Mata 3
3
Laghwal zlap mala Yuhana ma la Baptəysma
1Ata vah wese ca, heje wende aka, zlam anta Yuhana, ma la Baptəysma, a ndaha ata darzlam ma ŋ hayak Yahudəya, a kaghwal zlap, 2a ŋgaya: «Hune bawzata lanja ŋkune ege aza, mavəday, lazam bay ma mgba ata uzlaf slaɓ.» 3Yuhana ca, ara ɗala maa Esaya, mba ma zlap ma mala Gazlavay, a zlap a heɗe zlezle, a ŋgaya:
«Ɗala a kaja ula ata damaw, a ŋgaya:
“Hune lemzene taf aka ŋ bay Madakal,
hune lamzata taf anta ege aka, gbar delele.”»
4Rəgwac ma ata kusam Yuhana anta ca, majaja a jukwaɗ ŋgaluba. Kájaw bəra anta aka a kanda mala lagwaw. Səkan ta zam anta ca, ata wayak ey ɓamam damaw. 5Hejəye ma ŋ Urusaləyma ege, ma ŋ Yahudəya ege leŋ ma ŋ uzam ma a ma lakwat Urdun ege tewtew, əy ndaha ara mbe. 6A təwse ca, əy ghwelzene gay tata ege, aya, Yuhana a banata a yam baptəysma ŋ lakwat Urdun.
7Aya, maa Yuhana a gəre Farəysa ege ey Sadukəy ege vəram əy kandaha ara mbe ŋ lem laban aza a yam baptəysma ca, a zlepetene, a ŋgaya: «Hey! Hune uzəye ŋkursla ege, ma ghwalzahune, hune nereh ŋkune ata laghwaɗ unaf mala Gazlavay ma kanandaha ata hune ca, vayay? 8Hune la zlan ma taŋtaŋ ege ŋ ghwalza ca, hune kábawza lanja ŋkune ege aza. 9Hune ɗaw ŋ deŋza a unaf ŋkune ege: “Əybərahəyma ca, ara jeje ŋcene ca, ga,” səkwaw. Cemey, sa kazlapahune, Gazlavay ca, mbəy kula ŋ bawzata ŋkəɗaŋ ŋghe ege aza ŋ uzəye Əybərahəyma ege! 10Jene késleye ŋ bal mpe a slaslalay anta. Ndaŋw mpe kaw vekey ma kambaw mba ma taŋtaŋ səkwaw ca, əy nabalza, əy nanahza ŋ kwahwaw. 11Sa ca, sa banahune a yam baptəysma gagaha, ŋ ghwalza ca, hune kábawzata lanja ŋkune ege aza. Cemey, ɗala ma kanandaha a dəwze naka ca, ɓardakw anta day aha mala naka, kaw sa káhwas ŋ pal serek ŋte ma ata ŋgas anta səkwaw. Heje anta ca, a nabanahune a Zəwet ma keweɗ leŋ a kwahwaw. 12Heje anta ca, mbəy zlaɓa taktərgwa ma ata mbeŋ ndərey ŋ kəlaŋ asa ra anta ŋ ɓezata ata yam ndərey ey təbekw. A nazahza ndərey aka ŋ tərgwa anta, cemey, a təbekw ca, a naŋkəɗawza ŋ kwahwaw ma kamac səkwaw kaw vepey.»
Yesu a lem laban aza a yam baptəysma
13Aya, Yesu a ndaha aka ŋ hayak Galəyləy, a nda ŋ lakwat maa ey kayaɓa Urdun, ara Yuhana, ndar a lem laban aza a yam baptəysma. 14A təwse ca, Yuhana kálamza askwaw, a zlepene a ŋgaya: «Karba sa ma kananda ara hwa, ndar hwa benekey a yam baptəysma eze ca, hwa ndaha ara sa vaw!» 15Cemey, Yesu a zenene, a ŋgaya: «Na ŋgha ca, lamza ana ebe ŋghe anta, ndar mama lene zlan ŋ Gazlavay ana maa a kaɗawaw.»
Aya, Yuhana a lamza. 16Maa Yesu a lem laban aza a yam baptəysma ca, a damaha aza a bəza. A təwse a təwse, bədaŋ, la ma mgba ata uzlaf a zlar, a gəre Zəwet Gazlavay ma keweɗ a katadakwha ana məyɗanak, a nja a heɗe. 17Aya, ula a jaha aka mgba ata uzlaf wese, a ŋgaya: «Ebe ŋghe ca, ara Mba naka maa sa kaɗaw mambaza, maa sa mayaw, a sasam.»
Chwazi Kounye ya:
Mata 3: BHS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2025 CABTAL