LUKE 22
22
Jisu de Ngaukerau Ciem Kepeei
(Mat. 26:1-5; Mrk. 14:1-2; Jhn. 11:45-53)
1 #
Tet. 12:1-27. Ciciu eh Kahkegwang ngyi Tsehi kai mene Nku ru tyei kela Ngyi de mna gwang di. 2Ge cingkume nah laisiu kecime pecu nkim teitset di kera heciem pei bam di; kedanemene penui mina de kehing ne.
Judas Jisu ze Tuih gai kera Samkakkelu
(Mat. 26:14-16; Mrk. 14:10-11)
3Cidau Satan, Iscariot Judas lie kelabe kereikena bau hang ge lung ga lüt dige; 4pa mie cingkume nah roigwame reu kedihme dung de pa dainzwa penui de pecu tuihbeu lubui bi mpau. 5Ge penui penui sui lu nah rangkang pwa pecu peu zie lie samkak lu. 6Ciciu ge pa de pe lungning di nah mina maabe kega gade penui de pecu tui gaibeu kera peting keyi pei ladi.
Jisu Kahkegwang Ngyi ziemne Telei kecu
(Mat. 26:17-25; Mrk. 14:12-21; Jhn. 13:21-30)
7Cidau Tsehikaikemak Nku Ngyi tingba gwang di, cipau nai Kahkegwang meurünna pwa ratak teila. 8Cine Jisu Peter penai Johan de lang eh cu, “Gwang delü anui ziemne Kahkegwang ngyi telei lulo ciciu eh anui cide tyei kera,” debeu.
9Penai peda de, “Nang peu anai de cide daiga ge telei lai?” dedi.
10Pa penai dade, “Ainie nnai namdibe ga lüt de, mige duibung ge pwa eh nnai de dau zie; pa kemlüt ki de ga pecai sui nlüt lu, 11delü kilung mpaube dade, ‘Keledeube nda de keteu la, Daiga sangme bung bam no, I cika de a caisuime de ngngwa Kahkegwang ngyi de tyei kera?’ de rang lo beu. 12Nah ciciu de pa nnai de kibung nreuhbe kedi ge telei pwa kebamge sau beuzie; cika ge telei lulo,” debeu.
13Ge penai gwang di, ge pa penai de rang kebeu nzwa ngau lu; nah penai Kahkegwang ngyibe telei lu.
Rampaube ze Kensung Taktyei
(Mat. 26:26-30; Mrk. 14:22-26; 1 Ko. 11:23-25)
14Nah pe bamdapkak gwang dige pa apostleme de ngngwa taktyei bahm ga bam lu. 15Nah pa penui dade, “I keherei kecu dwa Kahkegwang ngyi aide nnui de ngngwa tyeineu süt la dida; 16kedanemene I nnui dage ranglia zie, cide Tinggwang hegwangram gade teicang lu kemaktane I cide tyei dai lakta.” 17Nah pa hepiak be keupwa lu delü Tinggwang de twa gai eh cu, “Aide pwa lü nnui mzi sak lo; kedanemene, 18I nnui dage ranglia zie, I cu gade Tinggwang hegwangram gwang kemaktane kubetsi dui aide sak lakta,” dedi. 19Nah pa nku de keupwa lü Tinggwang de twa gai eh tei pup lu delü penui de peu eh cu, “Aide a teih da, cide nnui ziemne kaikebeu deda. Acu kensung gade aide tei tei lo,” debeu. 20#Jer. 31:31-34.Cinzwa matyei kelu cai hepiak bede penui de pwa beu eh cu, “Hepiak aide nnui ziemne lwa kepet a jai gade samting samkak kelu kehecibe da,”#22:20. Laisiu kesa ga pecai Jisu sam lama Aide a teih delie pedum 19 ga, nah pedum 20 pelane. debeu. 21#Lei. 41:9.“Dede ainie, acu tui gaibeu kerabe au acu ngngwa matyei bam! 22#Lei. 41:9.Mina Nabe Tinggwang ne mrai riamteu kela nzwa tsai zie; dede co, pecu tui gai kebeube au tei lu buida!” dedi. 23Ge penui katei penui kak gade cau bene aide tei zie bi kecu ketket de keteu bam di.
Cau bene Di zie bi kecu
24 #
Mat. 18:1; Mrk. 9:34; Luk. 9:46. Cau bene dihtu zie bi kecu kesamlim kecu penui kak gade cuh di. 25Ge pa penui dade, “Tinggwang de ci kemakme kak ga peu kedihme dung de penui reu kedi teila; nah kenkieng teu kebamme de penui puipei teila. 26#Mat. 23:11; Mrk. 9:35. #Mat. 20:25-27; Mrk. 10:42-44.Dede nnui au ciciu lak; peu nnui kak gade dihtube de peu henah tube nzwa lu nah pe peu keteube de peu nküt pei nzwa lu. 27#Jhn. 13:12-15.Kedanemene cau be dihki no, bam eh matyei kebambe mi, mi pe gwa tei kebam be no? Bam eh matyei kebambe meni? Dede I au nnui kak ga migwa tei kebambe nzwa bam.”
28“Nnui a rei dung pelane ga acu ngngwa kebamme da; 29a Pei a ziemne hegwangbahm ge telei pwa kebam nzwa, I de nnui ziemne telei pwabam, 30cide peu nnui de a hegwangram gade a kaira gade acu ngngwa matyei masak kera, delü peu hegwangbahm dung ga bam eh Israel leuh kereikena tutiak kera.”#Mat. 19:28.
Jisu Peter pecu Meih kera Mrai kerang
(Mat. 26:31-35; Mrk. 14:27-31; Jhn. 13:36-38)
31“Simon, Simon, ainie, Satan ncu lu neu bam dida, ncu wheat de nzwa gui gai kerane, 32dede I peu n kenlum de kau di kelak ne n ziemne kie gaidi; nah nang mlung nreu gwang dai lu sangne peu n siname lung tei ntip lu kerane,” debeu.
33Ge pa peda de, “Rampaubo, I ncu ngngwa hebaangki ga gwang kera nah ketsai gade gwang kera telei luda,” debeu.
34Ge pa cu, “Peter, I nda ge ranglia zie, nang acu ci melie eh pia cum rang di kemaktane teziu nrui koa lak,” debeu.
Rangkang bung, Msung nah Qiengtie
35 #
Mat. 10:9,10; Mrk. 6:8,9; Luk. 9:3; 10:4. Pecai Jisu penui dade, “I nnui de peu rangkang bung mede msung mede picum pung mene langkegai dau nnui kenaang gede dau dini?” debeu.
Ge penui, “Magede ma” delu.
36Ge pa penui dade, “Dede cu au cau rangkang bung bam bi peu teu lu nah cinzwa nsung de. Nah cau pe qiengtie ga bi peu pecu pe pai zwa lü ket lui lu. 37#Isa. 53:12.Kedanemene I nnui de ranglia zie, kesanglaisiu ga raupwa kela aide ada de teicang maisia, ‘Nah pecu le hezai pungpang kelame de nzwa pei luda’ kedanemene a ha raupwa kelabe teicang lu muih kelane,” debeu,
38Ge penui cu, “Ainie, Rampaubo, aika qiengtie kena bam!” dedi.
Ge pa penui dade, “Cide yida!”#22:38. cide yida; mede aide cang da. debeu.
Jisu Olive Deutuh gade Kekie
(Mat. 26:36-46; Mrk. 14:32-42)
39Nah pa hegole mpet lü pezailui de nzwa olive Deutuh ga tet gwang di. 40Nah pa heni ga gwang cang luge penui dade, “Nnui kekedei ga lüt di melu kerane kie lulo,” debeu.
41Pecai pa penui dade tetpwa tsulien mdei gega pet eh kokdung lü kie eh cu, 42“A Pie, nang n sui lie cai aipau piak de ada de pwa nzia di lo; dede a suibe mene n suibe tei lu,” dedi. 43Nah cika tinggimgwame ge tinggim gade peda gwang eh pecu tei nkieng beu. 44Nah pa pelungrei teupung eh kie laikai teiki di; nah pe nlupdui hezai nzwa zau kideu ga miedi.#22:44. laisiu kesa ga pedum 43-44 bam ma.
45Nah pa kekie gade cuh lü ledeukelume da gwang ge penui penui lung keherei eh zip zeu eh ngau lu, 46ge pa penui dade, “Nnui daitei zip zeu no? Cuh lü kie lulo, kekedei ga lüt di melu kerane,” debeu.
Jisu ze Tuih Kelu
(Mat. 26:47-56; Mrk. 14:43-50; Jhn. 18:3-11)
47Pa marang bamreu kecune, mina maa ge gwang, nah minabe Judas, kereikena bau hang ge, ne penui de ngngwa gwang. Pa Jisu de kemam zie lie mna pet; 48dede Jisu peda de, “Judas nang kehemam gele Mina Nabe de tui gaibeu launi?” dedi.
49Nah pecu ngngwa kelame dung depai teilau bi kecu ngau eh cu, “Rampaubo, anui qiengtie le pwa bi zie mi?” dedi. 50Nah penui kak gade mige Cingku Kedibe kilabe de bi ge pe kwen zetle bi tüt di.
51Dede Jisu cu, “Aiciu si talu,” dedi. Nah pa pe kwen deu gai eh pecu tei myi beu.
52Cipau cai Jisu cingkume nah kerecaki kekwame nah hangkiame pecu tuih lu zie lie kegwangme dade, “Nnui qiengtie nah tsingpak pwa lü sütketyeime de tui kera nzwa gwang la nia? 53#Luk. 19:47; 21:37.I tingnai nsangne nnui de Kerecaki ga ngngwa bam de nnui ada ge nnui ba hwa gai ma. Dede aide nnui bamdapkak da; nah kemuibe kenkieng da,” debeu.
Peter Jisu ze Mlai Kedi
(Mat. 26:57-58,69-75; Mrk. 14:53-54,66-72; Jhn. 18:12-18,25-27)
54Ciciu eh penui pecu tuih lu delü ngngwa cingku kedibe ki ga gwang di. Peter kemdei gade pecai suila; 55nah mina dung kigu gage mi tei lü ntum togwa bam ge Peter penui kak ga bam lu. 56Cidau hegwa tei kebam puige pa cika kebaa ga kebam ngau eh pecu pie lü cu, “Mina aipau dede pecu ngngwa la” dedi.
57Dede pa cide mlai eh cu, “Mipoe, I pecu ci ma” dedi.
58Pecai ketie mene mige pecu ngau eh cu, “Nang penui hang ge” dedi.
Dedi Peter cu, “Minabo, I ma” dedi.
59Nah pecai bamdapkak ge dau migede cu, “Aipau dede pecu ngngwa la ciang da; kedanemene pa Galileeme gelu” dedi.
60Dede Peter cu, “Minabo, nang depai rang zeu bi, I ci ma,” dedi. Cidau zette, pa rang cang gailak kezeu ne nrui koah di. 61Nah Rampaube nreu gwang Peter de pei. Ge Peter Rampaube peda ge rang kebeu, “Heziu nrui koa kemak dwa nang acu pia cum mlai dizie” de kebeube sam de nsung lu. 62Ge pa hegole gwang hap süt bam di.
Jisu ze Henui tei nah Dap kecu
(Mat. 26:67-68; Mrk. 14:65)
63Mina Jisu de kwa kebamme pecu teu henui tei nah pecu dap. 64Penui pe mik hezuilü pecu keteu eh, “Ncu kezuhmbe de cau ah? Ci lu!” dedi. 65Nah penui pecu ngaukerau sam keda kekiee de rang.
Jisu Baudi dwa Kegwang
(Mat. 26:59-66; Mrk. 14:55-64; Jhn. 18:19-24)
66Ciciu eh tingbaa luge hangkiame, cingkume nah laisiu kecime nkwa lu delü Jisu de ngngwa penui nkwa ga gwang eh cu, 67“Nang Khristabe lie cai anui dage rang gailo” dedi.
Dede pa penui dade, “I nnui dage ranglia de, nnui nlum lak; 68nah I nnui dade keteu de nnui a sam keli lak. 69Dede cu gade Mina Nabe Tinggwang kenkiengbe ba zetle bam di zieda,” debeu.
70Ge penui pelane, “Nang, sui Tinggwang Nabe deni?” dedi.
Ge pa penui dade, “Nnui kerang sam de I da,” debeu.
71Ge penui cu, “Anui depai zierang teu si maisia ah? Anui cide pemui gade anui katei siu luda!” dedi.
Chwazi Kounye ya:
LUKE 22: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.