Exutu 25
25
Ahno nekarotyã Ritonõpo Tapyĩ ritohme
(Exutu 35.4-9)
1Ynara tykase Ritonõpo Moeze a:
2— Izyraeu tõ zuruko tynekarory tõ enehtohme ya. Toto nekarotyã apoiko emero ekarory se aehtohkomo. 3Kure ynara ekaroryhtao: uuru te, parata te, metau te; 4kaneru hpoty earyme tyrise ahtao ezuezume te, puupura te, tahpiremano te; mauru panono te; kamisa poti hpoty risemy te; 5kaneru pihpyry tonohse tahpire ahtao te, okyno pihpyry kurano te; wewe akaxiame te; 6oriu, azeite nãparina eukurume, jahkatohme te; typoxine exiketomo azeite maro zoximatohme ahno popatohme te, jahkatohme roropa ixtaratu zahkatoh po typoxine exiketyme; 7topu tõ kurano, onixi te, imehnõ typyne exiketõ tyritohme Ritonõpo maro oturukety zupõ pokona. 8Tapyi Kurã tyripoko Izyraeu tomo a jesaryme ehtohme toto rãnao.
9— Omoro Moeze, moro tapyi tyripõko ase, itaõkõ maro, ynenepory sã oya.
Ritonõpo omihpyry eny
(Exutu 37.1-9)
10— Kaxo tyripoko wewe akaxia risemy, 1,10 meturume mosa exiry te, 66 sẽtimeturume ipuroroje exiry te, 66 sẽtimeturume kae exiry, enara. 11Uuru kurã ke moro kaxo apuhko zao te, jarao, enara. Ehpikuroko uuru risẽ tyriko roropa. 124me parihmã tyriko uuru risemy ipupuru 4mãkõ pokona, tyritohme asakoro seino, asakoro moino arotohme. 13Asakoro mara tyriko epurume, wewe akaxiame tapuhse uuru ke. 14Moro mara tõ tyriko moro parihmã aka kaxo ratozo ae asakoro. 15Moroto parihmã ao mara tõ inomoko, morohne onoupopyra exiko esary tõ poe. 16Topu risẽ asakoro ekarõko ase oya, ipoko ynyripohpyry tymerose mana. Morohne tyriko kaxo aka, jomihpyry ẽ aka.
17— Kaxo apuru tyriko roropa, uuru kurã risemy, 1,10 meturume mosa exiry te, 66 sẽtimeturume ipuroroje exiry, enara. 18Asakoro taporihke exiketõ tyriko, uuru tapitapĩse risemy, kaxo apuru etyhpyry tõ po. 19Toiro tyriko seino, toiro moino apuru etyhpyry tõ po kaxo apuru maro toiro kyryryme ehtohme. 20Tyriko toto osẽpataka aporiry tõ totapuruhmakase kaxo apuru epoe. 21Kaxo aka moro topu risẽ asakoro tyriko. Epona kaxo apuru tyriko. 22Moroto amaro oseporỹko ase, oturũko ase kaxo apuru epoe, taporihke exiketõ asakoro rãnao. Ynyripohpyry emero ekarõko ase oya Izyraeu tomo a ekarotohme.
Wyi apõ Ritonõpo ẽpataka
(Exutu 37.10-16)
23— Meza tyriko wewe akaxia risemy, ynara samo: 88 sẽtimeturume mosa exiry te, 44 sẽtimeturume ipuroroje exiry te, 66 sẽtimeturume kae exiry, enara. 24Uuru kurã ke meza apuhko. Ehpikuroko uuru risẽ tyriko roropa. 25Meza zomye ehpiry tyriko 7 sẽtimeturume, uuru risẽ roropa tyriko ehpiry zomye. 264me parihmã tyriko uuru risemy tyritohme meza poko ipupuru 4mãkõ pũtokoxi. 27Moro parihmã tyriko meza ehpio pũtokoxi mara tõ apoitohme, meza epurume, arotohme. 28Moro epuru tõ tyriko wewe akaxia ke, uuru kurã ke apuhko kehko. Meza arõko matose moro mara tõ poko. 29Uuru kurã ke paratu tõ tyriko te, kopu tomo te, paxiha tomo te, jaha tomo uwa eukuru eny, onekarorykõ kyryryme. 30Moro meza tyriko jomihpyry ẽ ẽpataka. Meza po wyi tõ tyriko kokoro rokene. Ynyripohpyry onekarorykõme ya.
Ezuru apony
(Exutu 37.17-24)
31— Ezuru apõ tyriko uuru risemy. Apõ tyriko uuru tapitapĩse exikety ke, zoko roropa. Ekuru tõ tyriko emeporyme te, potão tõ maro petara tõ maro toiro kyryryme ehtohme. 326me amoriry tyriko zoko poko, oseruao toiro eriety poko, oseruao zakorõ eriety poko. 33Toiro amoriry poko oseruao ekuru tyriko, amẽtoeira ekuru panono potão tõ maro, petara tõ maro. Oxisã amoriry tõ tyriko.
34— Ezuru apõ zoko poko 4me ekuru tõ tyriko amẽtoeira ekuru samo potão tõ maro, petara tõ maro. 35Asakoro amoriry zopino toiro potão tyriko amẽtoeira kyryry, oseruao potão tomo. 36Moro potão tomo te, amoriry tomo te, ezuru apõ zoko maro toiro kyryryme tyriko uuru risẽme, tapitapĩse exikety. 377me nãparina tyriko ezuru apõ po, saereme ehtohme ezuru ẽpataka. 38Jahpi tõ ezuru tõ aryry kyrytohme te, oruno kyryry roropa tyriko uuru kurã ke. 3934 kirume uuru kurã ke moro ezuru apõ tyriko ikyryry tõ maro emero.
40— Tomeseke roropa tyritohme emero ynenepohpyry sã oya ypy po.
Chwazi Kounye ya:
Exutu 25: apy
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
©2017, Wycliffe Bible Translators, Inc.