यहून्ना 21

सात चेलानै ईसु को दरसाव

1इकै पाछै ईसु आपका चेलानै तिबरिआस झिल का किनारा प ओज्यु दरसण दिओ। अर आ बात अंय्यां होई, 2समोन पतरस, थोमा जखो जोड़लो खुवातो हो, गलिल का काना को नतनएल, जब्दि को बेटो अर ईसु का दो ओर चेला बठै भेळा हा। 3#लूक 5:5समोन पतरस बाऊँ बोल्यो, “म मछी पकड़बा जाऊँ हूँ।”

बे बिऊँ बोल्या, “म्हें बी तेरै सागै चालस्यां।” अर बे अंय्यां खेर बिकै सागै होलिआ अर न्याव म बेठगा। पण बि रात बाकै क्युंई कोनी हात्यायो।

4अंय्यां करता-करता दिन होगो, बि टेमई ईसु बठै किनारा प आर खड़्यो होगो पण बे चेला कोनी जाण्या क बो ईसु ह।

5जणा ईसु बाऊँ बोल्यो, “भाईड़ो, थारै कनै मछ्या ह के?”

बे बोल्या, “कोनी।”

6 # लूक 5:6 जणा बो बाऊँ बोल्यो, “न्याव क दाया नाकै जाळ फेको अर थानै मिलसी।” जणा बिका बोल्या गेल बे जाळ फेक्या पण बोळी मछ्या की बजेऊँ बे जाळनै पाछा कोनी खींच सक्या।

7जणा पाछै लाडलो चेलो पतरसऊँ बोल्यो, “अ तो परबुई ह।” आ सुणताई क, “अ तो परबुई ह,” बो कोई परवा करै बिनाई लंगोट प बारलो गाबो लपेटर पाणी म कुदगो जिऊँ तावळोसो किनारा प पुग सकै। 8जणा दुसरा चेला बिकै गेल मछ्याऊँ भरेड़ो जाळ खिंचर न्यावऊँ किनारा प ले आया क्युं क बे किनारैऊँ कोई सोएक गज दूर हा। 9किनारा प आताई बानै सिलगता कोयला की आग दिखी जापै मछी सिकरी ही अर रोटी बी पड़ी ही।

10ईसु बाऊँ बोल्यो, “जखी मछ्या थे इबी पकड़ी ह बामैऊँ क्युंक लिआओ।” 11जणा समोन पतरस न्याव प गयो अर एक सो तरेपन बडी मछ्याऊँ भरेड़ा जाळनै किनारा प खिंच्यो। अत्ती सारी मछ्या होबा क पाछै बी जाळ फाट्यो कोनी। 12ईसु बाऊँ बोल्यो, “अठै आओ अर रोटी जिमो।” बिका चेला मऊँ कोईसा किई हिमत कोनी बगी क बिऊँ बुजै “थे कूण हो?” क्युं क बे जाणगा हा क बे परबुई ह। 13जणा ईसु खड़्या होया अर रोट्या लेर बानै परूसी अर अंय्यांई मछ्या बी। 14अर ओ तीसरकै हो क मरेड़ा मऊँ जीबा क पाछै ईसु आपकै चेला क सामै परगट होया।

ईसु को पतरसऊँ बतळाबो

15रोटी खाबा क पाछै ईसु समोन पतरसऊँ बोल्यो, “यहून्ना का बेटा समोन, जत्तो परेम अ मेरूँ करीं हीं, तू मेरूँ बाऊँ बेत्ती परेम करै ह के?”

पतरस ईसुऊँ बोल्यो, “हाँ परबु, थे जाणो हो क म थारूँ परेम करूं हूँ।”

जणा ईसु पतरसऊँ बोल्यो, “मेरा उन्यानै चरा।”

16बो बिऊँ ओज्यु बोल्यो, “यहून्ना का बेटा समोन, तू मेरूँ परेम करै ह के?”

जणा पतरस बोल्यो, “हाँ परबु, थे जाणो हो क म थारूँ परेम करूं हूँ।”

जणा ईसु पतरसऊँ बोल्यो, “मेरी लल्ड्या की रूखाळी कर।”

17ईसु तीसरका पतरसऊँ बोल्यो, “यहून्ना का बेटा समोन, तू मेरूँ परेम करै ह के?”

पतरस बोळो दुखी होयो क्युं क ईसु तीसरका बिऊँ आ बात बुजी ही, “तू मेरूँ परेम करै ह के?” जणा पतरस ईसुऊँ बोल्यो, “परबु थे तो सक्यु जाणो हो थे जाणो हो क म थारूँ परेम करूं हूँ।”

ईसु बिऊँ बोल्यो, “मेरी लल्ड्यानै चरा। 18म तनै सची बोलुँ हूँ, जद तू मोट्यार हो, जणा तू तेरी कमर प सापी कसर जठै मरजी चल जातो हो। पण जद तू बूडो होसी जणा तू हात पसारसी अर दुसरा तनै बां'दर जठै तू कोनी जाणो चावै बठै लेज्यासी।” 19बो आ बात आ दरसाबा ताँई बोल्यो क पतरस कंय्यां की मोत मर'र परमेसर की मेमा करसी। आ बोलर बो बिऊँ बोल्यो, “मेरै गेल आ।”

ईसु अर लाडलो खुवाबाळो चेलो

20 # यह 13:25 पतरस गेलनै बावड़र देख्यो क बो चेलो जखो लाडलो खुवातो हो, बिकै गेल आर्यो ह। ओ बोई हो जखो रोटी जिम्ती टेम बिकै कान क कनैसिक मुंडो कर बाऊँ बुज्यो, “परबु बो कूण ह जखो थानै धोकाऊँ पकड़ासी?” 21बिनै देखर पतरस ईसुऊँ बोल्यो, “परबु, इको काँई होसी?”

22ईसु बिऊँ बोल्यो, “ज म आ चाऊँ क मेरै पाछै आबा ताँई, ओ अठैई रेह्‍वै जणा तनै इऊँ काँई? तू तो मेरै गेल आ।” 23जणा आ बात चेला म इ हद ताँई फेलगी क बो चेलो कोनी मरै। ईसु ओ कोनी बोल्या हा, क बो कोनी मरसी। पण बाको मतबल ओ हो क, “ज म आ चाऊँ क जद ताँई म आऊँ, ओ अठैई रेह्‍वै जणा तनै इऊँ काँई?”

24ओ बो चेलो ह जखो आ सगळी बाता की गुवाई देवै ह, अर जखो आ सगळी बातानै मांडी ह। म्हें जाणा हा क बिकी गुवाई सची ह।

25ईसु ओर बी बोळा काम कर्या। ज बे सगळा एक-एक कर मांड्या जावै जणा म समजूँ हूँ क बा किताब अत्ती बडी होती की सगळी सरस्टि प कोनी नावड़ती।

Jelenleg kiválasztva:

यहून्ना 21: एस डब्लु वी

Kiemelés

Megosztás

Másolás