Luka 4
4
Abɨɨ ɔkanio Yeso
(Mat 4:1-11; Mlk 1:12-13)
1Angbinga ngɨa Yeso a꞉huo-ɔɔ nɔ Mʉtɨma wɔta Tu, ɔ꞉ngwa amutii wɔ lisini ngɨyɔ Yɔlɔdanɨ, nɔ Mʉtɨma wɔta Tu wɔ꞉mʉtʉma anɨsa amukengu. 2Inani, Abɨɨ ɔ꞉mʉkanio amati ɔ makwaa ɓatɛkɛɓɛ ɓɔgɨna. A꞉kɔdyɔmʉ ɨkyɛmʉ amati ɔ makwaa ngʉkɔnanɨ pɔ nɨdya. Ndʉ makwaa ngʉkɔnanɨ ɓatɛkɛɓɛ ɓɔgɨna ka꞉chana, taa yɔ꞉mʉkɨa.
3Kʉdɔ, Abɨɨ ɛ꞉ka ɓata ga ɨyɔ nayɔ ɓɔ: «Wɔɓieni-sɨ mwana ɔ Asɔɓɨɨ, titio ikopi ngɨyɛ ɓɔ yɨnatana idyo.»
4Yeso ɔ꞉mutosio ɓɔ: «Amati ɔ Mabii kɔ ta Tu, ya꞉tɛndanakɨa ɓɔ: ‹Uɓei ngʉwɔ mombi wangɔmʉ ta akɔ yaka yɔ idyo.›»#popoko Tngw 8:3
5Abɨɨ ɔ꞉muɗetiso nɔ ɨkʉʉ nɔgbɛ, ɔ꞉mʉpana ɓʉngama ɓuɓomu ngʉɓɔ dɔdɔ, akɔ angbinga mʉngana ɓɔ. 6Ɔ꞉musigio ɓɔ: «Na꞊nenjo angu nɔ ʉbɨba, nɔ, lɨkyɛmʉ lɔ ɓʉngama ɓuɓomu ngʉɓɔ dɔdɔ, dɔ, Asɔɓɨɨ a꞉nenjo ɨmɨ, nɔ, nakwanana ninjo mombi ngɨa nakʉnda nayɔ aninjo. 7Wɔgbʉkʉmɨeni nɔ mawu apɛɨ asɛmɨ, nɛmɨ akɔbibiso, iɓomu ya꞊ɓio yɛsɔɔ.»
8Yeso ɔ꞉mutosio ɓɔ: «Yatɛndanakɨa amati ɔ Mabii ɓɔ: ‹Mubibiso Makwɔɓɨɨ Asɔɓɨɨ ngɨasɔɔ, nɔ, mʉkyananakɨa ta ɨyɔ nangana.›»#popoko Tngw 6:13
9Ambise ɔ yaka ngɨyɛnɛnɨ, Abɨɨ ɔ꞉sa nayɔ anɔ Yelusalɛma, nɔ, ɔ꞉muɗetiso akʉʉ ɔ ʉpaʉ wɔ ɨkáá yɔ Asɔɓɨɨ, akɔ ɨda ngɨyɛ yɛta ikongo nɔgbɛ, ɔ꞉musigio ɓɔ: «Dɔ ʉwɛ, wa mwana ɔ Asɔɓɨɨ, bʉmbʉa, wɔjo asɨ, 10dɔ, Mabii kɔ Asɔɓɨɨ kakɔsugo ɓɔ: ‹Asɔɓɨɨ a꞊titio ɓamalaika ngʉɓangɔ nɔwɛ aɓeyoko.› 11Nɔ ɓata: ‹Ɓamalaika ngʉɓangɔ ɓa꞊natʉmba akʉʉ ɔ lɨkɔndɔ ngɨleɓo, ambɔ watɨdʉanamʉ mʉtɨndɨ ngʉwɔsɔɔ akʉʉ ɔ ikopi.›»#popoko Mmb 91:11-12
12Yeso ɔ꞉mutosio ɓɔ: «Mabii kakɔsugo ɓɔ: ‹Watɨmʉkaniomʉ Makwɔɓɨɨ Asɔɓɨɨ ngɨasɔɔ.›»#popoko Tngw 6:16
13Ndʉ abɨɨ a꞉pipo akanakio Yeso akɔ lɨngbaa di di di, ɔ꞉mʉsɨa-sɨ akɔ angbinga, akɔɓɔya tɨa kʉ aka ɛ꞊na-ɔɔ mwana ɔ ɨhɔɨ ngayɛmɔ.
Yeso ɔsɔ anɔ Najalɛtɨ
14Kʉdɔ, Yeso a꞉tɔa anɔ Galilaya, ɔhueni nɔ angu ɔ Mʉtɨma wɔta Tu. Awɨa ngɨangɔ ɔ꞉ndanaka akɔ ihoi ngɨyɛnɛnɨ tɨta iɓomu. 15A꞉ɓio akɔpanɨa alɨkáá lɔ nɨta ngɨleɓo, nɔ ɓombi ɓaɓomu ɓɔ꞉mʉbɨba.
Ɓɔyaɔ Yeso anɔ Najalɛtɨ
16Ɔ꞉tɔsa tɨa kʉ anɔ Najalɛtɨ, aki a꞉hɛa-ɛɛ. Nɔ tɨa kʉndʉ ya꞉ɓio gbali angɔ, ɔ꞉kumonio aɨkáá yɔ nɨta ngɨyɔ Ɓayuda, aɓisi ɓɔ nuhomuo. Kʉdɔ, ɛ꞉maa ga gba, akɔpopoko mabii kɔ Asɔɓɨɨ. 17Ɓa꞉minjo ɨtaɓʉ ngɨyɛ ɨgbɛ Isaya. Ɔ꞉ɨɓoo nɔ, ɔ꞉tejeyo ɨda ngɨyɛ ya꞉tɛndanakɨa-ɔɔ ɓɔ:
18«Mʉtɨma wɔ Makwɔɓɨɨ, wa akʉʉ asɛmɨ,
ɨyɔ, a꞉naɗɛa ɨmɨ umbundo, dɔ, nɨsa akɔɓɨakɨa ɓajanga Ɨsaʉ yɛta Iɗo.
Ɨyɔ, a꞉natʉma ɨmɨ, akɔɓɨakɨa ɨsaʉ yɔ ɓoonokio akɔ ɓombi ngʉɓa ɓa꞉ɓʉfa aboloko,
nɔ, akɔɓɨakɨa ɓombi ɓɔ mamɔmɔ ɨsaʉ yɔ mesu aɓoonio ɓata.
Nɔ, akɔɓooko ɓombi ngʉɓa ɓanaɓɔ akɔkyananaka,
19akɔnimbiiso ɓombi angbinga ngɨa ɨjɨɔ yɔ Makwɔɓɨɨ, ya꞊pananɨa-ɔɔ.»#popoko Isa 61:1-2
20Kʉdɔ, Yeso ɔguɓoko ɨtaɓʉ ngɨyɛnɛnɨ, ɔ꞉mutosio mombi ɔ tɛa ngɨa ɔ ɨkáá yɔ nɨta ngɨyɔ Ɓayuda, nɔ, ɔ꞉wolo ga jikomu. Ɓajwa ɓɔ ɓombi ɓaɓomu ngʉɓa ɓa꞉ɓio inani aɨkáá, tɨta akʉʉ angɔ ɓɔ ngba ngba ngba. 21Kʉdɔ, ga ɨyɔ naɓɔ ɓɔ: «Ɓʉɓʉnʉ yaka ngɨyɛ Mabii kɔ Asɔɓɨɨ ka꞉sugo jɛnɛ, yɔkyananakɨɔ akʉʉ ɔ eno ngʉɓa nánɛmɨ anʉka aka tɨa kyananakɨanɨ.»
22Ɓombi ɓaɓomu ɓa꞉kwa ɨgyagya akʉʉ angɔ, nɔ yɔ꞉ɓʉmbangɨa akɔnʉka yaka yɛta manjanja ngɨyɛ a꞉ɓio naɓɔ anʉngakɨa. Ga ɨɓɔ ɓɔ: «Ambɨ ndɨ-sɨ mwana ɔ Yɛjɛfʉ akɛ?»
23Kʉdɔ, Yeso a꞉ɓʉngɨa ɓɔ: «Ta ingono, ná꞊nasigio sungo isisenio ngɨyɛ: ‹Mʉnganga, heisono pɨ ʉwɛ makwɔngɔ.› Ná꞊nasigio sungo ɓata kʉ ɓɔ: ‹Yaka yɛta ɨmbangɛ ngɨyɛ tɔ꞉ka pɔngɔ ɓɔ wa꞉ɨkɨa aki anɔ Kapalanaumu, kɨa pɨ aka andɛnɔ aka, kʉɓanɨ.›»
24Ɔ꞉ɓusigio ɓata ɓɔ: «Nanenu aɓɨa ta ingono, ɨgbɛ pɔ mɛngana yangɔmʉ nɔ ʉbɨba aɨkʉmbʉ ngɨyɛ aki anɔtanɨa-ɛɛ. 25Nɔ ɓata, nanenu akɔɓɨa ingono ɓɔ, akɔ angbinga ngɨa ɔ ɨgbɛ Ɛlɨa, ɓawoko ɓa꞉ɓio ɓaja anɔ Ɨsalaɛlɛ. Kʉ angbinga ngɨananɨ jɛnɛ, ʉgbaá wa꞉sɨa aneyo amati ɔ mago kaatʉ nɔ mayi mɛɗɨa. Ayende ata mʉja ɔ꞉kwa amati ɔ ihoi iɓomu. 26Asɔɓɨɨ a꞉tʉmamʉ Ɛlɨa pɔ atɨ mʉngana ati eɓo, yakamɛngana, a꞉mʉtʉma ta atɨ woko mʉngana anɔ Jalɛpata, aihoi yɔ Sɨdɔna. Woko ɔngɔ a꞉ɓiomʉ muto ɔ Ɓayuda. 27Ɓakeɓukeɓu ɓa꞉ɓio jɛnɛ ɓaja anɔ Ɨsalaɛlɛ, akɔ angbinga ngɨa ɔ ɨgbɛ Elisa. Keɓukeɓu pɔ mʉngana a꞉hɛamʉ kaɓu ngɨangɔ, yɔɓienimʉ jɛnɛ ta Naamanɨ ngɨa Musilia wɔngɔ.»
28Ɨyɛ ɓombi ɓaɓomu ngʉɓa ɓa꞉ɓio amati ɔ ɨkáá yɔ nɨta, ɓɔ꞉ka yaka ngɨyɛnɛnɨ, yɔ꞉ɓʉjʉka nɔgbɛ. 29Ɓɛ꞉maana ga njataa, nɔ, ɓɔ꞉muchweiso Yeso aɓei ɔ ɨkʉmbʉ, ɓɔ꞉sa nayɔ amʉtʉ wɔ ɨkpangba ngɨyɛ ɨkʉmbʉ ngɨyeɓo ya꞉tuɓonokio akʉʉ ɔngɔ, dɔ, ɓa꞉ɓio ahata ga ɓamutito aɨsɨ. 30Yakamɛngana, ɔ꞉chana ati eɓo, ɔ꞉sa yangɔ ta nɨsa.
Yeso ɔchweiso mombi mʉtɨma wɔ idu
(Mlk 1:21-28)
31Mbise ɔngɔ, Yeso ɔ꞉sa tɨa anɔ Kapalanaumu, ɨkʉmbʉ yɔ ihoi yɔ Galilaya, nɔ, ɔ꞉pʉnga panɨa ɓombi akɔ ɓisi ɓɔ nuhomuo. 32Mapanʉ ngʉkangɔ, kɔ꞉ɓʉmbangɨa ta mbangɨa, dɔ, a꞉ɓio apanɨa nɔ ʉpanʉ.
33Inani amati ɔ ɨkáá yɔ nɨta, ya꞉ɓio nɔ mombi mʉngana ɨya a꞉ɓio nɔ mʉtɨma wɔ idu. Ɔ꞉natɨa nɔ isó yɛta ɓʉmʉ, 34ɓɔ: «Ɨyeso nenu yɔkwa tanɨ, ha Yeso ngɨyɔ Najalɛtɨ-ei! Wɛkɔ-ndɨ nesu adʉka? Isu tanɨmbɨa iɗo ɓɔ, ʉwɛ, wa anɨ. Ʉwɛ, wa mombi ata Tu ngɨyɔ Asɔɓɨɨ.»
35Yeso ɔ꞉nyakɨa mʉtɨma wɔ idu ngʉwɔnanɨ ɓɔ: «Ʉwɛ, gbaa ta gbaa, nɔ, chwɛa amati ɔ mombi ngɨa!» Kʉdɔ, mʉtɨma wɔ idu ngʉwɔnanɨ, wa꞉mugboso mombi ngɨananɨ aɨsɨ, ananɨ apɛɨ ɔ ɓombi ɓaɓomu, nɔ wɔ꞉mʉchwɛa, sɔkɔmʉ wɔ꞉mʉkɨa ɨkyɛmʉ pɔ bele.
36Yaka ngɨyɛnɛnɨ yɔ꞉kiso ɓombi ɓaɓomu ʉɓá, ɓɔ꞉pʉnga ɓokuono ati eɓo ɓɔ: «Ɨkananja yɔ yaka nga ya ino tanɨ ɨyayɛ, gue ngɨa anyakɨa kʉ nɔ mɨtɨma yɔ madu nɔ angu, ɨhɔ kʉ nɔ ʉpanʉ, nɔ madu kɔngɔ kɔchwɛa ta chwɛanɨ!» 37Kʉdɔ, ɨsaʉ ngɨyɔ Yeso, ya꞉ndanaka ʉmʉa tɨta uɓomu amati ɔ ihoi ngɨyɛnɛnɨ.
Yeso ɔheiso ɓakaɓu di di di
(Mat 8:14-17; Mlk 1:29-38)
38Ɨyɛ Yeso a꞉chwɛa aɨkáá yɔ nɨta, ɔ꞉sa atɨ Simoni. Inyenguu ɔ Simoni a꞉ɓio akɔnɔ sɛsʉ ɓʉkaɨ nɔgbɛ. Ɓɔ꞉mɨta Yeso ɓɔ ɨmʉheiso. 39Yeso ɛ꞉ka, ɛ꞉maa tinene nayɔ, ɔ꞉nyakɨa kaɓu ngɨananɨ, kʉdɔ, ndʉtʉ yɔ꞉mʉkataka. Ta gagaa ngɨananɨ, ɔ꞉ngwa ɨkʉʉ, ɔ꞉pʉnga naɓɔ akyananakɨa.
40Nɛpasɨ, ɨyɛ ɨpá ya꞉kwa nayɔ, ɓombi ɓaɓomu ngʉɓa, ɓa꞉ɓio nɔ ɓanduku ɓeɓo nɔ ɓakaɓu di di di, ɓɛ꞉ka naɓɔ atɨ Yeso. Ɔ꞉napɨa lɨkɔndɔ akʉʉ ɔ mombi nangana nangana ati eɓo, nɔ, ɔ꞉ɓuheiso. 41Kʉdɔ, mɨtɨma yɔ madu ya꞉ɓʉchwɛa ɓombi ɓaja, nɔ nachokoo akɔsugo ɓɔ: «Ʉwɛ, wa mwana ɔ Asɔɓɨɨ» Yakamɛngana, Yeso ɔ꞉ɓʉnyakɨa, nɔ, ɔ꞉ɓʉgbaiso ɓɔ ɓatɨsamʉamʉ pɔ samʉa, dɔ, ɓa꞉ɓio anɨmbɨa ɓɔ ɨyɔ a Klisito.
Yeso ɔɓɨakɨɔ Ɨsaʉ yɛta Iɗo
42Ɨyɛ ɓisi ɓɔya, nekuɓa, Yeso ɔ꞉chwɛa aɓei ɔ ɨkʉmbʉ, ɓɔ꞉sa akɔ ʉmʉa ngʉwa ɓombi ɓangɔmʉ-ɛɛ. Ambaja ata mʉja ɔ ɓombi, ɓɔ꞉pʉnga nayɔ hata. Ɨyɛ ɓa꞉ɓɔya aka a꞉ɓio-ɔɔ, ɓɔ꞉hata ga ɓamʉfa ɓɔ atɨngwamʉ ɓata ananɨ andaɓʉ. 43Yakamɛngana, Yeso ɔ꞉ɓusigio ɓɔ: «Nɔsisekio kʉɔ akɔɓɨakɨa Ɨsaʉ yɛta Iɗo ngɨyɛ yɔ Ɓʉngama ɓɔ Asɔɓɨɨ akɔ lɨkʉmbʉ ngalɛmɔ, dɔ, Asɔɓɨɨ a꞉natʉma ɨmɨ, akɔ yaka ngɨyɛnɛnɨ.»
44Ɛ꞉sɨnganaka akɔɓɨakɨa Ɨsaʉ yɛta Iɗo amati ɔ lɨkáá lɔ nɨta, aihoi yɔ Yudɛa.
Chwazi Kounye ya:
Luka 4: buuN
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2021, Wycliffe Bible Translators, Inc.