Joira ja Anamarumiwa 9
9
Twarutchiwa wa mulombwana Sawulo
1Malambo anne mulombwana Sawulo okalelave ntindi aatutchaga anamamuhara a Nabwiya ira adowe amale apamo. Siku nimohi, ohovenyaga dowa wa mundimuwa wa anamakuta, 2liye nvepa ira amulrembele madugumento ira adowena Damaxiku, avolowe nyumba dofundjamo Mazu dafwanyeya wewo ira mutu watene ohara Ndila ya Yesu afuna liye nfwanya nyumba yofundjamo Mazu, amuhinde, ammange, amudowegena Jeruzalemu.
3Agavahiwe madugumentwaye, Sawulo ohovenyihana, adowaga Damaxiku. Afunaga fiya, morurumutcha wohoza moneya wokumela zulu, ujerimelaga. 4Evale Sawulo ohogwaga vati eto ohovwaga mazu kamuwongagana keraga: <<Sawulo, Sawulo, kodi unadiharaharela nni?>> 5Evale mulombwana Sawulo ohoira: <<Nabwiya, nyo munawonga eno, muli ani?>> Evale vohokumaga mazu owakula oira: <<Miyo dili Yesu, wenno unamuharahara we. 6Inafwanela weyo uvenye, uvolowe sidadi. Wadowa, unowandeliwa inafuna we ira.>> 7Kohokalavo eto alombwana angasi angasi kali muulrendoni vamohi na Sawulo. Aliwa kohoimela kahanna yowonga mwasiwa kohovwa nizu nne mbwenye tchamuonne mutu awongaga. 8Sawulo ohovenya vati vagwile liye. Mwa enne liye agalive ogudubulrene meso, kaona yengo. Vevale afwaye kohommeza na manda kamudowagana Damaxiku. 9Ohokala wewule malambo mararu ahaonaga. Eto kadja, nne kang'wa.
10Sidadi ya Damaxiku ule, ohokalawo mulombwana mmohi nzina naye ali Ananiya eto ali namamuhara Yesu. Nabwiya ohomuoniha jengo mmuruni mwaye awongaga eraga: <<Ananiya.>> Liye wakula ira: <<Gu miyo vano Nabwiya.>> 11Nabwiya ohomuruma eraga: <<Uvenye, udowe vande va Judasi. Liye uli wandamelana rampa nneriwa Rampa Nolinyareya. Wanfukede mulombwana mmohi uneriwa Sawulo wa Tarisu. Tchoira eni liye unafwanyeya alobelaga. 12Dihimuoniha jengo mmuruni mwaye. Dimuonihile liye amuonaga mutu eriwa Ananiya, azaga, amuhindaga na manda ira awande ona akoka, mwasiwa liye kanaona.>> 13Ananiya ohowakula ira: <<Nabwiya zela mulombwana munamuwonga nyo uyo, atu adjindji kohodiwandela zela jabure jaairele liye atwinyu otchenihiwa anafwanyeya sidadi ya Jeruzalemu. 14Dihiiziwa ira liye ohovahiwa madugumento na andimuwa a anamakuta ira aze uno, ammangege mutu watene unaromola nzina nenyu.>> 15Nabwiya ohomuwandela eraga: <<Nari, weyo uvenye, udowe, mwasiwa Sawulo gwaga. Dihimusakulra ira avweyihege nzina naga vamentoni va atu ohokala aJudewu masiki vamentoni va amwene masiki vamentoni va Ana Izarayeli. 16Miyo eto nnomuwandela goyi nnafuna liye onihiwa na mwasa wa nzina naga.>>
Ananiya ohodowa nvulumutcha Sawulo no mbatiza
17Agairile eno, Ananiya ohovenya, dowa wamutonyihedile Nabwiya, liye fiya vande vale, volowa mmba mwali mulombwana Sawulo, liye muhinda Sawulo na manda, liye ira: <<Mbalaga Sawulo, Nabwiya Yesu wenno autwanyuwenle mundila muzaga uno, gudirumile ira uwande ona akoka no zaleliwa Munemba Otchena.>> 18Mwa sanga sanga, mmentoni mwaye mohokumaga jengo kalaga nnga ha magoru. Noira eno, Sawulo ohoroma ona akoka. Nomala enne, Sawulo ohovenya, liye batiziwa. 19Noira eno, ohoromaga dja, liye kala pama akoka.
Sawulo ohoroma laleya zela Yesu sidadi ya Damaxiku
Vevale Sawulo ohomala malambo mangasi mangasi awendaga na anamamuhara Yesu kafwanyeya Damaxiku. 20Vohodibeliwa Sawulo ohoroma wendawenda nyumba dofundjamo Mazu, alaleyaga zela Yesu eraga: <<Yesu mwa ibaribari gu Mwana Mulugu.>> 21Atu atene kanvwile, kohotikiniheya ira: <<Uluwole kahi mulombwana wenno awana na makalelo abure na atu anno karomola nzina neno Jeruzalemu? Eto ira akume waniwa aze uno, azele ahinda atu oromola nzina neno, aadowena wa andimuwa a anamakuta Jeruzalemu.>> 22Eto laleya wa Sawulo ule wodowave sogolro, aaonihedagamo atu ira Yesu mwa ibaribari gu Namatikeliwa. Muwari mwa aJudewu ohonfuna Yesu kafwanyeya Damaxiku, kavafwanyeya mutu nne mmohi owanda runiha jalaleya Sawulo.
AJudewu kohofuna kampe Sawulo mbwenye afwaye kohomutawiha
23Vagavirile malambo madjindjene, aJudewu ohofuna ja Yesu kogaratela makalelo ompa Sawulo. 24Kohodowa muvitalela mmamilangoni mwatene movolowela no kuma sidadi yatene ya Damaxiku#9:24 mmamilangoni mwatene movolowela no kuma sidadi yatene ya Damaxiku: Sidadi ya Damaxiku kaiwerewerihile muru mulukulu olapa. Ule avolowa, ule akuma, avira mmamilangoni. ira kampe. Mbwenye jejo jahanaireye, Sawulo ohovwa yafuna atu muirela. 25Evale afwaye kamuhara, kohomudowana vamuruni wa sidadile na mahiyu, aliwa muhela mungogodani, muviriha vapelrengosoni, aliwa mutitiheda vati. Evale Sawulo ofiyeda mwezo otawa.
Atu omuroromela Yesu a Jeruzalemu kohomutawatawa Sawulo
26Sawulo agatawile Damaxiku, ohodowa Jeruzalemu. Agafiyile wewule, ohofuna ira adowe agumane na anamamuhara Yesu kafwanyeya wewule mbwenye aliwa komuova mwasiwa tcharumela ira Sawulo na ibaribari gu mutu omuhara Yesu. 27Evale Barnabe ohonvelela wa anamarumiwa, liye roma awandelamo makalelo Sawulo amuonne liye Nabwiya mundila adowaga Damaxiku na makalelo alaleya liye nzina na Yesu mohoova Damaxiku ule. 28Vevale Sawulo ohoroma wenda na atu omuroromela Yesu a Jeruzalemu, liye laleyaga nzina na Nabwiya Yesu mohoova. 29Sawulo eto okanetcha wonga no runihana na aJudewu owonga iGerego zela Yesu. Vevale kohoroma vendavenda makalelo ompa. 30Mbwenye abalaye omuroromela Yesu kagavwile jejile, kohomudowana Sezariya, aliwa muruma ira adowe Tarisu.
31Sawulo agadowile, nikuru na atu omuroromela Yesu vahanle atu maporovinsiya a Judeya, Galileya na Samariya joharahariwa jile, johomiyala noo. Kohogarati na murendele eto kolimbihave kopolo dewa. Kowenda momuova Nabwiya Yesu eto muwari mwa Munemba Otchena, kopwaseya pama eto koindjivihanave.
Peduru ohonvulumutcha murenda mmohi eriwa Eneya
32Mulombwana Peduru owendawenda mwatene mwene, aapandaga atu otchenihiwa. Ofiyeda tatamo ya Lida aapandaga atu otchenihiwa kali wewule. 33Tatamo yenne wohokala mulombwana mmohi eriwa Eneya amanle yaka tanu na taru ahawandaga wenda, agali ogonatene vakamani. 34Evale Peduru aganfwannye mulombwanole, ohoiraga: <<Eneya, Yesu Kiristu unouvulumutcha. Kavenya, uvinde nipawu nawo.>> Mobaranya, Eneya ohovenyaga. 35Evale anamurala a Lida na ilambo ya Sarona kagamuonne Eneya awendaga, na aliwene kohoroma muroromelaga Nabwiya.
Peduru ohonvenyiha mokwani mwana muhiyana Tabita
36Ilambo ya Jope wohokala mwana muhiyana mmohi eni, eriwa Tabita. Tabita ku wonga Dorika.#9:36 Dorika na iGerego ku wonga nase. Liye ali namamuhara wa Yesu eto ali mutu airetcha japama, aakamihedetcha atu osimela. 37Liye ohofiyeda mwezo obulela, liye kwa. Agakwile, kohomuhambiha, aliwa dowa muhiya kwartu ya nyumba ya muzulu. 38Voira Lida wali Peduru na ilambo ya Jope wakwile mwana muhiyanole kwalapenle, anamamuhara Yesu kagavwile ira: <<Peduru uli Lida>>, koharuma alombwana ambinli ira kadowe kanvepe Peduru aze wewule. Aliwa kaganfwanyile, kohonvepaga momuguzela mendo, keraga: <<Nnouvepani ira nidowegeni vamohi mohodibeliwa.>> 39Evale mulombwana Peduru ohomaruwa, liye aharaga alombwanale. Kagafiyile Jope ule, kohomudowana nyumba ya muzulu yali mwanokwa ule. Evale amakwele a ahiyana atene komukwivelaga Peduru kanlaga kamutonyihedaga makamiza na jowara jimohi jiwa jasonne Dorika tempu yawenda liye na aliwa. 40Vevale Peduru ohakumihagamo atwale. Kagakumile, Peduru ohokokoraga, liye lobela anvepaga Nabwiya. Agalobenle, ohorungunutcha kovaye, liye ing'ana mutembole, kwi: <<Tabita, kavenya.>> Evale muhiyanole ohogudubulra meso. Agamuonne Peduru, ohovenya, liye garati. 41Evale Peduru ohotapulaga ndanda naye, liye muhideda, muimeliha. Agamuimelihile, ohaitanaga atu otchenihiwa na amakwele, liye avaheda agali ngumi. 42Evale anamurala atene a Jope kagavwile matikiniho anne, adjindji kohoroma muroromela Nabwiya Yesu. 43Peduru ohokalaga malambo oindjiva sidadi ya Jope ule, akalaga vande va mulombwana mmohi eriwa Simawu wenno ali maliba uzula matembe a anavinyama.#9:43 maliba uzula matembe a anavinyama. Tempu yenno kohokalawo atu kalaba mabasa ouzula matembe a ng'ombe nari mbuzi nari nibila, aliwa sakanyedaga matembe na makalelo kaiziwile atu ira kasakanyegena masintu nari misasa nari mapasta.
Chwazi Kounye ya:
Joira ja Anamarumiwa 9: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral