Даниял 5
5
Къадада хъвараб балъголъи
1Цо нухалъ Белшацар пачаяс#5:1 Белшацар – ЦӀияб Вавилоналъул ахирисев пача, Набонидил кӀудияв вас. ХӀакъикъаталда, эмен чӀаго вукӀаниги, тахшагьаралда ва аскаразда тӀад кверщел васас гьабулеб букӀана. Гьесул эбелалда цӀар – Нитокрис, гьейги Навуходоносорил яс йикӀана. кӀудияб сухӀмат гӀуцӀана жиндирго чӀухӀби-хӀакимзабазе. Азарго чи ахӀана гьениве, ва гьезда цадахъ квана-гьекъолев вукӀана пача. 2Гьекъолдун кеплъарав чияс, гьесул кӀудияв эмен Навуходоносорица Иерусалималъул Мукъадасаб Рокъоса росун рачӀарал меседил ва гӀарцул щурмал гьанире росеян буюрана гьес – жиндицаго, жиндирго чӀухӀби-хӀакимзабаз, лъудбуз ва гъаравашаз чагъир гьекъезе букӀине. 3Иерусалималдаса БетӀергьанасул Рукъалъул меседил ва гӀарцул щурмал гьенире росун рачӀана ва гьезда жанибе чагъирги тӀун гьекъолдана гьев чӀухӀби-хӀакимзабигун, лъудбигун ва гъаравашалгун цадахъ. 4Гьекъолаго чагъиргун, жиндирго меседил, гӀарцул, мазгарул, маххул, цӀулал ва ганчӀил гьарурал аллагьзабазе рецц гьабулеб букӀана гьез.
5Цинги партӀан инсанасул квералъул гӀадал килщал раккун рачӀана, ва пачаясул кӀалгӀаялъул къеда бараб чирахъалда сверун къадал гачалда тӀад хъвадаризе жубана. Пача гьеб хъвадарулеб квералъухъ валагьун хутӀана. 6Гьесул гьумер хъахӀлъун ана, ва гӀемер хӀинкъиялъ гьесул накаби сородизе лъугьана.
7Ва пачаясул гьаркьал рахъана. Жиндихъе балъголъи лъалел чагӀи, гӀакълучагӀи ва нужумчагӀи рачеян ахӀана гьес. Вавилоналъул гӀакъилзабазда гьес абуна: «Гьаб хъвай-хъвагӀай цӀализе кӀварав ва дида гьелъул магӀна бицине лъарав чиясда тӀад дица пачаясул гӀаба ретӀине буго, горбода меседил рахасги базе буго, ва гьев тезе вуго дир пачалъиялъул бищун тӀадегӀаназул лъабабилев чилъун».
8Киналго гӀакъилзаби гьеб къеда тӀаде руссана, амма, я къадада хъвараб жо цӀализе, я гьелъул магӀна пачаясда бицине бажаричӀо гьезда. 9Гьебмехалъ пача жеги кутакалда хӀинкъана, гьурмал хутӀарабги кьер тӀуна, гьесул чӀухӀби-хӀакимзабиги щиб гьабилебали лъаларого хутӀана.
10Пачаясул ва чӀухӀби-хӀакимзабазул ахӀи-хӀур рагӀарай пачаясул эбел ячӀана квана-гьекъолеб рокъое жание. «БетӀерчӀахъаяв пача, дур гӀумру халалъаяв! – ин абуна гьелъ. – Гьеб хӀалалда дур ургъел ккезе ва дур кьер тӀезе щибго ккараб жо гьечӀо.
11Дур пачалъиялда вуго Хирияв Аллагьасул РухӀ жиндилъ бугев цо чи. Дур кӀудияв инсул заманалдаго жиндирго гӀелму-лъаялдалъун ва аллагьзабазул гӀадаб гӀакълуялдалъун машгьурлъана гьев. Дур кӀудияв эмен Навуходоносор пачаяс гьев тун вукӀана сихӀручагӀазул, балъголъи лъалел чагӀазул, гӀакълучагӀазул ва нужумчагӀазул бетӀерлъун. 12Гьеле гьесулъ, пачаяс Белтешацарин жинда цӀар лъурав Даниялилъин батараб гӀакълудал бегӀерлъиги, гӀелму-лъайги, макьабазул ва гӀаламатазул магӀна бицине гьунарги, захӀматал суалазе битӀараб хӀукму къотӀизе бажариги. Гьев ахӀизе чагӀи ритӀе, цинги гьес бицина дуда гьеб хъвай-хъвагӀаялъул магӀнаги».
13Гьебмехалъ Даниял вачун вачӀана пачаясухъе, ва пачаяс гьесда абуна: «Мунищ дов Даниял – дир кӀудияв инсуца Ягьудиялдаса рачун рачӀарал асиразул цояв?
14Дида рагӀана дулъ Бичасул РухӀ бугилан, ва мун, гӀелму-лъайги бугев, кутакалда гӀакъилав чи вугилан. 15ГӀакъилзабиги, балъголъи лъалел чагӀиги рачун рачӀун рукӀана дихъе, гьаб хъвай-хъвагӀай цӀализе ва дида гьелъул магӀна бицине, амма гьезухъа гьеб бажаричӀо. 16Дур хӀакъалъулъ абуни, дида рагӀана дуда балъгоябщиналъул магӀна лъалин ва захӀматал суалазе битӀараб хӀукму къотӀизеги бажарулин. Дуда гьаб хъвай-хъвагӀай цӀализе кӀвани ва гьелъул магӀна бицине бажарани, дуда тӀад дица пачаясул гӀаба ретӀине буго, горбода меседил рахасги базе буго ва мун тезе вуго дир пачалъиялъул бищун тӀадегӀаназул лъабабилев чилъун».
17Даниялица жаваб кьуна: «Дур сайгъатал дуего те, шапакъаталги цоги лъие букӀаниги кье. Пачаясе дица гьадингоги цӀалила къадада хъвараб жо, гьелъул магӀнаги бицина.
18БетӀерчӀахъаяв пача, ТӀадегӀанав Аллагьас дур кӀудияв эмен Навуходоносорие кьуна цӀар рагӀараб пачалъиги, кӀудияб къадру-къиматги, кутакаб бечелъиги. 19Бичас гьесие кьураб кӀодолъиялъ тӀолалго халкъал, къавмал ва батӀи-батӀиял мацӀазул гӀадамал хӀинкъун сородулаан гьесда цере. Бокьарал чӀвазе къотӀулаан гьес, бокьаразда гурхӀулаан, бокьарал тӀадегӀан гьарулаан, бокьарал гӀодорегӀан гьарулаан гьес. 20Амма гьесул ракӀ чӀухӀидал ва гӀамалкӀодолъиялъ тӀом биццалъидал, гьев пачалъиялъул тахидаса рехана ва къадру-къиматалдасаги махӀрумлъана. 21Гьев гӀадамазда цевеса нахъе гъуна ва гьесул гӀакълуги хӀайваналъулалда релълъинабуна. ГӀалхул хӀамулгун цадахъ, бугъица гӀадин херги кванан, зодил щубалъ черхги чурун вукӀана гьев, гӀадамазул пачалъи ТӀадегӀанав Аллагьасул кверщаликь букӀинги, Жиндиего бокьарасе Гьес гьеб кьолеблъиги гьесда бичӀчӀизегӀан.
22Мунин абуни, Белшацар, гьесул наслу, гьеб кинабгоги лъалев чи, гӀодове вуссинчӀо! 23Мунго Зобалазул ПарччахӀасдасацин кӀудияв вугин ккана дуда. Гьесул Рукъалъул щурмалги рачӀинарун, гьезда жанибе чагъирги тӀун, дурго чӀухӀби-хӀакимзабигун, лъудбигун ва гъаравашалгун цадахъ гьекъолдана мун. ГӀарцул, меседил, мазгарул, маххул, цӀулал ва ганчӀил гьарурал, я балагьизе берал гурел, я рагӀизе гӀундул гурел, я бичӀчӀизе гӀакълу гурел аллагьзаби реццана дуца. Амма дур гӀумруги дур киналго нухалги Жиндир хъатикь ругев Аллагьасе гӀибадатги реццги гьабичӀо. 24Гьединлъидалин Бичас битӀун бачӀараб гьеб квер ва къеда гьел рагӀабиги хъварал.
25Гьале гьениб хъван бугеб жо: „МЕНЕ, МЕНЕ, ТЕКЕЛ, У-ПАРСИН“.
26Гьале гьелъул магӀна:
МЕНЕ#5:26 МЕНЕ – рикӀкӀана абураб магӀна ккола гьаб рагӀул. – Бичас дур пачалъиялъул къоязул къоязул къадар рикӀкӀана ва гьелъие ахир лъуна.
27ТЕКЕЛ#5:27 ТЕКЕЛ – цӀана абураб магӀна ккола гьаб рагӀул. – Мун, цӀадирабаздаги лъун, цӀана ва цӀакъго тӀадагьав ватана.
28ПЕРЕС#5:28 ПЕРЕС – гӀемерлъул формаялда ПАРСИН. КӀийиде бикьана абураб магӀна ккола гьаб рагӀул. – Дур пачалъи кӀийиде бикьана ва мадаязеги парисазеги кьуна».
29Гьебмехалъ, Белшацарил буюрухъалда рекъон, Даниялида пачаясул гӀаба ретӀана, гарбида меседил рахасги бана ва пачалихъалъул бищун тӀадегӀанал бутӀрузул лъабабилев чилъунги тана гьев.
30Гьебго сордоялъ халдеязул пача Белшацар чӀвана#5:30 Гьеб сордоялъ, цебесеб эраялъул 539 соналъул октябрь моцӀалъул 11 къоялъ, парисаз Вавилон кверде босана., 31Мадаялдаса Дарийица#5:31 Дарий пача – мадаязул ва парисазул пача. пачалъиги кверде босана.
Лъабкъоялда кӀиго сон барав чи вукӀана Дарий.
Jelenleg kiválasztva:
Даниял 5: АварАК
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Институт перевода Библии, 2005-2023