni sɔ bani Isirayila kaanu kunma: 32Beyori la den Bela mata Edɔmi mansa la. A la saa tɔgɔ be fɔla le Dinhaba. 33Bela to fagata, Sera la den Yobabu, Bosara kaa sɔta a faliŋɛ la. 34Yobabu to fagata, Husan min bɔɔta Teman duge tɔ, wo tugun sɔta a faliŋɛ la. 35Husan to fagata, Bedadi la den Hadadi min ka sɛnbɛ sɔtɔ Madiyan kaanu kunma, Mowaba duge tɔ, a sɔta a faliŋɛ la. A la saa tɔgɔ be fɔla le Awiti. 36Hadadi to fagata, Samala Masarega kaa sɔta a faliŋɛ la. 37Samala to fagata, Sayulu Rehoboti kaa min be kɔɛɛ dala, a sɔta a faliŋɛ la. 38Sayulu to fagata, Akibori la den Bali Hanan sɔta a faliŋɛ la. 39Akibori la den Bali Hanan to fagata, Hadara sɔta a faliŋɛ la. A la saa tɔgɔ be fɔla le Pau. A la muse tɔgɔ le Mehetabeli, Matiradi la den musereŋɛ, Mesahabi mamareŋɛ.
40Kuntigenu tɔgɛnu le ka minnu bɔɔta Esayu bɔnsɛ tɔ. Bɛ nun a bɔnsɛ, bɛ nun a la duge, bɛ nun a tɔgɛ: Timina, Aliwa, Yetete, 41Oholibami, Ela, Pinon, 42Kenasi, Teman, Mibisari, 43Magadili nun Irami. Edɔmi kuntigenu tɔgɛnu le mu nun ka, bɛ nun a la duge anu be sabatiren ka min na nun. Esayu la tarigu le ka min mu Edɔmi kaanu benba la.
Nke Ahọpụtara Ugbu A:
Ko fɔlɔfɔlɛ 36: MOG
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye