Lu-ka 16
16
Pn'geh ruk teq u bnih klei klôn 'bưn tơt tưt. – Pal baak maanh buôi nday
1Brah Jê-sus kươi lah n'hai bơl bơl jơrnơ: “Di mbu bnih khunh tôw geh di mbu klei klôn dol pnđing lah mhaach griêng mlơ nnơơm ri. 2Đươm bei nei, yau nnơơm khuôl bu nei lôh u lah: ‘Hei ttang bu nday pnđing ay teq u ntil ơơn nei! Phrui tơmbơh kaar kan krai ay ri, đươm a pưt au ay 'bưn kươt lơh klei klôn hôm!’ 3Bnih klei klôn gênh êêng: ‘Nnơơm ruh kaar kan krai hei ri, hei a kươi lơh ơơn? Pông steh nei hei 'bưn sơp kmlang, nha han dan sa nei prêêng mat. 4Hei gưt phrui lơh ơơn jah khal dol ruh kaar geh bnih wơơt hei teq u nhi.’ 5Bei nei, bu nei khuôl êêng rêêng koon knđi yau nnơơm lôh u mor teq u bnih daak bôôk: ‘Ay knđi nnơơm hei pal êch?’ 6Bnih nei ơh: ‘di riêng thông pring.’ Bnih klei klôn lah: ‘Phrui pơih kơrđaih knđi, gôq u teh 'bian gway: Pram jơt.’ 7Hươi bu nei lah n'hai bnih ttal baar: ‘Ay knđi pal êch?’ Bnih nei ơh: ‘Di riêng sah#16:7 sah: Knông baak Hi-lap lah koros, lah pi rweh tơmlai 400 lit. ba.’ Bnih klei klôn lah: ‘Phrui pơih kơrđaih knđi, 'bian: Phaam jơt.’ 8Yau nnơơm tư bnih klei klôn 'bưn sêch song nei ja lơh kaar ngach jhai bei nei. Đươm koon sau klap au jhai rpech huôih koon sau baak aang knông kaar gôq rêh n'hai tơrnang nơơm. 9Nha Hei lah bơl 'bei: Phrui nhôq prak 'bưn song ri jah lơh gnasaal, tơt khal prak nei leq hơơi, bu a kươi wơơt bơl 'bei mưt u nhi yoot yôw.
10'Bơơn tơt tưt tơt bôl knông kaar dêq đat kot tơt tưt tơt bôl knông kaar tih, 'bơơn 'bưn song knông kaar dêq đat kot 'bưn song knông kaar tih. 11Bei nei mơq bơl 'bei 'bưn tơt tưt tơt bôl teq u griêng grau 'bưn song, 'bơơn a kươi ơn griêng grau ngan ndơơp aan bơl 'bei? 12Mơq bơl 'bei 'bưn tơt tưt tơt bôl teq u griêng grau bu nday, 'bơơn a kươi ndơơp aan bơl 'bei griêng grau êêng bơl 'bei ri? 13'Bưn dêch pa êch baah awap jraih kaar baar nnơơm đươm a kươi kiêr nnơơm au baah srlanh nnơơm tôw, paich đing nnơơm au baah jam joot nnơơm tôw. Bơl 'bei 'bưn geh đah jraih kaar Brah Ưn, đah jraih kaar prak kaih#16:13 Mơq baak rơih gôq Mat 6:24. nha.”#Mat 6:24.
14Bnih Pha-ri-si laa bơl bah sơ ôp prak kaih ttang jôm ntil nei đam điêl Pang. 15Pang lah n'hai bu: “Bơl 'bei lơh bei sêch song bôôk mat bu nday, dôh Brah Ưn gưt chưt bơl 'bei; đươm ntil bu nday ta lơơk leet laa ntil jrơơk jrơơm bôôk mat Brah Ưn. 16Ch'bap u baak grnưt noor geh lôh klap Jang ri ei. A nar nei, Baak Sroong Klanh teq u nggoor Brah Ưn kươt chhuôr u jôm bnih nhôq kmlang baah mưt u nei.#Mat 11:12-13. 17Teh trôôk han rlach nha snôk huôih 'bui di glat#16:17 Asn: di têl glat. knông ch'bap.#Mat 5:18. 18'Bơơn teq lơơi sai jah kliêr bnih nday nei geh dôih ta tưr, nha 'bơơn kliêr dơur dol sai klau teq lơơi nei kot geh dôih ta tưr.”#Mat 5:32; I Kô 7:10-11.
Bnih khunh u La-sa-rơ
19“Geh di mbu bnih khunh dook ao plir plaar u ao knat sut huul, rêêng nar êch nhêt rung sa dơng. 20Kươi geh di mbu bnih l'ơơi chôôl chhak laa La-sa-rơ bêch a gaaih lpôông bnih khunh nei, toh môôr bêêng chhak. 21Bu nei kmbưng kươt sa pal kơn hach a lơ bliêng bnih khunh a tup u teh. Kot geh pal ơk pi sôw lôh liêr môôr bu ri nha. 22Bnih l'ơơi chhưt, kươt lênh brah liêu teq knông chưt Ap-ra-ham. Bnih khunh kot chhưt u bu nday tung han rôôp. 23Bnih khunh a phaan#16:23 S'bt: Hades: rơih lah ktôk bnih chhưt ri. dol ji kôr, ngơơk mat sau Ap-ra-ham gôq ngngai rngai u La-sa-rơ a knông chưt bu. 24Bnih khunh khuôl: ‘Yau yi Ap-ra-ham ơi, dan gmaak hei, maanh La-sa-rơ chlok koon dong teq u daak jah lơh l'ơh lpiat hei, đươm hei kro rngiêl ir knông ôinh au.’ 25Dôh Ap-ra-ham ơh: ‘'Bei ơi, phrui gênh kươi khal 'bei nha rêh, 'bei ja kươt dơơn pal ntil klanh hôm, nha La-sa-rơ phrui dol ơk ntil ap; bei au, bu a au kươt nđum nđiêng, nha 'bei phrui dol rngiêl p'baak. 26Huôih nha, geh di tơrlung jru ttih đat pơng gah lwah bơl bơn n'hai 'bei, lôh aan 'bơơn êch han a au u nei 'bưn kươt, baah 'bơơn êch han a nei teq u đau kot 'bưn kươt.’ 27Bnih khunh mor: ‘Yau yi ơi! Bei nei dan maanh La-sa-rơ han tơt nhi bươp hei ri, 28đươm hei geh pram ndu oh bi, jah bu nei pơrjat bu, daq bu kot dol jưr ktôk rngiêl p'baak au.’ 29Dôh Ap-ra-ham ơh: ‘Bu ja geh Môi-se u bơl grnưt noor. Bu phrui iat baak bơl bu nei!’ 30Bnih khunh kươi mor: ‘Ơi yau yi Ap-ra-ham, 'bưn geh bei nei laang! Dôh mơq geh bnih chhưt rêh kươi lôh u bu nei bu a kươi teq lơi dôih.’ 31Ap-ra-ham ơh: ‘Mơq bu 'bưn sang iat Môi-se u bơl grnưt noor nei paich geh bnih chhưt rêh kươi kot 'bưn ndit kươt bu ơơm.’”
Chwazi Kounye ya:
Lu-ka 16: SBL2024
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2024 Bible Society Vietnam. All rights reserved.