Matayo 16
16
Farisayo ní kpa ndèymí Saddukayo ní kpa dhîy ɦiy Yesu dèddù
(Mak 8:11-13; Lwk 12:54-56)
1Farisayo ní kpa ndèymí Saddukayo ní kpa nà shì Yesu dè ndèymí ndrǔ jì tdè ì mbǔ Yesu ónga. Fú ddiy dhò, ndrǔ kâ à dhiy, à njěy ì dho ɦiy, ndaní à dhǒ Ddrà chô fú li ndey.
2À ngù lò ndrǔ dhò, “Nga tsò shì ngítss̀ djú ro, nyì tdra nì, ‘Itsś nì rǎ ka, ddiydhò rakpa nì ngbú.’ 3Ndèymí bbǔbbú nyì tdra nì, ‘Ndu dji nì rǎ kwo, ddiydhò rakpa nì kúw ndèymí dji-rà ddí lêy ndèy.’ Nyì tsì rakpa nyúddà njàdha, chú nyì dho nzǐ njanja nì ɦiy tey kwo!#16:3 Njàddí ndíydha-ní-lò ó, Yesu tdrà versi 2-3 nì ó nì lò nì ngǎ. 4Ngǎjìní bbalè ndèymí cha ì nì ngǎ uwdha nà nì ndrǔ nì ddùw mí ɦiy dhiy. Chú ma rà bbu ndrǔ dhò nì ɦiy nì nabi Yona ngá ddùw chúddì.”
Yesu kâ ndrǔ bbà ndèymí ka rà ndrǔ róddù.
Farisayo ní kpa ndèymí Saddukayo ní kpa nì thiy
(Mak 8:14-21)
5Yesu kodjú kpa dà ju-ddà djòluw, chú ndrǔ djùkpa dzûw tdè mùkátì tdúwdha nà. 6Yesu tdrà ndrǔ dhò, “Nyì déy nyì nyú nà. Nyì pbo nyì Farisayo ní kpa ndèymí Saddukayo ní kpa ní thiy róddù.”
7Ndrǔ lòw dey í lò tdrǎ ì kàòluw, “À nì í lò tdrǎ nzá mà mbà mùkátì ddiy mí lò dhò.”
8Yesu tsì tdè ndrǔ nì tdrǎ nì lò, à kâ ndrǔ dhiy, “Nyì drá ìdhí ùwdha nà nì bbalè, ddudhò nyì ní lò tdrǎ nyì kàòluw nzá nyì tdûw mùkátì mí lò ró? 9Děy nyì ní tsǐ nzǐ? Nyì ní ddey nzǐ cha ma pbrr̀ tdè mùkátì mbu nì ónga bbalè lówfù mbu nì dhò. Nyì njúw tdè ndèy mànì nyû gògò tdyǔ thi věy-věy? 10Ǐngí mùkátì hó zargbòw cha nyì ndò lówfù tho nì bbalè dhò. Nyì njúw tdè gògò tdyǔ thi věy-věy? 11Nyì dhó tsì ŋǎchú nzǐ ma tdè ngǎ lò tdrǎ nyì dhò mùkátì mí lò ró? Ma tdrà tdè nì ddiy tdè, nyì pbo nyì Farisayo ní kpa ndèymí Saddukayo ní kpa ní thiy róddù.” 12Ndrǔ kâ tsì à tdè ngǎ lò tdrǎ ì dhò ì pbǒ ì rónga mùkátì ka thi nì mí thiy róddù, chú Farisayo ní kpa ndèymí Saddukayo ní kpa dhí gwíydha róddù.
Petro dhò ndèymí ùwdha Yesu nì Masiya mî
(Mak 8:27-30; Lwk 9:18-21)
13Yesu shì tdè chow Kayisariya Filipi mí ddrǒngó ní bba ó ro, à dhîy ndèy kodjú kpa, “Bbalè tdrà ní ma Ndrǔ-Ddùw nì áyì?”
14Ndrǔ ngù lò, “Njàddí ndrǔ tdra nì, nyi nì Yohana Bàtízò bbúdha-dja. Njàddí ndrǔ tdra nì, nyi nì nabi Eliya. Ndèymí njàddí ndrǔ tdra nì, nyi nì nabi Yeremiya ǐngí nyi nì njàddí ddì nì nabi-kpà kàó li.”
15À dhîy ndrǔ ddíyàchú, “Chú nyì tdra ní manì áyì?”
16Simoni Petro ngù lò, “Nyi nì Masiya,#16:16 Njàddí mí lò-tey nì Mesiya. “Kristo” Griki ndèymí “Masiya” (Ebreniya) rwo túw mí lò-tey nì “Vìydha ní li” verse 25 ó ddí. djiy ní Ddrà mí Ddùwnì.”
17Yesu ngù lò, “Bû nyi dhò, Simoni Yona mí ddùwnì, ddiydhò í dìchú ní lò shì ngǎ nyì dè bbalè dèddù, chú ma Dja rakpa ó nì bbû ndey. 18Fú ddiy dhò, ma nì tdrǎ nyi dhò, nyi nì Petro,#16:18 Petro. Griki ló nà Petro mí lò-tey nì djuw. djuw. Ndèymí í djuw djú ma rà ì ùw ma nì ndrǔ ley ndèymí dhi rà dey nzǐ klôw nà ndrǔ djú. 19Ma rà rakpa mí pey-mí-nga tsò pùdha mí màfùtá bbu nyi dè. Dziylíy djú nyi chèy nì ddiy wá rà dey chèydha ní rakpa ò, ndèymí dziylíy djú nyi ngâ nì ddiy rà déy ngádha ní rakpa ò.” 20Yesu kâ jà ndèy kodjú kpa dhò, nzǐ ndrǔ tdrǎ njàddí li dhò ndèy nì Masiya.
Yesu tdrà lò ndèymí dhi ndèymí ngúdha djiy ní dhi óddù nì djú
(Mak 8:31–9:1; Lwk 9:22-27)
21Fú nga djúddù Yesu lòw dey lò těy tende ndèy kodjú kpa dhò, “À kà ma rǎ Yerusalemu ò, fulè drò-dró ní ndrǔ, Ddrǎ-ngá dyǎ-djá djú kpa ndèymí Musa-ngá yǎdha mí li-gwíydha-djá rà ma dhò nzadha bbu drǒ, pbǔw ka rà ma hwì ddiy ò. Chú ddu gbow nì ó, Ddrà rà ma ngù djiy ní dhi óddù.”
22Petro îy à nga gidjò ndèymí à lòw dey lò tdrà à dhò klôw nà. À tdra, “Ngǎ fǔchú, Ddrǒngóli! Ddrà rà ley nzǐ fú ddiy njěy ndèy nyi ró.”
23Yesu lî ndèy nga njà Petro dè, à kâ tdrà, “Setani ddá nyi gu ma róddù. Nyi nì màtsá tuw tǎ, ddiydhò nyìmí ddeydha shì ngǎ Ddrà dèddù, chú bbalè dèddù.”
24Fú ddiy-dzzdjú, Yesu kâ tdrà ndey kodjú kpa dhò, “Ya nyì kàó li rò nì jǐ ndèy rǎ ma nà, à jì ndeyli bbǎ ndèy djò nga ddeydha ndèyníddù ndèymí à tdúw ndèymí musalabba, à dyǒw ma. 25Ndèy jì ndèy pá ndèymí djiy nì li rà à viy, chú ndèy vîy ndèymí djiy màtsá lò dhò nì li, rà mí djiy chùw. 26Bbalè rá ŋá lǎní ddiy chùw ya ì tdûw dziylíy dzò ì-dhokpa ó, chú ya ì viy ì dhí djiy ro? Ǐngí bbalè dhó ná ddu bbu ì dzž ndanà ì dhí djiy? 27Ma Ndrǔ-Ddùw nì chow shìdha nà Djǎnì ngá ddrǒngó-ní-nga ó nděyngá malayika-kpà nà. Ma rà ddì-ddì ní li kobì bbu ddìkàddì ndeyli mí njeydha nà. 28Manì nyì dhò dìchú ní lò tdrǎ, njaddí ndrǔ cha ì dèy ingá nì rà dhì nzǐ nji nzá ì njà ma Ndrǔ-Ddùw mí shìdha màtsá pey-mí-nga ò ní.”
Chwazi Kounye ya:
Matayo 16: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved