San Mateo 11
11
Juan Bautistapa rimashcata pasachiccuna
(Lc 7.18-35)
1Imasnapimi Jesusca tucuchijurga yachachinata paiba chunga ishcai discipulungunata, cacharga yachachinapa shuc llactacunama.
2Juan Bautista, carcelpi cajushpan, uyashpan Cristupa rurajushcanda cacharga paiba ishcai discipulungunata
3tapunangunapa: «¿Canchu cangui maiganmi shamuna cargangui, manacashpaca chapashunchichu shucta?»
4Jesús paigunata ainirga: «Cutichi chaimanda cuindanguichi Juanda tucui ima ricushcaiguichita chaimanda uyashcaiguichita.
5Huiscucuna ricunaju, cojocuna purinaju, leprayucunapas pichaitucushcacuna, sordocunapas uyanaju, huañushcacunatapas causachishca, chaimanda nima imayucunatapas rimashca caju yachanangunapa mushu ali rimashcaca Yaya Diosmanda.
6Cushilla canga maiganmi mana saquinchu quirinata ñucata.»
7Juamba discipulungunaca cutishcanguna huasha, Jesusca callarirga Juanmanda rimanata: «¿Imatata rirganguichi ricunapa allpa nima imayuma? ¿Shuc sinchi caspi huaira cuyushishcata?
8¿Imatata rirganguichi ricunapa? ¿Shuc runa chuyajlla churarishcata? Yuyarichi maicangunami churarinaju chuyajlla llachapata causanajumi reycunapa huasipi.
9¿Imatata cangunaca rirganguichi ricunapa? ¿Shuc Profetata? Quiquimbata rimani, ¡chaimanda Juanmi cashca astahua atun shuc profetamandapas!
10Paimandami caju quillcarishca:
“Ñuca pundaiguipi cachani ñucamanda rimacta,
Maiganmi alichanga ñambiquita.”
11Cangunata quiquimbata rimani: Tucui runacuna causashcacunamanda nima maigan astahua valicchu cashca Juan Bautistamanda. Astahua, maiganmi can astalla valic Yaya Diospa camachinambi canmi valic Juanmandapas.
12Juan Bautista predicanata callarishcan punchamanda pacha asta cunangama, Yaya Diospa camachinan cieloca parisin sinchita paida piñaric runacunamanda, chasna cashpambas riju sinchita mirashpa tucui parti, chaimanda paida sinchita piñaric runacuna munaju ursahua amuyanata.
13Tucui profetacuna chaimanda leycunapas rimashcacuna Yaya Diospa camachinanmanda, asta Juan shamushcacama.
14Munashpaiguichica yaicuchinata, paimi can Eliasca, maiganmi shamuna carga.
15Maigambami tiyan uyanangunaca uyanamba, uyachu.
16Astahua ¿imahuataya ricuchisha cai miraicunata? Ricurinaju huahuacunashina tiyarishpanguna plazapi chaimanda caparinaju paigunapa compañerongunata:
17“Uyachishpanchi flautata, cangunaca mana bailarganguichichu; candashpanchipas huañushcacunaraigu candanata, chaimandapas cangunaca mana huacarcanguichichu”.
18Astahua Juan shamushpan, nima micuc nima upiac, rimargacuna paibi tiyan shuc supaiga;
19Chai huasha shamushca Cielomanda camachishca Runaca, micuc upiac, chaimanda rimanguichi paida micuisiqui machaisiqui, amiguyac cullquita cobraccunata romaraigu chaimanda uchasapacunahuapas tandaric. Astahua runacunaca ricungacunami Yaya Diosmanda yachanaca cuscami can runacunapi tiyashpanga alicunatami ruranaju.»
Jesús piñarga mana casunayac llactacunata
(Lc 10.13-15)
20Jesús casna callarirga llactacunata piñanata maibimi rurarga achca milagrucunata, mana saquinayashpanguna ucha ruranangunata. Paigunata rimarga:
21«¡Candataya can, Corazín! ¡Candataya can, Betsaida! chasnallatata Tiropi chaimanda Sidonbi ruranchima carga milagrucunata imasnami rurashcanchi cangunaraigu, unaimi mauca llachapata churarishpa chaimanda umangunapi uchpata huicharishpa ricuchinajuma carga uchata saquishcangunata.
22Chairaigu rimani, juiciu puncha urasca cangunaraiguca castiguca cangami astahua yapa sinchi Tiropi chaimanda Sidómbi causacunamanda.
23Chaimanda can, Cafarnaún, maiganmi ataringui cielocama, urmanguimi Hadescama#11.23 HadescamaMaimami rin huañushcacunapa almangunaca. sambayashca. Chasna Sodomapi ruranchima carga milagrucunata imasnami rurashcanchi cambi, cunan punchacama causanajuma carga.
24Chairaigu cangunata rimani, juiciu puncha urasca, cangunaraiguca castiguca cangami astahua yapa sinchi Sodomamanda.»
Shamuichi ñucama chaimanda samaichi
(Lc 10.21-22)
25Chai uras, Jesús rimarga: «Cushichinimi, Papaini, Amuini camachic cielopi allpapipas. Tucui caigunata pacashcangui yachaccunamanda chaimanda acertaccunamanda, chasna ricuchishcangui huahuacunata.
26Ári, Papaini, chasnami munashcangui.
27Papainimi cuhuashca tucui imacunata, chaimanda nima maigan ricsinchu Huahuanda, Papanllami ricsin, nima maigan ricsinchu Papandapas, Huahuanllami ricsin, chaimanda maigandami Huahuanga munan ricsichinata.
28Shamuichi ñucama tucui canguna, maicangunami sambayacta tarahuajunguichi, ñucami samachishcaiguichi.
29Apaichi ñucapa yugüinita#11.29 yugüinita Caspi ishcai uchcu huihuapa cungambi churana tarahuanamba. cangunapa ahuaiguichipi, chaimanda yachacuichi ñucamanda, canimi mansu chaimanda mana valiric shungumanda pacha, chasnami taringuichi samanata almaiguichiraigu,
30ñucapa yugüinica atipaibami can, chaimanda ñucapa cargainica manami llashachu.»
Chwazi Kounye ya:
San Mateo 11: QUPN
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2025 AIDIA
© 2025 Seed Company