Maˍkuˆ 2
2
Yeˍsuˆ changˉ laˍ puˍ laˍ hkuiˍ ang siˉ mangˉ na taeng pyo biˍ jiˍ
1Nuing iˉ yaˍ ca laeˍ yao, Yeˍsuˆ nawˍ Kaˍpeˍneˍonˍ vengˍ veu awngˉ aeˉ laeˍ yao, yumˉ veu ca naeˉ na hao ya kyaˍ jiˍ. 2Changˉ ang byaˍ laˉ chawnˉ yao, yumˉ langˉ kaw ang nyiˉ veu muiˉ ca kyaˉ baˍ ca. Yeˍsuˆ yawng na ang buinˉ tangˍ maˍ biˍ yao ca beu, 3Laˍ puˍ laˍ hkuiˍ siˉ jiˉ mangˉ na changˉ hanˍ hu ham yao, Yeˍsuˆ kawngˉ laˉ jiˉ. 4Changˉ ang byaˍ nae yao, Yeˍsuˆ htang veu changˉ daˉ mangˉ na baˍ suiˍ lae taw. Haeˉ mae yao, yawng ngaˍ Yeˍsuˆ ca naeˉ hingˉ htaˍ veu yumˉ buingˍ htaˍ hingˍ na hpya taw yao, changˉ daˉ mangˉ na ham jiˉ hingˉ ta ta nae hkla aeˉ biˍ jiˍ. 5Yeˍsuˆ maˇ yawng yumˉ naeˉ saˉ naeˉ hingˉ na myangˉ yao, laˍ puˍ laˍ hkuiˍ siˉ jiˉ mangˉ na, Ang yaˍ veuˉ, nang naˍ hokˍ na poiˇ laˍ byaˇ, nae ha biˍ jiˍ. 6Hae mae beu, hiˉ keung duingˉ yao ca jiˉ Camˉ lik ang hkiˍ saˍ laˉ htiˍ baˍ uiˍ muiˉ, 7Changˉ ningˉ maˇ ba ceuˉ ha yao ningˉ mae ciˍ naeˇ. Yaˇ Ang suingˉ Hpaˍ caoˍ na hpaˉ batˆ yangˉ byaˇ. Ang suingˉ Hpaˍ caoˍ baˍ baoˇ htiˍ hu muiˉ naˍ hokˍ na baˍ poiˍ lawt taw nae yawng nuing ba hkaoˉ veu kuitˉ laeˍ jiˍ. 8Yawng nuing ba hkaoˉ veu haeˉ mae kuitˉ yao ca naeˉ na Yeˍsuˆ tiˍ chitˍ nae bae yao, Ba ceuˉ hao nawng niˉ mae kuitˉ yao ca ngaeˇ nae naˉ jiˉ. 9Laˍ puˍ laˍ hkuiˍ siˉ jiˉ mangˉ na aˉ mae uiˉ ciˍ tangˍ ciˍ sangˍ yao ngaiˍ naeˇ. Nang beu naˍ hokˍ yangˍ poiˉ laˍ byaˇ nae laˍ ngaiˍ naeˍ. Baˍ baoˉ vaˍ, nang na ham laˍ jiˍ hingˉ hanˉ yao kaˉ ba yawˍ aeˉ baoˉ nae hingˉ laˍ ngaiˍ naeˍ. 10Changˉ nawˍ nuingˉ chaˍ htaˍ nawˉ naˍ hokˍ na ang poiˉ lawtˍ biˍ taw yaˇ nae ga nawng na piˉ bae laˍ naeˍ. Haeˉ mae beu, laˍ puˍ laˍ hkuiˍ ang siˉ mangˉ na, 11Hta laˉ bao. Nang na ham laˍ jiˍ hingˉ hanˉ yao, yumˉ veu aeˉ laeˍ bao nae Yeˍsuˆ yang na ciˍ sangˍ jiˍ. 12Changˉ hingˉ mangˉ muiˉ tiˍ chitˍ nae hta laˉ yao, yang yuˍ pamˍ yangˍ am yao, changˉ uiˉ tawngˍ naˍ veu awkˍ taw aeˉ jiˉ. Changˉ ang byaˍ uiˍ muiˉ kuitˉ manˍ hko laeˍ yao, Hpaˍ caoˍ beu tanˇ hkoˇ hingˉ na chiˍ mawng jiˉ. Ningˉ mae htiˍ cangˍ nae muiˉ baˍ myangˍ myang nae ha lang ga jiˉ. Yeˍsuˆ Leˍviˆ na haoˉ yuˉ jiˉ
13Hingˉ nawngˍ veu, Yeˍsuˆ Gaˍliˉlaeˉ lang awng ang huiˍ htang veu htiˍ cangˍ aeˉ laeˍ yao, changˉ ang muˉ ang byaˍ uiˍ yang htang veu laˉ yao, yawng na maˍ laeˍ biˍ jiˍ. 14Yang kaˉ ba yawˍ lae laeˍ yao, Aˍlaˍhpaeˉ beu ang yaˍ Leˍviˆ mangˉ hkawnˉ kaw kyaˉ veu duingˉ yao ca naeˉ na ya myangˉ beu, Ga nawngˍ veu hkeˍ lao nae ha biˍ jiˍ. Leˍviˆ mangˉ muiˉ hta laˉ yao, yang nawngˍ veu hkeˍ jiˍ. 15Kaˉ nawngˍ veu, Yeˍsuˆ maˇ Leˍviˆ yumˉ veu ang caˍ caˍ yao ca jiˉ. Hkawnˉ kaw hu uiˉ nae aw htaˍ veu changˉ haiˉ uiˉ muiˉ Yeˍsuˆ nawngˍ veu hkeˍ jiˍ. Changˉ hingˉ uiˉ htiˍ baˍ uiˍ a Yeˍsuˆ nae yang ta peˍ uiˍ kawngˉ htuˍ yaˍ laˉ mae caˍ yao ca jiˉ. 16Haeˉ mae beu, hkawnˉ kaw hu nae changˉ ang haiˉ uiˉ kawngˉ htuˍ yaˍ laˉ mae Yeˍsuˆ caˍ tangˉ jiˉ hingˉ na, Hpaˍriˆsaeˉ ang muˉ hkaoˉ veu Camˉ lik ang hkiˍ saˍ laˉ uiˉ muiˉ myangˉ yao, changˉ ningˉ maˇ hkawnˉ kaw hu nae changˉ ang haiˉ uiˉ kawngˉ aˉ mae jeuˇ caˍ tangˉ naeˉ nae ta peˍ uiˍ na naˉ jiˉ. 17Yeˍsuˆ ya kyaˍ yao, changˉ ang ca buiˍ uiˉ aˍ chiˍ kaˍ saˍ laˉ na baˍ loˍ. Caˇ, changˉ daˉ uiˉ yaˇ chiˍ kaˍ saˍ laˉ na loˉ naeˉ. Changˉ ang sui ang pawng uiˉ na haoˉ yuˉ naeˉ nae baˍ aˍ ga lui yaeˉ. Changˉ haiˉ uiˉ na haoˉ yuˉ naeˉ nae ga lui yaeˉ nae ha biˍ jiˍ.
Ang caˍ cheˉ naeˉ uiˉ awˍ lawng na naˉ jiˉ
18Hingˉ nyamˍ veu, Yoˉhanˍ beu ta peˍ uiˍ nae Hpaˍriˆsaeˉ uiˉ ang caˍ cheˉ yao ca jiˉ. Changˉ htiˍ baˍ uiˍ muiˉ Yeˍsuˆ kawngˉ laˉ yao, Yoˉhanˍ beu ta peˍ uiˍ nae Hpaˍriˆsaeˉ changˉ uiˉ aˍ ang caˍ cheˉ yao, ba ceuˉ ha yao Yeˍsuˆ nang beu ta peˍ uiˉ aˍ ang caˍ baˍ cheˍ naeˇ nae naˉ jiˉ. 19Cui hkaekˆ veu laˉ jiˉ uiˉ changˉ cangˉ uiˉ aˍ ang songˍ ang suiˍ kawngˉ nae poiˍ yao ca beu, ang caˍ cheˉ yao ang kaˍ laˍ. Laˍ laˍ baˍ kaˍ. Ang songˍ ang suiˍ kawngˉ nae htuˍ yaˍ laˉ mae ca beu aˍ, ang caˍ na cheˉ yao baˍ kaˍ. 20Hta yao muiˉ, yawng kawngˉ nae ang songˍ ang suiˍ mangˍ na piˉ hpakˍ nga aengˉ beu, yawng ang caˍ na ang cheˉ yaˉ nae Yeˍsuˆ yawng na tawpˍ laeˍ jiˍ. 21Ang kaˍ ang tum ang anˉ veu ang hpaenˉ ang suiˍ nae baˍ tawˍ lae myang. Haeˉ mae tawˍ baoˉ vaˍ, taw jiˉ ang hpaenˉ ang suiˍ hingˍ ang hpaenˉ anˉ mangˉ na caˍ yao ang honˉ huiˍ laˉ naeˉ. 22Hingˉ lawˉ yaˇ, saˍ hkaw langˉ tuingˉ ang anˉ veu suing kaeˍ ang chaˉ ang suiˍ baˍ kan myang. Haeˉ mae kan baoˉ vaˍ, suingˍ kaeˍ chaˉ ang suiˍ maˇ saˍ hkaw langˉ tuingˉ hingˉ na tiˍ chaw yao suingˍ kaeˍ chaˉ uiˉ hkaˉ yao, saˍ hkaw langˉ tuingˉ uiˉ muiˉ chaw hko naˇ. Suing kaeˍ chaˉ ang suiˍ uiˍ na saˍ hkaw langˉ tuingˉ ang suiˍ veu ya kan naeˉ nae ha biˍ jiˍ.
Vanˍ sin nuing veu Ang suingˉ
23Yuˉdaˆ changˉ ceuˉ beu vanˍ sin nuing veu Yeˍsuˆ hyaˉ veu hpaiˍ yao lae beu, yang ta peˍ uiˍ hangˍ baeˍ yao, kaw namˉ uiˉ na sap yao lae jiˉ. 24Hpaˍriˆsaeˉ changˉ uiˉ muiˉ, Yawng ngaˍ vanˍ sin nuing veu kanˉ vaˍ yao, ang liˍ veu sing byaˇ, nae Yeˍsuˆ na ha biˍ jiˍ. 25Yeˍsuˆ yawng na tawpˍ laeˍ jiˍ. Daˍvet nae yang changˍ htiˍ baˍ uiˍ hangˍ baeˍ yao, ang caˍ baˍ ca nae beu aˉ mae ha jeuˇ nae nawng ngaˍ htiˍ cangˍ nae muiˉ baˍ hpatˍ myang laˍ. 26Aˍbyaˍtaˍ yit pa rawˉ hek ang kaeˍ hpeuˍ beu, Hpaˍ caoˍ yumˉ veu Daˍvet awngˉ laeˍ yao, yit pa rawˉ hek baˍ aˍ nae baoˉ vaˍ, htiˍ hu baˍ caˍ cae nae uiˉ tanˍ na jiˉ hkaoˍ munˉ ang seungˍ ang sangˉ hingˉ yang caˍ yao, yang ang changˍ uiˍ na muiˉ piˉ yaˍ jiˍ baˍ aˍ la. 27Haeˉ mae yao, Yeˍsuˆ hkai biˍ jiˍ, vanˍ sin nuing ningˉ ngaˍ Changˉ yaˍ saˍ laiˍ taeng saˍ jiˍ yaˇ. Changˉ yaˍ nawˍ vanˍ sin nuing saˍ laiˍ taeng saˍ jiˍ baˍ aˍ. 28Hingˉ pa nae yao, Changˉ nawˍ vanˍ sin nuing beu Ang suingˉ ya hpeuˍ naeˍ, nae ha biˍ jiˍ.
Jelenleg kiválasztva:
Maˍkuˆ 2: pyy
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2022, Wycliffe Bible Translators, Inc. All rights reserved.