Matayo 14
14
Yohana Bàtízò bbúdha-dja mí dhi
(Mak 6:14-29; Lwk 9:7-9)
1Fú nga nà Herodde Antipas#14:1 Herodde Antipas. Fú lò hó dhò nja Klǒw ní lò ndèy tey nà. tdè Galilaya mí ngòw ó li-djùkpa ddàdha-dja. À rr̀ tdè Yesu ɦuwdjò ro, 2à tdrà nděyngá dhǐy-djá dhò, “Í kpatss̀ nì Yohana Bàtízò bbúdha-dja. À ngu ŋà djiy ní dhi óddù! Fú lò dhò, à nì ddùw njèydha mí klôw nà.”
3Fú ddiy njìó, Herodde jà tdè ka lǒw Yohana ndèymí ka chěy à ngiy-dzà ò. À njèy tdè í ddiy Heroddiya mí lò dho, àmí djûnì Filipo ngá dza-yà, 4ddiydhò, Yohana Bàtízò bbúdha-dja dêy tdrǎ Herodde dhò, “Musa-ngá yǎdha ùw nzá nyi zž Heroddiya.”#14:4 Lawi 18:16, 20:21. 5Herodde jì tdè ndèy hwǐ Yohana, chú nyí lòw à Yahuddi-ddúw dhí lò dhò, ddiydhò bbalè wánì ùw tdè Yohana nì nabi.
6Herodde mí gôw mí ddu mí madha itsś djú, Heroddiya mí dhànì bì dyì lu wánì nyú djú ndèymí à nyâ hwî Herodde ò. 7À tdèy ju tsódha nà ndèy rà ddiy rò chú bbu cha fú li dhîy nì. 8Heroddiya mwô dhànì ò nì lò nà, dhànì îy Herodde tsò ró, “Bbú ma dhò Yohana Bàtízò bbúdha-dja djùkpa njanja í swǎnì ó.” 9Zòw lòw Pey Herodde, chú cha à wâ ì tdè nyû tsò ró ndanà nì lu nyú djú nì lò dhò, à jà ka bbú fú sǐngba-ní-ngba îy nì ddiy. 10Fú ddiy dhò, Herodde chô nděyngá la-dzàdha-dja rǎ Yohana djùkpa tdèy ngiy-dzà ò. 11À tdèy Yohana djùkpa ka ley swǎnì ó ndèymí kà mbà fú sǐngba-ní-ngba dè. Sǐngba-ní-ngba kâ mbà yânì dè. 12Yohana kodjú kpa shì, ndrǔ tdûw àmí bu ndèymí ndrǔ rà tdòw. Ndrǔ kâ rà mí lò tdrà Yesu dè.
Yesu bbû nyû ndèy da lówfù mbu nì bbalè dhò
(Mak 6:30-44; Lwk 9:10-17; Yoh 6:1-14)
13Yesu rr̀ tdè Yohana ró ndèy njèy ndèy nì lò-ɦéy ro, à bbà fú nga, à rà ngǒ nà ɦiy ní nga ò cha ndèy dho dey ddǐ-ddi ní mí nga ò. Bíy ní bbalè rr̀ tdè à nì rǎ mí nga ro, ndrǔ bbà ìdhí drò-dró ní bba ka à dyòw ì-koko nà. 14Yesu shì ngǒ óddù, à njà bbalè mí njuw ro, zòw-lò njèy à ndrǔ ró, à djì ndrǔdhí dhi nà nì bbalè rónga.
15Itsś tdè chěy ro, Yesu kodjú kpa shì à dè ndrǔ kâ tdrà, “Í nga nì ɦiy ní nga, ddu ddí dà ŋà. Dhá fú bíy ní bbalè gu, ndaní ndrǔ rǎ chow nì bba òluw nyû rò dzz ì dhò.”
16Yesu ngù lò ndrǔ dhò, “À jì nzá ndrǔ rǎ ngéy ní nga ò. Nyì bbú ndrǔ dhò ddiy rò ndrǔ nyǔ.”
17Ndrǔ ngù lò, “Ddiy wá cha mà nì ndanà ingá nì, nì mùkátì mbu ndèymí bbì nà rwo.”
18Yesu tdrà, “Mba ingá ma dè.” 19Ndèymí à jà tdè bbalè dǒw gudjò tsó djú. À kâ fú mùkátì mbu nì tduw ndèymí rwo nì bbì nà ndèymí à njà nga ru rakpa ò, à kâ madha bbu Ddrà dhò. À pbrr̀ mùkátì ónga ndèymí à bbû ndèy kodjú kpa dè. À kodjú kpa bbû bbalè dè. 20Bbalè wánì nyù ndèymí ndrǔ ónga kì. À kodjú kpa njûw ndèy gògò mànì nyû dyǔ dri ndèy djú rwo nà věy-věy. 21Ì nyù nì kpa ní ndrǔ tdè chow-chow lówfù mbu. Dhì ndèymí nzòw nà ka zòw tdè nzá.
Yesu bbîy ju-ddà djòluw
(Mak 6:45-52; Yoh 6:15-21)
22Fú ddiy-dzzdjú, Yesu lêy ndèy kodjú kpa tsǔw ngǒ ò ndèymí ndrǔ dǎ nji ju-ddà djòluw děy ndèy nì bbalè dha ro. 23À dhâ bbalè ddiy-dzzdjú, à rà tdè ngòw djò Ddrà nzz̀ ndèyníddò. Ngítss̀ djú nga tsò shì tdè ro, à tdè fulè ddǐ-ddi ní. 24Chú í nganà ngǒ tdè ŋà ndèy shì ju-ddà chíykà ò ndèymí à tdè ndèy nza ju-ddà djú ngòngò nà, ddiydhò vi tdè vu à dè nì nga là djò.
25Sâ ddrrdhiy kúw ó nga mî, Yesu shì ndèy kodjú kpa dè ju-ddà djòluw ndèy nì bbiy ddiy nà. 26À kodjú kpa njà à nì bbiy ju-ddà djòluw ro, ndrǔ rónga lòw dey bbǐ. Ndrǔ tdrà, “Í nì rr!” Ndrǔ kâ swa rí ní ì chuw nà, ì rónga nì bbǐ ddiydhò.
27Chú ndùw Yesu tdrà ndrǔ dhò, “Nyì thíy déy klǒw. Í nì ma. Nzǐ nyí njěy nyì.”
28Petro kâ tdrà à dhò. “Ddrǒngóli, ya dìchú à nì nyi, ja ma dhò ma rǎ nyi dè ju-ddà djòluw.”
29Yesu kâ tdrà, “Ra.” Petro shì rúgò ngǒ óddù, à lòw dey rǎ Yesu dè dda djòluw. 30Chú à njà rí ní vi mí nga nà, nyí lòw à, ndèymí à lòw dey tsùw bbi dda ò. À swâ, “Ddrǒngóli, pa ma!”
31Ndùw Yesu ddà ndèy-dhokpa ó nga ndèymí à lòw à-dhokpa, à kâ tdrà, “Nyi drá nyìmí ùwdha nà nì li, ddudhò nyi thíy ní kǒw?”
32Ndrǔ rwo tú wá kâ tsùw ngǒ ò, ndèymí vi kâ dèy. 33Yesu kodjú kpa ì tdè ngǒ ó nì kâ ì tdyòw-tey kwò à dhò, ndèymí ndrǔ bbû madha à dhò, ndrǔ tdrà, “Dìchú nyi nì Ddrà mí Ddùwnì.”
Yesu lêy bbalè rónga djì Genesareti mí bba ó
(Mak 6:53-56)
34Yesu mà ndèy kodjú kpa nà dà ju-ddà djòluw ro, ndrǔ shì dèy Genesareti mí bba ó. 35Fú bba ó bbalè tsì fú nì tdè Yesu ro, à mí shìdha ɦuwdjò dhâ zěy-zěy fú bba rò luw nì bba òluw wá. Ndùw fú bba ó bbalè lòw dey dhi nà nì bbalè mbà wá Yesu dè. 36Ndrǔ kwô à, à léy ì nì dhi nà nì ndrǔ nú mbú à ró rù tsò. À ró rù tsò ì mbû nì ndrǔ wá rónga djì.
Chwazi Kounye ya:
Matayo 14: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved