Ichedendik 19

19
Mpyibha s'anọng p'Sọdọm
1Okwu opyirẹ ny'ẹsọhka, azeng-eden mbo afa p'Ibinọkpaabyi mapyirẹ ny'Sọdọm. Ny'ogbe nwo, Lọt oning ẹwọr ny'ebhumma ch'obhon. Oze bẹ nya o, obina, ozenga okebha bẹ za, ọraka eso otwu ititika ny'izek k'ekpukamaana, ọnang bẹ. 2Oben bẹ bẹ́, “Ab'ttatta, ototo, makwuna k'ọsọhm kw'ọtọhmnọng kwabọnga, mfha m'agbobhọ mmo, mabira abhing nya. Ewu esobh k'ekpebha, mabina ozenga kwabọnga.”
Akikennọng mbo nkacher, maben bẹ́, “Ttophyẹrẹ, mina mm'oyima z'ẹbhaama m'erungọ.”
3Okenaka Lọt ochina ororo okwukọ bẹ maa, pira nnacher bẹ mator-ẹ mad-abhung z'ikẹ k'ọsọhm. Mapyirẹ za o, Lọt osi ọchattọhk ọnang bẹ, obir osi brẹd kw'ina obibir d'obir, machi. 4M'okwu opyirẹ k'ogbe kw'mmin'anwa, ajinọng p'Sọdọm maphyir, makwu nya, adikkobh ọttara ataminọng p'afon k'akpaarẹ maphyir p'ebhondim ndo, makwu akọbha ọsọhm nwo ake k'ettem.
5Minna kw'mawon Lọt, maben-ẹ bẹ́, “Ajinọng mbo p'asak-ọ m'erungọ nda kẹ? Tọka bẹ nang mina moyima bẹ ábẹ̀.”
6Lọt oyin z'iyaan okebh bẹ za. Obhen akikennọng mbo ọmma z'ẹtaanga, 7oben bẹ bẹ́, “Abayi, ototo, m'itamase nja kàsi. 8Kaam nyena aminava afa ka p'nna ojinọng atima azonga. M'ntte bẹ ọbọhk nnang bọnga, mfha masi bẹ k'ose kw'ọdaakẹ bọnga. Ṉ́nòde ajinọng mba, ototo, màtte bẹ ọbọhk, kirẹ bẹ made akikennọng p'asak-m ọsaka e.”
9Maben Lọt bẹ́, “Bhonga mina eden. Kọ nwa kw'ade okikennọng, kọ min'akwu ade ọkpaar-aponga? Í̱na mina eden abhong, f'mm'ọsọ-ọ, m'opyibh ọyọhnga fabẹ.” Minna kw'anọng mbo achin ororo make Lọt eso, marima k'ose kw'mm'avọhkọ ọmma. 10Okenaka, ajinọng mbo p'aning z'ẹtaanga, manemẹ ọbọhk, matọr Lọt atima adim z'ọsọhm, mabhen ọmma. 11Pira nnasi ajinọng mbo maphyir p'abe ny'ẹsọhmma, adikkobh ọmaana ataminọng, makpa achen, mfha maning ọdọk eden ch'ọmma azong.
Ebina ch'Lọt z'Sọdọm
12Nya kw'akikennọng mbo afa mabenẹ Lọt bẹ́, “Ma, ayen anọng ọdọk ọdọk z'ebhonmọr yirẹ, mach'anyẹ, ọmaana ajinọngva, wanẹma aminava? Tima bẹ bina ma, 13okurọ bẹ́, min'okibhẹ obhon nwoma maphyir. Ọvaar Ibinọkpaabyi kk'ọbhaanga ose kw'anọng p'obhon nwa mazeng apyibh. Kẹ wọ osi ọtọhm mina bẹ́, mokwu okibhẹ obhon nwoma maphyir.”
14Minna kw'Lọt oyin k'iyaan, od-okebha ajinọng p'arọkọ aminava pẹ, oben bẹ bẹ́, “Màbina ẹbhar-ẹbhar, mọrọbh orik obhon nwa. Kirẹ Ọvaar Ibinọkpaabyi min'okibhẹ obhon nwoma.”
Ajinọng mbo p'arọkọ aminava pẹ osi bẹ bẹ́, Lọt osi olokọ.
15Ch'ewu min'esobha, azeng-eden p'Ibinọkpaabyi mabhọkọ Lọt bẹ́, “Tima kwanọng kwọ, ọttara aminava pọ afa p'aning ma, rọbh rik obhon nwa ẹbhar-ẹbhar. Ína minna ode, ekibhẹ ch'obhon nwa m'ẹbọka kọ ọttara.”
16Ch'Lọt okibhẹ ogbe kidaam o, azeng-eden mbo mabọka kẹ ọmaana kwanọng kwẹ, ọttara aminava pẹ afa ny'mbọhk, matima bẹ bẹ́ bẹẹẹm mabina ny'obhon nwo, okurọ bẹ́, wa Ọvaar Ibinọkpaabyi oyen ikwosisi ọmaana bẹ. 17K'ose kw'matim bẹ ayin k'iyaan nya, ọnọng wanẹ ny'azeng-eden mbo, oben bẹ bẹ́, “Màrọbh k'ose kw'mm'akkaana akpen pabọnga. M'nnam kàbhakẹ o! Nk'ibyi kpenamkpen ny'ẹkpẹmẹ kàbir akpọka o. Màrọbh china z'agbe, ína minna ode, mm'ataang bọnga maphyir afhọ.”
18Okenaka, Lọt oben bẹ bẹ́, “Mma o, ab'ttatta paam, ototo, 19bọnga nkk'ọphyaam fiden asa anang-m, mabir asok-m akpen. Kaam mìmkpo nrọbh mpyirẹ z'agbe. Ó̱de njaar, itama nja m'ibọk-m k'eden, kaam m'mbir mpope. 20Màkirẹ ebhonva dọ ẹnyọm ma. Tte nrọbh nchina nya, ọfha nyena ẹnaanga.”
21Ozeng-eden nwo oben-ẹ bẹ́, “Ojibh-ojibh. Kaam m'nsosi k'ose kw'aphyem-m ma. Obhon nwo kw'agbaak odik amaana mìnkibhẹ. 22Màsẹr-ọsẹr tima ẹbhar china za. Kaam ọttọhk kpenamkpen mìnsi maa, bọnga mapyirẹ ny'obhon.” Kẹ wọ osi pira mayerẹ obhon nwo bẹ́, Zoar#19.22 Zoar oyinẹ bẹ́, obiribirẹ..
Ibinọkpaabyi okibhẹ Sọdọm ọmaana Gọmọra
23K'ogbe kw'Lọt ọmaana anọng pẹ, nnapyirẹ z'Zoar, ode ch'ewu ikk'ẹnyaana. 24Ny'ẹmma ndo, Ọvaar Ibinọkpaabyi oninga z'ẹrọng ọtọhm ata p'awọm ekpon ny'Sọdọm ọmaana Gọmọra. 25Minna kw'Ibinọkpaabyi otim ekpon okibhẹ ibhondim njo, ọmaana ẹkpẹmẹ ndo k'ibungọ. Obir ọfhọ ayokinọng maphyir p'arukọ ny'ibhondim njo, ọttara ekpo maphyir py'emenẹ ny'izek njo.
26Okenaka, kwanọng kw'Lọt ọbhakẹ nnam. Minna kw'ọbhakẹ ozeng enung-takpa ch'ebe bẹ́ pyirr.
27Ny'ekpikpebha kw'owusobha, Abraham ọpọm ochina za ch'wendo obe ọgbaak odik ọmaana Ọvaar Ibinọkpaabyi. 28Okkerẹ z'ẹbhaakẹ ch'Sọdọm, ọmaana Gọmọra, ọttara ozek f'ẹkpẹmẹ ndo. Oze izizong s'ikk'idabha bẹ́ gwẹk, ipyi ewu bẹ́ kkang.
29K'ogbe kw'Ibinọkpaabyi kk'ibhondim njo s'ẹkpẹmẹ okibha maphyir, ojima Abraham. Ọrọbha Lọt ny'itama njo s'ikpẹkẹ ibhondim njo s'iwa Lọt orukọ.
Ẹtọma ch'Moab ọmaana Ammọn
30Wa Lọt ojor-ẹ ojora bẹ́, oruk ny'Zoar. Ofona nya, otima aminava pẹ afa, obina ochina z'agbe, mad-aruk k'ọtakpamma wanẹ.
31Otum k'ewu danẹ, ochedennwa kwẹ oben oyok kw'ikarẹ bẹ́, “Atte kwamina kk'ọtama. Ojinọng ọdọk-ọdọk ma kode kw'im'oyima mina ábẹ̀, k'ose kw'ẹmmaana ch'iyagbin maphyir ede. 32Tte mọnang atte kwamina atuk ogwo maa, masẹ-ẹ k'ose kw'mm'oyima ọmaan-ẹ, ọfha ofona ny'ikẹ, echimma chamina ening edimẹ.”
33Otum ny'erungọ, manang otte atuk, ogwo maa masẹ-ẹ. Ochedennwa nwo odim okebha za, od-oyima ọmaan-ẹ. Otte ogbe kozong kw'nnwa kwẹ okwu oyima nya, ogbe kobir ozonga kw'obin orik-ẹ nya.
34Ewu esobh nya, ocheden nwo oben oyok kw'ikarẹ bẹ́, “Chena k'erungọ nyim mmaana atte kwaam. Tte mobir ọnang-ẹ atuk m'erungọ maa, masẹ-ẹ, k'ose kw'ikọ mabir ayima amaan-ẹ, ọfha ofona ny'ikẹ, echimma chamina ening edimẹ.”
35Minna kw'mabir anang otte atuk ny'erungọ maa, masẹ-ẹ, oyok kw'ikarẹ obir odim od-oyima ọmaan-ẹ. Otte ogbe kobir ozonga kw'nnwa kwẹ oyim ọmaan-ẹ, ogbe kobir ozonga kw'obin orik-ẹ nya.
36Minna kw'uwa panọngva mbo afa p'Lọt mazeng atima ibhọr s'otte kwabẹ oke bẹ. 37Ochedennwa nwo ọmaan ojinọngnwa, ọkpẹ-ẹ, Moab. Nnwa nwo wọ ode otte kw'anọng p'Moab nda. 38Oyok kw'ikarẹ obir ọmaan ojinọngnwa, ọkpẹ-ẹ Bẹn-Ammi. Kẹ wọ ode otte kw'anọng p'Ammọn p'aning m'iyagbin maa, pyirẹ menda.

Chwazi Kounye ya:

Ichedendik 19: mfn-x-ad

Pati Souliye

Pataje

Kopye

None

Ou vle gen souliye ou yo sere sou tout aparèy ou yo? Enskri oswa konekte