Salsila siga Rasul 16
16
Si Timuti mmeꞌ ni ga si Pol ka si Saylas
1Pag-anu, lay na baw pawus ga si Pol ka si Saylas pa Delbe ka Listra. Ndooy siꞌ ni Listra, luu disu lalla inawnan si Timuti ma ndang pitsayaꞌ na du ni si Isa. Nneꞌ na ilay bangsa Yahudi, boꞌ ndang pitsayaꞌ na du ya. Sugaꞌ mmaꞌ si Timuti bangsa Greek. 2Si Timuti ilay ndang binitsala pa kaayaran meꞌ mimon sukuꞌ si Isa ni Listra sampay ni Ikoniyum. 3Dari karomanan si Pol mmeꞌ na si Timuti ni palanan da masaplag umanat mahap. Sugaꞌ pagka katoonan jama mimon mmaꞌ si Timuti bangsa Greek, lay doꞌ si Timuti inislam meꞌ si Pol. Maksud na bay ngislam mari yaꞌ luu sangdanan man si Timuti yaꞌ hinasi meꞌ siga Yahudi ni siga lahat ma tiluꞌ da.
4Na pag lakka da, lay sila maghāsan padisu-padisu daira. Maka lay gi sila masampayan ga sukuꞌ si Isa ndooy bay tugun siga rasul ka ga pagkahi da pa-mmean ndooy ni Jerusalem. Pag-anu, lay gi sila inamay-amayan nohoꞌ mean ilooy ma bay tinugun ninsila. 5Dari sabapan hulas-sangsāꞌ ga si Pol, patakkoꞌ na pin pangando ga baanan sukuꞌ si Isa sampay pasampun na pin eka jama pitsayaꞌ ni si Isa llaw pa dangallaw.
6Pag-anu, lay na baw pilay ga si Pol pa Pirigiya ka Galatiya. Sibuwa adak sila pilay masaplag pa Asiya, sugaꞌ yaꞌ sila bay tinugutan meꞌ Rū Sutsiꞌ. 7Song hallom, lay na sila nakka tapit pa Misiya. Ndooy siꞌ, adak sila bay pilay pa Bitiniya, sugaꞌ yaꞌ sila bay tinugutan meꞌ Rū si Isa.#(16.7) Tamūd Rū Sutsiꞌ inawnan du Rū si Isa atawa Rū Almasi atawa Rū Tuhan. 8Dari lay na sila pingkaꞌ man jawom Misiya sampay lay na ga sila nakka Troas, disu daira ni bihing dilawut.
Njawom pandapat si Pol ngita ya jama Masidunya
9Na pag sangom, lay na baw si Pol pinakitahan pandapat meꞌ Tuhan. Njawom pandapat na siꞌ, ngita ya disu lalla Masidunya ngalinganan iya, yuk na, “Junjung ku na ningkau, palintas doꞌ ko pitu pa lahat kami ntuu ni Masidunya. Tulungun doꞌ kami.”
10Pag sayu, magti du kami#(16.10) Tamūd si Lukas ma bay nuwat kitab tuu mmeꞌ du ni siga rasul si Isa. Iya siꞌ bay halling “kami” ni ayat tuu batan luu du ya bay pahaboy ni ga si Pol ni palanan looy siꞌ. miha adjung man kami mmeꞌ pa Masidunya. Tabista kami na man sabapan pandapat si Pol, lay kami sohoꞌ Tuhan masaplag umanat mahap ni ga jama ndooy.
11Dari lay na kami mmeꞌ taꞌ adjung lakka man Troas, sampay lay na kami nakka nusa Samotres. Pag meꞌ sumawung, lay na baw kami patuwak pa daira Niyapoles. 12Pag parungguꞌ kami ndooy ni Niyapoles, lay na baw kami lumān pa Pilipi, disu daira mehe njawom ntanan bangsa Rom ndooy ni Masidunya. Pag-anu, lay na doꞌ kami pahantiꞌ ndooy daka dangoy ngallaw.
Si Lidiya, danda ni Pilipi, pitsayaꞌ na ni si Isa
13Na taabut Llaw Pahali, lay taaka kami luu disu lugar ni bihing sōng man jama kumpo maku duwaa. Dari lay kami pōꞌ man jawom daira luꞌ pilay. Takka ndooy, pag ndaꞌ kami, luu ndooy baanan karandahan. Dari lay du kami ningkōꞌ ndooy moo sila magbitsala. 14Yaꞌ gi siꞌ hallom, lay na si Pol masampayan sila umanat mahap pasal si Isa. Kuwan ilooy siꞌ disu ma pakale niiya, yana si Lidiya, danda man daira Tatira. Iya ilay tukang dagang kakanaꞌ tawuk ma hagaan. Ndang lay na silay ya mmeꞌ ni agama Yahudi sampay ngisbat Tuhan. Pag-anu, sasang na pakale ni si Pol, lay na bukaꞌ Tuhan puad na sampay lay na ya pitsayaꞌ ni si Isa. 15Dari lay na ya pinandi sampay na siga jama lumaꞌ da. Pag lupus, lay gi kami pogos na binoo pa lumaꞌ da, yuk na, “Bong gantaꞌ ni bandingan bi tud hilas du meꞌ ku pitsayaꞌ ni Papuꞌ Isa, mmeꞌ doꞌ kam pa lumaꞌ kami. Ndooy na doꞌ kam pahantiꞌ.” Dari sabap sigi-sigi ya mogos, lay du kami mmeꞌ.
Si Pol malakka seytan man baran disu ata danda
16Na luu disu llaw, lān kami pilay pabalik pa lugar looy siꞌ man jama kumpo maku duwaa, lay kami sitammu ka disu ata danda sineytan. Iya ilay pandoy ngandaꞌ sukud jama man kawasa seytan na. Dari sabapan kapandoyan na, ilooy na poonan siga papuꞌ na koleꞌ pilak mehe. 17Na ni llaw looy du siꞌ, lay patuhut danda looy ningkami. Bbuwatan na ngahowap, yuk na, “Ga lalla naa ina yana ata Tuhan Mahatinggi! Buwatan da ina masaplag jalan man bi salamat.”
18Na hangat pinagsibalik-balik meꞌ danda looy halling meꞌ looy llaw pa dangallaw, dugahan na si Pol. Dari lay ya pateleꞌ sambayan na halling ni seytan njawom baran danda looy, yuk na, “Ni kawasa awon si Isa Almasi, sohoꞌ ta na ko palakka man jawom baran danda naa.” Dari siꞌ, sarunduun du lay lakka seytan na.
Si Pol ka si Saylas tajīl ni Pilipi
19Na pag tabista meꞌ siga papuꞌ danda looy lay na lungay usaha da njataꞌ danda looy, lay na sungkuban da ga si Pol ka si Saylas, boꞌ ginuyud-guyud pa mman siga saraꞌ ndooy ni bihing tabuꞌ. 20Luu jaꞌ siꞌ sila ni awpan siga huwis langkaw, yuk siga papuꞌ danda looy, “Ga lalla tuu itu bangsa Yahudi. Makalingog sila ni daira tabi. 21Bbuwatan da noan jama ngikut arat agama da, boꞌ yaꞌ san sikatuwaꞌ ka arat tabi. Meꞌ kitabi itu bangsa Rom, njawom saraꞌ tabi tud yaꞌ tahasi tōꞌ da.”
22Pag-anu siꞌ, sampay baanan jama ndooy ma bay kale, lay na du bay mmeꞌ-mmeꞌ malaat ga si Pol ka si Saylas. Dari lai na ga si Pol sohoꞌ siga huwis ndooy hinagtuꞌ inurusan pamakoy da, boꞌ da lay nohoꞌ llagpiꞌ. 23Min meka jaꞌ siꞌ sila bay llagpiꞌ, lay na baw sila nohoꞌ njīl. Boꞌ lay gi nohoꞌ njagahan banahan ni tukang jaga jīl looy. 24Dari lay na sila inannaꞌ meꞌ tukang jaga looy njawom bilik takkoꞌ banahan, boꞌ lay gi kinarinahan battis-tangan da ni tehang mehe.
25Na pag taabut ga tangngaꞌ bahangi, bbuwatan ga si Pol ka si Saylas maku duwaa sampay ngalang kalangan pudji pa Tuhan. Kuwan ga pagkahi da pilisu, pakale jaꞌ ninsila. 26Mindangoy ko, sarunduun du takka linug mehe sampay jogjog na ga banahan pananggehan jīl looy. Kuwan ga lawang sikamimon, lay magti pabukaꞌ sampay makkas na ga karina ga pilisu labbasakayi. 27Pag-anu siꞌ, magti du kabatiꞌ tukang jaga looy siꞌ. Pag takita na bukaꞌ na mimon lawang jīl looy, kanna na lay na patangkaw ga pilisu ndooy sikamimon. Dari lay urusan na kataliꞌ na man na mapatoy dī na. 28Kahapan lay ya hinowapan meꞌ si Pol, yuk na, “Daa ko ba mapatoy dī nu. Itu gi du kami ntuu sikamimon.”
29Dari tukang jaga looy siꞌ magti bay nohoꞌ binoonan siga sūꞌ, boꞌ na deꞌ-dēꞌ paasok ni bilik man ga si Pol ka si Saylas. Mipig na ga baran na sambayan na nangge ka tuut na ni awpan da. 30Pag-anu siꞌ, lay na boo na ga si Pol ka si Saylas pa poan, boꞌ da tilaw na, yuk na, “Siga Tuwan, oy tu la subay pabuwat ku supaya ku salamat?”
31Pag tampung ga si Pol, “Pitsayaꞌ na ko ni Papuꞌ Isa boꞌ nu salamat sampay na siga jama lumaꞌ nu.”
32-34Pag-anu siꞌ, lay na binoo meꞌ tukang jaga looy ga si Pol ka si Saylas dutai pa taꞌ lumaꞌ na. Ndooy siꞌ, lay gi kosoan na bakat da maka lay na sila pinakan. Pus meꞌ looy, lay na ga si Pol masaplag umanat mahap pasal Papuꞌ Isa ni tukang jaga looy sampay na ni mimon jama lumaꞌ da. Boꞌ lay na du sila pitsayaꞌ sikamimon. Dari siꞌ, magti du sila pinandi. Boꞌ pannoꞌ na atay da sikamimon leꞌ kagakan sabap meꞌ da pitsayaꞌ na du pa Tuhan.
35Na pag sayu, kuwan siga huwis langkaw baw siꞌ tu, lay na nohoꞌ siga pulis pilay pa jīl nohoꞌ masampay tugun da ni tukang jaga looy. Tugun da siꞌ, nohoꞌ na ga si Pol pinōꞌ man jawom jīl.
36Dari yuk tukang jaga looy ni ga si Pol, “Tugun siga huwis nohoꞌ na kam pinōꞌ man jawom jīl. Sangkon, pasannangun bi na njawom atay bi. Batnaa sumunsayaꞌ na kam pōꞌ.”
37Sugaꞌ yuk si Pol, “Uy, yaꞌ bilay sikatuwaꞌ! Pus kami bay llagpiꞌ ni mayran sampay njīl yaꞌ san bay luu pagsiyasat, pag batnaa, pinōꞌ na baw kami sipuk-sipuk! Boꞌ kami itu, siga raayat parinta Rom du kami. Yaꞌ kami la kuhi pōꞌ bong saꞌ du siga huwis looy mismu bay luꞌ pitu maddusan kami man jawom jīl tuu.”
38Dari lay na pabeleng ga pulis looy pa mman ga siga huwis masampay bay tugun si Pol. Dari siꞌ, pag bay tasayu leꞌ siga huwis looy ga si Pol pun ka si Saylas raayat parinta Rom du, tud bay tawu sila. 39Dari lay du sila pilay pa mman ga si Pol boꞌ da nganjunjung sila maku kaampunan. Pag-lupus, lay na ga si Pol hinongan meꞌ da pōꞌ man jawom jīl sambayan da nganjunjung sila nohoꞌ palakka man daira da.
40Pag lakka ga si Pol man jawom jīl, lay sila pahās ni lumaꞌ si Lidiya. Ndooy siꞌ, lay sila sitammu ka baanan danganakan da sukuꞌ si Isa. Maka lay gi sila muwansangan sila mari pahallot na pin pangando da ni si Isa. Pag lupus, lay na sila palakka.
Chwazi Kounye ya:
Salsila siga Rasul 16: sjm
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 2021, Wycliffe Bible Translators, Inc. All rights reserved.