युहन्ना 13
13
ईसु आपसा चेलान पाय धुवे
1फसह तीहवारेन दाहड़ु आय लाग्यु, ने खाणो तीयार हय रह्लो। ईसु काजे मालुम हतलो, की जी कळ छुड़ीन भगवान बासेन्चां जाणेन मारी घड़ी आय गुयली छे। ईसु आपसा चेला काजे, जे ईनी कळी मां हतला, तीनुक पेहेल सीत परम करतु आय रवलु ने आकरी#13:1 अन्त टेम लग तीनु काजे तसुत परम करतु रयु।
2सांतो हय रह्लो तत्यार ईसु ने तेरा चेला तीहवारेन खाणो खाणे करीन बठी गुया, तीने टेमे लग भुतड़ु सीमोन ईस्करीयोतीन पुर्या यहुदीयान मन मां ईसु काजे धुकु दीन धरावणेन वीच्यार नाख देदलु। 3ईसु जाणतेलु की मे भगवान बासेन्चां सी आवलु छे ने भगवान बास मारा हाते मां आखो काय आप देदलु छे ने मे तेरेन्चां पछु जाणे वाळु छे। 4ने चु खाणो खाणे रहणीदीन उबु हय गुयु ने आपसो उपरनो झगल्यो नीकाळ लेदु ने कमर मां टुवाल बांद लेदु। 5ती चु टगार्याम पाणी हेड़ लेदु, ने आपसा एक-एक चेलान पाय धुवतु गुयु, ने कमर मां बांदी रवलु, तीना टुवाल सी तींद्रा पाय नुछतु गुयु। 6जत्यार ईसु सीमोन पतरसेन्चां पाय धुवणे करीन आयु, ती पतरस ईसु काजे कह्यु, “ए मालीक! तु मारा पाय धुवणे हय र्यु काय?”
7ईसु पतरस काजे जपाप आप्यु, “मे ज करने बाजी र्यु, च तु हींताळ नी समजतु बाकुन तु अळतेन समजी जासी।”
8पतरस ईसुक कह्यु, “मे तुसेक मारा पाय कदी नी धुवणी दम।” ईसु पतरस काजे कह्यु,
“कदी मे तुसेक नी धुवों, ती मार साते रवणे मां हक नी जड़े।”
9ज सामळीन सीमोन पतरस ईसुक कह्यु, “ए मालीक! असो हय ती तु मारा पाय अतरा नी बाकुन मारा हात ने मुणको लग धुय दे।”
10ती ईसु पतरस काजे अळी कह्यु, “जु उंघळी लेदलु छे, तीनाक आपसा पाय अतरा धुवणु छे, तेरो आखो डील ते चुखलो छे। तुहुंं ते चुखला छे, बाकुन आखा ने आखा चुखला नी हय।” 11ईसु काजे मालम हतलो की मेसेक कुण धरावसे, चु कह्यु, “तुहुंं आखा ने आखा चुखला#13:11 शुध्द नी हय।”
12जत्यार ईसु तींद्रा पाय धुय देदु, ती आपसो झगल्यो पछु पेहरीन अळी पछु बठ गुयु, ने तीनुक कह्यु, “मे तुंद्रे साते ज वेहवार कर्यु, तीना वेहवारेन मतलब तुहुंं समजी गुया काय? 13तुहुंं मेसेक मास्तर ने मालीकेन नाते बुलाड़ी र्या ने तुहुंं सय कय र्या, काहाकी मे छाचलीन चु ने चु छे। 14कदी मे तुंद्रु मालीक ने मास्तर हय्न बी तुंद्रा पाय धुयु ती तुहुंं बी एक दीसरान पाय धुवणु चाहजे। 15मे ते तुंद्रा पाय धुवीन तुंद्रे वाटे दाखलु देखाड़लु छे, ने जसु मे ने तुंद्रे साते वेहवार करलु छे, तसु तुंद्रे वेहवार तुहुंं बी दीसरा साते वेहवार करु। 16मे तुहुंं काजे छाची छाचीन ज कहं, काय हक मां रहणे वाळु पावर्यु आपसान मालीक सी मटु नी हय ने मकलन्या सी मटु नी हय। 17कदी तुहुंं जी वात समजीन एरे अनसारे जीवु ती तुहुंं बरकतवाळा रवसु।”
18“मे तुहुंं आखा काजे बरकतवाळा नी कह्तु काहाकी मे तीनु आखाक जाणो जीनुक मे नेवाड़लु छे बाकुन तींद्रे मायन एक जम छे, तेरे बारामां असो लिखलो छे जु मारु रुटु खादु, चु मेसेक लातावणे बाजी गुयु, ची वात पुरी हवसे करीन मे तीनाक बी नेवाड़लु छे। 19हय मे तुहुंंक पेहलुत ज कयदम, तेरेसी मारो कहंलो पुरो हय जाय, ती तुहुंं भुरसु करसु, की मे चु ने चु छे। 20मे तुहुंंक छाची छाचीन ज कहं, जु काहनु मारे सी मकेल्ला माणसे काजे मानीन तेरो आव-भाव करे, चु मेसेक मानीन मारुत आव-भाव करे, चु मेसेक मकेलन्याक मानीन तेरुत आव-भाव करे।”
ईसु धुकु देण्यान वात करे
(मत्ती 26:20-25; मरकुस 14:17-21; लुका 22:21-23)
21जी वात कयदीन ईसु जीवेम बेसकु कलपी गुयु, ने जी गवाय देदु काय वात नी सात्यु ने कह्यु, “मे तुहुंंक छाची-छाची कहं तुंद्रे मायन एक जणु मेसेक धराय देसे।”
22चेलाक ज नी समज पड़्यो की ईसु कुणीन बारामां कहंणे बाजी र्यु, ने चेला चकरायन एक दीसरा भीणी भाळने बाजी गुया। 23तीनु बारे चेला मायन एक जणु, “ईसुन लाटेक्लु चेलु।” कहंवायतेलु। चु ईसुन छाती भीणी एक कड़्यु वळीन बठी रवलु। 24सीमोन पतरस तीनाक ईसारु करीन जां कह्यु, “ईसुक पुछ, चु चेलु कुण छे।”
25तत्यार चु असु की असु ईसुन छाती भीणी अळीन बठी रवलुत ईसुक कळेन पुछ्यु, “ए मालीक! जु कुण छे?” 26ईसु तीनाक कळेन जपाप आप्यु, “मे तीनाक रुटान कवळ उलन मां चुपड़ीन आपीस, चु की चु मेसेक धरावण्यु छे।” ने चु रुटान कवळ चुपड़ीन#13:26 डुबाकर सीमोन ईस्करीयोतीन पुर्या यहुदा काजे आप्यु। 27ने रुटान कवळ धरीन मुंहडाम नाख्तुत यहुदान डीलेम भुतड़ु भरायन तीनाक कब्जाम कर लेदु। तत्यार ईसु तीना यहुदाक कह्यु, “ज काम तु करने हींड र्यु च छाटुस कर।” 28बाकुन चां खाणो खाणे बठी रवला चेला मायन कुयक बी जी वात समज नी पड़ी की ईसु तीनाक जी वात काहा कह्यु। 29यहुदा धड़े थयलि हतली, ने काहनाक-काहनाक ज समज्या की ईसु तीनाक ज कह्यु हसे की, आपणु तीहवार वाटे ज काय चाहजे च मुल ली लेजे, नी ते गरीबेक आप दे।
30अळतेन रुटान कवळ खायलीन यहुदा तत्यारुत खयड़े जाती र्यु। तीने टेमे रात हय वागली।
नवली हुकुम
31यहुदाक खयड़े जाणी दीन ईसु कह्यु, “हय माणसेन पुर्या काजे भगवान पेहलुत सी ईज्जत जड़ली छे, ने माणसे अगळ भगवान काजे बी माणसेन पुर्यान कामे सी ईज्जत जड़ने वाळी छे। 32ने माणसे अगळ माणसेन पुर्यान कामे सी भगवान काजे ईज्जत जड़से ती भगवान बी माणसेन पुर्या काजे सरग वाळु सेक-सींगार पछु आपीन ईज्जत करसे ने छाटुस ईज्जत करसे। 33ए मारा लाटेक्ला पुर्या-पारी! मे अळी ईतरीक वार लग तुंद्रे पुठ्ये छे, अळतेन तुहुंं मेसेक हेरसु ने जसु मे यहुदी मुख्याक कहलु, तसु हय मे बी तुहुंंक कहो, जां मे जाणे हींड र्यु चां तुहुंंक नी आवाये। 34मे तुहुंंक एक नवलु हुकुम आपो, तुहुंं एक दीसरा पर परम राखु जसु मे तुंद्रे पर परम राख्यु तसा तुहुंं बी एक दीसरा पर परम राखु। 35कदी तुहुंं एक दीसरा पर परम राखसु ती च देखीन आखा माणसे जाण लेसे की तुहुंं मारा चेला छे।”
ईसु पतरस सी कहें की तुसे तीन कावा नी जाणो करीन
(मत्ती 26:31-35; मरकुस 14:27-31; लुका 22:31-34)
36सीमोन पतरस ईसु सी पुछ्यु, “ए मालीक।”
“तु कां जाणे हींड र्यु?” ईसु पतरस काजे कह्यु, “मे जां जाणे हींड र्यु चां तुसेक हींताळ नी आवाये बाकुन अळतेन तु चां आवसी।”
37पतरस तीनाक कह्यु, ए मालीक! मेसेक हींताळ तु जाय चां काहा नी आवाये? “मे तार वाटे मारु जीव बी आप दीस।”
38ईसु पतरस काजे जपाप आप्यु, “तु मारे वाटे आपसु जीव आप देसी काय? मे तुसेक छाची छाचीन ज कहं कुकड़ा वासणेन पेहलुत तु तीन कावा दीसरा अगळ असुत कह्सी की मे ईसुक जाणो लग नी।”
Chwazi Kounye ya:
युहन्ना 13: BSP25
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.