सॆःक्ढुङ्पा 7
7
इस्टिफनसऎ नुऎ खानावाँ खेम्मिॽमिम्पा
1हाङ् चोब्नबाङ् ढ्या याटाङ्पाऎ इस्टिफनस सिमु, “ग आब्डिक् चाइबानऎ हॆ?” 2मसॆ खोसॆ आक्खाचि खानावाँ एम्पिसे लोसुचि, “आपाचि हाङ् बुबुचि, काङाम् खानावाँ खेमाम्नॆ। कानिम् टुबालाबा आबाराहाम हारान हाटाबि पेम्माबाङ् याॽल खो मेसोपोटामिया लोमॆ ठालबि लिमारक्न निवाँहाङ्मि निङ्लावा खोबि खाङ्ङुसा हाङ् 3खो गर लोसु, ‘ग हाङ्टेम् नुङ् आम् टाङ्पाम् याॽमिचि याइडाऎचॆहाङ् कॆ खाङ्मिडानॆ हाङ्टेम्पि खारॆ।’#उट्पाटि १२:१ 4मसॆ खो कल्डिचिम् हाङ्टेम्बाङ् आम्पकाहाङ् हारानपि खाराहाङ् पेम्पका। आक्कुबि उम्पा सिखारा हाङ् निवाँहाङ्ऎ खो आक्क हाङ्टेम्बाङ् लाखॆटु हाङ् ह आन्ना पेम्मिम्पा हाङ्टेम्पि लाटॆटु। 5आक्र हाङ्स खो आक्क हाङ्टेम्पि लाङ् सिक्ठाम् ठाल स मापिट्टु, टर ग हाङ्टेम् खो हाङ् खोम् पिसानासाचि पिकुङ्चि कामानुङ् चुप्लाङ् मुसु। निवाँहाङ्ऎ चुप्लाङ् मुमिम्पा लःबि आबाराहाममि एक्क स पासाचि माचुमि। 6निवाँहाङ्ऎ खो गर स लोसु, ‘आनाम् पासा याङ्मिन्चि होइढाचिम् हाङ्टेम्पि खॆॽमा लॆःॽमिहाङ् पेम्मा लॆःॽमि। आक्कुबिहा याॽमिचिऎ आक्खाचि काइर लॆःॽमानुङ् रिकग् निङ्ढारि उम्चि योम्पक् मुखुबा मुकुचि। 7टर आसॆ आनाम् पिसानासाचि उम्चि योम्पक् मुखुबा मुकुचि आक्खाचि कॆ डान्डा पिकुङ्चि। हाङ् आम् पिसानासाचि आक्कबाङ् आम्पक्मि हाङ् ग ठालबिॽन टाक्मिहाङ् काङा पारठाना लॆःॽङामि।’#उट्पाटि १५:१३-१४ 8हाङ् निवाँहाङ्ऎ आबाराहामनुङ् खटनामि चुप्लाङ् मुसुहाङ् आबाराहामऎ उम् पासा इसाहाकमि बाङ्चि डिनाबि खाट्ना लॆपिटु। इसहाक याकुबमि आपा लिसा हाङ् याकुब हिपङ्हि सामॆक्मि आपा लिसा।
9“याकुबमि पासाचिबि युसुफ खोम् बुबुचिऎ सिच्चाम्पासॆ खो मिस्र हाङ्टेम्पि योम्पक् मुमाम् लागि इन्चोहाङ्सुचि टर निवाँहाङ् खोनुङ् चुआ। 10हाङ् उम् चोब्न डुखाबाङ् फाक्बकु। हाङ् निवाँहाङ्ऎ खो चेन्टुबावाँ निवाँ पिॽमिम्पासॆ मिस्रबिऎ फारो लोमॆ हाङ्ऎ खो टाङ्पाम् हाङ्टेम्बि खोम् खिम्पिऎ टुङ्घङ्पा मुसु।
11“हाङ् चोब्न मिस्र हाङ्टेम् नुङ् कनान हाङ्टेम्पि ढ्या आनिकाला सिट्टा हाङ् ढ्या डुखा चआमि, मसॆ कानिम् टुबालाबाचिनुङ् माङ्स चामा मॆचु। 12हाङ् याकुबऎ मिस्रबि डिरिक् चारुङ् चु कामानुङ् खेमुचिहाङ् उम् पासाचि चारुङ् लासि याॽल खेपा पाङ्हाङ्सुचि। 13होइक खेपा चारुङ् लासि खोचि खॆॽमार युसुफऎ उम्बुचि ‘काङा युसुफङा’ कामानुङ् लोसुचि, हाङ् फारो हाङ्ऎ स युसुफमि याॽमिचिम् बारेबि खेमु। 14हाङ् युसुफऎ उम्पा याकुब हाङ् चोब्न उम् याॽमिचि मिस्रबि सेःरुचि। आक्खाचि चोब्न वापङ्ङा जाना लॆटामि। 15हाङ् याकुब मिस्रबि खारा। डॆङ्पि खो नुङ् खोम् पिसानासाचि आक्कुबि सिखारामि। 16खोचिऎ उम्चि सिच्चि आबाराहामऎ हामोरमि पासाचिबाङ् इम्मिम्पा सेकेम लोमॆ ठालबिऎ येःॽमाबि हुमुचि।
17“ह निवाँहाङ्ऎ आबाराहामनुङ् मुमिम्पा चुप्लाङ् यॆॽमा ठाबाक्मार मिस्रबि कानिम् याॽमिचि पुबक्से खारामि। 18डिरिक् निङ् डॆङ्पि मिस्रबि होइकन याॽमि हाङ् लिसा हाङ् मिस्रबि हाङ्डाम् लॆपका। खोसॆ युसुफमि बारेबि माङ्स मालेसु। 19आक्कसॆ कानिम् टुबालाबाचि काइर लॆटुचि हाङ् एट्टान डुखा पिट्टुचि हाङ् खोचिम् चाचाचि सिखॆॽमिर कामानुङ् खिम्बाङ् कहाङ्मिॽयुक्सुचि।
20“मरक्लन मोसामि जान्म लिसा खो एट्टान काम्नुऎ चाचा लॆटा हाङ् सुम्चि महिना ढारि खोम् आपा आमाऎ खो खिम्पि चुम्से युङाचु। 21हाङ् खो खिम्बाङ् लाबक्मार आक्कुबि फारो हाङ्मि साम्सामाऎ भॆट्टकु हाङ् उम् पासार मुमानुङ् युङु। 22गरहाङ् खो मिस्रबि चुहा चोब्न चेन्टुबावाँ निवाँ हाङ् चिन्माह खानावाँ चिनुचि। हाङ् खो पुसे खाराहाङ् चोब्न खानावाँबि नुङ् योम्पक्पि चॆक्मावा नुङ्मा लिसा।
23“हाङ् मोसा रिपङ् निङ् याक्मार खोम् चोब्न टाङ्पाम् याॽमि इस्राएलिचि चुॽमा हाङ् उम्चि बारेबि वाप्मा मिनु। 24हाङ् एक्क मिस्सिरिऎ एक्क इस्राएलि डुखा पिट्ढाङ्पा खाङ्टकु हाङ् मोसाऎ म मिस्सिरि रःक्सिटु हाङ् म रःग्मा टुम्चाखुबा इस्राएलि याॽमि नुःर लॆटु। 25खो निवाँहाङ्ऎ इस्राएलि याॽमिचि उम्चि डुखाबा फाक्सि पाङ्हाङ्पा खानावाँ वाबुचिर कामानुङ् मिम्मिम्पा लॆटु, टर खोचिऎ म खानावाँ मान्वाबुचि।
26“हाङ् वेन्डाक् लाम्पॆ खोसॆ हिप्पा इस्राएलिचि चुङ्मे पाइमिम्पा खाङ्टकु हाङ् टङ्मा कामानुङ् खाराहाङ् लोसुचि, ‘ओ लाङ्काम्चि, आन्ना ग बुनुसा रे मान्ठा खिक्चिनॆ?’ 27टर म रःग्खुबॆ मोसा टोम्से सिमु, ‘आना आसॆ काङ्कामि टुङ्घङ्पा हाङ् न्यायॆ लॆखुबा याॽमि मुसॆ? 28आनॆ आसेन् मिस्सिरि सेॽमिम्पार काङा स सेॽङानॆ?’#पारास्ठान २१:४ 29ग खानावाँ खेमुहाङ् मोसाऎ कॆ मिस्सिरि सेॽमिम्पा खानावाँ स होइढा याॽमिचिऎ लेटकुचॆ रछ कामानुङ् मिनुहाङ् किसिमाऎ मिस्रबाङ् खुरिङ्खारा हाङ् मिड्डान हाङ्टेम्पि टाआहाङ् आक्कुब्न पेम्पका, हाङ् आक्कुबि खिम्टाङ्मा लाटॆटा हाङ् हिप्पा पासाचिस लिसाचि।
30“रिपङ् निङ् डॆङ्पि सिनाइ लोमॆ पङ्पङमा कॆक्पि आसास पेम्मिनिहा ठालबि आसास पेम्मिनिहा ठाल मिः हामिम्पा एक्क मिछुॽमा इःक्पि निवाँखाटॆखुबा मोसा नुङ् खाङ्ङुसा। 31मोसा आक्खॆॽमानुङ् माङ्र कामानुङ् आक्कमि कॆक्पि खारा। टर आक्कुबि खॆॽमार गर कामानुङ् पारभुमि साम्ला टाआ, 32‘आबाराहाममि निवाँहाङ्, इसाहाकमि निवाँहाङ् हाङ् याकुबमि निवाँहाङ्।’#पारास्ठान ३:६ मोसा किसिमाऎ यङा हाङ् आक्क खाङ्मान मान्हेसु। 33हाङ् पारभुऎ लोसु, ‘आनाम् सुप्मारा बिल्लाह्ङ्सॆ, मान्ठाभनॆ आना येप्मिम्पा ठाल सॆङ्सॆङॆ लॆ। 34काम याॽमिचि मिस्रबि डुखाबि सिॽमिम्पा खाङ्टकुङ् हाङ् खोचिऎ हाप्से लोमिम्पा खानावाँ खेम्डुङ। मसॆ इस्राएलिचि उम्चि डुखाबाङ् फाक्सि काङा उङ्डिङ। ह कॆ आना मिस्रबिॽन ऎम्पक्मिना।’#पारास्ठान ३:५,७,८,१०
35“ग मोसा इस्राइलिचिऎ ‘आना काङ्का सक्पि आसॆ हाङ् नुङ् न्याये लॆखुबा याॽमि मुसॆ?’ कामानुङ् सिच्चोम्पा लॆटुचि, टर म इःक्पि खाङ्मुडॆ निवाँखाटॆखुबामि निवाँहाङ्ऎ खोन हाङ्डाम् लॆखुबा हाङ् फाक्बखुबा मुमानुङ् पाङ्हाङ्सु। 36मोसाऎन इस्राएलि याॽमिचि मिस्रबाङ् बाहिर लाटॆटुचि, हाङ् मिस्रबि, हार्रपा पॆरॆरॆमाबि, हाङ् रिपङ् निङ्ढारि आसास पेम्मिनिहा ठालबि डिरिक् आक्खॆॽमाहा योम्पक् लॆटु। 37ग मोसाऎन इस्राइलि याॽमिचि गर लोसुचि, ‘निवाँहाङ्ऎ काङा रक्मान निवाँहाङ्मि खानावाँ इखुबा आन्नामि टाङ्पाम् याॽमिचिबाङ् आन्नाबि पाङ्हाङ्कु।’#यायेॽमा १८:१५ 38मोसा चाइ आसास पेम्मिनिहा ठालबि खोम्टि खॆॽमिम्पा इस्राएलिचि हाङ् कानिम् पाप्पाटुबा हाङ् सिनाइबि खोनुङ् एक्क निवाँखाटॆखुबा यामुसा। निवाँहाङ्मि हिङ्खामामि खानावाँ मोसाऎ भॆट्टकुहाङ् कानि पिट्टि।
39“टर कानिम् टुबालाबाचिऎ मोसामि खानावाँ माखेमुचि हाङ् सिच्चोउचि हाङ् मिस्रबिॽन ऎम्पक्मॆ निवाँ मुसुचि। 40खोचिऎ मोसामि बुबु हारुन् गरहाङ् लोसुचि, ‘कानिम् लागि लाम्फु खाङ्मिखुबा निवाँहाङ् मुबिचिमॆ, मिस्रबाङ् काङ्का लाबक्खुबा आक्क मोसा माङ् लिसे काङ्कॆ लेसुङ्कानि।’#पारास्ठान ३२:१ 41मसॆ आक्खाचिऎ बाछामि मुर्टि डुबुचिहाङ् आक्कबि सङ्टिसुचि। हाङ् खोचिम् हुगॆ मुमिम्पा योम्पक्पि चेन्चाआमि। 42हाङ् निवाँहाङ्ऎ आक्खाचि नाम्, पाप्पाला नुङ् साङ्कॆम्माचि चुङुचिर कामानुङ् लेहाङ्सुचि। ग खानावाँ डॆङ्पिऎ खानावाँ याॽलन लोखुबामि साब्चिराबि साप्मिम्पा आनुसारान लिसा,
‘इस्राएलि याॽमिचि, माल आन्ना रिपङ् निङ्ढारि आसास पेम्मिनिहा ठालबि चुमार काङाम् निङ्पि सङ्टिसाम्नॆ? 43टर आन्नॆ ग मोलेक लोमॆ निवाँहाङ्मि युङ्ठङ् हाङ् रेफान लोमॆ निवाँहाङ्मि साङ्केम्मा ठेक्खेटाम्नि। आन्न टाङ्पॆॽन मुमिम्पा मुर्टि चुङ्मिम्पासॆ कॆ आन्ना बेबिलोनबाङ्स मिउ लाखॆॽमिकानि।’#आमोस ५:२५
44“खोचि आसास पेम्मिनिहा ठालबि चुमार कानिम् टुबालाबाचिनुङ् निवाँहाङ्मि सॆङ्सॆङॆ ठाल चुआ। निवाँहाङ्ऎ मोसा खाङ्मिॽमिम्पा रक्न आक्खाचिऎ म युङ्ठङ् मुसुचि। 45डॆङ्पि निवाँहाङ्ऎ खोचिम् ङारिङ्बाङ् यिक्पहाङ्पा हॆॽनिबारेक्चिम् हाङ्टेम्पि, यहोसुनुङ् खोचि खॆॽमार, खोचिऎ युङ्ठङ् खोचिनुङ्न खिङ्खॆटुचि। डाउड हाङ्मि लःढारि आक्क युङ्ठङ् म ठालबि चुआ। 46डाउडऎ निवाँहाङ्मि निवाँ चेन्चामिट्टुहाङ् याकुबऎ चुङ्मिम्पा निवाँहाङ्मि लागि खिम् हेप्टॽङार कामानुङ् लोसु, 47टर उम् निवाँहाङ्मि खिम् चाइ सुलेमान हाङ्ऎ टेःॽन हेबु।
48“टर चोब्बाङ् सङ्पिऎ निवाँहाङ् याॽमिचिऎ मुमिम्पा खिम्पि पेन्नि। निवाँहाङ्मि खानावाँ इखुबामि साब्चिराबि गरहाङ् साब्डा,
49पारभुऎ लोसु, ‘पारु काम् पेन्ठाम् ठाल यो, आक्कबाङ्न चोब्न सक्पि हाङ्डाम् फॆरुकुङ्, हाङ् बाखाटेम् काम् लाङ् खुक्माबिऎ सिक्ठाम् ठाल यो।
मसॆ आन्नॆ का नाचामाम् लागि मान्टक्मा खिम् हेबुकाम्नॆ?
50इघा चोब्न कॆन मुमिम्पा हॆॽनॆ?’#यासाइया ६६:१-२
51“ओ आन्ना लुङ्कॽवा रक्मा निवाँ पिक्खॆम्पा याॽमिचि हाङ् निवाँहाङ्मि खानावाँ खेम्सि नाबाक् डॆक्टिखॆॽमिम्पाचि, आन्ना आन्नामि टुबालाबाचि रक्मान लॆकानि हाङ् हानाम्स सॆङ्सॆङॆ लावा आन्नॆ सिच्चोकाम्नि। 52आन्नामि टुबालाबाचिऎ चोब्न निवाँहाङ्मि खानावाँ लोखुबाचि डुखा पिट्टुचि। आक्खाचिऎ निवाँनेन् याॽमि टा कामानुङ् याॽलन खानावाँ इखुबाचि चोब्न सेरुचि। आन्नॆ खो बङ्सिटाम्नि हाङ् सेराम्नि। 53निवाँहाङ्मि निवाँनेन् यायेॽमा निवाँखाटॆखुबाचिऎ आन्ना पिट्टानि, हाङ्स आन्नॆ माखेमाम्नि।”
स्टिफनस लुङ्कॽवाऎ डॆरुकुचि
54याहुडि टुङ्घङ्पाचिऎ स्टिफनसमि खानावाँ खेमुचिहाङ् याक्चाबक्कुचि हाङ् कॆङ् यिःक्पकामि। 55टर स्टिफनस चाइ सॆङ्सॆङॆ लावाऎ चेप्खॆटुहाङ् पारु पोट्टा खाङ्ठाकु, हाङ् निवाँहाङ्मि निङ्लावा नुङ् येसु निवाँहाङ्मि चुप्ठिङ् पोट्टा पेन्ढाङ्पा खाङ्टकु। 56हाङ् खो गरहाङ् यामुसा, “आन्नॆ खाङाम्नॆ, कॆ पारु हेम्बक्मिम्पा खाङ्टकुङ्, हाङ् याॽमिमि पासा निवाँहाङ्मि चुप्ठिङ् हुक् पोट्टि येप्मिम्पा खाङ्कुङ।” 57मसॆ खोचि याकामानुङ् उम्चि नाबाक् हुगॆ डॆगुचिहाङ् एक्क लिसामि हाङ् चोब्न खो सक्पि बुप्टिखारामि, 58हाङ् हाटा बाहिर सॆप्फॆटुचि। म खानावाँमि चुमॆक्सङ् पेन्खुबा याॽमिचिम् चे सावाल लोमॆ वॆन्चा हुङ्मिटुचि हाङ् इस्टिफनस लुङ्कॽवाऎ डॆपकुचि।
59आक्खाचिऎ लुङ्कॽवाऎ डॆसे लॆःॽमार स्टिफनसऎ गरहाङ् पारठाना लॆटु, “ओ पारभु येसु, काम् सक्मा लासॆ।” 60हाङ् खो पुम्रुॽवा ठःक्मानुङ् पेनाहाङ् ढ्या साम्लाबि गर कासा, “ओ पारभु इघा याॽमिचि, खोचिऎ लॆःॽमिम्पा हिङ्वामि डान्डा खोचि आलासॆचॆ।” खो आक्र कामानुङ् सिखारा।
Chwazi Kounye ya:
सॆःक्ढुङ्पा 7: LBR
Pati Souliye
Pataje
Konpare
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023, Wycliffe Bible Translators, Inc. and Nepal Bible Society