LUKE 24
24
Jisu Ringcuh kedi
(Mat. 28:1-10; Mrk. 16:1-8; Jhn. 20:1-10)
1Dede mtakkak zie raitu benai penui tingco kenuge marim kehengui penui telei kenzeu dung teu eh herau ga mie. 2Ge penui ntsube nlet mpet kedi ngau lu, 3dede penui pelung ga lüt ge pe paaube ngau lu tadi. 4Penui aide cet gailak eh kebam dau, ainie, mina hang na pai mzai liklik kecu bah lü penui tai ga sap di, 5ge penui kengngi le puih eh penui keu taksu pungkebam dau, cii kena de penui dade, “Daitei lu nnui ring kelabe de ketsaime kak ga pei lano? Pa aika bam meda, dede pa ringcu dai dida. 6#Mat. 16:21; 17:22,23; 20:18,19; Mrk. 8:31; 9:31; 10:33,34; Luk. 9:22; 18:31-33.Pa Galilee ga kebam dau dainzwa nnui dage rang beu bi nsung lulo, 7Mina Nabe de kemaume ba gage tui gaibeu kera nah gwak di eh lang cumne benai ring dai cu lu kera de,” debeu.
8Ge penui pe sam dung nsung dai lu, 9delü herau gade nli dai gwang aidung pelane pwa kereiket nah kedame pelane dage rang beu. 10Mipui apostleme dage sam aide rang kebeume Mary Magdalene, Joanna nah Jakob pui Mary nah mipui kedame dung de si; 11dede apostleme penui sam le kemta sam ge liedi, nah penui penui de nlum tadi. 12Dede Peter cuh lü herau ga pak gwang; pa keukei mie piege, linen kehezui pai gole makeda gede ngau ma. Cine pa ma cidung de ngau eh pesui gah eh kilung ga nli gwang di.#24:12. Laisiu kesa pedum 12 bam ma.
Emmaus ga Kegwang
(Mrk. 16:12-13)
13Cipau nai penui penui kak gade hang na Emmaus lie kecu renam ge Jerusalem gade mile kena ga kebam ga gwang la, 14nah penai ma aidung de tei kedi ha dung keresiu pwa la. 15Penai marang nah mpau kela dau Jisu penai de gwang mna lü nzang ladi. 16Dede peu penai mik de pecu ci lu tadi. 17Nah pa penai dade, “Nnai tet kegwang dau hang gege da rang kela dung de depai ha reki lano?” dedi.
Ge penai sap bam di, penai sui sia rak eh. 18Ge penai hang ge be pezi Cleopas pe sam keli eh cu, “Jerusalem ga kegwangme nang rünne cudau ma aidung de tei kedi ci kemak deha ai?” dedi.
19Ge pa penai dade, “Depai ah?” dedi.
Ge penai peda de “Nazarethme Jisu ha lie, aipau de caihakecime ge, pa Tinggwang nah mina pelane dwa de pe sam de nah bata de dih süt, 20anui gu cingku kedihme dung nah hangkiame pecu nim lü mmau eh teitset di lo mi ba gage kai beu, ciciu eh pecu gwak cet di. 21Dede anui Israel de ri lu kerabe da de eh, nlum gwang. I paucai de, aide tei kedi henai lang cumne zeuda. 22Cirünne mene, anui mame mipui dungge gwang, 23ge pe paaube ngau lu tadi; nah penui tinggimgwame rengei ngau eh penui dade pa ring dai lu delie beu lie caili gwang dai. 24Anui de ngngwa kela mina hang gede herau ga mie pie, ge pa mipui dung rang kebeu de nzwa ngausiak lu; dede penui pecu ngau lu tadi,” dedi.
25Ge pa penai dade, “Nnai dai mie mie no, nah caihakecime ma pelane rang kebeu dung de dai kenzwa gede nnui nlum gailak zing dino! 26Khrista ma aidung gade keherei eh pezi hecilu kerabe meni?” dedi. 27Nah pa kesanglaisiu gade Mosa gade gwang caihakecime pelane pe ha rangpwa kela dung de penai dage ranglia.
28Cidau penui penai gwang kela nam ga gwang mna di. Pa tet mdei si petcu, 29dede penai pecu kaam eh cu, “Anai de ngngwa bam di lulo, kedanemene cu tinghegi dida, nah tingbazie kekiee le gwang dida.” Cine pa penai de ngngwa bam di zie lie lüt lu. 30Pa penai de ngngwa matyei zie lie bam kelu dau, pa nku keupwa lü samlam gai delü cide tei pup lu, delü cide penai de peu. 31Ge penai mik mrak pet lü pecu ci lu, dede pa penai de peu pecu ngausi tadi. 32Ge penai ketket dade, “Pa lampuiki ga anai de mpau kela dau, pa kesanglaisiu gade anai de marang lia kela dau anai anai lung mine keru nzwa di meni?” dedi.
33Nah penai cipau bamdapkak gade tet dai pwa Jerusalem ga nli gwang; ge penai kereiket bau nah kedame dung de nkwa bam eh ngau lu, 34ge penui cu, “Rampaube ringcu dai di kesang da, nah Simon de peu ngau gaida!” debeu.
35Ge penai lampuiki gade depai tei dibi, nah nku tei pup kelu dau dainzwa penai pecu ci lu dibi kecu ranglia.
Jisu Pe Caisuime ze peu Pecu Kengau
(Mat. 28:16-20; Mrk. 16:14-18; Jhn. 20:19-23; Bat. 1:6-8)
36Penai aide rang kebam dau, Jisu penui kak ga sap lü penui dade, “Keyibe tei lulo”#24:36. laisiu kesa ga bam ma nah penui dage rang gai, “Keyibe tei lulo.” debeu.
37Dede penui de keheu di eh zing de bam di, nah penui marabe gede ngau zeu lie cet di. 38Ge pa penui dade, “Daitei nnui ngngi zeu no? Daitei nnui lunghau zeu no? 39A pi a ba pielo, delü cide I lie kecu ci lulo; acu deu eh pielo; kedanemene rabe au peteih pera ga, dede I au kebam nnui pie lulo,” debeu.
40Nah pa aide rang gai eh pa penui de pe pi pe ba pwalia.#24:40. Laisiu kesa ga pedum 40 bam ma. 41Penui ciciu de nlum luma, penui penui suiyi zu nah penui sui gah zu di; cine pa penui de keteu eh, “Nnui makeheibe de tyei kera aika bam ni?” dedi. 42Ge penui heka lang kelube ge pecu peu, 43nah pa cide penui mikngau gade tyeilu.
44Cipau cai pa penui dade, “Aidung de a sam, I nnui cu nnui de ngngwa kebam dau ge ranglia zeu, cide cii a ha Mosa zai gage nah caihakecime nah lei laisiukwak ga dungge rauteu kela pelane teicang megai lak,” debeu.
45Ciciu eh pa peu penui de kesanglaisiu ci lu kebui penui lung nkei beu, 46delü penui dade cu, “Khrista keherei süt eh pecai lang cumne benai ketsaime kak gade ringcu luzie; 47ciciu eh Jerusalem gade pe bangdua tei lü mina leune dung dage pezi gade helung nreu lulo kecu nah penui mau gi beudi delie kecu ledeu rwa zie, de kecu raupwa la. 48Nnui ma aidung de zierangme da. 49#Bat. 1:4.Nah ainie, I a Pei kai beuzie lie rangpwa kela de nnui dage lang gai beuzie; dede tinggim gade kenkieng ngau lu kemaktane renam namdibe ga bam lulo” debeu.
Jisu ze Ngngwa Tinggim Nghang kedi
(Mrk. 16:19-20; Bat. 1:9-11)
50 #
Bat. 1:9-11. Ciciu eh pa penui de ngngwa Bethany lebie gwang di, nah pa pe ba kena hwa cu penui de samlam beu. 51Pa penui de samlam beu kebam dau, pa penui dade tet di; ciciu eh pecu ngngwa tinggim hangh di.#24:51. Laisiu kesa ga bam ma nah pecu tinggim ga keucu di. 52Ciciu eh penui pecu reca eh penui suiyi süt eh tet Jerusalem ga nli gwang di, 53nah penui Kerecaki ga Tinggwang de twa eh bam di.
Chwazi Kounye ya:
LUKE 24: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.