Népszerű bibliai igeversek innen: ᒪᕐᒃ 6

Megosztás

ᓇᔅᒡ ᒪᒃ ᒋ ᒥᒐᑎᔪᐛ ᐊᐛᔪᐛ ᐊ ᑎᑯᓯᓂᔨᒋ ᐊ ᐸᒋ ᓂᑐᐛᐱᒥᑯᒡ ᐊᑯ ᓇᒪ ᐛᐛᒡ ᐅᒋ ᐃᔅᐱᓯᔪᐅᒡ ᒐᒋ ᒥᒋᓱᒡ᙮ ᐊᑯ ᒋᓴᔅ ᒂ ᐃᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ, “ᐊᔅᑎᒧᒄ ᒥᒄ ᒋᔨᐛᐤ ᐊᓐᑕ ᐊᑲ ᑕᓄᐅᒡ, ᒐ ᐊᔅᑕᔭᔅᑯᓯᔭᒄ᙮”

ᐊᑯ ᒋᓴᔅ ᒂ ᐃᑕᑦ, “ᐊᓐ ᐊᐛᓐ ᑲ ᐅᒋᔅᒋᐛᐃᒐᓱᐅᑦ ᒋᔅᑕᔨᒪᑭᓄᐤ ᐊᐃᒡ ᐅᑕᓇᒡ ᐊᑯ ᐊᓐᑕ ᑎᐱᔨᐛ ᐅᑦ ᐊᔅᒋᒡ ᐊ ᑕᑦ ᓇᒪ ᐊᐱᑕᔨᒪᑭᓄᐤ᙮ ᓇᒪ ᐛᐛᒡ ᒋᔅᑕᔨᒥᑯᐤ ᐎᐧᑲᓂᓴ ᑭᔭ ᐊᓂᔭᔪᐛ ᐊᓐᑕ ᐊ ᐸᐃᑯᔅᑲᓇᓯᑦ ᑲ ᑕᔨᒋ᙮”

ᐃᔅᐱ ᒋᓴᔅ ᑲᐸᑦ ᐊᓂᔭ ᐅᐤᑎᔪᐤ ᒋ ᐛᐱᒪᐤ ᐊᓂᔭ ᐃᔪᐛ ᐊ ᒥᒐᑎᔨᒋ᙮ ᓇᔅᒡ ᒪᒃ ᒋ ᒧᓯᑕᐤ ᐊ ᒋᔅᑎᒪᒐᔨᒪᑦ ᒧᔭᒻ ᒪᔭᑕᓂᓯᒡ ᐊᑲ ᐊᔭᐛᒡ ᒪᔭᑕᓂᓯᐅ-ᐃᔪᐛ ᒐ ᓂᓇᑭᑐᐛᔨᒥᑯᒡ ᐊ ᐃᓯᓇᑯᓯᒡ᙮ ᐊᑯ ᒂ ᒋᔅᑯᑎᒧᐛᑦ ᒥᒐᑦ ᒐᒂᔪᐛ᙮

ᐊᓂᔭ ᒪᒃ ᐊᑲ ᐅᒋ ᑕᑈᑎᒥᔨᒋ ᓇᒪ ᐅᒋ ᐃᑐᑎᒻ ᒪᒥᔅᑲᒡ ᒐᒂᔪᐛ ᐊᓐᑕ, ᒥᒄ ᐱᔅᒐ ᐊᓂᔭᔪᐛ ᑲ ᐊᐧᑯᓯᔨᒋ ᒋ ᓴᒥᓇᐤ, ᒋ ᒥᓏᒋᐊᐤ ᒪᒃ᙮ ᒋ ᒪᒥᔅᑲᑕᔨᒪᐤ ᒪᒃ ᐊᓂᔭ ᐊ ᐃᔅᐱᔅ ᐊᑲ ᑕᑈᔭᔨᒥᑯᑦ᙮ ᒋ ᐊᒋᓇᔅᑭᒻ ᒪᒃ ᐊᓂᔭᔪᐛ ᐃᑕᐅᓂᓴ ᐊ ᐱᐸ ᒋᔅᑯᑎᒪᒐᑦ᙮

ᐊᑯ ᒋᓴᔅ ᐛᑎᓇᑦ ᐊᓂᔭ ᐱᑕᑕᒡ ᐸᒂᓯᑭᓇ ᑭᔭ ᐊᓂᔭ ᓂᓱ ᓂᒪᓴ, ᐃᔅᐱᒥᒡ ᒂ ᐃᓯ ᑎᔅᑎᓴᐱᑦ ᐊ ᓂᓇᔅᑯᒪᑦ ᒋᓴᒪᓂᑐᐛ᙮ ᒋ ᐸᐱᑯᐱᑕᐤ ᒥᓯᐛ ᐊᓂᔭᔪᐛ ᐸᒂᓯᑭᓇ, ᐊᑯ ᒂ ᒥᔭᑦ ᐅᒋᔅᒋᓄᐊᒧᐛᑭᓇ ᒐᒋ ᒪᑎᓄᐛᔨᒋ᙮ ᑭᔭ ᐊᓂᔭᔪᐛ ᓂᓱ ᓂᒪᓴ ᒋ ᒪᑎᓂᒧᐛᐤ ᒐᒋ ᒪᑎᓂᒧᐛᔨᒋ ᒥᓯᐛ ᐊᐛᔪᐛ ᐊᓐᑕ ᑲ ᑕᔨᒋ ᒐᒋ ᒥᒋᓱᔨᒋ᙮ ᒥᓯᐛ ᒪᒃ ᐊᐛᓐ ᒋ ᒥᒋᓱᐤ ᑭᔭ ᒋ ᑕᐱᔅᑯᔪᐤ᙮ ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒂ ᒪᒧᓴᒋᓇᒡ ᐃᔅᑯᔅᑐᐛᓂᔪᐤ᙮ ᓂᓱᓴᑉ ᒪᒃ ᐅᑎᐱᐅᑕ ᒋ ᓴᑭᔅᒋᓂᑕᐅᒡ ᐊᓂᔭ ᑲ ᐃᔅᐱᔅ ᐃᔅᑯᐳᐛᑭᓄᔨᒋ ᐸᒂᓯᑭᓇ ᑭᔭ ᓂᒪᓴ᙮