युहन्ना 15
15
ईसु कह्वे मे खरलु अंगुरेन वेलु छे
1ईसु कह्यु, “अंगुरेन खरलु वेलु मेत छे। ने ईना अंगुरेन वेलान राखवाळ्यु किरसाण#15:1 किसान मारु भगवान बास छे।” 2मारा डाळ्या मायन जे डाळ्या नी फळे, तीनुक मारु भगवान बास काट नाखे। ने जे डाळ्या फळे, चे डाळ्या अळी बी अदु फळनु चाहजे करीन तीनुक छाटे। 3तुहुंं काजे जी वात सीकाड़लु छे, तीनी वात सी तुहुंं चुखा हय गुयला। 4अळी अळीन फळ लावणे करीन मे तुहुंंक चुखा करलु छे, जीनु डाळ्या काजे अंगुरेन वेला मां सी काट नाख्या, चे डाळ्या मारेम जुड़ायला नी हय, ने चे आपसात नी फळे। तीने रीते मारेम जुड़ायला नी रहे ती फळ बी नी लावे, ने तुहुंं मारेम जुड़ायला रहु ने मे तुंद्रेम जुड़ायलु रवीस।
5“चु अंगुरेन वेलु छे, ने तुहुंं मारा डाळ्या छे, मार सी छेटे रय्न तुहुंं काय बी नी कराये। ने जु मारेम जुड़ायलु रहे ने मे तेरेमां जुड़ायलु रवसे, चु बेसकु फळसे।” 6जे मारेम जुड़ायला नी रहे चे तीनु डाळ्यान तसा छे, तीनुक किरसाण काटीन नाख देय ने चे सुक जाय ने किरसाण ईछीन आकठा मां नाख देय ने चे धप जाय। 7कदी तुहुंं मारेम जुड़ायला रवसु ने मारी सीकाड़ली वात काजे मान्ता रवसु, ती च बी चाहजे च दुवा करीन मांगजु ने मे तुहुंंक आपी दीस। 8असा करीन तुहुंं बेसका फळ लावसु, ती मारा भगवान बासेन बड़ाय हवसे ने तत्यार तुहुंं मारा पक्का चेला बण जासु। 9जसु भगवान बास मारे सी परम#15:9 प्रेम राखलु छे तसुत मे बी तुंद्रे सी परम राखलु छे। तुहुंं मारा ईना परम मां बणीन रवजु। 10मे मारा भगवान बासेन हुकुम पाळतु जाय्न तेरा परम मां बणीन रवु, तसात तुहुंं बी मारा हुकुम पाळसु ती मालम पड़से की तुहुंं मारा परम मां बन्ला छे।
11मे तुहुंं काजे ज असु करीन कह्यु की, तुहुंं काजे मारु हुकुम पाळनेन खुसी जड़ती रवे ने ची खुसी पुरी की पुरी जड़ जाय। 12मारु हुकुम जु छे की जसु मे तुंद्रे सी परम करलु, तसा तुहुंं बी एक दीसरा सी परम करता रवजु। 13आपसा दुस्तीदार सी परम करीन तींद्रे वाटे मरनु आखा सी मटु परम छे। असलु परम सी मटु काहनु बी परम नी हय। 14कदी तुहुंं मारा हुकुम पाळसु ती तुहुंं मारा खरला दुस्तीदार#15:14 मित्र कहंवायसु। 15पावर्या काजे मालम नी पड़े की तेरा मालीकेन मरजी काय छे, ने चु काय करने वाळु छे। बाकुन मे मारा बास सी सामळ्ळु च आखो तुहुंंक कय देदलु छे, ने हय सी मे तुहुंंक पावर्या नी कहं बाकुन दुस्तीदार कहीन। 16“तुहुंं मेसेक नी नेवाड़्या, बाकुन मे तुहुंंक नेवाड़ीन तुहुंंक मारे कामे लागाड़लु छे, की तुहुंं मारो नाव लीन भगवान बास सी ज काय दुवा करीन मांगसु च भगवान तुहुंंक आप देसे 17मे तुहुंं काजे जे हुकुम असु करीन आप र्यु की, तुहुंं एक दीसरा पर परम राखता रहु।”
ईनी कळीन माणसे ईसुन चेला काजे वारु नी कह्वे
18“कदी ईनी कळीन माणसे तुंद्रे पर भुंडा सुचे, ती तुहुंं ज हेर राख्जु की तुंद्रे सी पेहेल चे मारे पर भुंडा सुचे।” 19कदी तु ईनी कळीन माणसे रहता तत्यार चे तुहुंंक आपणा समजीन परम राखता बाकुन मे तुहुंं काजे ईनी कळीन माणसेम सी नेवाड़ लेदलु छे, करीन चे तुंद्रे बारामां भुंडा सुचसे। 20मे तुहुंंक जी वात कह्यु तीनीक हेर राख्जु की, पावर्यु आपसा मालीक सी मटु नी हय। मे तुंद्रु मालीक छे, तेबी माणसे मेसेक वेला पाड़्या असला माणसे तुहुंंक बी वेला पाड़से ईनी कळीम वाळा माणसे मारी सीकाड़ली वात काजे नी मान्या ती तुंद्री सीकाड़ली वात बी नी माने। 21असला माणसे, मेसेक मकेलन्या भगवान काजे नी उळख्या, ने मारी वीरुद कर्या, तुहुंं ते मारो नाव ली र्या ने चे तुहुंं काजे भुंडात करीन तुहुंंक वेला पाड़से। 22कदी मे नी आवतु ने हीनुक पापेन बारामां भगवानेन छाचली वात नी सीकाड़तु, ती हीनुक पाप नी लागतु बाकुन हय ते हींद्रे धड़े आपसा पापेन बारामां ढंगड़ा करनेन मुखु नी हय। 23जु मेसेक भुंडु समजे, चु मारा भगवान बास काजे भुंडु समजे। 24कदी मे तींद्रे अगळ चे मटा कामे नी करतु, चे कामे कुय बी दीसरु कदी नी कर्यु, ती तीनुक पाप नी लाग्तु बाकुन हय ते चे असा काम देखीन बी मेसेक नी मान्या ने सांबा मार भीणी ने मारा भगवान बास काजे भुंडा करला छे। 25ज असो काहा हयो काहाकी खरला सास्तुर मां लिखलो हतलो च पुरो हवे चां असो लिखलो छे, की चे माणसे फालतु मां मारा वेरी बण गुयला छे।
26मे तुंद्रेन्चां सात देण्या काजे मतलब छाचली जीव-आत्मा काजे भगवान बासेन चां सी मकलीस, जत्यार चु छाचली जीव-आत्मा भगवान बासेम सी आवसे ती चु मारे बारामां गवा देसे। 27ने तेरे पुठ्ये तुहुंं बी मारी गवाय देसु काहाकी तुहुंं सुरु सीत मारे पुठ्ये रवला छे।
Chwazi Kounye ya:
युहन्ना 15: BSP25
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.