Ɛfɛsënyüü 5
5
'Ba ‑tɩtra Nyɔsʋa mlɩ
1‑Bɛ 'a bäa' Nyɔsʋaa ‑wawajü nɩ, 'ba ‑tɩtra 'ɔɔn mlɩ. 2'Ba 'nyɛrɛ ‑wawlakʋ 'lɩ, 'sɩrɩ 'Kriisë ‑waa' amɩ. 'Ɔ 'sara 'ɔa nyufa Nyɔsʋa kälɩ ‑gbɔa 'sa ana ‑gʋ; 'ɔ bä ‑gbɔlʋ kä 'nɔnʋ käa' Nyɔsʋa 'tʋ.
3Nyɔsʋaa 'nyünanyüü 'a bä. 'Ii känyrɩ, ‑sagbili Nyɔsʋa 'nyɩ 'bataa' nyra diili plaa' ‑fre, nyra dɛɛnyükäkäkʋ, 'ia ‑taa wiilia 'fɩɔ 'nyɩ kä ‑a kä 'imä 'ana ‑tɔrʋpɩɔ bä. 4'Papawiili bebea' nyüü cɛlɩ, mlüüpawii nyra bʋbɔ ‑gbanyrüü 'nyɩ bä 'ana ‑tɔrʋpɩɔ! 'Ba kä Nyɔsʋaa 'tɛtrɛɛkʋa 'doo. 5‑Bɛ 'ba jre bɩa 'saa nyɔɔlɔ nöa' ‑sagbili Nyɔsʋa 'nyɩ 'bataa', 'aiɛ ɔ nöa' diili plaa' ‑fre 'lɩ, 'aiɛ ɔ käa' tɛ, 'iibä ‑a ‑tɩ ‑plɩɩ Nyɔsʋa ‑bɛ ‑a bibie dii ‑mɩdoo. 'Ia nyɔɔlɔ ‑nëmä ‑jaaa ‑a ji 'Kriisë nyra Nyɔsʋaa 'kamapläa 'mlɩ.
'Ba 'nyɛrɛ 'napɛ 'klɩ
6Nyɔɔ 'nyɩ nʋ wiili 'nyɩa' ‑tɔɔ kä 'ɔnyɩ 'pa 'amɩ mlüü 'lɩ. 'A 'samaa nʋnʋgbili 'ii 'kʋɛɛrɛ Nyɔsʋaa 'crɛ nyüülü 'nyɩ ‑trääräa' 'lɩ 'ɔmɩ ‑gälɩ. 7'A nyra 'üün 'nyɩ 'nyɛrɛ 'wʋ! 8'Jöjrüükpü 'a ma bä, ‑maa 'anya 'a ‑mlatɩ 'napɛ bä 'Pläkänyɔɔ 'lɩ. 'Ii känyrɩ, 'ba nʋ 'napɛa 'jüa 'sa; 9'be Nyɔsʋaa ‑Susu#5.9 Nyɔsʋaa ‑Susu: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: 'napɛ. ‑nyɛɛ ‑gbinanakʋa 'kaɩn 'kaɩn, 'klɩgägäkʋ, nyra 'cɩcasa. 10'Ba 'bata wiili käa' 'Pläkänyɔɔ 'tʋa nʋnʋkʋ. 11'Anyɩ 'cakla 'ana nyüfë ‑gbiaraa nʋnʋgbili 'nyɩa' 'wli nyra ‑toko kä, ‑maa 'ba be 'iin ‑fälɩ. 12'Be wiili 'ü nröröa' ‑sisiedii 'lɩ nɩ, 'i bä 'nyüsü 'wʋ. 13‑Maa 'ia diilia 'fɩɔ ma nyaa' ‑fälɩ blö nɩ, 'i 'a 'napɛ 'klɩtɔrɔ; 'be i 'tɔrɔa' 'napɛ 'klɩ nɩ, 'napɛ 'i bä#5.13 'be i 'tɔrɔa' 'napɛ 'klɩ nɩ, 'napɛ 'i bä: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä.. 14'A 'ia ‑gʋ 'ü nö:
Tɛkä, ‑mɔ 'mʋmɔa',
sɔ jäjänyüüa ‑tɔrʋpɩɔ:
'Kriisë 'mä ‑mɩ 'ɔa 'napɛ ‑gälɩ ŋʋala#5.14 Esaii 26.19; 51.17; 52.1; 60.1..
15'Ii känyrɩ, 'ba ‑tre ‑gböösa 'ana ‑wälɩkʋkʋkʋ. 'Anyɩ 'nyɛ saklanyüüa 'sa, ‑maa 'ba nʋ 'lɩglanyüüa ‑gbi. 16'Ba 'kpla 'taɩn 'lɩ a bäa' ‑gälɩ 'cɩcasa, 'be 'taɩn 'nyɩ 'na ‑a 'na. 17'Ii känyrɩ 'anyɩ 'jrara mlüü, ‑maa 'ba 'nu wiili 'Pläkänyɔɔ 'bataa' 'wli. 18'Nʋ 'nyɩ 'bla 'amɩ, 'u ‑pɩ 'amɩ dɛɛgbagbi 'lɩtutro. ‑Maa abɩa Nyɔsʋaa ‑Susu 'si 'amɩ 'klɩ: 19'ba nʋ Nyɔsʋaa 'lɩbrɛrɛdʋ, nyɔsʋaa daklüü nyra daklüülü Nyɔsʋaa ‑Susu jaa' ‑bɛ 'ba 'papla 'klü 'lɩ. 'Ba nʋ 'ana plɛa 'fɩɔ ‑bɛ 'ba brɩ, 'ba 'bʋala 'Pläkänyɔɔ. 20'Ba 'trɛɛ ana Tʋ Nyɔsʋa 'taɩn a 'fɩɔ 'lɩ nyra diia 'fɩɔa ‑gʋ, 'Pläkänyɔɔ Jesu 'Kriisëa 'nyrɩklɩ. 21'Ba ‑täträlɩ Nyɔsʋaa#5.21 Nyɔsʋaa: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: 'Kriisëa. 'nyrɩklɩa ‑gʋ.
Dʋɔɩɩ nyra 'ŋlëgë
22'Ŋlëgë 'amɩ, 'ba ‑träärälɩ 'ana dʋɔɩɩ 'sɩrɩ 'a ‑trääräa' 'lɩ 'Pläkänyɔɔ. 23'Be dʋɔ 'ɔɔ bä 'ɔa 'ŋlʋʋa 'cifi 'sɩrɩ 'Kriisë bäa' 'cɛcɩa 'cifi, ‑bɛ 'ɔ bäa' 'cɛcɩlɛ bäa' 'ɔa fugbaa 'Lɩmlɩbanyɔɔ. 24‑Maa 'sɩrɩ 'cɛcɩ ‑trääräa' 'lɩ 'Kriisë nɩ, 'asɩ 'ŋlʋʋa 'mʋgbɛ kä 'ɔmä bä 'ɔa dʋɔa 'pɛlɩ wiia 'fɩɔa 'mlɩ.
25'Amɔ dʋɔɩɩ, 'ba ‑wa 'ana 'ŋlëgë 'sɩrɩ 'Kriisë ‑waa' 'cɛcɩ ‑bɛ 'ɔ 'saa' 'ɔa nyufa 'ɛa ‑gʋ, 26'ɛmä 'klɩbere. 'Papawii nyra 'nɩ 'ɔ nʋ 'ɔnya 'ba 'ɛɛn ‑fre 'lɩ. 27'Ɔ nʋ 'imɩ 'kä 'cɛcɩlɛ 'naa' ‑gböösa 'mä 'ɔɔn 'klɩtɔrɔ, ɛnyɩa' 'kpafa ‑gba kä, ɛnyɩa' pɩpra, ɛnyɩa' bʋbɔdɛɛ ‑gba kä, ‑maa ɛ kä 'nyü 'naa', ɛ nyɔɔ 'nyɩa' 'lɩbɩa 'ɔmäa' wii 'kplara. 28Dʋɔɩɩ kä 'ümä 'üa 'ŋlëgë ‑wa 'sɩrɩ 'ü ‑waa' 'üa fugba. Nyɔɔlɔ ‑waa' 'ɔa 'ŋlʋʋ ‑wa 'ɔa 'mʋgbɛ.
29'Be nyɔɔ ‑kaapɩɔ 'ɔa fugba 'nyüamlɩjrara. 'Ɔ 'fini 'ään 'klɩ, 'ɔ ‑tʋʋä 'ään 'nyügba ‑beere 'sɩrɩ 'Pläkänyɔɔ#5.29 'Pläkänyɔɔ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: 'Kriisë. nöa' bɩa 'cɛcɩa ‑gʋ. 30'Be a bä bɩa 'ɔa fugbaa ‑gbaa dɛɛ 'ɔa 'jajɛ nyra 'ɔa 'koi#5.30 'ɔa 'jajɛ nyra 'ɔa 'koi: ‑Taa waklüülü 'nyɩ grɛɛkë kätɩpɔɔkɩ ‑mɩdooa 'mlɩ ‑a bä.. 31«'A 'ia ‑gʋ nyɔɔ nya 'ɔa tʋ nyra 'ɔa 'yio ‑gbasɔa 'kä 'ɔ nyra 'ɔa 'ŋlʋʋ nya ‑gba kpasraa, 'kä 'üa 'sɔɔ nya 'jajɛ 'dee bä#5.31 Jenɛɛsë 2.24..» 32‑Sarawiili bäa' wiili 'n ‑gbalaa' ‑plɩɩ 'amɩ a dɛrɩ nɩ, 'i 'bʋa ‑gböösa: 'iibä 'Kriisë nyra 'Cɛcɩa ‑gä. 33‑Maa 'i kälä bɩa 'amɩ ‑gba: dʋɔ ‑moloo ma bälɩ ɔ ‑wa 'ɔa 'ŋlʋʋ ‑beere 'ɔa 'mʋgbɛ, 'kä 'ŋlʋʋ ‑träärälɩ 'ɔa dʋɔ.
Chwazi Kounye ya:
Ɛfɛsënyüü 5: Bakwé
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc.