KENDEU 27
27
Isaac Jakob ze Samlam kebeu
1Cu au Isaac cing di eh pe mik sia di. Pa pe na kecingbe ze qu teugwang lü peda de cu, “A na!” degai.
Pa keli eh, “Hoiy” delu.
2Isaac rang eh, “Nang pie gailo I cing dida nah tsai zi dide lubui. 3N mpi nah heleitu pwa lü renaamkang mie a ziemne heteih qap lo. 4A ziemne I tyei keneu kenggum taktyei laang lu, delü ada teugwang beu lo. I cide tyei lü ncu I tsaikedi dwa a samlam kekambe peu zie” dedi.
5Isaac Esau ze resiu kebam dau Rebecca kingnei bam. Cine Esau heteih gwa zie lie tetpet ti ge, 6pa cu Jakob dade, “N pei Esau dade 7‘Acu makaune teugwang laang beu lo. I cide tyei lü I tsaikedi dwa Rampaube dwa de a samlam pwa ncu peu zie lie’ de kerang I siu” dedi. 8Rebecca rang si eh cu, “A na cu, kingnei lü I kerangbe tei lulo. 9Hemeu hau ga mie delü pelui keyibe kena teugwang lu, ciciu de I n pei tyei neu süt kecu laang beuzie. 10Nang pecu peu tyei kera cide teu peda gwang lu, ciciu de pa tsaikedi dwa pa pe samlam pwa ncu peu zie” dedi.
11Dede Jakob pe pui dade cu, “Nang Esau pe mai kekiee kauge kecu ci bam, dede I a mai gah. 12A pei acu tung gai eh I pecu cwa kecu ci luzie; aiciu eh I samlam mene reset ada ge kai dizie” dedi.
13Ge pe pui keli eh, “Ncu mmau eh kereset pelane peu a poi ga gwang lu, a na; I kerang nzwa tei lu, nah mie delü hemeu kena ada pwa gwang beu lo” dedi. 14Cine pa mie cii kena de teu peda gwang beu, nah pa pe pei tyei keneube malaang tyeilu. 15Ciciu eh pa Esau paiki lung ga kai kenzeu yitube dung keu lu, delü Jakob ze peu teu lu. 16Pa hemeu geu pwa pe ba kena nah pe gong pe mai kega ga dung reuge kai lu. 17Pa pecu taktyei tyei keyi de nah nku pa ru kelu dede si eh pwa beu.
18Delü Jakob pe pei da gwang eh cu; “A pei!” degai.
Pa keli eh, “Hoiy, nang a na cau be no?” dedi.
19Jakob keli eh, “I n na kecingbe Esau; nang ada ge rang kebeu nzwa I tei luda. Keherei de cuh bam lü I n ziemne pwa gwang kela heteih tyei lulo, ciciu eh nang acu samlam de peu lu kerane” dedi.
20Isaac cu, “Nang dainzwa cide ngau zette ludi ah, a na?” dedi.
Jakob keli eh “Rampaube Tinggwang acu ngha beu eh cide peei ludi” dedi.
21Isaac Jakob dade, “Keherei de gwang mna lu, ciciu de I ncu tung lu kerane. Nang Esau kesang deni?” dedi. 22Jakob pe pei ze mna gwang lu, ge pa pecu deu eh cu, “N koa Jakob koa nzwa, dede n ba kena au Esau ba nzwa” dedi. 23Pa Jakob ze ci lu tadi, kedanemene pe ba kena au Esau ba nzwa pe mai kebam ne. Pa pecu pe samlam peudi lai eh bam di, 24dede keteu dai eh, “Nang Esau kesang deni?” dedi.
Pa keli eh, “I da” debeu.
25Isaac cu, “Acu hemeeu kesa teugwang beu lo. I cide tyei kelu cai, I ncu a samlam peu zie”. Jakob cide peda teugwang beu, nah pa sak kera zau de si eh pecu teugwang beu. 26Ge pe pei peda de, “Gwang mna lü acu kemam gailo, a na” dedi. 27#Ibr. 11:20.Pa pecu kemam kera mna gwang gaige, Isaac pe pai rim nghui gai eh pecu pe samlam pwapeu. Pa cu, “A na rim kehengui de Rampaube samlam kebeu luh rim de nzwa da. 28Tinggwang ze peu tinggim gade hezin kai beu eh n luh dung peu malungh yi kelube tei lulo! Pecu peu ncu tak hezau peu kiee süt kelube tei lulo! 29#Ken. 12:3.Heleuh dung ze peu n kila tei lu, nah peu mina dung de n dwa keumie kelube tei lulo. Nang n kibaume pelane reu dih kelube tei lulo, nah n pui leuhme ze peu n dwa keumie kelube tei lulo. Ncu keresetme ze peu reset punglu, nah ncu samlam kebeume de peu samlam pung kelube tei lu” debeu.
Esau ne Isaac dade Samlam Kekie
30Isaac pe samlam pwapeu cang di, nah Jakob tetti kerikezi, pe swacingbe Esau heteih gwa la eh gwang siak lu. 31Pa de taktyei kenggum laang lü cide pwa pe pei da gwang. Pa cu, “A pei, keherei de cuh lü I ncu teugwang kebeu hemeeu tyei lulo, ciciu eh nang acu n samlam peu lu kerane” dedi.
32Isaac keteu eh, “Nang cau no?” dedi.
Pa keli eh, “N na kecingbe Esau” debeu.
33Isaac ncui nah pepum pelane mbeu di, nah pa keteu, “Cau ah, sui, mige heteih gih pung gwang acu kepeube de? Nang kegwang dwa siak dau I cide tyei luda. I pecu a samlam kekambe peu dida, nah cine cide kelungta pe gu dida” debeu.
34Esau aide siu luge, pa hap nteei süt eh cu, “A pei, acu de n samlam peu lo!” dedi.
35Isaac keli eh, “N sinabe gwang acu cwa dida. Pa ne n samlam dung luu teu dida” dedi.
36 #
Ken. 25:29-34. Esau cu, “Aide pa acu cwa kedi pia nabe dida. Pezi Jakob#27:36 Jakob: Aipau zi de Ibri gade “Kecwa” de kecu koa ge nzwa. kecu ma ketsam ge meda. Pa a kecing qwa luu teu di, nah pa cu a samlam luu teu di. Nang a ziemne samlam gede bangh lu me deni?” dedi.
37Isaac keli eh, “I pecu tei pwa n mpaube tei beu dida, nah I pe kibaume pelane de pe hebaangme tei beu dida. I pecu tak hezau peu dida. Cu I magede n ziemne tei lu kebui gah da, a na!” dedi.
38 #
Ibr. 12:17. Esau pe pei dade pe nggia kiebi eh: “A pei, nang samlam ket rünne bam ni? Acu e samlam beu lo, a pei!” Pa hap cuh di.
39 #
Ibr. 11:20. Ge Isaac peda de
“N ziemne tinggim gade hezin gede gah,
Luh pe deu keyi gede n ziemne gah.
40 #
Ken. 36:8; 2 Hg. 8:20. Nang n qiengtie teu n teilung tei zie,
Dede n sinabe baang tei lu.
Dede nang n zai sia kedi dau,#27:40. mlai; mede lungnaang cu kedi.
nang pe kehejeu kang gade mpet luzie” dedi.
41Esau Jakob ze nkau di, kedanemene pe pei Jakob ze samlam peu kedine. Pa kecet, “A pei tsit heei eh hap kera ting mna dida; ciciu de I Jakob ze teitset tizie” dedi.
42Dede Rebecca au Esau ciem siu luge, pa Jakob ze quteu peda gwanglü cu, “Kingnei lu, n swacingbe Esau ncu peei lü teitset ti lai zeuda. 43A na, I kerangbe tei lu. Haran ga a heibe Laban da kelwa miecu, 44delü cika kak ge pecu ngngwa bam dilu, n swacingbe rata nkung di kemaktane 45nah pa nang peda ge tei kegai nsung tadi kemaktane. Ciciu de I mide ncu ngngwa dai lu kera lang gai beuzie. Daitei eh I a na hang nana ze tingnai ge gage tei nggah di lulai?” dedi.
Isaac Jakob ze Laban dage Langkegai
46Rebecca Isaac dade cu, “I Esau nau sangpui dung ze ngau leeu dida. Jakob ze Hittime pui gede luu dai lu cai, I tsai de dilu buida,” dedi.
Chwazi Kounye ya:
KENDEU 27: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.