Matayo 18
18
Niji mgiru?
Mariko 9:33-37; Luka 9:46-48
1Ka madamo, vahina vekalita hodi Yesu eaha na kumlhaasu, “Ho niji emgiru kutakho vakhabuna he Udilao wa Kiumbi?” 2Yesu ekamse muinyi muwe mgitutu ekamuumati hasi na hasi kini, 3nau ekavaba, “Kweri nimubaya, mkusaakhwa saya muinyi mgitutu, temukabuu he Udilao wa Kiumbi.” 4Kira muhe ekukudimiri saya muinyi, niu emgiru kutakho vakhabuna he Udilao wa Kiumbi. 5Kira mhe ekudimiri saya muinyi kwa ilhe gho, enidoria ani.
Kulhiija vahe vasivata vahali kuboi makusa
Mariko 9:42-48; Luka 17:1-2
6“Mira muhe enemboi muwe waya vainyi venidarisha kuboi makusa, chidumuwe aorowe isaheru liyahi la kushaghia he waka kuu, naho abibiwe za he bahari.” 7Kharo giru jinevalitia vahe vaidi vero vahe vedarishe vaboi makusa. Ya mburi jidumuwe kulijanya, mira nivuhuye vugiru hehu veboi jilijanye. 8Kai muharegha kechi hile kusame kechi kukuboi uboi makusa, kute naho uubibi uda naari. Nikeba kubuu he uzime wa maaze makhabuna usilo muharegha hile kusame, kuro kusa na miharegha minu hile masame manu naho ukabibiwe he mwalha wa maaze makhabuna usiga. 9Naho kai iila kechi likukuboi uboi makusa, ling'ofule naho urelibibi uda naari. Nikeba he ari kubuu he uzime tulo iila iwe mira usibibiwe he mwalha wa bamuza ulo maila kechi makhabuna manu.
Mtotiano wa ialu lilahae
Luka 15:3-7
10“Wesiishani musimfwa neri muwe waya vagitutu, kwaite nimubaya, velo vazasughawa kini veaha sina ne Aba gho eaha are ana.” 11Kwaite Muinyi wa Muhe elitie kudaa hu chilahae. 12“Muakho kimomo? Chikukhwa muhe elo maalu igana iwe, na iwe likalakha, ho tekayaro hu mikado kenda na kenda he lubwa na kuso kuradaa ka iwe lilahae?” 13Nau ekuliakho, kweri namubaya etalhamuiwa kwa mburi yaka ialu iwe kuro hu maalu mikado kenda na kenda yeesilahae. 14Wato oto, Aba kaghu waare ana tedumu neri muwe heya vagitutu alaha.
Mbakhu kechi ekukuboia kikusa
15“Kai mbakhu kechi ekukuboia kikusa, so uremuaija ukusa kuu, wakune vanu bi. Kai ekukuko, unekhwa wamuakho kahali mbakhu kechi.” 16Mira kai tekakuko, so na muhe mhali muwe hile vanu kalo kira kiome chikowe ni vahe vanu hile vakai. 17Kai ekulhi kumulahonha, vabaie vahe vemdarishe Kiumbi. Nau ekulhi kuvalalhona ka vahe, muakhoni sa muhe esidarisha.
Kulhiija na kudumuija
18“Kweri nimubaiya, kira lo munelilhiija heidi linekhwa laalhiijwa naareana he Kiumbi nahu munekhwa mulidumuije he idi linekhwa laadumuijwa naare ana he Kiumbi.” 19“Kahali namubaiya, chikukhwa vanu hekune veneyo kigi nakuiseko heidi kwa mburi yo venelhawa, veneboiiwa ni Aba gho eaha are ana. 20Kwaite ho vebunguru hawe vahe vanu hile vakai kwa ilhe gho, ani niaha hawe navo.”
Mtotiano wa muhe esikaaya
21Niho Petro ekamliaha Yesu ekamlhasu, “Dilao mbakhu gho ekuniboiya kikusa kagi kame naani nimkaaye? Ho, neri kagi saba?” 22Yesu ekamba, “Umkaaye muaro neri ite ekukiriia kagi mikado saba.” 23Kwaite Udilao waare ana he Kiumbi utoiane ne dilao muwe edumue kuwesia nyamalo kuu ite iso kimomo na vanyamalo kuu. 24Arealholhoshi kuwesia nyamalo kuu, ekageriiwa muhe muwe elo iwero la mafumba erufu ikado ya zahabu. 25Kwaite ka muhe teelo neri cha kulhanu, dilao kuu ekaba adidiwe u salaghe sa mhaye na mlage kuu na vainyi kuu na vigi vikhabuna vyo elo navyo kalo iwero lilhanuwe. 26Kwato, hu mnyamalo ekammaiya mamuro nakumgogo ekumba, nikulhawa ronga niro ninekulhanu iwero kechi ikhabuna. 27Hu mgiru ekamwakhoiya mbalamija, ekamkaaya hu iwero naho ekamro agale. 28Mira ka mnyamalo ekaiwe iwero areali gahana, ekasahe na mnyamalo muaro emuambale magongolo igana. Ekamdara, ekamfufa hewaka ekumba, nilhanu iwero gho. 29Ka mnyamalo muaro kuu ekama mamuro nakamgogo ekuba, “Nikugogo urongeniro ninekulhanu iwero kechi ikhabuna. 30Mira u ekalhi, ekarambutu he igereza sari ekunelhanu hu iwero. 31Vanyamalo vahali vareakho ka mburi vekasanuishwa, vekaso kurambaiya mgiru kini ka mburi khabuna jilijanye. 32Niho hu dilao ekamse ka mnyamalo ekamba, ‘Ari umnyamalo mkusasha. Weenigogoe nikakukaaya iwero kechi ikhabuna. 33Ho, techeekukudumu naari umkoe mbalamija mnyamalo muaro kechi sacho nikukoie mbalamija ari?’ 34Kwato, hu mgiru ekasanuishishwa, ekambutu heigereza kalo akharotijwe sari ekunelhanu iwero ikhabuna. 35Ya nicho Aba gho eaha are ana he Kiumbi enemboia kira muwe kaghu ikukhwa muwe kaghu tekamkaaie mbakhu kuu kwa swaho kuu khabuna.”
Chwazi Kounye ya:
Matayo 18: NTMBL2025
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The New Testament in Mbugu @The Word for The World International and Mbugu Language translation, 2025. All rights reserved.