MATTHAI 24
24
Jesuh Nih Biakinn Rawhnak Kong A Chim
(Mar 13.1-2; Luk 21.5-6)
1Jesuh cu Biakinn khan a chuak i a kalpah ah khan a zultu hna cu a sinah khan an ra i Biakinn le Biakinn he aa pehtlaimi inn hna kha an hmuhsak. 2Aa thawh i, “Hihi nan hmuh cio ko hna a si lo mei? Sihmanhsehlaw hihi kan chimh hna: lung pakhat hmanh hi a umnak kel ah a ummi an um te lai lo, an dihlak tein chimh an si dih lai,” tiah a ti.
3Cun Jesuh cu Oliv Tlang i a ṭhut lioah khan a zultu hna kha anmah lawngte in an ra i, “Hihi zeitik ah dah a si lai? Cun na ratnak ding hmelchunhnak le atu chan donghnak ding hmelchunhnak ah zei thil dah a um hna lai?” tiah an hal.
4Jesuh nih cun, “I ralring u law ahohmanh i hlenter hna hlah u. 5Zeicahtiah ka min in mi tampi an ra lai i, ‘Keimah hi Messiah cu ka si,’ tiah an ti lai i mi tampi kha an hlen hna lai. 6Lam nai i an i tuknak thawng le lam hla i an i tuknak thawngpang kha nan theih hna lai; sihmanhsehlaw nan awlokchong hlah u. Cu bantuk thil cu an um hrimhrim awk a si ko, asinain a donghnak a phan cang tinak a si lo. 7Ram khat le ram khat an i do lai, peng khat le peng khat an i tu lai. A kenkip ah mangṭam le lihnin a tlung lai. 8Hi thil vialte hi nau chuah lai nganfah a hmasa bik bantuk an si.
9“Cun mi nih an in tlaih hna lai i dantat awkah an in chanh hna lai i an in thah hna lai. Keimah ruangah mi vialte nih an in huat hna lai. #Mat 10.22 10Cu caan ah cun mi tampi nih an zumhnak kha an hlawt lai i pakhat le pakhat an i rawi lai i pakhat le pakhat an i hua lai. 11Cun nal profet tampi an chuak lai i mi tampi an hlen hna lai. 12Ṭhat lonak kha a karh tuk lai caah mi tampi cu an dawtnak kha a dai lai. 13Sihmanhsehlaw a dongh tiangin a fekmi cu khamh an si lai. #Mat 10.22 14Cun miphun vialte hna ca i tehte si awkah Vancung Pennak kong Thawng Ṭha hi khuazakip ah chim a si lai — cun cu hnu lawngah cun donghnak cu a si lai!
Ṭhiotu Fihnung
(Mar 13.14-23; Luk 21.20-24)
15“Cun profet Daniel nih, ‘Ṭhiotu Fihnung,’ a timi kha hmunthiang i a dir cu nan hmuh lai. (A reltu hna, hi a sullam hi i hngalh u). #Dan 9.27; 11.31; 12.11 16Cun Judea ram i a ummi kha tlang ah zam hna seh. 17A inncung i a ummi cu a innchung i a ummi thilri lak awkah ṭum hlah seh. #Luk 17.31 18Lo i a ummi cu a puan lak awkah tlung hlah seh. 19Cu caan ah cun fapawi nu hna le nau no ngeimi nu hna caah a har hringhran lai. 20Nan zam caan hi khuasik caan le Sabbath ni ah a si sual nakhnga lo, Pathian sinah thlacam u. 21Zeicahtiah khi caan ah cun vawlei hramthawk in nihin ni tiangah a ummi harnak a zeihmanh nakin a let tampi in a fak deuhmi harnak kha a um lai. Cu bantuk harnak cu a um zong a um ti lai lo. #Dan 12.1; Biat 7.14 22Cu caan cu Pathian nih rak tawiter hlah seh law ahohmanh a nungmi an um hnga lo. Asinain Pathian nih a mithim mi hna caah, cu caan cu a tawiter lai.
23“Cun ahohmanh nih, ‘Messiah cu hika ah a um, khika ah a um,’ in ti ai kun hna, va zum hna hlah u. 24Zeicahtiah nal messiah le nal profet kha an chuak lai i Pathian mithim hna hmanh kha a si khawh ahcun hlen khawhnak ding caah hmelchunhnak le khuaruahhar nganngan an ser hna lai. 25Ngai hmanh u. A hlankan in hihi kan chimchung hna hih.
26“Cun mi nih, ‘Ramlak ah a um,’ an in ti hna ahcun va kal hlah u; ‘Hika ah aa thup ko,’ an in ti hna zongah vaa lun hlah u. #Luk 17.23-24 27Zeicahtiah Mi Fapa cu van ah nichuahlei in nitlaklei tiang aa lekmi nimtlau bantukin pei a rat lai cu.
28“Saruak umnak hmun ah langta an i pum tawn.” #Luk 17.37
Mi Fapa Ratnak
(Mar 13.24-27; Luk 21.25-28)
29“Cu caan harnak cu a dongh cangka in ni cu a mui lai i thlapa cu a ceu ti lai lo, arfi cu van in an tla lai i vancung ṭhawnnak cu an i hnin lai. #Isa 13.10; 34.4; Eze 32.7; Joe 2.10,31; 3.15; Biat 6.12-13 30Cun Mi Fapa hmelchunhnak kha van ah a lang lai; khi tikah vawlei cung miphun vialte kha an ṭap lai i Mi Fapa cu lianhngannak le sunparnak he vancung in a rat kha an hmuh lai. #Dan 7.13; Zek 12.10-14; Biat 1.7 31Muko nganpi cu an tum lai i a vancungmi kha vawlei kil li ah a thlah hna lai i vanrang toi khuazakip in a mithim hna kha a pumh hna lai.
Theipi Kung Hmelchunhnak
(Mar 13.28-31; Luk 21.29-33)
32“Theipi kung nih hin thil pakhat in cawnpiak hna seh: A nge cu an hung hrin i an hung no i a hnah an hung corh tikah ṭhal caan cu a nai cang, ti kha nan hngalh. 33Cu bantukin hi thil vialte hi nan hmuh hna tikah, caan cu a nai cang, aa thawk dengmang cang, ti kha nan hngalh lai. 34Mah hihi philh hlah u: Hi thil vialte hi atu i a nung lio mi an thih dih hlanah hin a tlung ko lai. 35Van le vawlei cu an rawk lai; sihmanhsehlaw ka bia cu zeitikhmanh ah a rawk lai lo.
Ahohmanh Nih A Ni le A Caan An Hngal Lo
(Mar 13.32-37; Luk 17.26-30,34-36)
36“Asinain, cu ni le cu caan cu zeitik ah dah a si lai, ti kha ahohmanh nih an hngal lo; vancung mi zong nih an hngal lo, Fapa zong nih a hngal hlei lo, Pa lawnglawng nih a hngalh. 37Mi Fapa a rat cu Noah chan i thil umtuning bantuk kha a si lai. #Gen 6.5-8 38Tilian a tlun hlan, Noah lawng chung i a luh ni tiang kha, an ei an ding an i ṭhi an i um i 39tilian a hung tlun taktak i a fenh dih hna hlantiang kha cu, zeihmanh an hngal lo. Mi fapa a rat tikah cun cu bantuk cun a si lai. #Gen 7.6-24 40Cu caan ah cun mi pahnih lo ah rian a ṭuanmi hna lakah pakhat cu kalpi a si lai i pakhat cu nganhta a si lai. 41Nu pahnih sum a sumi hna lakah pakhat cu kalpi a si lai i pakhat cu nganhta a si lai. 42Cucaah nan Bawipa a rat lai ni nan hngalh lo caah ralring tein um ko u. 43Hihi philh hlah u: Inn ngeitu nih mifir a rat lai caan kha hngal seh law, hngilh lo tein a rak um hnga i mifir kha a inn chungah a luhter hnga lo. #Luk 12.39-40 44Cu ruangah cun nannih zong timh cia tein nan um zungzal awk a si, zeicahtiah Mi Fapa cu nan i rin lo caan ah khin a ra ko lai.
Zumhtlak le Zumhtlaklo Sal
(Luk 12.41-48)
45“Cu a si caah aho cu dah zumh awk a tlakmi le a fimmi sal cu a si? Cu bantukin zumh awk a tlak i a fimmi sal cu, a Bawipa nih a sal hawi zohkhenhtu dingah, a caan hmaan tein an rawl a petu dingah, a chiahmi kha a si. 46A bawipa nih a tlun tikah, a rian a rak ṭuan liote ah a run tanhmi sal caah cun lunglawmh awk a va si dah! 47Cu sal cu a bawipa nih a ngeihmi thil vialte zohkhenhtu ah a chiah hrimhrim lai, tiah kan chimh hna. 48Sihmanhsehlaw cu pa cu miṭhalo a si ahcun, ‘Ka bawipa cu a ra chom rih lai lo,’ tiah a lung chungin a ti lai i 49a sal hawi kha a ṭhuat a den hna lai i zuri pawl hna he khan an ei an ding ṭi lai. 50Cun a bawipa cu ni khatkhat cu aa rin lo caan le a hngalh lo caan ah a ra tlung lai i 51a bawipa nih cun a sam cikcek lai i midepde pawl umnak hmun ah khan a umter ve lai. Cuka ah cun a ṭap lai i a hacang a rial lai.
Chwazi Kounye ya:
MATTHAI 24: HCL06
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Lai (Hakha) Common Language Bible © Bible Society of Myanmar 2006