लेवी 2
2
अन्नबलि
1“‘सुनानं परमप्रभुया निंतिं अन्नबलि छाःसा भिंगु छुचुं हयेमाः। उकी जैतूनया चिकं प्वंकाः धुपाँय् तयेमाः। 2अले वं हारूनया पुजाहारी काय्पिन्थाय् हयेमाः। उकिं पुजाहारीं थःगु ल्हाःया छम्हू भिंगु छुचुं व चिकं, अले फुक्क धुपाँय् नाप लिकायेमाः। अले वं परमप्रभुयात यःगु नस्वाः वःगु विशेष देछा लुमन्तिकथं वेदीइ छ्वय्केमाः। 3अन्नबलिया ल्यं दुगु हारून व वया काय्पिनिगु जुइ। परमप्रभुया निंतिं मेमेगु विशेष देछा स्वयाः थ्व तसकं पवित्रगु खः।
4“‘भुतुलिइ दय्कूगु अन्नबलि छायेगु इच्छा दुसा, चिकनय् बुलातःगु सोडा मतःगु भिंगु छुचुंया ग्वारमरि वा चिकनं इलातःगु सोडा मतःगु मरि जुइमाः। 5छिमिगु बलि ताप्केचाय् छूगु अन्नबलि खःसा, चिकं बुलातःगु सोडा मतःगु भिंगु छुचुंया जुइमाः। 6व कुचा कुचा यानाः उकी चिकं प्वंकेमाः व अन्नबलि खः। 7छिमिसं छाःगु अन्नबलि द्वालय् छूगु खःसा चिकं भिंगु छुचुंया जुइमाः। 8थज्याःगु अन्नबलि परमप्रभुया थासय् हयाः पुजाहारीयात लःल्हायेमाः। अले वं वेदीइ तयेमाः। 9पुजाहारीं अन्नबलिं लुमन्तिकथं छम्हु लिकयाः व परमप्रभुयात यःगु नस्वाः वःगु विशेष देछा वेदीइ छ्वय्केमाः। 10अन्नबलिं ल्यंगु ब्व हारून व वया काय्पिनिगु जुइमाः। परमप्रभुया निंतिं मेमेगु विशेष देछा स्वयाः थ्व तसकं पवित्र खः।
11“‘छिमिसं परमप्रभुयाथाय् छायेहइगु फुक्क अन्नबलि सोडा मतय्कः दय्कूगु जुइमाः। छाय्धाःसा परमप्रभुया निंतिं छाइगु विशेष देछाय् छिमिसं सोडा व कस्ति छ्वय्के मते। 12व धाःसा न्हापांयागु फलया देछाकथं परमप्रभुया न्ह्यःने छाःसां ज्यू। नस्वाःया लागिं धाःसा उकियात वेदीइ छ्वय्के मते। 13छिमिसं छाःगु फुक्क अन्नबलिइ चि तयेमाः। परमप्रभुं छिपिंनाप सदांया लागिं चिनादीगु बाचाया चिं चि हे खः। थथे जूगुलिं न्ह्यागु हे बलिइ चि तये हे माः।
14“‘परमप्रभुया निंतिं न्हापांगु फलयागु अन्नबलि छायेगु इच्छा दुसा छिमिसं मिं छूगु व क्यलातःगु ताजा अन्न छायेमाः। 15उकी चिकं व धुपाँय् तयेमाः। व अन्नबलि जुइ। 16अले पुजाहारीं अन्नबलिं चिकं तयातःगु क्यलातःगु अन्न छुं ब्व व धुपाँय् फुक्क कयाः लुमन्तिकथं छ्वय्केमा। परमप्रभुया निंतिं थ्व विशेष देछा खः।
Nke Ahọpụtara Ugbu A:
लेवी 2: NEW
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2024 Nepal Bible Society, Newa Christian
Literature Center and Wycliffe Bible Translators, Inc.