If you would like a copy of this version please contact info@davaraudiobibles.org

Lhomi New Testament

हीनी येशुगी रोरङ्‌गी ॱलोप्‍टुक् च्‍युन्‍नीबु दीबरङ् लोल भो़न हुब घयेत्‍ल ॱनो़प्‍प स्‍यीलोक्‍पोक्‍म घयेत् तो़न्‍न दीत् छुज्‍ये यो़प्‍प धङ् नज ॱनम्‍ब गज्‍येन् ढक्‍तु ची़त् छुज्‍ये यो़प्‍पे कवङ् ॱनङ बेत्। ॱनी ठीक्‍नल हुब च्‍युन्‍नीबी़ मीङ् दी गोम ॱएन्‍स्‍युक्‍म दी शीमोन् बेत्। ॱनी हुल यङ् मीङ् ॱयोङ्‌म पत्रुस् सीन्‍न अक् सीक्‍केन् बेत्। हुनी हुगी पी़न् अन्‍द्रीयस्, हुनी जब्‍दीगी भु याकुब् धङ् हुगी पी़न् युहन्‍ना, हुनी फीलीप्, हुनी बार्थोलोमै, हुनी थोमा, हुनी मत्‍ती गोलदर्, हुनी अल्‍फयस्‍की भु याकुब्, हुनी थेदीयस्, हुनी शीमोन् जेलोतेस्, हुनी खोङ् डलक्‍ल तोङ्‌गेन् यहुदा इस्‍करीयोत् हीजो़त् च्‍यीक् बेत्।

ॱनी येशुगी हुब च्‍युन्‍नीबुल हीन्‍दुक् सीन्‍न ॱङान तङ बेत्। खीत्‍रङ्‌सो ज्‍यी़त् ॱयोङ् ॱयोङ्‌गी मी च्‍याल मत् डो। सामरीयागी लुङ्‌बे सार् धङ् युगङ् घयेत्‍ल अक् मत् स्‍युक्। लुक् भत्‍त छ्‌यर्नर डस्‍सी झ्‍यीबे इस्राएल्‍की ज्‍यी़त् घयेत् च्‍यालरङ् ज्‍युक्‍च्‍यीत्। खीत्‍रङ्‌गी मी घयेत्‍ल ॱस्‍यो़त् गोगेङ्‌गी केच्‍च्‍य दी तेङ् यी़गी ज्‍यागक् ह ॱस्‍यच्‍चल ॱलीत् छर बेत् सीन्‍न ॱस्‍यो़च्‍च्‍यीत्। नेप्‍प घयेत् ढक्‍तु ची़च्‍च्‍यीत्। ॱस्‍यीनर घयेत् ॱसोम्‍बुल ॱलोङ्‌ज्‍यीत्। जीस्‍सो़ घयेत् ढक्‍तु ची़त्‍न चङ्‌मल सो़ज्‍यीत्। ॱनो़प्‍प अयेक्‍प स्‍यीन्‍न यो़प्‍प घयेत्‍नी हुगो तो़न्‍न दीच्‍च्‍यीत्। खीत्‍रङ्‌ल हीन्‍दुक्‍रङ्‌ल थोब दी हीन्‍दुक्‍रङ्‌लरङ् टो़च्‍च्‍यीत्। कीप्‍पल पयीसक्‍की ढङ् ॱसीर्, ॱङु, सङ् घन्‍ड हीन्‍न अक्, ॱमत् खुर्च्‍यीत्। जप्‍पेक् ॱमत् खुर्च्‍यीत्। ली़ज्‍ये नङ् घो़ ॱङी धङ् जुत्‍त ॱङी ॱमत् खुर्च्‍यीत्। तोक्‍लङ् ॱअङ् ॱमत् खुर्च्‍यीत्। घन्‍ड हीन् सीन्‍न लेमीयल सम थोप् ओ़ब युङ्‌गेन् बेत्। खीत्‍रङ् सार् धङ् युगङ् घल फीन्‍न आक्, हुदु ॱसी़ ओ़ब झ्‍यीगुक्‍क हुगी खीम् दीदु दो़च्‍च्‍यीत्। हुगी यु दीनी नम् थो़न् थो़न् थुक्‍ल हुदुरङ् दो़च्‍च्‍यीत्। ॱनी हुगी खीम् दील स्‍युक्‍पे यङ्‌ल खीत्‍रङ्‌गी हीदु स्‍यीव दीव युङ स्‍योक्‍च्‍यीत् सीन्‍न झ्‍यीज्‍यीत्। ॱनी हील ओ़ब यो़त्‍न ॱनी, हुबल दीव युङ्‌गेन् बेत्। ओ़ब मीत्‍न ॱनी, दीव दी खीत्‍रङ् च्‍यालरङ् लोक्‍केन् बेत्। खीत्‍रङ् घदु स्‍युक्‍को़दङ् हुगो सार् हीन्, खीम् हीन्‍न अक्, हुगी मी दीबे खीत्‍रङ्‌ल थोङ् ओङ् मत् झ्‍ये, खीत्‍रङ्‌गी तम्‍ल मत् नेन्‍न ॱनी, हुनी थो़न्‍न डोये यङ्‌ल खीत्‍रङ्‌गी जुत्‍तल ज्‍यरे थल दी हुबे थोङ्‌सदु दप्‍ल स्‍योक्‍च्‍यीत्। ङे खीत्‍रङ्‌ल गन्‍दीय ॱस्‍येत् योङ्। ठीम्‍ज्‍यो़क्‍की ङीङ्‌गी यङ्‌ल हुगी सार् हुल नोङ्‌गेङ्‌गी दुक्‍पले त सदोम् धङ् गमोराल फोक्‍पे छ्‌येप्‍प हुगो गुर् थेक्‍पा युङ्‌गेन् बेत्।

तेदे च्‍यङ्‌गु घयेक्‍की छीक्‍ल लुक् तङ डस्‍सी खीत्‍रङ् तोङ्‌गेनो। हीगो झ्‍यीनी डी़ डस्‍सी च्‍यङ्‌जो़त् झ्‍यीज्‍यीत्। पुक्‍मु डस्‍सी ॱयुङ्‌बोक्‍म झ्‍यीज्‍यीत्। मी घयेक्‍की छीक्‍तु खीत्‍रङ् च्‍यङ्‌जो़त् झ्‍यीन दो़च्‍च्‍यीत्। घन्‍ड हीन् सीन्‍न हुबे खीत्‍रङ् यरी सुङ्‌न ठीम्‍सल च्‍यो़गेन् बेत्। ॱनी यरील यङ् यहुदीगी छ्‌यो़गी छोगङ्‌दु डेङ्‌ज्‍यक् बेङ्‌गेन् बेत्। ङे ढीक्‍की केच्‍च्‍य यहुदी धङ् ज्‍यी़त् ज्‍यी़क्‍की मी घयेक्‍की ॱह घोज्‍ये यो़प्‍पल खीत्‍रङ् यरी ङे धो़ल्‍ल पेम्‍बु छ्‌यीम्‍मु धङ् ज्‍याबु घयेत् च्‍याल सुङ्‌न ठीक्‍केन् बेत्। हुबे खीत्‍रङ् सुङ्‌न ठीम्‍सल च्‍येन ॱनी, हुगी यङ्‌ल खीत्‍रङ्‌गी ॱसीम्‍ल घन्‍डे केच्‍च्‍य ॱस्‍यो़च्‍च्‍ये ब अक्? घन्‍दुक् झ्‍यीन ॱस्‍यो़च्‍च्‍ये ब अक्? ॱनो़न च्‍युगा ॱमत् खुर्च्‍यीत्। हुदु लप्‍च्‍येमे केच्‍च्‍य हुगी यङ्‌लरङ् खीत्‍रङ्‌ल ॱनङ्‌गेन् बेत्। घन्‍ड हीन् सीन्‍न हुगी यङ्‌ल ॱस्‍यो़क्‍केन् दी खीत्‍रङ् मेम्‍ब, यप्‍की थुगी खीत्‍रङ्‌गी खनी तम् ॱस्‍यो़क्‍केन् बेत्।
पी़न् नङ्‌दु च्‍यीक्‍की डल च्‍यीक् लोङ्‌न पी़न् च्‍यीक् ॱसो़त्‍तु ची़क्‍केन् बेत्। यरी भीजे डल पब, यरी फमे डल भीज घयेत् लोङ्‌न ॱसो़त्‍तु ची़क्‍केन् बेत्। ङे मीङ्‌गी ढीक्‍ल मी घयेत् कुरीक् खीत्‍रङ्‌गी डल लोङ्‌गेन् बेत्। ॱनी हीन्‍न अक्, स्‍युक् थम थुक् मी ॱसु थीरीय गुर्न दो़क्‍कुक्‍क हुगोल छी थर्व युङ्‌गेन् बेत्। सार् च्‍यीक्‍तु खीत्‍रङ्‌ल दुक्‍प अयेक्‍प तङ्‌न ॱनी, खीत्‍रङ् यङ् ॱयोङ् च्‍यीक्‍ल ढो़ल ज्‍युक्। ङे गन्‍दीय ॱस्‍येत् योङ्। इस्राएल्‍की सार् कुरीक्‍ल खीत्‍रङ् गीर् ॱमत् छरे यङ्‌ल कोलीमीगी ॱरेबु युङ्‌गेन् बेत्।
चयेलमले ॱलोप्‍टुक् खेबा मीत् युङ्‌गेन् बेत्। दक्‍पुले ॱयोक्‍पु छ्‌यीया मीत् युङ्‌गेन् बेत्। हीगो झ्‍यीनी ॱलोप्‍टुक्‍ल चयेलमजो़त् झ्‍युङल धङ् ॱयोक्‍पुल ज्‍यीन्‍दक्‍चो़त् झ्‍युङ्‌न युङल ॱलो दीय झ्‍यीज्‍यीत्। ढोङ्‌बे दक्‍पुल त मी ॱयोङ्‌मागी बाल्‍जीबुल् सीक्‍केल्‍ल ॱनी हुगी मीजङ्‌ल ॱसुम्‍ब हुले दुक्‍पा सीक्‍केन् बेत्।
मी घयेत्‍ल ज्‍यीब मत् झ्‍यीत्। हुबे घङ् बेन स्‍यक्‍प घयेत् थोङ्‌सल ॱमीत् तो़ङ्‌गी धो मीप्‍प बेत्। हुबे केत्‍मीत्‍ल झ्‍यीबे लेमु घयेत् घोगेल्‍ल मीत् सोगी धो मीप्‍प बेत्। मेन्‍नक्‍ल ङे खीत्‍रङ्‌ल घङ् ॱस्‍येप्‍प घयेत् खीत्‍रङ्‌गी मेङ्‌गल कुरीक्‍की ॱह घोसोङ् ॱसम्‍ब ॱस्‍यो़त्। ङे केत्‍मीत्‍ल ॱस्‍येप्‍प घयेत् खीत्‍रङ्‌गी केच्‍च्‍येल्‍ल खङ्‌दोक्‍की चीमुङ्‌नी ॱस्‍यो़त्। सी़बु हीगोरङ् ॱसो़त् छुगेन्, हुनी ॱसीम् दी यङ् खरप्‍ल तोङ् ॱमीत् छुगेन् घयेत्‍ल खीत्‍रङ् ज्‍यीब मत् झ्‍यीज्‍यीत्। बोर सी़ धङ् ॱसीम् ॱङीक्‍कर् ॱनलल जङ्‌न खरप्‍ल तोङ् छुगेल्‍लरङ् ज्‍यीब झ्‍यीज्‍यीत्। पेन्‍ज्‍यी ॱरीब छ्‌य च्‍यीक्‍ल हुगी रीन् दी सङ्‌गी टङ्‌ग च्‍यीक्‍रङ् सीक्‍केन् बेत्। ॱनी हुन्‍दुक् झ्‍यीब ॱनङ्‌ज्‍युङ्‌ल आक् त खीत्‍रङ्‌गी यप्‍की क मीत्‍न, हुब च्‍यीगी च्‍यीक् इक् ॱसल ॱमीत् छर्केन् बेत्। ॱनी खीत्‍रङ्‌सोल ॱसुम्‍ब खीत्‍रङ् रीदङ् रीगी गो़ टत्‍तोक् घयेत्‍ल अक् को़न्‍ज्‍योक्‍की ढङ्‌ज्‍युक् ज्‍यप्‍न यो़क्‍केन् बेत्। ज्‍यीब मत् झ्‍यीज्‍यीत्। पेन्‍ज्‍यी ॱरीब घयेत्‍ले त खीत्‍रङ् थोङ् छ्‌यीया यो़क्‍केन् बेत्।

मी घयेक्‍की घुङ्‌दु ॱसी़ ङ येशुगी मी हीन् सीन्‍न सीगुक्‍क हुल ङ अक् तेङ् यी़दु ङे यप्‍की ढुङ्‌दु हुगो ङे मी हीन् सीन्‍न सीक्‍केन्। ॱनी यङ् मी घयेक्‍की घुङ्‌दु ॱसी़ ङ ॱनी येशुगी मी मेन् सीन्‍न सीगुक्‍क हुल ङ अक् तेङ् यी़दु ङे यप्‍की ढुङ्‌दु हुगो ङे मी मेन् सीन्‍न सीक्‍केन्।
ङ जम्‍बुलीङ्‌ल स्‍यीव टो़त्‍तु युङ ब अक् ॱनो़गो़प्‍प न? ङ स्‍यीव टो़त्‍तु मेम्‍ब, ढी पदङ् टो़त्‍तु युङ हीन्। घन्‍ड हीन् सीन्‍न पबे डल भु, आमे डल भुमु धङ् ज्‍युक्‍मी़ डल ॱनम ॱलोङ्‌दु ङ युङ हीन्। हुन्‍दुक् झ्‍यीन ड दी खीम्‍गी मीजङ् नङ्‌नी लोङ्‌गेन् बेत्।
मी ॱसु ङले ॱल्‍हक्‍मा रोरङ्‌गी फमल धङ् भीजल ॱसीम् छ्‌याब झ्‍यीगुक्‍क हुगो ङे मी हीम्‍बल ओ़ब मीत् युङ्‌गेन् बेत्। मी रोरङ्‌गी कुरुस् खुर्न ङे लम्‍ल युङ्‌गेन् दीरङ् क ङे मी हीम्‍बल ओ़ब युङ्‌गेन् बेत्। मी ॱसी़ रोरङ्‌गी छील फङ झ्‍यीगुक्‍क हुगी छी दी तोर् डोगेन् बेत्। ॱनी यङ् ॱसी़ ङे धो़ल्‍ल रोरङ्‌गी छील फङ मीप्‍प झ्‍यीगुक्‍क हुल ॱङीत्‍न थोप्‍केन् बेत्।
खीत्‍रङ्‌ल थोङ् झ्‍यीक्‍केन् दीगी ङल अक् झ्‍यीबल डोगेन् बेत्। ॱनी ङल थोङ् झ्‍यीक्‍केन् दीगी ङ तोङ्‌गेल्‍ल आक् थोङ् झ्‍यीबल डोगेन् बेत्। कलुङ् ॱस्‍यो़क्‍केल्‍ल मी ॱसी़ हुगो कलुङ् ॱस्‍यो़क्‍केङ्‌गी मी बेत् ॱनो़ब ॱसम्‍न थोङ् झ्‍यीगुक्‍क हुगोल इगीनी मल्‍ल कलुङ् ॱस्‍यो़क्‍केङ्‌गी ॱल दी डस्‍सीरङ् थोप्‍केन् बेत्। ॱनी यङ् को़न्‍ज्‍योक्‍की मी ढङ्‌बुल ॱसी़ हुगो को़न्‍ज्‍योक्‍की मी ढङ्‌बु बेत् ॱनो़ब ॱसम्‍न थोङ् झ्‍यीगुक्‍क हुगोल को़न्‍ज्‍योक्‍की मी ढङ्‌बी़ ॱल दी डस्‍सीरङ् थोप्‍केन् बेत्। खीत्‍रङ्‌गी छीक्‍नी च्‍युङा च्‍यीक्‍ल मी ॱसी़ हुगो येशुगी ॱलोप्‍टुक् बेत् ॱनो़ब ॱसम्‍न छ्‌यु ढङ्‌मु फोप्‍प घङ् तीक्‍कुक्‍क हुगो बीम्‍बे ॱल दी हुगोल घनी इक् ॱमीत् थोप्‍की धो मीप्‍प बेत् सीन्‍न ॱस्‍येप्‍प बेत्।

Hallgasd meg मत्‍ती 10