1थिस्सलुनीकियनमन 5
5
यीशु केर दोबारा घूइर आवेक बेरा तेयार रहेक
1मगर हे भाईमन, इकर दरकार नखे कि यीशु केर दोबारा घूइर आवेक समय केर बारे में तोहरेमन के कोनों लिखल जाओक। 2काले कि तोहरेमन खुद ठीक जानाला कि जइसन चोर राइत के अचका आवेला, तइसनेहें प्रभु यीशु हों अचका आवेक वाला अहे। 3जब आदमीमन कहबैं कि सोउब कुछ ठीक अहे, आउर कोनों डार नखे, तो उ मनक उपरे अचका बिनाश आवी आउर उमन उ बड़का दुःख से नी बाचबैं। जे लेखे गर्भवती जनाना उपरे जनम देवेक केर दुःख अचका शुरु होवेला। 4मगर हे भाईमन, तोहरेमन पापमन में जिंदगी नी जियाथा कि जब प्रभु यीशु दोबारा घूइर आवी, तो उ दिन तोहरेमन उपरे चोर नियर आय जाई कि तोहरे तेयार नी रहबा। 5काले कि तोहरेमन सोउब दीया केर आउर दिन केर संतान हेका जे इंजोत हेके, हमरे ना राइत केर आउर ना अंधार केर संतान हेकी। 6इ लगिन हमरे के दोसरमन नियर निंदाते नी रहेक चाही मगर जागते आउर सावधान रहेक चाही। 7काले कि जेमन निंदायना उमन राइत हें के निंदायना, आउर जेमन मतवारी करैना उमन राइत हें के मतवारी करैना। 8मगर हमरे जे दिन केर हेकी, बिसवास आउर प्रेम केर झिलम पिंध लेवब, जे हमरे के ओइसनेहें बचायला जइसन झिलम एगो फौजी के दुश्मन केर हमला से बचायला, आउर इ आसरा देवेला कि हमरे सोउब दिन केर दंड से बाइच जाय ही, एहो उ टोपी नियर अहे जे बचायला।
9परमेश्वर हमरे के इ लगिन नी चुइन हे कि अपन खीस में हमरे के दंड देवी, मगर हमरे अपन प्रभु यीशु मसीह बटले छुटकारा पावेक लगिन चुनल जाय ही। 10प्रभु यीशु मसीह हमर लगिन इ खातिर मोरलक कि हमरे चाहे जिंदा रहब, चाहे मोइर जाब, जखन उ घूइर आवी हमरे सोउब दिन लगिन उकर संगे रहेक पारब। 11इ लगिन एक दोसर के दिलासा देवा, आउर परमेश्वर उपरे आउर बगरा बिसवास करेक लगिन एक दोसर केर मदइत करा जइसन कि तोहरे कारबो कराला।
कलीसिया के उपदेस
12आउर हे भाईमन, हमरे तोहर से बिनती करिला कि जेमन तोहर में मेहनइत करैना, आउर प्रभु में तोहर अगुवा हेकैं, आउर तोहरेमन के शिक्षा देवैना, उमन केर इज्जत करा। 13आउर जे कोनों उमन तोहर लगिन करैना, उकर चलते उमन केर ढेइर आदर करा आउर उमन के ढेइर प्रेम करा आउर आपस में मेल जोल से रहा। 14आउर हे भाईमन, हमरे तोहरेमन से अरजी करिला कि जेमन आलसी अहैं उमन के चेतावनी देवा, आउर उमन के उसकावा जेमन डरपोक अहैं, कमजोरमन केर सहायता करा, आउर सोउब कर लगिन सहेक वाला बना। 15इ धेयान रहोक कि केकरो से बुराई केर बदला बुराई ना करा, मगर सोउब बेरा भलाई करेक ले तेयार रहा, आपस में आउर सोउब से हों भलाई केर हें कोशिश करा। 16सोउब बेरा खुशी से रहा। 17सोउब बेरा प्रार्थना करेक में लगल रहा। 18हरेक स्थिति में परमेश्वर के धन्यबाद देवा काले कि तोहर लगिन मसीह यीशु में परमेश्वर केर एहे इच्छा अहे। 19पवितर आत्मा केर काम के ना रोका। 20परमेश्वर बटले आदमीमन के बताल भविष्यवाणीमन के ना ठुकरावा। 21सोउब गोइठमन के परखा कि उ परमेश्वर बटले हेके कि निहीं, बेस संदेशमन के ग्रहण करा आउर उके पालन करा। 22सोउब रकम केर बुराई से बचल रहा।
आशीर्वाद
23परमेश्वर जे शांति देवेला खुद हें तोहरे के सोउब रकम से पवितर करोक, आउर तोहर आत्मा, प्राण आउर काया के हमर प्रभु यीशु मसीह केर दोबारा घूइर आवेक तक पूरा-पूरा निरदोष आउर जोगाय के रखोक। 24इ लगिन कि उ तोहरे के पवितर बनेक ले बोलायला, तो उ तोहरे के पवितर बनेक लायक हों बनाई।
25हे भाईमन, हमर लगिन प्रार्थना करा। 26सोउब बिसवासी भाईमन के प्रेम से जोहार करा। 27मोंय तोहरेमन के प्रभु केर आगया देवोना कि इ चिट्ठी सोउब भाईमन के पइढ़ के सुनाल जाओक। 28हमर प्रभु यीशु मसीह केर किरपा तोहर उपरे होते रहोक।
Chwazi Kounye ya:
1थिस्सलुनीकियनमन 5: SCK
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Sadri Bible by The Love Fellowship is licensed under Creative Commons Attribution-ShareAlike 4.0 License.