Ruta 2
2
Ruta njèy njí Bowaz ngá nza ó
1Nawumi tdè ndèy làyi nà kpatss̀ màdhí ngá nga-là djò. À tdè bíy ndèy thokpa ó ddiy nà nì li ndèy ró dho drr̀ nì, ndèymí à tdè Alimalek màdhí-ngá pbúw ó li, à ró dho tdè Bowaz. 2Ddì nì ddu ó, Ruta cha ndèy tdè Mowab síngba nì tdrà Nawumi dho, “Bba ma rǎ ngǎnù gùw cha ma rà lǎnínga chùw ndèy nyú djú nì li ngá nza òluw ì nì ngǎnù tsǐ nì ndrǔ bbà nì.” Nawumi kâ tdrà à dho, “Njey fǔchú, màtsá dhànì.” 3Fú ddiy dhò Ruta rà rúgò ndèymí à lòw nza ó ndèy mà nì ngǎnù gògò gùw cha ì tdè ngǎnù tsǐ nì bbalè dzzdjú. À njèy ndèy, à chùw ndèynì njí njěy Bowaz ngá nza ó cha ndèy tdè Alimalek màdhí pbúw óddù nì li.
4Fú nga dzzdjú, Bowaz ndèy rónga nà kâ shì Betelehemu mí bba óddù ndèymí à kâ ì nì ngǎnù tsǐ nì bbalè rónga zù, “Ddrǒngóli déy nyì nà!” Ndrǔ kâ lò-dzzdjò ngù.
“Ddrǒngóli bbú nyi dhò bû!”
5Bowaz kâ ndèynì fú njí-djá djúnga njǎ nì nokpa dhiy, “Áyì mí dhànì ní ndey?” 6Ndèy nì fú nza ó njí-djá djúnga njǎ nì nokpa kâ lò-dzzdjò ngù, “Fú nì Mowab-síngba cha ì ngû Nawumi nà Mowab mí dziylíy óddù nì. 7À tdrà, ‘Krŕ-krr̀, ma bbǎ ndèy bbíy ì nì ngǎnù tsǐ nì bbalè kodjú ndèymí ndèy njúw ndèy mà nì ngǎnù fú kpa dzzdjú.’ Ma ùw à dho à tsǔw nza ò ndèymí à nga ndèy bbǔw-bbúw nga djúddù pbǔw njanja à nì fú njí njěy, chú drá ní nga dhò à dòw shú ní nga téy.”
8Fú ddiy dhò Bowaz kâ tdrà Ruta dhò, “Màtsá dhànì rr manì tdrǎ nì lò. Nzǐ ra ddiy njuw njàddí li ngá nza ò ndèymí nzǐ ra ingá ddù. Déy ingá màtsá-ngá noyi nà. 9Léy nyi nyú ngǎnù tsò njúwdha-djá nì ngǎnù tsò njuw ǒmá nì nza ró, ndèymí nyi dyǒw fú noyi dziydjò. Ma jà ŋà màtsá-ngá nokpa dhò nzǐ ndrǔ nzá nyi. Ya dda ꞌwíy nì nyi njěy ro, ra dda mbrr̀ njí-djá ꞌwì nì dda-tdéy óddù.”
10Bowaz tdrà fú lò ro, Ruta kwò ndèy gudjò Bowaz nyú djú ndèy nyú nà gudjò. À tdrà, “Ma chǔw lǎnínga nyi nyú djú ddudhò, cha nyi nì ndanà ma djò nga ddey nì? Maní ngéy ní dziylíy ó lu, ddudhò nyi ní zòw-lò njěy ma dhò?”
11Bowaz ngù lò-dzzdjò, “Ma dhò ka tdrà ddiy wá cha nyi njèy djîyà-nyi dhò nì à nga ndèy nyìmí dza-dja dhì mí nga óddù. Ndrǔ lêy ma tsì nyi bbà yâ-nyi màgò djǎ-nyi nà ddiy ndèymí nyìdhí-ngá bba ndèymí nyi rà dey ingá nzá nyi tsì tdè njitsò-djú nì bbalè nà. 12Ddrǒngóli ngǔ nyi dhò nyi njèy nì ddiy kobì. Bba Ddrǒngóli Ddrà, Israeli dhí Ddrà cha nyi rà nyi rùdha mí nga chùw ndèy prú ss̀téy nì, à bbú nyi dhò ddrǒngó ní nyi rónga pbòdha.”
13Ruta ngù lò dzzdjò, “Màtsá Ddrǒngóli nyi njey ma dhò lǎní ddiy à lêy ma chùw lǎnínga nyi nyú djú. Nyi djôw ma thíy, ndèymí nyi tdrà lǎní lò nyìmí njí-dja dè, yakpe ma kâ nzá nyǐngá ddì nì noyi nà.”
14Nyû nyùdha mí nga shì tdè ro, Bowaz tdrà tdè Ruta dho, “Ra ingá nyi nyǔ ddiy rò mà nà. Shuw nyìmí nyû dìváyì ddà ò.” Ruta kâ dòw gudjò ì nì ngǎnù tsǐ nì kpa kàtéy ro, Bowaz kâ kùwdha ní nyû-tsi rò cha ka kùw nì bbu à dho. À nyù cha ka bbû ndèy dho nì ddiy pbǔw ndèy zz̀ kì ddiy ò ndèymí à bba gògò. 15Ruta ngbî ndèy ru ro, Bowaz kâ lò jà nděyngá nokpa dhò, “Ya à nì ngǎnù gǔw ndèy tsò ka chey chèydha ní róddù, nzǐ nyì nyá à djú do. 16Nyì ddá à dho mí ngǎnù kòw-tsò rò cha ka chèy ndèy tsònì róddù ndèymí nyì bba à klí, nzǐ nyì gu à.”
17Fú ddiy dhò Ruta njûw ngǎnù gògò fú nza óddù pbǔw ngítss̀ djú nga ò. À têy cha ndèy njûw nì ngǎnù ddìngaó ndèymí à njûw ndèy ddrǒngó ní tdyǔw ddì. 18À tdûw à ngû ndanà ddrǒngó ní bba ò ndèymí àmí djîyà-nì njà ya ŋàbùkà à njûw tdè ddiy. Ruta tdûw ndèy gògò mà nì ddiy à bbû romà djîyà-nì dho.
19Àmí djîyà-nì dhî à, “Nyi njúw ndu ŋangá ddù? Nyi njěy njí ndu ŋangá? Madha déy ndey njà nyìmí zòw nì li dhò!” Ruta kâ ndèy njèy njí nděyngá nza ó nì li ló tdrà djîyà-nì dhò. À kâ tdrà, “Ndu ma njèy njí nděyngá nza ó nì li ró dho nì Bowaz.” 20Nawumi kâ tdrà ddùw-nì-dhi dhò, “Ddrǒngóli bbú bû fú li dhò! Fú li bbà nzá zòw-lò njèydha mà dho cha mà nì djiy ní ro ndèymí mà kpá dhò cha ì dhì nì. Fú kpatss̀ nì màdhí chow nì mà làyi. Fú li nì cha ndèy dho mà ngù nì li.” 21“Ruta, Mowab síngba kâ tdrà, à tdrà ddí ma dhò, ‘Déy màtsángá nokpa nà pbǔw ndrǔ rà ngǎnù tsò njúwdha si wá ddiy ò.’”
22Nawumi kâ tdrà ddùw-nì-dhi Ruta dho, “À nì lǎní màtsá dhànì nyi rǎ ǎngá noyi nà, ddiydhò ya nyi rà ngéy ní li ngá nza ò ka rà nyi rónga nyu.”
23Fú ddiy dhò Ruta dêy chow Bowaz ngá noyi nà ndèy tdè ngǎnù gògò njuw ro pbǔw ngǎnù tsò njúwdha sî ndèy ddiy ò. Ndèymí à dêy dey djîyà-nì nà.
Chwazi Kounye ya:
Ruta 2: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved