Matayo 11
11
Yesu tdrà lò Yohana Bàtízò bbúdha-dja ró
(Lwk 7:18-35)
1Yesu sî tdè lò-dhòdha dri ndèy djú rwo nà nì ndèy kodjú kpa dhò ro, à rà fungá ddù lò gwiy ndèymí lò tdrà chow nì drò-dró ní bba ò.
2Fú nga nà, Yohana Bàtízò bbúdha-dja tdè ngiy-dzà ò ro, à rr̀ Kristo nì njěy nì njí ɦuwdjò. À chô ndèy kodjú kpa, 3ndaní ndrǔ dhíy à, “Nyi ná Masiya cha mà tdè pbǒ nì, ǐngí mà mey ná ngéy ní li?”
4Yesu ngù lò ndrǔ dhò, “Nyì ngú ndèymí nyì tdrà Yohana dhò cha nyì rr̀ nì ddiy ndèymí nyì njà nì nà. 5Ngǎ nyú nì nga njǎ, ì-koko dhì nì ndrǔ nì bbiy, ì nì tsátsá mí dhi nà nì ndrǔ rónga djì, nzǐ ì-gi tdè nga rř nì ndrǔ nì nga rř, ì dhì nì ndrǔ ngû djiy ní, ndèymí Hwî mí Lò-ɦéy ka tdrà zòw-djá dhò.#11:5 Nabi Isaya tdrà tdè cha Yesu nì njěy nì ddiy cha ka dhò ǐngá nì. Nja Isaya 35:5-6; Isaya 61:1. 6Bû nì cha nzá ndèy gù màtsá lò nì li dhò.”
7Yohana kodjú kpa tdè rǎ ro, Yesu lòw dey lò tdrǎ bbalè mí njuw dhò à ró. À dhîy ndrǔ, “Nyì rǎ ddu njà ɦiy ní nga ò? Nyì rǎ tdè ngǎ ndèy mí klôw nà nì li njà, cha ndèy nì gbè ndìy ndèy dhìy nì tsó níchú cha vi nì jǎ nì? 8Ya ngǎ ro, nyì rǎ tdè ddu njà rútsò? Ndèy thô ndèy klǒw ndèy ró dzẑ nà nì rù nà nì li? Ngǎ, ì kpi nì klǒw ndèy ró dzẑ nà nì rù nì bbalè, déy nì pey ngá kaley ò. 9Nyì tdra ma dhò, nyì rǎ tdè ddu njà? Nabi njà? Òní, manì tdrǎ nyì dhò, chú nyì njà ndèy dà nabi djòluw nì li. 10Í nì Yohana cha Ddrà tdrà tdè ndèymí ndíydha-ní-lò ó nì, à tdrà tdè,
“ ‘Ma rà màtsá dyòw-dja cho nyi njìò,
cha ndèy rà nyìmí tuw thì nì.’#11:10 Malaki 3:1.
11Manì nyì dhò dìchú ní lò tdrǎ, Yohana Bàtízò bbúdha-dja nì ddrǒngó tǐ à da wánì bbalè djòluw cha ì tdè ney djiy ní à nga ndèy ndruní nga djúddù nì. Chú ndèy nì drá tǐ rakpa mí pey-mí-nga ò nì li, nì ddrǒngó à dà Yohana djòluw. 12À nga ndèy Yohana Bàtízò bbúdha-dja tdrà Ddrà mí lò-ɦéy mí nga djúddù pbǔw njanja, rakpa mí pey-mí-nga nzâ ndèy la nà. La-djá jì tdè ì ddá à klôw nà. 13Pbǔw Yohana ngá ddu ó, nabi-kpà wá ndèymí Musa-ngá yǎdha nà tèy lò rakpa mí pey-mí-nga djò. 14Ya nyì jì nyì ǔw ndrǔdhí lò-ɦéy, Yohana nì Eliya cha ndèy kà ndèy shǐ nì.#11:14 Malaki 4:5-6. 15Cha ndèy nì ndèy gi nà nì li, bba à rř!
16“Njanja, ma rá í ddu ó bbalè ddey ddu nà? Ndrǔ nì gbè nzòw níchú cha ì dòw sǒkò ó ní ndèymí ndrǔ nì tdrǎ ì kàó, 17‘Mà mèy tdè lǐy nyì dhò, chú nyì bì nzá. Mà ngwò dzz̀ ngwò nyì dhò, chú nyì dzz̀ nzá!’ 18Nyì nì gbè nzòw níchú. Yohana shì tdè ro, à nyù ddiy rò nzá ndèymí mbùdha ní ddiy ddí à mbù nzá. Bbalè wánì tdrà, ‘À nì che thíy nà ndèy ó!’ 19Njanja ma Ndrǔ-Ddùw shì tdè ro, ma nyù nga ndèymí ma mbù mbùdha ní ddiy, ndèymí bbalè wánì tdrà, ‘Nyì nja í kpatss̀. À nì pǔ-dja ndèymí wa rŕ, ndèymí à nì mùsórò njúwdha-djá dhí dyasi ndèymí cherr-djá nà!’ Chú nyǔꞌwiy dho nì ndèy nì dìchú, ndèymí njeydha nà.”
Yesu ddù ì gù ndèy nì bbalè nyú drò-dró ní bba ó
(Lwk 10:13-15)
20Yesu lòw dey drò-dró ní bba ó bbalè nyú ddù cha ndèymí bíy ní ddùw njèy ndèy ǒmá nì, ddiydhò fú bba ó bbalè lî tdè ì dhà rónga nzá ì dhí cherr óddù. 21À tdrà ndrǔ dhò, “Zòw nyì dhò Korazini ó bbalè. Zòw nyì dhò ddí Betsayidda ó bbalè. Nyì kàó ma njèy tdè nì ddùw, ka njěy tdè Turo mí ddrǒngó ní bba ó ndèymí Sidoni#11:21 Korazini ndèymí Betsayidda nà nì Yahuddi-ddúw dhí ngòw. Turo ndèymí Sidoni nà nì ngǎ Yahuddi-ddúw dhí ngòw. nà, fungá nì bbalè dho gùníyà tho ì ró ndèymí ndrǔ dho ì vìy hurr nà cha ndèy nì dhǒ ndrù lî ì dhà rónga ìdhí cherr óddù nì. 22Chú manì tdrǎ nyì dho, lò-tdèydha mí ddu ó, Ddrà rà zòw-lò njèy Turo ndèymí Sidoni ó bbalè ró à da tǐ nyì dhí djòluw. 23Nyì, Kapernawumu ó bbalè, nyì ní jǐ nyì tdúw nyì ru rakpa ò? Ka ra nyì ngbò ndru-tey ró nì li sàdha mí kàss ò. Ya nyì kàó ma njèy tdè nì ddùw, ka njěy tdè Sodoma ó, fú ddrǒngó ní bba dho mà tdè pbǔw ndu nì ddu ò. 24Chú manì tdrǎ nyì dho, lò-tdèydha mí ddu ó Ddrà rà zòw-lò njèy Sodoma ó bbalè ró, à da tǐ nyì dhí djòluw.”
Nyì ra ma dè, ndaní nyì shǔ nyì rónga
(Lwk 10:21,22)
25Fú nga nà Yesu tdrà, “Ma nì madha bbu nyi dhò, ma-Dja, rakpa djú Ddrǒngóli ndèymí dziylíy djú nì nà. Nyi rù í ddiy nyǔꞌwiy-djá róddù ndèymí ì tsì lò nì ndrǔ róddù, chú nyi dhò mí lò dùdú ní nzòw dhò. 26Òní, màtsá Djǎnì, í ddiy njèy ndèy cha nyi jì tdè à njěy ndèy níchú.”
27Yesu kâ tdrà bbalè dhò, “Màtsá Djǎnì bbû ddiy wánì ma dhò. Li rò nì ngǎ ndèy tsì Ddùwnì nì, chú Djǎnì chúddì, ndèymí li rò nì ngǎ ndèy tsì Djǎnì nì, chú Ddùwnì, ndèymí cha Ddùwnì vû ndèy dhǒ ì dhò nì ndrǔ.
28“Nyì ra ma dè, nyì wá cha nyì nì nyì nza tǔw ní nò tdúwdha nà nì ndrǔ, ndèymí ma rà nyì dhò nyì rónga shùdha bbu. 29Nyì dyow manì gwiy nì lò ndèymí nyì tsi lò ma dè, ddiydhò manì bbò ndèymí ma djówdha nà ma thíy ò ndèymí nyì rà nyì rónga shùdha chùw. 30Màtsá gwiydha nì ngǎ tǔw-tǔw ndèymí màtsá nò nì vu-ká-vu.”
Chwazi Kounye ya:
Matayo 11: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved
Matayo 11
11
Yesu tdrà lò Yohana Bàtízò bbúdha-dja ró
(Lwk 7:18-35)
1Yesu sî tdè lò-dhòdha dri ndèy djú rwo nà nì ndèy kodjú kpa dhò ro, à rà fungá ddù lò gwiy ndèymí lò tdrà chow nì drò-dró ní bba ò.
2Fú nga nà, Yohana Bàtízò bbúdha-dja tdè ngiy-dzà ò ro, à rr̀ Kristo nì njěy nì njí ɦuwdjò. À chô ndèy kodjú kpa, 3ndaní ndrǔ dhíy à, “Nyi ná Masiya cha mà tdè pbǒ nì, ǐngí mà mey ná ngéy ní li?”
4Yesu ngù lò ndrǔ dhò, “Nyì ngú ndèymí nyì tdrà Yohana dhò cha nyì rr̀ nì ddiy ndèymí nyì njà nì nà. 5Ngǎ nyú nì nga njǎ, ì-koko dhì nì ndrǔ nì bbiy, ì nì tsátsá mí dhi nà nì ndrǔ rónga djì, nzǐ ì-gi tdè nga rř nì ndrǔ nì nga rř, ì dhì nì ndrǔ ngû djiy ní, ndèymí Hwî mí Lò-ɦéy ka tdrà zòw-djá dhò.#11:5 Nabi Isaya tdrà tdè cha Yesu nì njěy nì ddiy cha ka dhò ǐngá nì. Nja Isaya 35:5-6; Isaya 61:1. 6Bû nì cha nzá ndèy gù màtsá lò nì li dhò.”
7Yohana kodjú kpa tdè rǎ ro, Yesu lòw dey lò tdrǎ bbalè mí njuw dhò à ró. À dhîy ndrǔ, “Nyì rǎ ddu njà ɦiy ní nga ò? Nyì rǎ tdè ngǎ ndèy mí klôw nà nì li njà, cha ndèy nì gbè ndìy ndèy dhìy nì tsó níchú cha vi nì jǎ nì? 8Ya ngǎ ro, nyì rǎ tdè ddu njà rútsò? Ndèy thô ndèy klǒw ndèy ró dzẑ nà nì rù nà nì li? Ngǎ, ì kpi nì klǒw ndèy ró dzẑ nà nì rù nì bbalè, déy nì pey ngá kaley ò. 9Nyì tdra ma dhò, nyì rǎ tdè ddu njà? Nabi njà? Òní, manì tdrǎ nyì dhò, chú nyì njà ndèy dà nabi djòluw nì li. 10Í nì Yohana cha Ddrà tdrà tdè ndèymí ndíydha-ní-lò ó nì, à tdrà tdè,
“ ‘Ma rà màtsá dyòw-dja cho nyi njìò,
cha ndèy rà nyìmí tuw thì nì.’#11:10 Malaki 3:1.
11Manì nyì dhò dìchú ní lò tdrǎ, Yohana Bàtízò bbúdha-dja nì ddrǒngó tǐ à da wánì bbalè djòluw cha ì tdè ney djiy ní à nga ndèy ndruní nga djúddù nì. Chú ndèy nì drá tǐ rakpa mí pey-mí-nga ò nì li, nì ddrǒngó à dà Yohana djòluw. 12À nga ndèy Yohana Bàtízò bbúdha-dja tdrà Ddrà mí lò-ɦéy mí nga djúddù pbǔw njanja, rakpa mí pey-mí-nga nzâ ndèy la nà. La-djá jì tdè ì ddá à klôw nà. 13Pbǔw Yohana ngá ddu ó, nabi-kpà wá ndèymí Musa-ngá yǎdha nà tèy lò rakpa mí pey-mí-nga djò. 14Ya nyì jì nyì ǔw ndrǔdhí lò-ɦéy, Yohana nì Eliya cha ndèy kà ndèy shǐ nì.#11:14 Malaki 4:5-6. 15Cha ndèy nì ndèy gi nà nì li, bba à rř!
16“Njanja, ma rá í ddu ó bbalè ddey ddu nà? Ndrǔ nì gbè nzòw níchú cha ì dòw sǒkò ó ní ndèymí ndrǔ nì tdrǎ ì kàó, 17‘Mà mèy tdè lǐy nyì dhò, chú nyì bì nzá. Mà ngwò dzz̀ ngwò nyì dhò, chú nyì dzz̀ nzá!’ 18Nyì nì gbè nzòw níchú. Yohana shì tdè ro, à nyù ddiy rò nzá ndèymí mbùdha ní ddiy ddí à mbù nzá. Bbalè wánì tdrà, ‘À nì che thíy nà ndèy ó!’ 19Njanja ma Ndrǔ-Ddùw shì tdè ro, ma nyù nga ndèymí ma mbù mbùdha ní ddiy, ndèymí bbalè wánì tdrà, ‘Nyì nja í kpatss̀. À nì pǔ-dja ndèymí wa rŕ, ndèymí à nì mùsórò njúwdha-djá dhí dyasi ndèymí cherr-djá nà!’ Chú nyǔꞌwiy dho nì ndèy nì dìchú, ndèymí njeydha nà.”
Yesu ddù ì gù ndèy nì bbalè nyú drò-dró ní bba ó
(Lwk 10:13-15)
20Yesu lòw dey drò-dró ní bba ó bbalè nyú ddù cha ndèymí bíy ní ddùw njèy ndèy ǒmá nì, ddiydhò fú bba ó bbalè lî tdè ì dhà rónga nzá ì dhí cherr óddù. 21À tdrà ndrǔ dhò, “Zòw nyì dhò Korazini ó bbalè. Zòw nyì dhò ddí Betsayidda ó bbalè. Nyì kàó ma njèy tdè nì ddùw, ka njěy tdè Turo mí ddrǒngó ní bba ó ndèymí Sidoni#11:21 Korazini ndèymí Betsayidda nà nì Yahuddi-ddúw dhí ngòw. Turo ndèymí Sidoni nà nì ngǎ Yahuddi-ddúw dhí ngòw. nà, fungá nì bbalè dho gùníyà tho ì ró ndèymí ndrǔ dho ì vìy hurr nà cha ndèy nì dhǒ ndrù lî ì dhà rónga ìdhí cherr óddù nì. 22Chú manì tdrǎ nyì dho, lò-tdèydha mí ddu ó, Ddrà rà zòw-lò njèy Turo ndèymí Sidoni ó bbalè ró à da tǐ nyì dhí djòluw. 23Nyì, Kapernawumu ó bbalè, nyì ní jǐ nyì tdúw nyì ru rakpa ò? Ka ra nyì ngbò ndru-tey ró nì li sàdha mí kàss ò. Ya nyì kàó ma njèy tdè nì ddùw, ka njěy tdè Sodoma ó, fú ddrǒngó ní bba dho mà tdè pbǔw ndu nì ddu ò. 24Chú manì tdrǎ nyì dho, lò-tdèydha mí ddu ó Ddrà rà zòw-lò njèy Sodoma ó bbalè ró, à da tǐ nyì dhí djòluw.”
Nyì ra ma dè, ndaní nyì shǔ nyì rónga
(Lwk 10:21,22)
25Fú nga nà Yesu tdrà, “Ma nì madha bbu nyi dhò, ma-Dja, rakpa djú Ddrǒngóli ndèymí dziylíy djú nì nà. Nyi rù í ddiy nyǔꞌwiy-djá róddù ndèymí ì tsì lò nì ndrǔ róddù, chú nyi dhò mí lò dùdú ní nzòw dhò. 26Òní, màtsá Djǎnì, í ddiy njèy ndèy cha nyi jì tdè à njěy ndèy níchú.”
27Yesu kâ tdrà bbalè dhò, “Màtsá Djǎnì bbû ddiy wánì ma dhò. Li rò nì ngǎ ndèy tsì Ddùwnì nì, chú Djǎnì chúddì, ndèymí li rò nì ngǎ ndèy tsì Djǎnì nì, chú Ddùwnì, ndèymí cha Ddùwnì vû ndèy dhǒ ì dhò nì ndrǔ.
28“Nyì ra ma dè, nyì wá cha nyì nì nyì nza tǔw ní nò tdúwdha nà nì ndrǔ, ndèymí ma rà nyì dhò nyì rónga shùdha bbu. 29Nyì dyow manì gwiy nì lò ndèymí nyì tsi lò ma dè, ddiydhò manì bbò ndèymí ma djówdha nà ma thíy ò ndèymí nyì rà nyì rónga shùdha chùw. 30Màtsá gwiydha nì ngǎ tǔw-tǔw ndèymí màtsá nò nì vu-ká-vu.”
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved