Aromayi 8
8
Anyìgyi dna n Zafnu
1Ntucenu, knyiznu to lo ntu aza yi ɓo n ɓa fyi ń Kirisiti Yeisu m, 2ntuge dna ń Kirisiti Yeisu, owa Zafnu nya ń wo ga wyewyeyi nyi, wo la ho loya n owa leifyi nya ń əfyíi. 3Ntuge əɓo ń owa to ɓə n ikwoi kwa zhni m, ntuge nayi ɓə n kwoi gbakalá, Shekwoyi ɓə kwu kwo zhni dna ń əwo Nugwnu, shi wo ɓə tnu n woi dna ń dogbe nayi leifyi nya, waa zè leifyi nyaga. Ntulonu waa leifyi znuknyi dna ń nayi, 4nabai ń a ɓa nu owa aɓəcekpe ɓəfyece nya vnyanya fyi ń yi, əyi ń yi ta gyianyì vyi nayi m, ama vyi Zafnu nya.
5Aza yi n ɓa gyianyì vyi nayi ɓəye, ɓa n əɓa abwugbai zhi ń anya ɓo nu ń nayi n əɓa apwawoi; ama aza yi ń ɓa gyianyì vyi Zafnu, ɓa ń əɓa abwugbai zhi ń aɓəpwawo Zafnu nya nu. 6Bwugba ń nayi nu gyibe tu ń kwo, kwo zhni fyifyiyi nu, ama bwugba ń Zafnu nu gyibe tu ń kwo, kwo zhni wyewyeyi nu n bwugbafui. 7Bwugba ń nayi nu gyibe tu ń kwo, kwo pyenapyepyei n Shekwoyii; kwo ta ga əkwohni kwa shi Shekwoyi owa ɓwa m, kwo nyi taa myi n əkwo ɓwashi m. 8Aza yi ń ɓa gyianyì fyi ń nayi, ɓa ta zhni əɓo ń kwo da Shekwoyi m.
9Ama əfyeeda, fye to fyi ń nayi anyìgyi nu m, ama fye fyi ń Zafnu anyìgyi nu, ngye ɓəhnihni nu ge Shekwoyi Zafnu nu dna n fye. Njesnu ngye əzaho lo, ń wo to n Zafnu Kirisiti nyai lo m, wo to zhni Kirisiti nya nu m. 10Ama ń Kirisiti dnalo ń ho, kwo shikwonyi əho nayi ɓə fyí ntu n leifyi ɓo, Zafnu ɓa ga wyewyeyi ntu ɓəfyecezhni ɓo. 11Njesnu, ngye Shekwoyi, ń əwo Zafnui ɓə lá Yeisu kala ń əfyí nyi, wo dnalo n ho, əwo ń wo ɓə la Kirisiti kala ń əfyí nyi, wo ɓə ga ho nayi, ń kwo ɓə fyí nyi, kalá ce, ntu əwo Zafnu ɓo ń wo dna əho nyi.
12Ntucenu, əmi azaje azanugbai n anyikwozai, yi n əɓoi lo n kwo zhni ɓəshishi nu ya zhni; ama kwo to nyi ntu nayi ɓo nu m, n əza ɓa gyianyì vyi əkwo ɓəmwi m. 13Ntuge n fya gyianyì vyi nayi ɓəye, fye ɓa fyí, ama ndəi dna n Zafnu, fyaa kwu aɓoajegbmi nayi nya wu, fye ɓa ɓwa wyewyeyi.
14Ntuge aza yi ń Zafnu Shekwoyi nya nu wu ɓa zokwo, əɓa nu zhni Shekwoyi aɓyi. 15Zafnu ń fye ɓə gwo nyi, wo taa kwu fye zè afyenu, nabai nge fya gyianyì fyi n ədnawo m; n əkwoɓwi, Zafnu n fye ɓə gwo nyi, wo ɓəə ɓe n fyei a gwo fye nu, n zhni anugwnu. Jesnu n əwoi nu ń yi yi, “Abba, Dada.” 16Zafnu n əwohni tukwoi, wo gbmiɓo lo n əyi zafnui nge yi zhni Shekwoyi aɓyi nu. 17Nsaiye ngye yi zhni aɓyi nu, a gye yi zhni abeɓyi nu. Shekwoyi abeɓyi, jesnu abeɓyi n kwnusnu n Kirisitii, ndəi ɓəhnihni yi ɓa kwnu azhnìgye nabai ń yi ɓə kwnu agbmada wo, əwo latu nya.
Azhnìgye nsayi nya n latui abye nyai
18Mi zhninubwo lo nge azhnìgye nsayi nya to kwnuce lo a mwudo n latui n a ɓə kpeyawu ga yi nyi m. 19Ntuge nyazhnizhni gnyilo kwoi pmi n awyetui nyipyei ń Shekwoyi ɓəə kwnu əwo aɓyi wu. 20Ntuge a ɓə la nyazhnizhni zeawyegbmaje, toge n əkwo ɓəyei m, ama n əza ɓəyei n wo nu ɓə dna kwo nyi, dna n awyetu, 21nge nyazhnizhni n əkwohni tukwoi, a ɓə lá kwo loya n əkwo yefnya n əkwo bwobwoi jesnu ai lo ɓe n kwoi dna n loloya ɓədo n latui Shekwoyi aɓyi nya.
22Yi kpəlo nge nyazhnizhni vnyanya gnyilo kwoi domì, ngye ɓyimanyasna nya nsaiye. 23Kwo to ɓwa zo lo nlonu m, ama əyi ń əyihni tukwo, n əyi nu zhni anyagyigyi kpmisnui Zafnu nya nyi, yi domì lo fyi n əyi əmi, əsa n yi zhi yii pmi n wyenyii, nabai yii kwu zhni anugwnuzezè agwogwoyi; əyi anayi shnashna ɓo. 24Ntuge fyi n awyetu ye nu, n a ɓə gnyi yi. Ama awyetu n a gye ɓa əwye, ɓa to zhni awyetu nu m, kpeekpe. Nyika nu zhni wa tu ənya əwye n wo n kwoi pmashilo n akwnu a? 25Ama n ya tuwye n ənya n yi too ɓwa kpa m, ya pmi kwo n bwugbaɓwai.
26N ɓwasnu n zokwo ye, Zafnu bma yi zhni fyi n əyi akalágba. Yi ta kpe əɓo əye n yi ɓa zhniaduwa ntu əkwo ɓo m, ama Zafnu n əwohni tukwoi, wo gbimì ga yi n əmìdoi n ɓədagbma taa shni kwo da m. 27Njesnu əza n wo pmi əyi adu nyi, wo kpe Zafnu bwugba əye lo, ntuge Zafnu gbimì ga Shekwoyi aza, n vyi Shekwoyi ɓəye nu.
28Njesnu yi kpəlo nge fyi n aɓo vnyanya Shekwoyi zhni aɓo amanai ga aza yi nu n ɓa ye wo, aza n a la ɓa yi, vyi əwo ɓəmwi. 29Ntuge aza yi n Shekwoyi ɓə kwu ɓa pmayekpé nyi, wo ɓə la ɓa pmaknyi zhi, ɓai kwu gbədo n əwo Nugwnui, nabai n əwo nu ɓə la zè əɓyi kpmisnui dna n əwo azaje atasni azanugbai n anyikwozai. 30Nlonu, aza yi n wo ɓə la ɓa pmaknyi zhi nyi, wo ɓə la ɓa yi cè; aza yi n wo ɓə yi nyi, wo ɓə la əɓa aɓogyikpmaya ce; aza yi n wo ɓə la əɓa aɓəgyikpmaya nyi, wo ɓə la ɓa latu ce.
Yi du anasalagyiyi lo
31To, knyiɓei nu n yi ɓa dnagbe ntu aɓo ye ɓo a? N Shekwoyi gnyigwu yi lo, nyika nu ɓa gnyiapaapa n yi a? 32Əza ń wo to ɓə kna əwo Nugwnu ya gnyi m, ama waa wo taya ga ntu əyi ɓo vnyanya; kwo ɓa zè n wuna, ń wo to ɓə kwnu yi anyaga vnyanya, ɓədo n woi dna ń snusnugye ma a? 33Nyika nu ɓa ma aza yi əɓəho ń Shekwoyi wo la ɓa knyi nyi a? Shekwoyi nu kpmaɓəya. 34Nyika nu zhni əza n wo znu əza əknyi a? Əzaho to lo m. Kirisiti Yeisu nu ń wo ɓe fyí nyi; n dudu ɓo, n a ɓə je wo laka gnyi n wyewyeyi nyi; wo gnyilo n Shekwoyi ɓwaizheɓwa, woi gbimì ga yi. 35Nyika nu ɓa gná yi aje n Kirisiti yeyei a? Azhnìgye nu, kwo əɓoɓədna kwo awyesnugbegye ɓo kwo myikwnu nazhii kwo ɓwotoloi kwo ɓwawu kwo əbeyaakwo a? 36Ngye she a ncei kafyilo:
“Ntu əho əɓo nu, n yi gye əfyí nya wyizo;
a n yii zhi ngye aknyi nu, ai ce ɓa asha ya.”
37Aawo, kpe n aɓo ye vnyanya, yi du anasalagyiyi lo, ntu əwo ɓo n wo ɓə ye yi nyi. 38Ntuge kwo la mi kwnuawye; kwo əfyí kwo wyewyeyi, kwo amaləka kwo ase, kwo anya n ɓa lo nsaiye, kwo anya n ɓa ye ɓeɓelo n abye, kwo kalá dəhodəhoi, 39kwo àsna kwo agyiloloi, kwo nyaho n shnasnu n anyazhnizhni vnyanya, n ɓa ɓá myi ɓa gna yi aje n yeye Shekwoyi nyai, n kwo dnalo ń Kirisiti Yeisu əyi Dagayi nyi m.
Jelenleg kiválasztva:
Aromayi 8: GNB
Kiemelés
Másolás
Összehasonlít
Megosztás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.