Népszerű bibliai igeversek innen: Romnima 8

Megosztás

Ti mi ni zaŋ chaŋ ninvuɣ’ shɛb’ bɛn yuri Naawuni ka nyɛ o ni daŋ pii shɛb’ o nia lɔbu ni la sani, ŋun’ Naawuni chɛ ka binshɛɣukam niŋdila bɛ zaɣ’ viɛlli nyabu zuɣu.

Dama m mi ka biɛhiŋ kani ni kum bee nyɛvili bee malaikanim’ bee alizinnim’ bɛn nyɛ zuɣulaannim’ mini bɛn su fukumsi bee binyara din be pumpɔŋɔ bee binyara din ti yɛn kana bee yikombiɛri bee binyara din be zuɣusaa bee binyara din be tiŋgbani puuni bee binshɛŋa din be binnamda puuni zaa shɛli ku tooi yihi ti Naawuni yurilim din be ti Duuma Yisa Masia ni la ni.

Lala ka Naawuni Shia Kasi sɔŋdi ti ti chɔɣinsi ni, dama ti ʒi di ni simdi ni ti suhiri Naawuni shɛm, amaa Naawuni Shia Kasi maŋmaŋa n-deeri suhiri Naawuni ni ŋuhibu din ka yɛtɔɣa tiri ti.

Dindina wula ka ti lee ni yɛli zaŋ chaŋ dimbɔŋɔ polo? Naawuni yi ʒe ti nyaaŋa, ŋuni n-lee nyɛ ŋun ni tooi zaŋ o nyɔɣu yo ti?

Dinzuɣu ninvuɣ’ shɛb’ bɛn be Yisa Masia ni la yi taali ni.

Nir’ yi zaŋ o tɛha niŋ o ninsalitali biɛhigu yɛla ni, di bahigu ti nyɛla kum, amaa nir’ yi zaŋ o tɛha niŋ Naawuni Shia Kasi yɛla ni, di bahigu ti nyɛla nyɛvili mini suhudoo.

Amaa di zaa yoli, ti di nasara yaɣi Masia ŋun yuri ti la zuɣu.

N zahimya ni ti ni diri wahala shɛli pumpɔŋɔ ŋɔ bi saɣi shɛli ni ti zaŋ li buɣisi jilima shɛli Naawuni ni ti yɛn ti ti la.

Ŋuni n-lee ni tooi yihi ti Masia yurilim ni? Muɣisigu bee wahala bee alaka bee fifali bee gbinfini bee barina bee takɔbi ni tooi yihi ti di ni?

Ka Naawuni ŋun vihiri ninsalinim’ suhuri mi din be o Shia Kasi tɛha ni, dama Naawuni Shia Kasi n-deeri suhiri tiri Naawuni ninvuɣ’ gahinda kaman Naawuni yubu ni nyɛ shɛm.

Bɛnkam doli Naawuni Shia Kasi ni wuhiri ba so’ shɛli, bɛna n-nyɛ Naawuni bihi.

Dama ninvuɣ’ shɛb’ bɛn doli bɛ ninsalitali biɛhigu yubu zaŋ bɛ tɛha niŋla bɛ ninsalitali biɛhigu yubu maa yɛla ni, amaa ninvuɣ’ shɛb’ bɛn doli Naawuni Shia Kasi yubu zaŋ bɛ tɛha niŋla Naawuni Shia Kasi yɛla ni.

Naawuni ŋun daa bi zaɣisi ni omaŋmaŋ’ Bia kpi, amaa ka daa zaŋ o ti ti zaa ŋɔ, o ku zaŋ binshɛɣukam din kpalim zaa gba pah’ o zuɣu ti ti?

Di nyɛla Naawuni Shia Kasi maŋmaŋa n-diri ti shɛhira ti suhuri ni ni ti nyɛla Naawuni bihi. Ka ti yi nyɛla Naawuni bihi, dindina ti nyɛla o bindiriba. Ti nyɛla bɛn mini Masia laɣim nyɛ Naawuni bindiriba, tinim’ dee min’ o yi laɣim di wahala ni di chɛ ka ti min’ o ti laɣim nya jilima.

Ninvuɣ’ so ŋun zaŋ o tɛha niŋ o ninsalitali biɛhigu yɛla ni nyɛla Naawuni dima, dama o bi doli Naawuni fukumsi zaligu, hal ka shiri ku tooi dol’ li.

Binnamda zaa kul guhirimi ka bɛ suhuri kul ye saha shɛli Naawuni ni ti yɛn yih’ o bihi palɔni la zuɣu

Ti mi ni binnamda zaa kul ŋuhirimi ka wolisiri biɛrim zuɣu hal ni pɔŋɔ