Mata 8
8
Yesu a rehza ɗala maa fagwalakw a heɗe aza
1A dəwze anta, Yesu a tadakw aza ata barla wese, hejəye vəram əy kasəbaraw. 2A təwse ca, ɗala wende aka, maa fagwalakw a heɗe, a nda mbermber ara Yesu, a gəleɓ a tama anta, aya, a zlepene a ŋgaya: «Bay naka, mada hwa káɗawza ca, hwa kula ŋ rehzekey aza.» 3Aya, Yesu a daɗ ra anta, a ca ata heje wese, a zlepene a ŋgaya: «Ayaw, sa káɗawza, reh ŋkwa.» A təwse a təwse, heje wese saɗ a saɗ anta ŋ fagwalakw anta wese. 4A dəwze anta, Yesu a zlepene a ŋgaya: «Teh zlam kadak kadak, hwa ɗaw ŋ zlepene ma anta ŋ kaw vayay səkwaw. Cemey, nda ŋ ghwalza ha ŋkwa ara mala kwakwas, aya, hwa valza səkan ma ata la kwakwas ana ma maŋkanaŋkan ma mala Musa a kaɗawaw, ndar hejəye əy san ca, hwa kásaɗ ŋkwa ŋ fagwalakw ŋkwa.»
Yesu a rehza mala zlan mala madakal sawje ege mala hayak Rawma aza
5Aya, maa Yesu a kadam ŋ uzam Kafarnahum ca, madakal sawje Rawma ege, a nda mbermber ara mbe, a jene mbahw. 6A zlepene, a ŋgaya: «Bay naka, mala zlan naka kéweneye a wata, a kadawar, mbəy kula ŋ həɓal kusam səkwaw, a kasa gef mambaza.» 7A təwse ca, Yesu a zenene, a ŋgaya: «Sa nanda ŋ rehza aza.» 8Cemey, madakal sawje ege wese, a zlepene zeney, a ŋgaya: «Bay naka, sa káhwas hwa dam a wata naka səkwaw, cemey, zlap ma ŋkwa teŋguleŋ ca, mala zlan naka a nereh. 9Sa ca, madakal ege ata ha naka aka, sa yam, sa ata ha sawje ege. Mada, sa zlepene ŋ sawje wende, sa ya: “Nda!” A nda. Sa zlepene ŋ wende zeney, sa ya: “Ndaha!” A ndaha. Sa zlepene ŋ mala zlan naka, sa ya: “La ana ebe ŋghe!” A la ana mbe.» 10Maa Yesu a zləme zlap mala madakal sawje ege wese ca, kéndəremzene aza, aya, a zlepetene ŋ hejəye ma kasəbar ege, a ŋgaya: «Sa kazlapahune njenjəwen, kaw sa kéndew ata ɗala maa lalam ŋ unaf anta aka ana ebe ŋghe ŋ hayak Əysərayəyla ca, askwaw. 11Sa kazlapahune njenjəwen, hejəye vəram, əy nandaha aka ta ŋ ata ladamha pes leŋ ta ŋ ata landav pes, əy nazam uda tewtew ata Əybərahəyma ey Əysəyaku leŋ Yakubu ŋ lazam Bay ma mgba ata uzlaf. 12Cemey, hejəye maa Gazlavay a mayata aza ŋ zam bay anta wese ca, əy nanahzata aza a bəza ŋ kuzle ɓekɓek. A təwse ca, əy nahan, əy naɓam zləɗeŋ.» 13Aya, Yesu a zlepene ŋ madakal sawje ege wese a ŋgaya: «Zen a wata. Səkan maa hwa ɗawza ca, a nala mavəday lalam ŋkwa.» A təwse a təwse, mala zlan mala madakal sawje ege wese, reh a reh anta.
Yesu a rehza man wala Pəyer leŋ hejəye ma kadawar ege vedəye
14A dəwze anta, Yesu a nda a wata Pəyer, a təwse ca, a ndaw ata man wala Pəyer kéweneye, mbəy werwer askwaw, hendərey kámbalza, kwahwaw ata kusam dakala. 15A təwse ca, Yesu a ca ra anta a heɗe, aya, dawar wese kes a kes anta a heɗe. Aya, perce a gwarzam, a lene səkan ta zam ŋ Yesu.
16Maa mackwahw kála anta ca, əy data hejəye vəram maa zəwet malula kámbalata aza ege ara Yesu. A təwse ca, Yesu a zlap ma anta teŋguleŋ, aya, a gamata zəwet malula ege aza, a rehzata hejəye ma kadawar ege wese aza tewtew tata. 17Ana ebe ŋghe, a law, ana maa Esaya mba ma zlap ma mala Gazlavay, a zlap, a ŋgaya: «Ara mbəy, ma ŋtaheje səkan ma kalaheje gef ege aza leŋ mbəy ma tewaheje dawar ŋtakwaw ege aza ata ha anta.»
Hejəye ma kaɗaw ŋ səbar Yesu ege
18Maa Yesu a gəre hejəye vəram, əy ketəwlek ka ca, a zlepetene ŋ malaɓ anta ege ŋ zlaŋ tata kəɗa aha bəza ŋtele. 19Aya, maghwal ma maŋkanaŋkan wende, a nda mbermber ara Yesu, a zlepene, a ŋgaya: «Bay naka, sa nasəbarahwaw kaw a katay ata la maa hwa kananda.» 20A təwse ca, Yesu a zenene, a ŋgaya: «A mbəyga ege ca, uley tata ege ma ata wan aka, vəgem ege yam, ujek tata ege aka, cemey, a Mba Ɗala ca, kaw la anta ma ata wan cekuɗe ende ŋghe ŋ zazak ca, askwaw.»
21A təwse ca, ɗala teŋguleŋ ŋ taba madarlaŋw anta ege, a zlepene, a ŋgaya: «Bay naka, pelzekey taf, sa nda ŋ mpas aza vana aza kwagwa may.» 22Yesu a zenene, a ŋgaya: «Səberekey, yakzata hejəye mamacamac ege, əy mampas mce tata ege.»
Yesu a garza bargadaŋ aka
23A dəwze anta, Yesu a tev anta ŋ kwambawal, aya, madarlaŋw anta ege əy səbaraw. 24A təwse a təwse, bargadaŋ a babar ata ŋtele wese a mazlazlay. Yam a paslawha, slaɓ ŋ kuɗapza kwambawal zlaɓa hejəye ma ŋma ege aza. Yesu ca, a kawan. 25Aya, madarlaŋw anta ege, əy nda ara mbe, əy fəɗahza, əy zlepene, əy ŋgaya: «Bay Madakal! Rehzaheje aza! Heje kakuɗap ŋtakwaw!» 26A təwse ca, a zenetene, a ŋgaya: «Hune lalak ca, mavəday vemey? Hune hejəye ma lalam parham ŋgha ege!» Aya, a gwarzam, a bebeczata ata bargadaŋ ey yam, a təwse ca, ɗekɗek əy nja ka. 27Hejəye tewtew əy kédeŋ ŋkwaɓ mambaza, əy zlap, əy ŋgaya: «Heje maa kaw ata bargadaŋ ey yam, əy ketehzene zlam ŋgha ca, ara vayay?»
Yesu a rehzata hejəye gbak, maa zəwet malula kámbalata aza ege
28Maa Yesu a zlaŋ anta aha bəza ŋtele, ŋ hayak Gadarena ege ca, hejəye vedəye gbak aka, əy damha aka ŋ jeɓ, əy nda ŋ ŋgelene ma. Hejəye anta ege ca, zəwet malula ege əy kámbalata aza, ara hejəye dadawar ege mambaza. Kaw ɗala kula ŋ nda ta ŋ taf anta səkwaw. 29Aya, əy ja ula, əy ŋgaya: «Mba Gazlavay! Hwa ɗaw ara nene vemey? Hwa ndaha ata la ŋgha ca, ŋ seney gef mpar aha vah maa Gazlavay a caza aka vaw?»
30A təwse ca, galdam ege vedəye aka vəram, əy gədak cekuɗe a tata, əy kampam səkan ta zam. 31Zəwet malula wese ege, əy jene mbahw ŋ Yesu, əy ŋgaya: «Mada hwa ɗaw ŋ gemeney aza ca, leɓzeney, nene damɓa ŋ galdam ma vəram ŋgha ege.» 32Aya, Yesu a zlepetene, a ŋgaya: «Hune nda!» A təwe ca, zəwet malula wese ege, əy damha aza ŋ hejəye ma gbak wese ege, əy dam ŋ galdam ege. Aya, galdam ma vəram wese ege tewtew tata, əy hehey ka mgba ata dawan, səɓet əy kway ŋ ŋtele, əy fətek tata tewtew tata. 33Maa hejəye ma kahəbar galdam ege əy gəre səkan ma laha anta ege ca, əy hey kəɗa ŋ uzam, əy slap səkan ma ndewzetene ŋ hejəye ma gbak ege maa zəwet malula kámbalata aza ege wese yam. 34Aya, hejəye ma ŋ uzam anta ege tewtew, əy damha, əy nda ŋ ŋgelene ma ŋ Yesu. Maa əy ŋgelene ma a ca, əy jene mbahw dakala, ma yekzetene uzam tata aka.
Chwazi Kounye ya:
Mata 8: BHS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2025 CABTAL