सॆःक्ढुङ्पा 2
2
सॆङ्सॆङॆ लावा टामिम्पा
1हाङ् पेन्टिकोस लोमॆ चाडा टामिम्पा लॆटा, हाङ् येसुबि निवाँयुङ् लॆखुबा खोचि चोब्न यारुसालेम्पि एक्क ठालबि खोम्टि खॆॽमिम्पा लॆटामि। 2हाङ् पारुबाङ् ढ्या हिॽयापा रक्मा हुरुरु काटाआ हाङ् आक्कसॆ खोचि पेन्डामिहा खिम् चोब्न चेप्खॆटु। 3हाङ् मिःमि लेन् रक्मान आक्खाचिबि खाङ्ङुसाहाङ् फाक्बका हाङ् आक्कुबि चुक्मिहा चोब्नबि पेना। 4हाङ् चोब्न सॆङ्सॆङॆ लावाऎ चेप्खॆटुचि हाङ् खोचि लावाऎ यामिॽमिम्पा होइढा खाप्पि यामुबक्कामि।
5आक्रल यारुसालेम्पि बाखाटेम्बिहा चोब्न याहुडि निवाँनेन् याॽमिचि पेम्मिम्पा लॆटामि। 6हाङ् म साम्ला खेमुचिहाङ् आक्कुबि डिरिक् याॽमिचि खोम्टि खारामि। आक्खाचि फोफो आक्खॆटुचि मान्ठाभनॆ चोब्न खोचिऎ खोचिम् टाङ्पा टाङ्पामि खाप्पि यामुमिम्पा खेमुचि। 7हाङ् आक्खाचि फोफो आक्खॆटुचि हाङ् आक्खॆसे कासामि, “खेमाम्नॆ इघा यामुखुबाचि चोब्न गालिलिचि हॆॽनॆ? 8हाङ्स मान्टॽल खोचिऎ यामुमिम्पा खाप् कानिऎ टाटाङ्पामि खाब्न खेम्सिऎ? 9कानि ग पार्ठिचि, माडिचि हाङ् एलामिचि हाङ् मेसोपोटामिया, याहुडिया, कापाडोकिया, पोन्टास एसिया, 10हाङ् फिरिगिया, पाम्फिलिय, मिस्र हाङ् ऎॽवाचि चाइ लिबियामि कुरेनि ठालबिहा हाङ् रोमबाङ् वाइटामिम्पा याहुडि हाङ् याहुडिचिम् निवाँहाङ् मानालॆखुबाचि चुकि। 11केरेट नुङ् अराबबि पेन्खुबाचि सङ्क चुकि। खोचिऎ कानिम् खाप्पिॽन निवाँहाङ्मि योम्पक्मि खानावाँ इमिम्पा खेम्मे पाइकि।”
12हाङ् आक्खाचि फोफो आक्खॆटुचि हाङ् आक्खॆमानुङ् टाङ्पाटाङ्पाबि कासामि, “इग माङ् लिहिऎ?” 13टर होइढाचिऎ सेम्चासे लोसुचि, “आक्खाचि चानुऎ डिबुऎ सेइङ्खॆडुचि।”
पाट्रुसमि खानावाँ
14टर पाट्रुस एपङ्ए सॆःक्ढुङ्पाचि नुङ् पगाहाङ् ढ्या साम्लाऎ आक्खा याॽमिचि लोसुचि, “याहुडि लाङ्काम्चि हाङ् यारुसालेमबिहा चोब्न बुबुनुसाचि, आन्नॆ ग खानावाँ लेसाम्नॆ कामानुङ् ग खानावाँ लोकानि, नुःर खेमाम्नॆ। 15आन्नॆ लोसिन्ट इघाचि सेइङ्खेम्पाचि हॆॽनॆ, मान्ठाभनॆ ह नाम्सऎ नाङ्चि टे बाजालिमॆ पाइ। 16टर आन्नॆ इग माङ् खाङ्मॆ पाइकाम्नि म चाइ योएल लोमॆ निवाँहाङ्मि खानावाँ लोखुबाऎ लोमिम्पा खानावाँ रेम, 17निवाँहाङ् का, ‘डॆङ्पिऎ डिनाबि कॆ काम् लावा चोब्न याॽमिचिबि होकुङ। हाङ् आन्नामि वाठाङ्पा पासा नुङ् साम्सामाचिऎ निवाँहाङ्मि खानावाँ इकुचि, हाङ् आन्नामि वॆन्चाचिऎ सेन्चि खाङ्टकुचि, हाङ् पासिङ्चि सेम्माङ् खाङ्खुबा लिक्मि। 18हाङ् आक्क डिना काम् योम्पक् मुखुबा वाठाङ्पा नुङ् मेॽनुङ्माचिबि काम् लावा होकुङ् हाङ् आक्खाचिऎ निवाँहाङ्मि खानावाँ इकुचि। 19कॆ मिट्टु नाम्फलिॽवाबि आक्खॆॽमाहा खानावाँ हाङ् मिम्मु बाखाटेम्पि चिना खाङ्मुकुङ्-हारि, मि हाङ् मॆख्खुमामि मुस्ल। 20पारभुमि ढ्या निङ्लावामि डिना टामाबाङ् याॽल नाम् माॽयाक्ट हाङ् पाप्पाला हारि रक्मा हार्रापा लि। 21हाङ् आसॆ चाइ निवाँहाङ्मि निङ् इढाङ्कु आक्क हिङ्चा।’
22“इस्राएलबिहा याॽमिचि, इघा खानावाँ खेमाम्नॆ, निवाँहाङ्ऎ नासारटमि येसुबाङ् आन्नामि लुम्पि चॆक्मावा नुङ्मा योम्पक्, आक्खॆॽमाहा खानावाँ हाङ् चिन्ना लॆःॽमानुङ् खोसॆ नासरटबिऎ येसु आन्नाबि पाङ्हाङ्पा यो कामानुङ् चुमॆक्सङ् पिट्टु। इगग आन्नॆॽन लेकाम्नि। 23निवाँहाङ्मि याॽलन मुमा मिडुयॆ निवाँ रक्न खोसॆ येसु आन्नामि हुक्पि पिट्टानि, हाङ् आन्नॆ हिङ्वा याॽमिचिम् हुक्बाङ् कुरुसाबि कॆङाम्निहाङ् सेराम्नि।
24“खोन निवाँहाङ्ऎ सिखॆॽमामि डुखाबाङ् फाक्बडुहाङ् हिङ्पमिडु मान्ठाभनॆ खो सिखॆॽमाऎ टिप्ढाङ्मा हेसुनिऎ लॆटा। 25मान्ठाभनॆ डाउड लोमॆ हाङ्ऎ खोम् बारेबि लोसु, ‘कॆ हानाम्स पारभु काम् ङारिङ्पि खाङुङ्, मान्ठाभनॆ का आकिसिखॆॽङार कामानुङ् खो काम् चुप्ठिङ् पोट्टि चु। 26मसॆ काङा निवाँ हङ्सिबाङ्न चेन्चाडिङ् हाङ् काम् याऎ चेन्चाम्पामि साम् इकु, हाङ् गबाङ् सङ्क काम् सालुङ् आःसबि हिङ्चा। 27मान्ठाभनॆ आनॆ काम् लावा किॽमालुऎ येःॽमाबि याइडाउनानि, ना आनाम् योम्पक् मुखुबा सॆङ्सॆङॆ याॽमिमि सालुङ् किम्खॆॽमा पिकुना। 28आनॆ काङा हिङ्खामामि लाम् लेखुबा मुसिङ्ना, आनॆ का आनाम् ङारिङ्पि चेन्चामानुङ् हाङ्हाङ् मुङाना।’
29“बुबुनुसाचि, चाइबान कॆ कानिम् टुबालाबा डाउडमि बारेबि नुःर खानावाँ इहिकुङ्, खो सिखारा हाङ् हुम्डाङ्सा, हाङ् खोम् येःॽमा हढरि सङ्क काङ्कानुङ् चु। 30टर मसॆ खो एक्क निवाँहाङ्मि खानावाँ इखुबा लिमिम्पासॆ निवाँहाङ्ऎ हिक्मिम्पा चुप्लाङ् रक्न खोम् ठालबि खोम् पिसानासाचि बाङ्न निवाँहाङ्ऎ एक्क हाङ् पेम्मिकु कामानुङ् लेमिम्पा लॆटा। 31खोसॆ याॽलन खिरिस्टमि बारेबि खाङ्टकुहाङ् लोसु, खिरिस्ट सिखॆम्पाबा हिङ्प हाङ् गर सङ्क लोसु, ‘ना खो किॽमालुऎ येःॽमाबि याइडाआ ना खोम् सालुङ् किम्खॆॽमिम्पा खाङा।’
32“म येसुन निवाँहाङ्ऎ हिङ्पॽमिटु, आक्खा चोब्न खाङ्खुबा काङ्कान। 33हाङ् खो निवाँहाङ्मि चुप्ठिङ् पोट्टि सङ्पिटु ठेट्टि खारा। हाङ् निवाँहाङ् आपामि चुप्लाङ् रक्न सॆङ्सॆङॆ लावा टक्चाउ। खोसॆ ग कानिबि होडु, म आन्नॆ स खाङ्से हाङ् खेम्मे सिकाम्नि। 34-35मान्ठाभनॆ डाउड पारुबि मॆठाङ् टर खोसॆ लोकु, पारभुऎ काम् पारभु लोसु, हानाम्ढारि कॆ आना सिच्चोखुबाचि आनाम् लाङ् खुक्माबि सिॽमिॽङाचिनि मरक्लढारि आना काम् चुप्ठिङ् पोट्टा पेनॆ।#खोम्मिम्पासाम् ११०:१
36“मसॆ इस्राएलबिहा चोब्न याॽमिचिऎ ग लेमान लॆ, आसा आन्नॆ कुरुसाबि सेराम्नि, खो येसुन निवाँहाङ्ऎ पारभु नुङ् खिरिस्ट हिच्चिन मुडु।”
37ग खानावाँ याॽमिचिऎ खेमुचिहाङ् उम्चि निवा हङ्सि भॆना हाङ् “कानिऎ काइसॆ योम्पक् यिगि कामानुङ् मिॽलउचि” हाङ् आक्खाचिऎ पाट्रुस नुङ् होइढा सॆःक्ढुङ्पाचि लोसुचि, “हॆॽनॆ बुबुनुसाचि काङ्कॆ माङ् लॆःमॆ” 38पाट्रुसऎ आक्खाचि लोसुचि, “आन्ना हिङ्वाबाङ् ऎम्पकानॆ हाङ् येसु खिरिस्टमि निङ्पि बाप्टिस्मा लासानॆ। हाङ् आन्नॆ आन्नामि हिङ्वामि यङ्निमा टकाम्नि हाङ् आन्नॆ सॆङ्सॆङॆ लावामि बारडाना भॆट्टकाम्नि। 39मान्ठाभनॆ चुप्लाङ् चाइ आन्नामि लागि हाङ् आन्नामि पासाचिम् लागि हाङ् टाढ चुक्मिहाचि कानिम् पारभु निवाँहाङ्ऎ सेखुबा चोब्नमि लागि रेम।”
40हाङ् होइढा डिरिक् खानावाँ इमानुङ् पाट्रुरसऎ ग काइसॆ याॽमिचिम् पुस्टाबि टाऎ निवाँहाङ्मि सिरिबाङ् हिङ्चाआनॆ लोसुचि। 41हाङ् खोम् खानावाँबि निवाँयुङ् लेखुबाचिऎ बाप्टिस्मा लासामि हाङ् म डिना सुबङ् जाना रः याॽमिचि खोचिबि ठुटिखारामि। 42हाङ् आक्खाचि सॆःक्ढुङ्पाचिऎ चिम्मिम्पा खानावाँबि हाङ् साङ्गाटिबि, चामा चामार हाङ् पारठानाबि भाक्टिनुङ् लागालियुक्सामि।
येसुमि टिङ्खुबाचिम् छाक्मावा
43हाङ् चोब्न फोफो आक्टिखारामि, मान्ठाभनॆ सॆःक्ढुङ्पाचिबाङ् डिरिक् आक्खॆॽमाहा नुङ् चिन्हामि योम्पक् लिसा। 44हाङ् चोब्न निवाँयुङ् लॆखुबाचि एक्क ठालबि पेयुक्सामि हाङ् एक्कबि चुऎ ठका चोब्नमि लियुक्सा। 45हाङ् टाङ्पाम् चासुम् इन्चोयुक्सुचि हाङ् आसा माङ् पाबुक्र म पिॽयुक्सुचि। 46हाङ् भाक्टि लॆसे खोचि चोब्न डिना निवाँहाङ्मि खिम्पि खोम्युक्सामि हाङ् चेन्चामानुङ् काम्नुऎ निवाऎ खिम्खिम्पि चामा हाचायुक्सामि। 47निवाँहाङ्मि निङ् ठेस्से होइढा याॽमिचिबाङ् नेन्चाइखारामि। हाङ् पारभुऎ निवाँयुङ् लॆसि याॽमिचि डिनाहुँ खोचिबि येट्टिबिट्टुचि।
Chwazi Kounye ya:
सॆःक्ढुङ्पा 2: LBR
Pati Souliye
Pataje
Konpare
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023, Wycliffe Bible Translators, Inc. and Nepal Bible Society