Ɛfɛsënyüü 6
6
'Jü ‑bɛ tʋɩɩ
1'Jüjie 'amɩ, 'ba ‑träärälɩ 'ana tʋɩɩ; 'ii 'Pläkänyɔɔ 'bata. 'Be 'ii 'na. 2«‑Träärälɩ ‑na tʋ nyra ‑na 'yio,» 'iibä Nyɔsʋaa 'klɩsa ‑dɔ. 'Ua dɛrɩ bä dɛɛlɛ Nyɔsʋa 'daaa' 'ɔmäa' nʋ: 3«‑Mä ‑jɔrʋ nyra ‑wɩaraklä 'jä ‑pɩ ‑tʋtʋ ‑gälɩ#6.3 Ɛgësɔɔdë 20.12; Deteronɔɔmë 5.16..» 4‑Bɛ 'amɔ tʋɩɩ 'amɩ, 'anyɩ 'tutro 'ana 'jü 'crɛ 'lɩ, ‑maa 'ba 'bʋala 'üün srarakʋ nyra 'kpɩkpɩakʋ 'lɩ, 'sɩrɩ 'Pläkänyɔɔ 'bataa' 'ia 'sa.
‑Goou nyra 'kamanyüü
5'Amɔ ‑goou 'amɩ, 'ba ‑träärälɩ 'ana 'kamanyüü ‑gböösa ‑pɩ ‑tʋtʋ ‑gälɩ, 'ba nʋ 'ana plɛa 'fɩɔ, 'sɩrɩ 'a ‑fɛɛɛ ɩa' 'jrʋpa 'Kriisëa ‑gʋ. 6'Anyɩ ‑fɛ 'jrʋpa 'taɩn 'lɩ 'ü tɛa' 'amɩ 'klɩa 'doo ‑beere 'amä nyüü 'tʋkä. ‑Maa 'ba 'palɩ 'klü 'ba nʋ 'ana plɛa 'fɩɔ 'ba nʋ wiili Nyɔsʋa 'bataa' ‑beere 'Kriisëa ‑goou. 7'Ba nʋ 'ana 'mʋfa plɛ 'ba ‑fɛ 'üa 'jrʋpa; ‑mää nyɔɔa 'jrʋpa ‑a, ‑maa 'Pläkänyɔɔa 'jrʋpa 'a ‑fɛɛɛ. 8'Be 'a jre 'iin, ‑moloo ma bälɩ, 'ɔ bä ‑geei, 'aiɛ 'ɔnyɩ ‑geei ‑a bä, 'a 'cɩcagbili ‑moloo nʋa' 'ia 'sa 'Pläkänyɔɔ 'mä 'ɔɔn 'pɛɛ.
9'Amɔ 'kamanyüü 'amɩ, 'asɩ 'ba nʋ bɩa 'üa 'pɛlɩ. 'Ba 'pie 'üa 'dadaakʋ. 'A jre 'iin 'sɩrɩ 'a nyra 'üün kɔsɔ käläa' 'Kamanyɔɔ 'doo cɛɩɩa 'mlɩ, ‑bɛ 'ɔnyɩ ‑gbasaa' nyüü 'lɩ.
Tafudiili Nyɔsʋa ‑nyɩa' amɩ
10 'Na ‑wlajü 'amɩ # 6.10 'Na ‑wlajü 'amɩ: ‑Taa ‑waklüülü 'nyɩ grɛɛkë kätɩpɔɔkɩ ‑mɩdooa 'mlɩ ‑a bä. ‑jäsɩ 'n blöa' nɩ: 'ba 'batra 'ana 'klü 'Pläkänyɔɔ 'lɩ, 'kä 'a 'batra 'üün 'ɔa 'klü kpakü 'lɩ. 11'Ba fa Nyɔsʋaa tafudiia 'fɩɔ, Sataan ma ji 'amɩ ‑trɔɔrɔ, 'amä 'wʋsɔɔrɔ. 12'Be ‑golulu a ‑fuuöa' 'nyɩ 'jajɛ nyra ‑torua ‑golu ‑a bä; ‑maa 'klü, 'kamanyüü, nyüülü 'kama 'jöjrüükpüa 'blɩlɩ kʋa' ‑pɩ, nyra bʋbɔsisili kʋa' cɛ nyra ‑tʋtʋa ‑tɔrʋpɩɔ, 'üü a nyra 'üün ‑fuuö. 13'A 'ia ‑gʋ, 'ba dɔrɔ Nyɔsʋaa tafudiia 'fɩɔwʋ 'amä nyɔnyrɔ bʋbɔsrɩa 'taɩn 'lɩ, 'amä 'nyüglökʋ jre, 'be 'a tritri 'anya 'tɔ bɩarafa 'wʋ. 14'Ii känyrɩ 'ba ‑sɔɔrɔwʋ: 'ba wlo 'cɩcasa 'ana ‑fualɩ ‑beere ‑pɛɛtʋ; 'ba pa 'klɩgägäkʋ 'lɩ ‑beere tafukotu. 15'Ba pa ‑si 'lɩ ‑beere 'Mʋfagogolä ‑nyɛɛa' 'wlinönrökʋ, 'be 'ää ‑ëlere 'amɩ. 16'Ia 'fɩɔlʋa 'wliklɩ nɩ, 'ba ‑tʋ 'lɩ nyɔsʋaplɛtorokʋ ‑beere 'ana tafudɛɛlɛ kakaa' dii 'klɩ. 'Ɛɛ 'a nëmä nʋ ‑bɛ 'amä Plɛbʋbɔsusu#6.16 Plɛbʋbɔsusu: Sataan a 'nyrɩ bäsaa. a ‑pruuulu 'pütöa' 'nyrɔlɔ. 17'Ba dɔrɔ bɩa 'lɩmlɩwʋwʋkʋ 'wʋ ‑beere tafuwlugbö, 'kä 'a dɔrɔ Nyɔsʋaa ‑Susua ‑jɛrɛ 'wʋ, ɛ bäa' nyɔsʋaawii.
18'Ba bibie Nyɔsʋa 'taɩn a 'fɩɔ 'lɩ. Wiili kä 'fɩɔ 'a ‑waa', i 'a 'bataa', 'ba ‑gbala 'ia 'fɩɔ Nyɔsʋa, ‑maa abɩa 'Ɔa ‑Susu ji 'amɩ ‑gba. 'Anyɩ sɩa, 'ba nʋ 'imɩa 'doo, 'kä 'a bibie nyɔsʋaanyüüa 'fɩɔa 'wli 'lɩ. 19'Ba bibie bɩa 'na 'wli 'lɩ, Nyɔsʋa 'mä 'mɩ wii mlɩ 'pa 'kä ama 'salɩ 'Mʋfagogoa 'mlɩa wiili ‑sisiea' nɩ, ŋalɛ ‑pɩ 'mɩ 'bla. 20Bɔblɔnyɔɔ 'n bä, 'äa ‑gʋ 'ü 'pa 'mɩ 'cɩ. 'Ii känyrɩ, 'ba bibie Nyɔsʋa 'mä 'suru 'mä 'Mʋfagogo 'sa 'sɩrɩ 'n käa' 'mäa' 'ään 'sa.
'Täpa 'trɔrʋ
21Ana ‑wlajʋ Tikiikë ana 'fɩɔ ‑waa' 'saa, ɔ nöa' 'mʋfasa 'Pläkänyɔɔa 'jrʋpa, 'ɔnya 'amɩ 'na ‑gogoa 'fɩɔ ‑nyɩa, 'amä bɩa dɛɛlɛ 'n nöa' jre. 22'Ia 'doo 'dooa ‑gʋ 'n blɔ 'ɔɔn 'ɔmä 'amɩ ana ‑gogo ja ‑bɛ 'ɔmä bɩa 'amɩ 'klülɩpa.
23Abɩa ana Tʋ Nyɔsʋa nyra 'Pläkänyɔɔ Jesu 'Kriisë ‑nyɩ ‑wlajüa 'fɩɔ 'wlinönrökʋ nyra ‑wawlakʋ nyra nyɔsʋaplɛtorokʋ. 24Abɩa ‑gbinanakʋ bä nyüülü kä 'fɩɔ ‑waa' 'cɩcasa ana 'Pläkänyɔɔ Jesu 'Kriisë ‑gälɩ. 'Asɩ i bä#6.24 'Asɩ i bä: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä.!
Chwazi Kounye ya:
Ɛfɛsënyüü 6: Bakwé
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc.