Matayo 12
12
Yesu nì Sabato ddù djú Ddrǒngóli
(Mak 2:23-28; Lwk 6:1-5)
1Ddì nì Sabato ddù ó, Yesu mà ndèy kodjú kpa nà dêy bbiy nyû nzà òluw. À kodjú kpa tdè ɦùw nà, fúddiy dhò ndrǔ lòw dey nyû-tsi kli ndèymí ndrǔ lòw dey nyù. 2Farisayo ní kpa njà tdè í ddiy ro, ndrǔ kâ tdrà Yesu dhò, “Nja, nyi kodjú kpa nì dhǐy njěy Sabato ddù ó. Musa-ngá yǎdha ùw fú ddiy nzá.”#12:2 Ngbídha 20:8-11, 34:21 Yǎdha 5:12-15.
3Yesu ngù lò ndrǔ dhò, “Nyì zǒw nzá Dawuddi njèy tdè nì ddiy cha à nděyngá kpa nà ɦùw tdè njěy ro? 4À rà tdè Ddrà-dzà ò, ndèymí à nděyngá kpa nà nyù tdè mùkátì cha ka bbû tdè Ddrà dho nì.#12:4 1 Samueli 21:1-6. Chú Musa-ngá yǎdha ùw tdè nzá ndrǔ dhò ndrǔ nyǔ ní. À ùw tdè ndèy Ddrǎ-ngá dyǎ-djá dhò chúddì.#12:4 Lawi 24:5-9. 5Nyì zǒw nzá Musa-ngá yǎdha ó wánì Sabato ddù ó Ddrǎ-ngá dyǎ-djá njey nì njí Ddrà nzz̀dha mí thí ní dza ó? Ndrǔ kwo nì ngǎ yǎdha Sabato ddù ó, chú ndrǔ djú lò tde ní ngǎ? 6Manì tdrǎ nyì dho, li rò nì ney i ngá cha ndèy nì ddrǒngó tǐ Ddrà nzz̀dha mí thí ní dza djòluw nì. 7Ddrǎ-ngá ndíydha-ní-lò tdrà, ‘Manì zòw-lò jǐ, ngǎ měyá mí bbudha.’#12:7 Hoseya 6:6. Ya nyì tsǐ tdè í ddiy mí lò-tey, nyì dhò tdè nzǐ ngǎ ì nì ngǎjìní lò nà nì ndrǔ djú lò-ndò, 8ddiydhò ma Ndrǔ-Ddùw nì Sabato ddù djú Ddrǒngóli.”
Yesu djì ndèy-dhokpa vêy nì kpatss̀ rónga Sabato ddù ó
(Mak 3:1-6; Lwk 6:6-11)
9Yesu bbà fú nga ndèymí à rà Yahuddi-ddúw dhí njuwdha-dzà ò. 10Fungá tdè ndèy-dhokpa vêy nì kpatss̀-ní-li. Farisayo ní kpa rò tdè ney fungá cha ì dêy jǐ ì bbǒw Yesu ngǎjìní ddiy njèydha dhò nì. Fú ddiy dhò, ndrǔ dhîy à, “À ǔw ndèy ŋà Musa-ngá yǎdha dhò ka djǐ bbalè rónga Sabato ddù ó?”
11Yesu ngù lò ndrǔ dhò, “Ya nyì kàó li rò nì towmbù nà ddì ndèymí mí towmbù chèy bbuw ò Sabato ddù ó ro, nyì dhó nzǐ fú towmbù dda fú bbuw óddù Sabato ddù ó? 12Nyì tsì lǎní drǒ bbalè ɦuwdjò nì tǔw tǐ à dà towmbù djòluw. Fú ddiy dhò, yǎdha ùw ŋà kà njěy lǎní ddiy bbalè dhò Sabato ddù ó.”
13Fú ddiy-dzzdjú Yesu kâ tdrà fú ndey dhokpa vêy nì kpatss̀-ní-li dhò, “Dda nyi-dhokpa ónga.” À ddà ndèy-dhokpa ónga ndèymí à-dhokpa ónga ngû lǎní gbè njàddí níchú. 14Fú ddiy-dzzdjú, Farisayo ní kpa kâ rà ndèymí ndrǔ ddêy lò ddìngaó ya ŋǎchú ì hwǐ ndanà Yesu.
Yesu nì Ddrǎ-ngá vúdha ní nokpa
15Yesu rr̀ tdè ndèy ró Farisayo ní kpa lêy tdè nì lò ro, à rà ndùw fu ngá ddù. Bíy ní bbalè mí njuw rà à kodjú. À djì bbalè wánì rónga cha ì tdè dhi nà nì. 16À jà ndrǔ dhò nzǐ ndrǔ tdrǎ ndèy ɦuwdjò ngéy ní bbalè dhò. 17À njèy í ddiy, ndaní cha Ddrà kâ tdrà nabi Isaya òluw nì lò njěy ndèy dìchú. À tdrà,
18“Ingá nì màtsá nokpa, cha ma vû nì,
ma jì nì, ndèymí cha ma nì hwî nà ndèy nà nì.
Ma rà màtsá Bblǒ Thíy cho à djò,
ndèymí à rà màtsá chěy ní lò-ndòdha dhò dziylíy wánì ó bbalè dhò.
19À rà nzǐ lò rr̀ ǐngí à rà swa nzǐ,
ǐngí à rà nzǐ rí ní lò tdrà tuw tsò rá òluw.
20À rà nzǐ ngǎ ìdhí klôw nà nì bbalè rónga nyu.
À rà zòw-lò njèy ngǎ ìdhí klôw nà nì ndrǔ dhò.
À ra í ddiy njèy pbǔw wánì chěy ní lò rà ì dhò mí nga djò.
21Dziylíy wánì ó bbalè rà ìdhí ddeydha ley à ó.”#12:21 Isaya 42:1-4.
Farisayo ní kpa tdrà Yesu mí klôw shì Setani dèddù
(Mak 3:20-30; Lwk 11:14-23)
22Fú ddiy-dzzdjú njàddí bbalè rò mbà tdè cha ndèy nyú mûw nì kpatss̀-ní-li Yesu dè ndèymí nzǐ à dêy lò těy, ddiydhò à tdè che thíy nà. Yesu djì fú kpatss̀-ní-li ronga. Fú ddiy lêy à lòw dey lò tèy ndèymí à lòw dey nga njà. 23Bbalè mí njuw ónga ꞌwìy ndèymí ndrǔ tdrà, “Í nì dho ná tdè pey Dawuddi mí Ddùwnì?”
24Farisayo ní kpa rr̀ tdè í ddiy mí nga nà, ndrǔ tdrà, “À diy nì che thíy, ddiydhò ndrǔ djùkpa ddàdha-dja Belzebuli#12:24 Belzebuli. Í nì njàddí dho Setani ró nì. bbû nì à dho klôw fúddiy njèydha mî.”
25Yesu tsì tdè ndrǔ nì ddey nì lò mí nga nà, à kâ tdrà ndrǔ dhò, “Ngòw cha ndèy nì ndèy ónga ndǒ la nà nì, rà dèy nzǐ. Ndèymí ddrǒngó ní bba ǐngí dzà cha ndèy nì ndèy ónga ndǒ la nà nì, rà chèy. 26Fú ddì nì tùw nà, ya ddì nì ngúw nì la njěy njàddí Setani ngá pey-mí-nga ró, à ndò ndèy ŋà ndèymí à nì chow chèydha nà. 27Nyì nì tdrǎ ma ddá nì che thíy Belzebuli bbû ma dhò nì klôw nà. Ya fúnì nì dìchú, nyì kodjú kpa ddá ní áyì mí klôw nà? Fú ddiy dhò, nyì kodjú kpa rà lò-ndò nyi djú. 28Chú ya ma ddá nì che thíy Ddrà mí Bblǒ Thíy mí klôw nà, fúnì nì dhǒ Ddrà mí pey-mí-nga shì ŋà nyì dè.
29“Manì tdrǎ ddíyàchú, ndeyli dhó tsùw klǒw ní li ngà dzá ŋǎchú, ndèy tdǔw fú li mí ddiy? Ya à jì ndèy njěy fúddiy, à rà nji fú li chèy, fú ddiy-dzzdjú à rà fú li mí ddiy tdùw.
30“Cha ndèy nì ngǎ ma nà nì li, nì ma tsò ró li, ndèymí nzǐ ndèy mbà nì bbalè ma dè nì li, dhá nì bbalè dhá ní. 31Ndèymí manì tdrǎ nyì dhò, wánì cherr ndèymí ngǎjìní ddiy cha ndrǔ nì tdrà nì ka dho bbà ney bbalè dhò. Chú Ddrà rà bbà nzǐ ndèy nì ngǎjìní ddiy tdrǎ Bblǒ Thíy ró nì li dhò. 32Ndèy nì lò tdrǎ ngǎjìní ma Ndrǔ-Ddùw ró nì li dhò, ka dho bbà. Chú ndèy nì lò tdrǎ ngǎjìní Bblǒ Thíy ró nì li dhò, ka rà bbà nzǐ. Ka rà bbà nzǐ fú li dhò njanja ndèymí ndru-tey ró.
Tsúw ka tsi nì ndèy tsi ró
(Lwk 6:43-45)
33“Tsúw ka nja nì ndèy tsi ró. Ya tsúw nì lǎní, à tsi ddí rà dey lǎní. Ya tsúw nì ngǎjìní, tsúw-tsi ddí rà dey ngǎjìní.#12:33 Ya tsúw nì lǎní, à tsi ddí rà dey lǎní. Ya tsúw nì ngǎjìní, tsúw-tsi ddí rà dey ngǎjìní. Njàddí í lò líydha tey nì, Léy tsúw déy lǎní, tsúw-tsi ddí rà dey lǎní, íngí léy tsúw déy ngǎjìní, tsúw-tsi ddí rà dey ngǎjìní. 34Nyì ngìydhá ó ddèy, nyì dhó lǎní lò tdrà ŋǎchú, yà nyì nì ngǎjìní ro? Li-tsò tdrà nì cha ndèy nì li-thíy ò ddù nì ddiy. 35Lǎní li mba nì lǎní ddiy, lǎní thíy óddù ndèymí ngǎjìní li ddí mba nì ngǎjìní ddiy, ngǎjìní thíy óddù. 36Manì tdrǎ nyì dhò, lò-tdèydha mí ddu ó, Ddrà rà nyì dhiy wánì ngǎ ndèy tey nà nì lo ró cha nyì tdrà tdè nì. 37Nyi tdra nì nì lò rà nyi djú lò tdèy, ya chěy ǐngí ngǎ chěy.”
Ddǐnì mí li-djùkpa ddàdha-djá dhǐy Yesu njěy ì dhò ddùw
(Mak 8:11,12; Lwk 11:29-32)
38Fú ddiy-dzzdjú njàddí Farisayo ní kpa ndèymí Musa-ngá yǎdha mí li-gwíydha-djá kâ tdrà Yesu dhò, “Li-gwíydha-dja, mà nì jǐ mà njǎ ddùw mí ɦiy nyi dèddù.”
39À ngù lò ndrǔ dhò, “Ngǎjìní bbalè ndèymí cha ì nì ngǎ uwdha nà nì ndrǔ dhîy ddùw mí ɦiy. Chú ma rà bbu ndrǔ dhò nì ɦiy nì nabi Yona ngá ddùw chúddì. 40Fú ddì nì tuw nà, cha Yona dêy tdè ddrǒngó ní bbì ò ddu gbow nì dhò itsś ndèymí kúw nà níchú,#12:40 Yona 1:17. ma Ndrǔ-Ddùw ddí rà dey tdôw-dzì ò ddu gbow nì dhò itsś ndèymí kúw nà. 41Lò-tdèydha mí ddu ó Nineve mí ddrǒngó ní bba ó bbalè rà ì ngbi ndèymí ndrǔ rà nyì bbòw, ddiydhò Yona gwîy tdè ndrǔ Ddrà mí lò-ɦéy nà ro, ndrǔ lî ì dhà rónga ì dhí cherr óddù.#12:41 Yona 3:1-10. Chú nja ndèy dà Yona djò luw nì li nì ney ingá. 42Lò-tdèydha mí ddu ó ɦìytss-ní-li ní Cheba mí ngòw ó pey rà ndèy ngbi ddìngaó njanja nì bbalè nà ndèymí à rà nyì bbòw. À shì dziylíy tsò tdôw mí nga óddù, ndaní ndèy rř nyǔꞌwiy mí lò pey Sulemani deddù.#12:42 1 Pey 10:1-13. Chú nja ndèy dà Sulemani djòluw nì li nì ney ingá.
Che thíy ngû ndèy rr̀dja ò
(Lwk 11:24-26)
43“Ya che thíy shì njàddí li óddù, à ra nì bbiy ndèy ꞌwìy nì nga ò, ndaní ndèy chǔw ndèy shu ndèy rónga mí nga. Chú ya à chùw nzá, 44à rà tdrà ndèy dhò, ‘Ma rà ngu ví cha ma shì ndèy óddù nì dza ò.’ Ya à ngu ro, à chùw mí dza ó nga nì vúní, ka tsùw ddí ngbá ndèymí ka thì ddí lǎní. 45À rà rà rúgò ndèymí à rà ngéy ní che thíy zargbòw nì zz̀ ì jì nà ngǎjìní tǐ ndèy djòluw nì. Ndrǔ rà tsùw ndèymí ndrǔ rà dey fungá. Ndey li mí deydha rà ngu ngǎjìní tǐ à da ndruní djòluw. Fú ddì nì ddiy rà ndèy njèy nyì ró nyì ngǎjìní bbalè cha ì nì djiy ní njanja nì ddu ó nì.”
Yesu mí yânì ndèymí djúní nà
(Mak 3:31-35; Lwk 8:19-21)
46Yesu tdè lò těy sǔw bbalè mí njuw nà ro, àmí yânì ndèymí djúní nà shì à dè. Ndrǔ dèy cha Yesu tdè ǒmá nì dza mí rúgó, ndèymí ndrǔ jì ì těy lò à nà. 47Ndèymí li rò kâ tdrà à dhò “Nja yâ-nyi ndèymí djú-nyí nà dèy rúgó, ndrǔ nì jǐ ì těy lò nyi nà.”
48Yesu ngù lò, “Màtsá yânì ní áyì? Màtsá djúní ní áyì mà?” 49Fú nganà à kâ nga dhò ndèy kodjú kpa dè ndèymí à kâ tdrà, “Njà! Í nì màtsá yânì ndèymí màtsá djúní nà ddí. 50Ndèy rà cha màtsá Djǎnì rakpa ó nì nì jǐ à njěy nì ddiy njèy nì fú li, rà tdè màtsá djûnì, màtsá vînì ndèymí màtsá yânì nà ddí.”
Chwazi Kounye ya:
Matayo 12: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved