Marko 12
12
Dìváyì-ngìy nzà ó njí-djá mí lò-ngbòdha
(Mat 21:33-46; Lwk 20:9-19)
1Yesu tdrà lò ndrǔ dhò lò-ngbòdha nà, à tdrà, “Ddì nì kpatss̀-ní-li tdè ney cha ndèy tdòw tdè dìváyì-ngìy nděyngá nzà ó. À lêy rǒmá kaley gbrǔ, à bbî bbuw dìváyì-tsi zźdha mî ndèymí à ss̀ rónga pbòdha mí ru ka ss̀ nì dza. À kâ dìváyì-ngìy nzà bbu njí-djá dè ndèymí à rà bbíydha ò. 2Nyû tsò njúwdha mí nga shì tdè ro, à chô nokpa njí-djá dè, ndaní ndrǔ bbú ndèy rr̀djá dìváyì-tsi rò cha ndrǔ njûw nì. 3Chú ndrǔ lòw à, à dhèy, ndèymí à cho ngǎ ndèy dhokpa ó ddiy ní. 4Nza-dja kâ njàddí nokpa cho, ndrǔ pêy à djòkpa ndèymí ndrǔ njèy à ngǎjìní drǒ. 5À chô njàddí nokpa ddíyàchú, fú nì ndrǔ hwì. À chô bíy ní njaddí nokpa, ndrǔ kàó njàddí ndrǔ ka dhèy ndèymí njàddí ndrǔ ka hwì.
6“Nza-dja mà tdè ddì li nà cha ndèy kà ndèy chó nì, drǒ ndèy jì nì ddùwnì chúddì. Luwtéy à chô ddùwnì, tdràdha nà, ‘Ndrǔ rà màtsá ddùwnì dò njèy.’
7“Chú njí-djá tdrà ì kà-òluw, ‘Í nì nza-dja mí ddùwnì. Nyì ra, mà hwǐ à ndèymí àmí ddiy wánì rà mà màdhí ní.’ 8Fú ddiy dhò, ndrǔ lòw ddùwnì ndèymí ndrǔ hwì à, ka à rónga ngbò rúgò dìváyì-ngìy nzà óddù.”
9Yesu dhîy, “Fú nza-dja rá ddu njèy? À rà shì ndèymí à rà fú njí-djá hwì ndèymí à rà mí nza li ngéy ní ndrǔ dhokpa ò. 10Nyì zǒw nzá í lò Ddrǎ-ngá ndíydha-ní-lò ó?
“ ‘Dza ss̀dha-djá gù nì djuw
ngû tdêy djú djuw ní.
11Ddrǒngóli njèy tdè í ddiy,
ndèymí à nì wá li ónga ꞌwíy dhomà nì ddiy mà nyú djú!’#12:11 Ngwo-kpà 118:22-23.”
12Yahuddi-ddúw djùkpa ddàdha-djá jì tdè ì lǒw Yesu, ddiydhò ndrǔ tsì tdè à tdrà tdè í lò-ngbòdha ì ró. Chú ndrǔ tdè bbalè mí njuw dhí nyí nà, fúddiy dhò ndrǔ bbà à ndèymí à rà gu.
Lò-dhíydha mùsórò bbúdha ró
(Mat 22:15-22; Lwk 20:20-26)
13Fú ddiy-dzzdjú, ndrǔ chô njàddí Farisayo ní kpa ndèymí njàddí Pey Herodde Antipas ngá kpa nà Yesu dè, ndaní ndrǔ kí à, nga dhíydha nà. 14Ndrǔ rà à dè, ndèymí ndrǔ tdrà, “Li-gwíydha-dja, mà tsì nyi tdra nì dìchú ní lò. Nyi ónga tdo nì nzǐ bbalè ddéy nì nì lò dhò, ddiydhò nyi ddéy nì nzǐ ya áyì ndeyli nì ddiy. Chú, nyi gwíy nì bbalè dìchú ní lò nà cha Ddrà nì jǐ bbalè njěy nì. Tdra mà dhò, Musa-ngá yǎdha ǔw ŋà mà bbú mùsórò, Roma mí dziylíy ó ddrǒngó ní pey#12:14 Roma mí dziylíy ó ddrǒngó ní pey. Ddrǒngó ní dho Roma ó pey dhî nì, Kayisari. dhò? À kà ná ŋà, mà bbú ndrǔ dhò ǐngí nzǐ?”
15Yesu njà ndrǔdhí ngǎjìní lò-ddeydha ndèymí à ngù lò, “Ddudhò nyì ní jǐ nyì kí ma? Nyì bbú mb-ho, ndèymí nyì léy ma njǎ.”
16Ndrǔ mbà mb-ho, ndèymí à dhîy, “Í mb-ho ró ní áyì mí ɦiy ndèymí dho nà?”
Ndrǔ ngù lò, “Roma mí dziylíy ó ddrǒngó ní pey mî.”
17Yesu tdrà ndrǔ dhò, “Lǎní, nyì bbú pey mí ddiy pey dhò ndèymí Ddrà mí ddiy Ddrà dhò.”
Fú kpa ónga ꞌwì wá à dhò.
Lò-dhíydha djiy ní ngúdha dhì óddù nì ró
(Mat 22:23-33; Lwk 20:27-40)
18Njàddí Saddukayo ní kpa cha ì tdra nì, ngúdha djiy ní dhi óddù nì, nì ngǎ nì, kâ shì Yesu dè ndèymí ndrǔ tdrà, 19“Li-gwíydha-dja, Musa ndîy í yǎdha mà dhò, ‘Ya kpatss̀-ní-li dhì ndèymí à bbà dza-yà ngǎ nzòw ní, fú kpatss̀ mí djûnì kà ndèy kǒw nděyngá kpatss̀ dhì nì fú sǐngba, ndaní ndrǔ gǒw nzòw djûnì dhò.’#12:19 Yǎdha 25:5-6. 20Ddì li ngá kpa-ní-nzòw tdè zargbòw, ddíydjò ní nì kòw sǐngba, ndèymí à dhì nzá ndèy gòw nzòw ní. 21Rwo nì mî kòw ndèy dhìnì djûnì ngá sǐngba, à ddí dhì nzá ndèy gòw nzòw ní. Fú ddiy njèy ndèy gbow nì mí djûnì ró ddí. 22Fú ddiy njèy ndèy fú zarr̀gbòw ní kpa ní ndrǔ ró wá. Luwtéy fú sǐngba ddí kâ dhì. 23Njanja, ngúdha djiy ní dhi óddù mí ddu ó, fú sǐngba rá dey áyì ngá dza-yà ní, fu bbalè zarr̀gbòw wánì kòw tdè à ro?”
24Yesu ngù lò ndrǔ dhò, “Nyì tsì nzá nyì nì tdrǎ nì ddiy, ddiydhò nyì tsì Ddrǎ-ngá ndíydha-ní-lò nzá ǐngí Ddrà mí klôw. 25Ì dhì nì bbalè rà ngu djiy ní ro, ndrǔ rà dey rakpa ó malayika-kpà níchú ndèymí nzǐ ndrǔ rà ì kòw. 26Bbalè rà ngu djiy ní dhi óddù ddiy mí lò dhò, nyì zǒw nzá Musa-ngá bǔkù ó ndèy nì gbǐy nì gú ró lò? Fungá à ndîy ndèy, Ddrà tdrà Musa dhò, ‘Ma nì Abrahamu ngá Ddrà, Isaka ngâ ndèymí Yakobbo ngá nà.’#12:26 Ngbídha 3:6. 27À nì ngǎ ì dhì nì ndrǔdhí Ddrà, chú djiy ní bbalè dhî. Dìchú nyì tsì nzá nyì nì tdrǎ nì ddiy!”
Ddrǒngó ní yǎdha
(Mat 22:34-40; Lwk 10:25-28)
28Musa-ngá yǎdha mí li-gwíydha-dja tdè ney ndèymí à rr̀ tdè mí lò nì. À njà tdè Yesu ngù lò lǎní Saddukayo ní kpa dhò ro, à dhîy, “Ŋá yǎdha ní ndey ddrǒngó wánì yǎdha kàó?”
29Yesu ngù lò, “Ndèy dà wánì yǎdha djòluw nì yǎdha nì i, ‘Nyì rr Israeli-ddúw! Ddrǒngóli màdhí Ddrà nì nú ddì.#12:29 Ddrǒngóli màdhí Ddrà nì nú ddì. Ǐngí Ddrǒngóli chúddì nì màdhí Ddrà. 30Ji Ddrǒngóli nyìmí Ddrà nyi thíy nà wá, nyìmí djiy nà wá, nyìmí ddeydha nà wá ndèymí nyìmí klôw nà wá.’#12:30 Yǎdha 6:4-5. 31Ndèy ɦuwdjò nà tǔw nì rwo nì mí yǎdha nì i, ‘Ji nyi dyási, gbè nyi jì nyi níchú.’#12:31 Lawi 19:18. Ngéy ní yǎdha rò nì ngǎ cha ndèy dà í rwo nì yǎdha djòluw nì.”
32Musa-ngá yǎdha mí li-gwíydha-dja tdrà Yesu dhò, “Nyi njèy lǎní, Li-gwíydha-dja! À nì dìchú, gbè nyi tdrà níchú, Ddrà nì nú ddì ndèymí ngéy ní nì nì ngǎ, à chúddì. 33Ndèymí à kà nyi jǐ Ddrà nyi thíy nà wá, nyìmí ddeydha nà wá, nyìmí klôw nà wá, ndèymí nyi kà nyi jǐ nyi dyási, gbè nyi jì nyi níchú. À ɦuwdjò nì ddrǒngó tǐ, nyi pbǒ í rwo nì yǎdha rónga à da měyá bbúdha alitari djú ndèymí njàddí bbudha nà Ddrà dhò nì.”
34Yesu njà tdè à ngù nì lò tdè nyǔꞌwiy nà, ndèymí à tdrà à dhò, “Nyi nì ngǎ ndì Ddrà mí Pey-mí-nga róddù.”
Í ddiy-dzzdjú li rò tdè ngǎ cha ndèy ddêy ndèy dhíy Yesu ngéy ní dhíydha nà nì.
Masiya nì Dawuddi mí ddùwnì ndèymí bbalè wánì dhí Ddrǒngóli
(Mat 22:41-46; Lwk 20:41-44)
35Cha Yesu tdè bbalè gwiy Yahuddi-ddúw dhí Ddrà nzz̀dha mí thí ní nga ó ro, à dhîy, “Musa-ngá yǎdha mí li-gwíydha-djá dhó tdrà ŋǎchú Masiya nì pey Dawuddi mí Ddùwnì? 36Dawuddi ndèyníddù tdrà lò Bblǒ Thíy mí klôw nà,
“ ‘Ddrǒngóli Ddrà tdrà màtsá Ddrǒngóli dhò,
“Dow ingá ví djú nì ma dhokpa djòluw,
pbǔw ma rà nyìmí ndrò-djá ley
nyi-koko ss̀téy.”’#12:36 Ngwo-kpà 110:1.
37Dawuddi ndèyníddù îy Masiya ‘màtsá Ddrǒngóli’ ní, fúddiy dhò ŋǎchú Masiya dhó dey pey Dawuddi mí ddùwnì ní?”
Yesu ddù bbalè nyú Musa-ngá yǎdha mí li-gwíydha-djá ró
(Mat 23:1-36; Lwk 20:45-47)
Bíy ní bbalè dêy lò rř Yesu dè ì ró ꞌwíy nì nà. 38À tdè ndrǔ gwiy ro, à tdrà, “Nyì déy nyì nyú nà Musa-ngá yǎdha mí li-gwíydha-djá ró. Ndrǔ jì bbiydha ì ró ndì ní rù nà. Ndrǔ ji nì ka zǔ ì rónga ì dò njèydha nà ddiy ónga dzźdha mí nga òluw. 39Ndrǔ ji nì lǎní dòwdha mí nga Yahuddi-ddúw dhí njuwdha-dzà ó ndèymí lǎní nga madha mí nyû mí nga ó nì. 40Chú ndrǔ nyu nì ì kpá dhì nì dhì dhí ddiy ndèymí ndrǔ tsa nì fú dhì nyú ìdhí ddiy ró. Ndrǔ nzz nì ndì ní nzz̀dha, ndaní njàddí bbalè má ì. Ka rà ndrǔ djú lò tdèy ngǎjìní à da njàddí bbalè dhí djòluw.”
Ndèymí kpatss̀ dhì nì ɦìytss ní li mí bbúdha
(Lwk 21:1-4)
41Yesu dòw tdè chow Yahuddi-ddúw dhí Ddrà nzz̀dha mí thí ní nga ó mb bbúdha mí ddiy dè. À tdè bbalè njǎ cha ndrǔ nì ì dhí mb bbu ro. Ì dhokpa ó ddiy nà bíy ní bbalè bbû lèy ní mb. 42Chú ndèymí kpatss̀ dhì nì, zòw ní sǐngba shì ndèymí à bbû drá ndèy ɦuwdjò nà nì mb hó rwo.
43Yesu îy ndèy kodjú kpa ddìngaó ndèymí à tdrà ndrǔ dhò, “Manì nyì dhò dìchú ní lò tdrǎ, í ndèymí kpatss̀ dhì nì zòw ní sǐngba bbû ddiy tǐ à dà njàddí ndrǔ djòluw wá. 44Njàddí bbalè bbû ìdhí bíy ní ddiy kàó ddiy rò, chú í zòw ní sǐngba bbû ddiy wá cha ndèy tdè ndanà nì. Njanja à mà ngǎ ddiy ní cha ndèy dho ndanà ndèy-rónga pbò nì.”
Chwazi Kounye ya:
Marko 12: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved