San Mateo 7
7
Jesús yachachin shuccunata mana juzganapa
(Lc 6.37-38,41-42)
1»Mana juzgaichichu shuccunata, Yaya Dios cangunatapas mana juzgachinamba. 2Astahua imasnami uchachinguichi shuccunata, chasnallatatami uchachitucunguichi; chaimanda imahuami tupunguichi, chaihuallatatami tupui tucunguichi. 3¿Imaraigutaya ricungui huauquiquipa ñahuimbi quihua pangata, astahua mana ricunguichu camba ñahuiquipi shuc atun caspi chimbacta tiyajushcanda? 4¿Imasnata rimangui huauquiquita: “Surcushara quihua pangata ñahuiquimanda”, cambi tiyajushpanga shuc caspi chimbacta ñahuiquipi? 5¡Yanga alitami rurajuni rimac runa! Surcui pundiru ñahuiquipi cajuc caspita. Chasna alita ricushpa surcunaiguipa huauquiquipa ñahuinmanda. 6Cangunaca mana allcucunata cuichichu Santo Yaya Diosta cushcata, nima cuchicunaraigu perlata huichuichichu, chasna rurashpaiguichica saru sarumi rurangacuna. Chaimandapas contrami cangunama rishpanguna canishpa liqui liqui cangunata rurangacuna.
Mañashpa cayai, tapui, mascai Yaya Diosta
(Lc 11.9-13; 6.31)
7»Tapuichi, Yaya Diosca cungami, mascaichi taringuichimi, cayaichi, punguca pascaringami. 8Astahua tucui maiganchari tapun, cuitucungami, mascacca, taringami, cayactaca, pascanchimi. 9¿Pita cangunamanda, huahuaiguichi panda tapushpanga, cun rumita? 10¿Mana cashpaca tapushpan challhuata, cun shuc machacuyata? 11Chasna cangunaca mana alicuna cashpaiquichipas, yachanguichi cunata huahuaiguichita tapushcanda, ¡astahua Papaiguichi cielopi causacca cungami alicunata maicanguna tapuccunataca!
12Chasna astahua, tucui munashcaiguichita runacuna ruranangunapa cangunaraigu, chasnallatata ruraichi cangunapas paigunaraigu, astahua chaidami riman leyca chaimanda profetacunapas.
Quichqui pungumanda
(Lc 13.24)
13»Yaicuichi quichqui punguta, anchu pungu chusha ñambimi apan huiñaipa huañuima, achcacuna yaicunaju chaiparti. 14Quichqui pungumi, ñañu ñambi huiñaipa causanama apan, chaidaca manami achcachu yaicunaju.
Rurajushcaiguimanda ricsi tucungui
(Lc 6.43-44)
15»Cuirarichi llullachic profetacunamanda, maicangunami shamunaju ricurishpa oveja mansushina, shungungunaca lobopashinami can. 16Canguna ricsinaiguichi tiyan millaipa ruranangunamanda, manami atipanchichu pallanata uvata cashamanda, nima higuta cardu cashamanda. 17Chasnami, tucui ali tarpuca alita muyuyan, millaipa tarpuca millaipatami muyuyan. 18Ali tarpuca manami atipanchu millaipata muyuyanata, mina millaipa tarpu muyuyanchu ali muyuta. 19Tucui tarpu mana muyuyactaca, pitishpa ninapi rupachinchi. 20Chasnami cangunaca ricsinguichi ruranangunamanda.
Yaya Diospa munashcanda ruraccunallami yaicungacuna cieloma
(Lc 13.25-27)
21»Mana tucui ñucata “Señor#7.21 Señor Riman Amuini., Señor” rimacchu: yaicunga reino cielopica, astahua yaicungami maiganmi Papaini cielopi cajucpa munashcanda ruran.
22Chai puncha achcacuna rimahuangacuna “Señor, Señor, ñucanchimi camba shutiquipi rimashcanchi, camba shutiquipi llucshichirganchi supaigunata. Chaimandapas shutiquipi achca milagrucunata rurashcanchi.” 23Chaibi ñucaca rimasha: “Mana ricsinichu cangunata. ¡Anchurichi ñucamanda, uchata rurashpa causaccuna!”
Parábola ishcai sami huasimanda
(Mc 1.22; Lc 6.47-49)
24»Maiganchari cai rimajushcainita uyashpan casun, paiga shuc runa ali yuyaihua huasinda rumipi shayachishcashinami can. 25Urmashpan tamya, undashpan yacu, sinchi huaira pactashpan; chai huasita mana urmachirgachu, sumacta rumipi shayachishca cashpan. 26Shuc parti rimani, maiganmi uyan cai rimashcainita mana casushpanga, paiga shuc runa mana yuyayu huasinda playapi ruracshinami. 27Urmashpan tamya, undashpan yacu, sinchi huaira pactashpan, chai huasica urman shicuacta.»
28Jesús rimashcan huasha, achca runacuna yachachishcanmanda chunlla pandachirishca quiparirgacuna, 29Jesús yachachipayarga quiquimba camachinahua mana escribacunashinachu.
Chwazi Kounye ya:
San Mateo 7: QUPN
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2025 AIDIA
© 2025 Seed Company