Marko 14
14
Yahuddi-ddúw dhí li-djùkpa ddàdha-djá jì ì lǒw Yesu
(Mat 26:1-5; Lwk 22:1,2; Yoh 11:45-53)
1À tdè ddu rwo li djòluw dàdha mí madha mí ddu njìó ndèymí ngǎ ndèy ó thiy nà nì mùkátì mî. Ddrǎ-ngá dyǎ-djá djú kpa ndèymí Musa-ngá yǎdha mí li-gwíydha-djá tdè tuw měy ì lǒw ndanà Yesu mùw, ndèymí ì hwǐ à. 2Ndrǔ tdrà, “À jì nzá mà njěy fú ddiy ddrǒngó ní ddu ó, ndaní nzǐ à nyá lò bbalè kàó.”
Yesu ka vìy chi nà Betaniya ó ddiy
(Mat 26:6-13; Yoh 12:1-8)
3Yesu tdè Betaniya mí bba ó Simoni ngà dzá cha ndèy nzâ tdè ndèy tsátsá dhì nà nì. À tdè nga nyǔ mí nga nà, ɦìytss-ní-li shì tdè ndèy dhokpa ó rí ndèy ró dzẑ nà nì chǔwpà nà, cha ndèy ó tdè rí ndèy ró dzz̀ nà nì rř ní chì cha ka dêy îy nardo ní nì. À pù mí chǔwpà tsò ndèymí à ddù ǒmá chì Yesu djùkpa ró. 4Fungá njàddí bbalè tdè thǒw nà ndèymí ndrǔ tdè tdrǎ ì kàòluw, “Ddudhò ka ní rí ndèy ró dzz̀ nà nì rř ní chì sǎ? 5À kà tdè ka dzź ǒnga cho ddì ní mí njí kobì mí mb nà, ndaní ka bbú mí mb zòw-djá dhò!” Ndrǔ tdrà ngǎjìní lò à ró thǒw nà.
6Chú, Yesu tdrà, “Nyì bba à déy ndèyníddù! Ddudhò nyì ní à nza? À njèy lǎní ddiy ma dhò. 7Nyì rà dey zòw ní bbalè nà wánì nga nà ndèymí cha nyì jì nyì kwó ndrǔ tsotso mí nga nà, nyì rà njèy. Chú, ma rà dey nzǐ nyì nà wánì nga nà. 8À njèy ddiy wá cha ndèy kà ndèy njěy nì. À ddù chì ma rò, ndaní ndèy thǐ ma-rónga njitsò djò nì tdôw dhò. 9Manì nyì dhò dìchú ní lò tdrǎ, Hwî mí Lò-ɦéy ka nì gwiy í dziylíy djú mí nga òluw wá, à njèy nì ddiy bbalè rà à ddey ndanà.”
Yudda ùw ndèy rà Yesu bbu ndrò-djá dè
(Mat 26:14-16; Lwk 22:3-6)
10Yudda Iskariyota tdè dri ndèy djú rwo na nì Yesu kodjú kpa kàó ddì li. À rà Ddrǎ-ngá dyǎ-djá djú kpa dè, ndaní ndèy kwo ndrǔ tsotso Yesu lòwdha dhò. 11Ndrǔ tdè hwî nà cha à tdrà tdè nì lò rr̀dha dhò ndèymí ndrǔ tdèy ì rà à dhò mb bbu. Yudda lòw dey lǎní tuw mèy ndèy dho ndanà Yesu dhotèy bbu ndrǔ dè nì.
Yesu nyù li djòluw dàdha mí madha mí nyû ndèy kodjú kpa nà
(Mat 26:17-30; Lwk 22:7-23; Yoh 13:21-30; 1 Kor 11:23-25)
12Ngǎ ndèy ó thiy nà nì mùkátì mí madha mí ddì nì mí ddu ó, li djòluw dàdha mí towmbù ka tdè hwǐ mí ddu ó, Yesu kodjú kpa dhîy à, “Nyi ní jǐ mà rǎ li djòluw dàdha mí madha mí nyû thì nyi dhò ŋangá?”
13Yesu kâ rwo nì ndèy kodjú kpa cho í lò dhòdha nà, “Nyì ra ddrǒngó ní bba ò ndèymí nyì rà nyì njuw ndèy tdûw dda-tdéy nì li nà. Nyì dyow à. 14À rà tsùw òmà nì dza, nyì tdra mí dza-dja dhò, ‘Li-gwíydha-dja dhîy, lu mí gìy ní ŋangá, cha ma ndèymí ma kodjú kpa nà, dho li djòluw dàdha mí madha mí nyû nyù ǒmá nì?’ 15À rà nyì mbà ru ndèymí à rà nyì dhò ddrǒngó ndèy ónga nà nì gìy dhò, cha nyì rà ǒmá ddiy wánì chùw mà dhò nì. Nyì thi mà dhò li djòluw dàdha mí nyû fungá.”
16Fú rwo nì Yesu kodjú kpa kâ rà ddrǒngó ní bba ò, ndrǔ shì wánì ddiy chùw cha Yesu tdrà tdè ì dhò níchú. Ndrǔ thì li djòluw dàdha mí madha mí nyû fungá.
17Ngítss̀ djú nga shì tdè ro, Yesu shì ndèy kodjú dri ndèy djú rwo nà nì kpa nà. 18Ndrǔ tdè mězà tsò ró nyû nyǔ ro, Yesu tdrà, “Manì nyì dhò dìchú ní lò tdrǎ, nyì kàó ddì li rà ma dhotèy bbu ndrò-djá dè. À nì ddì li cha ndèy nì nyû nyǔ ma nà nì.”
19Zòw lòw Yesu kodjú kpa ndèymí ddì ddìní, ndrǔ lòw dey à dhiy, “Ddrǒngóli, nyi ní ma tdrǎ?”
20Yesu ngù lò, “À nì dri ndèy djú rwo nà nì nyì kàó ddì li cha ndèy shùw ndèy dhokpa ddìngaó ma nà líybbíy ò nì. 21Ma Ndrǔ-Ddùw rà dhì cha à ndîy ndèy Ddrǎ-ngá ndíydha-ní-lò ó níchú. Chú, à rà tdè zòw cha ndèy rà ma dhotèy bbu ndrò-djá dè nì li dhò. À dho tdè lǎní fú li dhò ya nzá ka gòw tdè à!”
22Ndrǔ tdè nga nyǔ mí nga nà, Yesu tdûw mùkátì, à bbû madha mí nzz̀dha Ddrà dhò, à pbrr̀ ǒnga, ndèymí à bbû ndèy kodjú kpa dhò. À tdrà, “Nyì tdúw ndèymí nyì nyu, í nì ma rónga.” 23À kâ dìváyì-wà nà nì kǒpù tduw, à bbû madha Ddrà dhò ndèymí à bbû ndrǔ dè, ndèymí ndrǔ wánì mbù ǒmá ddù. 24À tdrà, “Í dìváyì-wà nì màtsá tdeynì ní li-chuw-tsò gbádha mí jǔw, cha ndèy tdiy ndèy bíy ní bbalè dhò nì. 25Manì nyì dhò dìchú ní lò tdrǎ, ma rà í dìváyì-wà mbù nzǐ ddíyàchú, pbǔw ma rà tdeynì ní dìváyì-wà mbù Ddrà mí Pey-mí-nga ò mí ddu ó.”
26Ndrǔ kâ Ddrà mádha mí ngwo ngwò, ndùw ndrǔ rà Òlívè tsúw mí ngòw djò.
Yesu tdrà Petro rà ndèy gù
(Mat 26:31-35; Lwk 22:31-34; Yoh 13:36-38)
27Yesu tdrà ndrǔ dhò, “Nyì wá rà ma bbà, ddiydhò à ndîy ndèy Ddrǎ-ngá ndíydha-ní-lò ó, Ddrà tdrà,
“ ‘Ma rà towmbù rónga pbòdha-dja hwì,
ndèymí towmbù wánì rà dha.’#14:27 Zakariya 13:7.
28Chú ma rà ngu djiy ní dhi óddù ddiy-dzzdjú, ma rà rà Galilaya mí ngòw ò nyì njìò.”
29Petro ngù lò, “Yakpe njàddí ndrǔ bbà nyi, ma rà nzǐ nyi bbà.”
30Yesu tdrà Petro dhò, “Manì nyi dhò dìchú ní lò tdrǎ, ndu nì kúw nà, děy nzá ǒw-kpà ngwò rwo ngà nà ní, nyi rà tdrà gbow ngà nà nzá nyi tsì ma.”
31Petro ngù lò klôw nà, “Yakpe à kà ma dhǐ nyi nà, ma rà nyi gù nzǐ!”
Yesu kodjú kpa wá tdrà fú ddì nì lò jì.
Yesu nzz̀ Ddrà Getsemani ó
(Mat 26:36-46; Lwk 22:39-46)
32Ndrǔ shì tdè Getsemani ní ka íy nì nga ò, ndèymí Yesu tdrà ndèy kodjú kpa dhò, “Nyì dow ingá, ma nì rǎ děy Ddrà nzz̀.” 33À tdûw Petro, Yakobbo ndèymí Yohana ddìngaó ndèy nà. À ónga lòw dey tdò ndèymí zòw lòw à. 34À tdrà ndrǔ dhò, “Ma nì zòw nà drǒ ma thíy ò cha ndèy dho ley ma dhǐ nì. Nyì déy ingá ndèymí nyì pbo.”
35À rà ndrǔ róddù drá njitsò djò, à kwò ndèy tdyòw-tey gudjò ndèymí à nzz̀ Ddrà, ya ney à dho ndèy pà, à kà nzá fúli dǎ fú nzadha mí sâ. 36À nzz̀, “Bàbá, ma-Dja! Nyi dhò ddiy wánì njey nì ndèy. Tdúw í nzadha mí kǒpù gu ma róddù. Chú nzǐ léy à njěy ndèy ma jì níchú, chú léy nyi jì nì ddiy njěy ndèy.”
37À kâ ndèy li ndèy kodjú kpa gbow nì dè ndèymí à chùw ndrǔ nì ddǔ ddù ní. À tdrà Petro dhò, “Simoni, nyi ní ddǔ ddù ní? Nyi dhó dey nzǐ nzá nyi ddù ní sâ ddì nì dho kpe?” 38Ndèymí à kâ tdrà ndrǔ dhò, “Nyì pbo ndèymí nyì nzz, ndaní nzǐ nyì chěy mbùdha ò. Thíy nì jǐ ney, chú li-rónga nì shú.”
39À rà ndrǔ róddù gu ddíyàchú ndèymí à nzz̀, ddì nì lò jì tdràdha nà. 40À ngû ndèy kodjú kpa gbow nì dè ndèymí à chùw ndrǔ nì ddǔ ddù ní, ddiydhò ndrǔ djùkpa tdè tǔw ddu nà. Ndèymí ndrǔ tsì nzá ya ddu ì kà ì tdrǎ à dhò.
41À ngû gbow ngà nà nì mí nga nà, à tdrà ndrǔ dhò, “Nyì ní sǔw ddu ddǔ ndèymí nyì rónga shǔ? À kâ ŋà! Sâ kâ ŋà! Nja, ka nì ma Ndrǔ-Ddùw dhotèy bbu cherr-djá dhokpa ò. 42Nyì ngbí nyì ru, mà rǎ. Nja, ndèy nì rǎ ma dhotèy bbu nì li nì ingá!”
Ka lòw Yesu
(Mat 26:47-56; Lwk 22:47-53; Yoh 18:3-12)
43Yesu tdè sǔw lò tdrǎ ro, Yudda cha ndèy tdè dri ndèy djú rwo nà nì kpa kàó ddì li kâ shì. À nà tdè bbalè mí njuw ì dhokpa ó gòw-dyì nà ndèymí kòddá nà. Ddrǎ-ngá dyǎ-djá djú kpa, Musa-ngá yǎdha mí li-gwíydha-djá, ndèymí drò-dró ní ndrǔ, chô tdè ndrǔ ndey.
44Ndèy nì rǎ à dhotèy bbu nì li, dhò tdè ŋà ndrǔ dhò ɦiy cha ndèy rà dhò ndrǔ dhò nì. À tdrà, “Ma rà ndèy mbu nì li, nì nyì nì jǐ nì li. Nyì low fú li ndèymí nyì rà à nà.” 45Yudda shì mí nga nà, à rà chěy Yesu dè ndèymí à tdrà, “Li-gwíydha-dja” ndèymí à mbû à. 46Fú nga nà, ndrǔ lòw Yesu ndèymí ndrǔ chèy à. 47Chú ddì li cha ndèy dèy tdè fungá nì kâ gòw-dyì dda, ndèymí à nyû Ddrǎ-ngá dyǎ-djá djú ddrǒngóli ngá piy rónga, à gi tdèydha nà.
48Yesu tdrà bbalè mí njuw dhò, “À kǎ nyì rǎ gòw-dyì nà ndèymí kòddá nà ma lòwdha dhò, gbè ma nì nga ngbùwdha-dja níchú? 49Wánì ddu ró ma tdè nyì nà, lò gwiy Ddrà nzz̀dha mí thí ní nga ó, nyì lòw ma nzá. Chú, í ddiy nì ndèy njěy, ndaní Ddrǎ-ngá ndíydha-ní-lò njěy ndèy dìchú ma ró.” 50À kodjú kpa wá bbà à ndèymí ndrǔ kòw à róddù.
51Njàddí yàddá ní kpatss̀ tdè ndèy ró rù nà nú ddì, à tdè Yesu kodjò dyǒw. Ndrǔ ddêy ì lǒw à, 52chú à kòw ngǎ ndèy ró rù ní, ndèy bbà ndèy ró rù luwtò ddiy nà.
Yesu lò-tdèydha-djá nyú djú
(Mat 26:57-68; Lwk 22:54,55,63-71; Yoh 18:13,14,19-24)
53Ndrǔ mbà Yesu Ddrǎ-ngá dyǎ-djá djú ddrǒngóli ngà dzá, cha Ddrǎ-ngá dyǎ-djá djú kpa, drò-dró ní kpa ndèymí Musa-ngá yǎdha mí li-gwíydha-djá wá dêy ì njuw mí nga ò. 54Petro dyòw à ndì nga óddù, pbǔw Ddrǎ-ngá dyǎ-djá djú ddrǒngóli ngá dza mí bbay djò. À dòw gudjú nga pbòdha-djá nà, ndèymí ndèy-rónga mow kàss tsò ró. 55Ddrǎ-ngá dyǎ-djá djú kpa ndèymí ru nì lò-tdèydha mí njuwdha dzò dêy lò-tey měy Yesu ró, ndaní ì hwǐ à, chú ndrǔ chùw nzá. 56Bíy ní bbalè tdrà tdè mbwa mí lò Yesu ró, chú ndrǔdhí ngèy gbâ ndèy nzá.
57Njàddí kpa ngbîy ì ru ndèymí ndrǔ tdrà í mbwa mí lò Yesu ró, 58“Mà rr̀ à dêy tdrǎ, ‘Ma rà í Ddrà nzz̀dha mí thí ní dza sà cha bbalè ss̀ nì, ndèymí ddu gbow nì ó ma rà njaddí ss̀ cha ngǎ bbalè ss̀ nì.’” 59Yakpe ndrǔ tdrà tdè fǔchú, ndrǔdhí lò gbâ ndèy nzá.
60Ddrǎ-ngá dyǎ-djá djú ddrǒngóli ngbî ndèy ru ndrǔ wánì nyú djú ndèymí à dhîy Yesu, “Nyi ní ngǎ lò rò ní cha nyi dho ngù í nyi ró ka lêy nì lò ró?” 61Chú, Yesu dêy chíy ndèymí à tdrà lò rò nzá. Ddrǎ-ngá dyǎ-djá djú ddrǒngóli dhîy à ddíyàchú, “Nyi ní Masiya, Ddrà mí Ddùwnì, cha ka má nì nì?”
62Yesu ngù lò, “Ma nì ndey, ndèymí nyì rà ma Ndrǔ-Ddùw njà ma dòw klôw-Dja mí ví mí nga là djòluw ndèymí nyì rà njà ma shì nduw-nduw ó rakpa óddù!”#14:62 Danieli 7:13.
63Ddrǎ-ngá dyǎ-djá djú ddrǒngóli thâ ndèy ró rù#14:63 Í ddiy à njèy ndaní à dhǒ ndèymí thǒw. ndèymí à tdrà, “Ddudhò mà ní njáddí ì tsì fú lò ró lò nì ndrǔ jǐ sǔw? 64Nyì rr̀ ŋà àmí dhúwdha mí lò Ddrà ró nì. Nyì ní ddu ddey?”
Ndrǔ wá ùw tdè fúli kâ dhi nà.
65Njàddí ndrǔ lòw dey sa hwi Yesu ró ndèymí ndrǔ tss̀ à nyú djú nga ndèymí ndrǔ dûw à. Ndrǔ tdrà, “Ddéy, áyì dǔw nyi!” Nga pbòdha-djá tdûw à ndèymí ndrǔ thà à.
Petro gù Yesu
(Mat 26:69-75; Lwk 22:56-62; Yoh 18:15-18,25-27)
66Petro tdè děy bbay djú mí nga nà, noyi ní nzòw kàó ddì li Ddrǎ-ngá dyǎ-djá djú ddrǒngóli ngâ shì tdè. 67À njà tdè Petro nì ndèy-rónga mǒw mí nga nà, à njà nga chěy à dè ndèymí à tdrà, “Nyi ddí tdè Nazareti ó Yesu mà nà.”
68Petro gù fúnì. À ngù lò, “Ma tsì nzá dìchú ddu djò nyi nì lò těy ddiy,” ndèymí à shì tde kaley tsò ró ndèy nì rǎ rúgò ro, ndùw ǒw-kpà ngwò.#14:68 Ndùw ǒw-kpà ngwò. Njaddí ndruní Ddrà mí ndíydha-ní-lò nì ngǎ í lò nà.
69Noyi ní ngba njà Petro ddíyàchú, à kâ tdrà ì dèy fungá nì ndrǔ dhò, “Í kpatss̀ nì ndrǔ kàó ddì li.” 70Petro gù ddíyàchú.
Drá ní nga dzzdjú, ì dèy fungá nì ndrǔ bbòw Petro ddíyàchú, “Nyi dho gù nzǐ, nyi nì ngǎ ndrǔ kàó ddì li, ddiydhò nyi ddí nì Galilaya ó li.”
71Petro kâ tdrà, “Ma nì tdrǎ ju-tsódha nà, ma nì dìchú ní lò tdrǎ. Ddrà dhěy ma, ya ma nì ngǎ dìchú ní lò tdrǎ ro. Ma tsì nzá nyì nì ndèy djú lò tdrǎ nì li.”
72Ndùw ǒw-kpà kâ ngwò rwo nga nà nì mî ndèymí Petro ddêy cha Yesu tdrà tdè ndèy dhò nì lò, “Děy nzá ǒw-kpà ngwò rwo ngà nà ní, nyi rà tdrà nyi tsì ma nzá, gbow ngà nà.” Petro mí klôw sǐ ndèy ndèymí à dzz̀.
Chwazi Kounye ya:
Marko 14: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved