Ichedendik 20
20
Abraham ọmaana Abimẹlẹk
1M'ogbese nwa, Abraham obina orik Mamrẹ, ozenga ochina z'ẹbhaakẹ ch'Nẹgẹv, od-oruk ny'njeka kw'Kadẹsh ọmaana Shur. Oninga ny'Gẹra k'ogbe biribirẹ. 2Nya wọ kw'otek anọng bẹ́, Sara ode ọgbaanotte kwẹ. Ofona nya o, Abimẹlẹk kw'ode ọvaarnọng kw'Gẹra ọtọhm bẹ́, mayerẹ Sara anang-ẹ.
3Okenaka, k'orungiwu wanẹ, Ibinọkpaabyi oyin okebha Abimẹlẹk k'ọda, oben-ẹ bẹ́, “Kọ kk'opupe apa e, okurọ bẹ́, kwanọng nwo kw'atọk nya, kk'odim ọba.”
4Ny'ogbe nwo, Abimẹlẹk ọmaana Sara m'ifor atima abhina. Ofona nya o, ọbọbh Ibinọkpaabyi bẹ́, “Ọvaar Ibinọkpaabyi, ma, ọbaan za bẹ́, akibhẹ ẹkọma ch'mbọhk sẹ iwur-owur o? 5Abraham ny'ikẹ k'ifor otek-m bẹ́, Sara ode ọgbaanotte kwẹ. Sara oyenẹ obir otek-m bẹ́, Abraham ode ọgbaanotte kwẹ. Ettem chaam ọmaana achibhẹ paam made bẹ́ ttaan.”
6Ofona nya, Ibinọkpaabyi oben Abimẹlẹk k'idachen bẹ́, “Iye, kaam kk'nzonga bẹ́, odik nwa k'ẹyaaka kasi. Ofona nya, mkpọ-ọ eden bẹ́, aning epyibha asi k'ikaam k'ititika. Kẹ wọ osi pira kìmbir nchera bẹ́, ayim-ẹ ábẹ̀. 7Tera tte kwanọngnwa ọbọhk ọkpa nnam z'odim. Odim kwẹ ode ọgbaak-ettem ch'Ibinọkpaabyi. Kẹ m'oze njọm ọnang-ọ ọfha, aruk akpen. Okenaka, óde ina Sara ọbọhk atte ọkpa nnam z'odim, zonga bẹ́, kọ ọttara anọng pọ maphyir, mm'ape.”
8K'ekpikpebha ch'ewu esobh, Abimẹlẹk oyerẹ adidennọng pẹ maphyir, otek bẹ odik kw'oyinẹ maphyir. Ojora osi bẹ mawuriji. 9Pira Abimẹlẹk oyerẹ Abraham, ọbọbh-ẹ bẹ́, “Bọng-odik wọ kw'asi mina ma o? Mpin-ọ yen, kw'awọhkọ odik katamse nwa anang-m ọttara ọvaarbhon kwaam o? Ọttọhk f'asi anang-m ma, kọbaan.” 10Abimẹlẹk ochina ororo, ọbọbh Abraham bẹ́, “Bọng-ọttọhk f'azeng ábẹ̀ asi-m odikse nwa?”
11Abraham ọpọhn-ẹ bẹ́, “Kaam osi-m bẹ́, anọng p'obhon nwoma, m'opoma f'Ibinọkpaabyi kayen, mbir nchibhẹ bẹ́, mm'afhọ-m okurọ kwanọng kwaam. 12Obir ode k'odik ọkkọkka bẹ́, otte mawanẹ wọ obhonọ mina, za wura mọkọm abakka. Kaam ntọk-ẹ mach'kwanọng kwaam. 13K'ogbe kw'Ibinọkpaabyi osi-m mbina nrik oter kw'atte kwaam mkpaanga k'ibyi k'ibyi, mben Sara bẹ́, minna kw'mad-atima akọhk-m ọdaakẹ kwọ: k'ibyi kpenamkpen s'im'opyirẹ, tek anọng bẹ́, kaam nde ọgbaanotte kwọ.”
14Nya o, Abimẹlẹk ọtọka arọkimaan ọmaana adamogbodo, ọmaana abira p'ejinọng, ọttara p'ẹpanọng, ọnang Abraham, obir otte Sara ọbọhk, ọnang-ẹ. 15Abimẹlẹk oben Abraham bẹ́, “Kirẹ izek saam jọ ining-ọ m'ititika, ruk k'ibyi kpenamkpen s'idaak-ọ.”
16Abimẹlẹk obir oben Sara bẹ́, “Kaam m'nnang agbaanatte ashẹkẹl p'silva nnọhna mfa okwuma arọbh ijobh; ọfha otima odimẹ odik nwo z'ititika s'anọng mbo p'aning amaan-ọ. Minna wọ im'ọkọhka bẹ́, epinẹ kpenamkpen kàsi.”
17Nya o, Abraham oze njọm ọnang Abimẹlẹk, Ibinọkpaabyi okwu obina ọnang Abimẹlẹk, ọmaana kwanọng kwẹ, ọttara abirapanọngva pẹ, mfha mabir akpo ọmaan asi, 18okurọ bẹ́, wa Ibinọkpaabyi kk'Sara, kw'ode kwanọng kw'Abraham ozenga ábẹ̀ osi ẹsọhmmọr ch'Abimẹlẹk ẹkpaana.
Chwazi Kounye ya:
Ichedendik 20: mfn-x-ad
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
©️2025 West Africa Christian Mission